হৌজিক অতোপ্পা ৱাফম তাগদৌদবা ৱাৎলিবরো?

অদোম পুম্নমকপু কমদৌরিবগে?

ভাইব খরা চেক তৌসিরো?

থৌরমসিদা শরুক য়ারিবা মন্ত্রী পরিশদকী ঐহাক্কী মরুপ, শ্রী অশ্বিনি বৈশ্নবজী, জ্যুরী মেম্বর, ইনাও প্রশুন জোশীজী, রুপালী গঙ্গুলীজী, লৈবাক্কী মফম খুদিংদগী লাক্তুনা মফমসিদা লৈরিবা কন্তেন্ত শেনবা মীওই পুম্নমক, থৌরম অসিবু মিৎয়েং তাবা লাকপীরিবা লৈবাক মীয়াম অমসুং ঐহাক্কী নহা ওইরিবা মরুপ খুদিংমক অসুং অতোপ্পা মীথুংলেনশিংবু ঐহাক্না তরাম্না ওকচরি, লোয়ননা ইকায়খুম্নবসু উৎচরি। অদোমদি ইশাগী খুভম অমা শেম্লবা মীওইশিংনি, অদুনা ঙসি অদোম মফম, ভারত মান্দপম, অদুদা লৈরিবনি। মপান্দা থম্লিবা সীম্বোল অসিশু ক্রিএতিবিতীগা মরী লৈনবনি, অদুগা মফম অসিদি জি-20গী মকোকশিংনা অমত্তা ওইনা পুনখিবা মফম অউশু ওইরিবনি। তুংগী মালেম করম্না শেমশিগে হায়না খন্নরিবা মফম্নি। অদুগা ঙসি অদোম পুম্নমকশু ভারতকী তুংগী মতম করম্না শেমসিগে হায়বগী মতাংদা খন্ননবা লাক্লিবনি।

মরুপশিং,

মতমগী অহোংবা লাকপা মতমদা, অনৌবা য়ুগনা হৌরকপা মতমদা, অদুগা খোঙথাং মান্ননা চৎপা হায়বসি লৈবাক অমগী থৌদাংনি। ঙসিদি, লৈবাক অস্না ভারত মন্দপম অসিদা মশাগী থৌদাং পাংথোক্লি। অহানবা নেস্নেল ক্রিএতর্স এৱার্দ অসিদি অনৌবা চৎনবী কয়াবু মতমগী মমাংদা মশক খঙদোক্নবা থৌরম অমনি। ঐহাক্কী মায় পাকপা অসিগী অরোনবা মরম করিনো হায়না মীয়াম্না ঐঙোন্দা হংই। পুম্নমক্কী পাউখুম পীবদি ঙম্বা নত্তে। রেস্তোরেন্ত ফম্বা মীওইনবু মহাক্কী চাকখুম মীঙোন্দা উৎথোকপা নত্তে। অদুবু, ঐহাক্তি হায়গে। ঈশ্বরগী থৌজালনি,ঐহাক্তি মতমগী মমাংদা খঙবা ঙম্মি। অদুনা, মসিগী এৱার্দ অসিদি লাক্কদৌরিবা মতমশিংদা য়াম্না মরু ওইবা ফম অমা কনগদৌরিবনি। অনৌবা য়ুগ অসিবু ইনোৎ হাপ্লিবা অদোম নহাশিংবু ইকায় খুম্নবা, ক্রিএতিবিতীবু ইকায় খুম্নবা, খুন্নাইগী নোংমগী পুন্সিগী পুন্সিগী মতাংদা খঙবা, পুম্নমক অসিবু ইকায়খুম্নবগী তাঞ্জা অমনি। অদোমগী থবকশিং অসি য়াম্না চাউবা শক খঙনরগনি। ঙসি নেস্নেল ক্রিএতর্স এৱার্দ ফংলিবা মীওইশিংবু ঐহাক্না থাগৎলি। থৌরম অসি শিনবদা মতম য়াম্না ফংখিদে, অদুনা মীয়াম পাক শন্না খঙহনবা ঙমখিদ্রে। অদুগা মতম য়াম্না চঙহনবসু পামখিদে। অদুবু, তেনখ্রবা মতমসিদা ক্রিএতিব মাইন্দ লাক্ষ অমগা লিশিং কুন মঙাগা পুনবা ঙমখিবা অসিনা অনৌবা শক্তাক অমবুদি শেম্বা ঙমখি।

মরুপশিং,

ঙসি অসিদি য়াম্না শেংবা নুমিৎ অমগা তান য়াম্না চাননা তারে। নেস্নেল ক্রিএতর্স এৱার্দ অসি মহাশিবরাত্রীগী নুমিত্তা পাংথোক্লি। অদুগা ঐহাক্কী কাশীদদি শিবজী য়াওদনা করিমত্তা তৌনদে। মহাদেব, ভগ্বান শিববু লোল, কলা অমসুং ক্রিএতিবিতীগী মপানি খন্নরিবনি। ঐখোয়গী শিব অসি নাতরাজনি। শিবজীগী দমরুদগী মহেশ্বর সুতর থোকখিবনি। শিবজীগী তান্দব অমসুং তান্থা অমসুং ক্রিএসনগী ফম্বাক শেম্লিবনি। অদুনা, ক্রিএতরশিংনা মতাংসিদা অনৌবা হীরম অমসু ফংলগনি। ঙসিগী মহাশিবরাত্রীগী থৌরম অসিগীদমক্তা পুম্নমক্কী মফমদা য়াইফ পাউজেল পীজরি। 

মরুপশিং,

ঙসি অসিদি মালেমগী নুপীশিংগী নুমিৎসু তাই। অদুবু নুপাশিংনা খুবাক হান্না খুবগী মতৌ ঐনা উরি, নত্ত্রবদি, মখোয়গী নুমিৎ অমত্তা লৈতে হায়না খল্লমগদৌরিবনি। ঙসিগী এৱার্দ ফংবশিংগী মরক্তা নুপী কয়া অমসু য়াওবা ঐহাক্না উরি। নুপীশিংনা মশিং য়াম্না ঙসি শরুক য়ারিবা অসি উবদা ঐহাক্না নুংঙাইবা ফাওই অমসুং ঐহাক্না মখোয়বু থাগৎচরি। মালেমগী নুপীগী নুমিৎ অসিদা ঐহাক্না লৈবাক্কী নুপীশিংবু ইকায় খুম্নজরি। অদুগা ঙসিগী নুমিৎসিদা গ্যাস সিলিন্দরগী মমলশু লুপা 100 হন্থখ্রবনি।

মরুপশিং,

লৈবাক অমগী খোঙচৎ খুদিংদা, পোলিসীগী ৱারেপ কয়াদা, নত্ত্রগা খোঙথাং কয়াদা, মায়থোং য়াম্বগী থৌওং লৈ। মসি অদোম উবদা ময়েক শেংনা খঙবশু ঙম্লি। চহি 10 অসিদা লাকখিবা দেতাগী ইহৌদগী হৌরগা, অহোঙবা মোবাইল ফোন ফাওবদা, দিজিতেল ইন্দিয়া অভিয়ান্না কন্তেন্ত শেম্বশিংগী অনৌবা মালেম অমা শেম্লবগুম্বনি। সেক্তর অমগী নহাগী পাঙ্গলনা সরকারদা ইথিল পীবসি মসিনা অহানবা থৌওং ওইরমগনি খল্লি। ফমদুনা লৈরগনু, থবকশু খরা পাংথোক্লসি হায়না মখোয়না হায়রি, মসিগীদমক্তা মখোয়বু থাগৎফম থোক্লিবনি। অদুনা ঙসিগী মনা পীবগী থৌরম অসিগী ক্রেদিত্তি দিজিতেল কন্তেন্ত ক্রিএতর খুদিংদা চৎকনি।

মরুপশিং,

ভারতকী কন্তেন্ত শেম্বশিংনা অতোপ্পা হীরম অমগী মশকশু তাক্লি। ঐখোয়গী নহাশিংদা নীংথিনা লমজীংবিরবদি, মখোয়না তৌবা ঙমদবা লৈতে। অদোম্না কন্তেন্ত শেম্বগী কোর্স তৌবা নত্তে। মহৈ তম্লিঙৈদা ঐহাক কন্তেন্ত শেম্বা মীওই ওইগে হায়না খনখিবা লৈবশু নত্তে। অদুবু অদোম্না তুংগী মতম খঙদুনা নুংদা করিগুম্বা অমা লেপ্লগা কন্তেন্ত শেম্বগী থবক হৌখিবা ঙাক্তনি। অশুক য়াম্না ৱাখল চেৎপগী মতৌদা অমুক্তা য়েংসি। খুত্তা মোবাইল অমা পায়রগা কন্তেন্ত শেম্বা হেক্তা হৌবনি। রাইতরশু ইশানি, প্রদ্যুসরশু ইশানি, দাইরেক্তরশু ইশানি, হীরোশু ইশানি, ইশানা পুম্নমক পাংথোকপা ঙাক্তনি। শম্না হায়রবদা, তেলেন্ত ময়াম অমা মফম অমখক্তা তুংশিন্দুনা লৈবা মতমদা, মদুনা ওইরকপা মহৈদুনি ঐখোয়না উরিবসে। অদোম্না কন্তেন্তশিংনা ঙসিদি ভারত্তা অচৌবা ইথিল, শাফু পীরি। অদোমদি ইন্তর্নেতকী এম.ভি.পি. অমা ওইরবনি। এম.ভি.পি. হায়বদি করিনো খঙবীরবরা? মোস্ত ভেলুএবল পর্সন হায়বনি।

মরুপশিং,

কন্তেন্ত অমসুং ক্রিএতিবিতীনা পুন্না থবক তৌমিন্নবা মতমদা মসিদগী ইনগেজমেন্ত হেনগৎলি। দিজিতেল কন্তেন্তকা কোলাব তৌবা মতমদা ত্রান্সফোর্মেসন লাকই। কন্তেন্ত অদুনা পান্দম অমগা লোয়ননা কোলাব তৌবা মতমদা, মদুগী শাফু উবা ফংই। অদোম পুম্নমক ঙসি মফমসিদা লাক্লবনিনা, ঐহাকশু অদোমগা হীর কয়াদা কোলাব তৌগদবা লৈরবনি।

মরুপশিং,

ঐখোয়না মমাংগী মতমদা উবদা, দুকান অমগী মমাংদা মফমসিদা অহাওবা চিঞ্জাক ফংই হায়না থাদুনা থেৎনৈ। উরেকো? মফমদুদা করিগীদমক্তা চাগদৌরিবনো হায়না হংনবা মতমদা, অহাওবা চিঞ্জাক হায়না পাউখুম ফংগনি। অদুবু হৌজিক্কান্দি অহাওবা হায়বগী মহুত্তা হকশেল ফবা চিঞ্জাক ফংগনি হায়নরে। মসিগুম্বা মিৎয়েং অসি মহাওদগী হকশেলদা হোংলক্লে। অহোংবা অসি করীদগী লাকপনো? মসিনা খুন্নাইগী ৱাখল্লোন্দা অহোংবা লাকপগী মতৌ তাক্লি। মরম অদুনা, কন্তেন্ত খুদিংমক্না মীয়ামদা মসগাগী থৌদাং পাংথোক্নবা ইথিল পীগদবনি, লৈবাক্কীদমক্তা পাংথোকফম থোকপা মশাগী থৌদাং পাংথোকপগী ৱাখল চেলহনগদবনি। মসিনা অদোমগী কন্তেন্তকী হকথেংনবা পাউজেল ওইগদবনি হায়বা নত্তে, কন্তেন্ত শেম্বদা ৱাখল অসিদা য়ুম্ফম ওইহনগদবনি হায়বনি। ইচানুপীশিংদা ইকায় খুম্নবা ৱাৎপা ৱাহৈ ৱাতা শিজিন্নবগী মতাংদা ঐহাক্না লাল কিলাদগী থমখিবা ৱারোল নীংশিংবীয়ু। মচানুপীশিংনা থেংনা হল্লকপা মতমদা মখোয় কদাইদা চৎলুবগে হায়বদি হংই, অদুবু মচানুপাশিংদদি হংদে, মসি করিগীনো হায়না ঐহাক্না মমা মপা ওইবশিগদা হংখ্রবনি। হীরম অসিদা কন্তেন্ত শেম্বশিংনা মিৎয়েং চঙগদবনি, চপ মান্নবা থৌদাং পাংথোকহনগদবনি। ঐখোয়না খুন্নাইগা ৱারী শাগদবনি অমসুং মসিগুম্বা ৱাখল্লোনশিংবু য়ুম্থোং খুদিংদা পুরকপা ঙম্বগী পাম্বৈ অদোমগী নাক্তা লৈ। অদুগা, ঙসিগী নুপীশিংগী নুমিত অসিদা ঐখোয়না হীরম অসিদা খোঙফম চেৎলসি হায়না অমুক্কা হন্না লেপ্লসি।

লৈবাক্কী নুপীশিংগী মশক থোকপা মতিক মগুনশিং অসি অদোমগী কন্তেন্তকী শরুক ওইহনবা য়াই। ক্রিএতিব ওইবা ৱাখল্লোন চেনবা অদোম্না মমা অমনা নোংঙানবদগী নুমিৎ তাবা ফাওবা পাংথোক্লিবা থৌওংশিং খঙগনি হায়না ঐহাক্না থাজৈ। মসিগুম্বা থৌওং রেকোর্দ তৌরগা ইদিৎ তৌবীয়ু, অদু য়েংবদা অঙাংশিংনা মখোয়গী মমাগী তৌবা ঙম্বগী মতিক্তা অঙকপা ফাওগনি। মসিগুম্বা থৌওংশিং মীয়ামদা উৎপা ঙম্বগী পাম্বৈ অদোমগী নাক্তা লৈ। চপ মান্নবা মতৌ অমা ওইনা, নুপীশিংনা শেন্মিৎলোনগী থবকশিংদা মশক থোক্না শরুক য়াবা খুঙ্গংগী পুন্সি মহিংদা অদোম্না কন্তেন্ত শেম্বা য়াই। ভারত্তা থবক তৌবী নুপী লৈতে হায়বসিদি নোংচুপ লৈবাকশিংনা লান্না থাজবা ৱাফম্নি। মসিদি তসেংবা ফিভমগা তাইওন্নরে। ভারত্তা নুপী লৈবনা ইমুং অমসুং শেন্মিৎলোন্না নীংথিনা মথৌ তৌরিবনি। চিংগী মফমশিংদা চঙলুবা মতমদা, শেন্মিৎলোনগী অয়াম্বা থবক নুপীশিংনা পাংথোকপা অদোম্না শোইদনা উগনি। মরম অদুনা, ঐখোয়গী ক্রিএতিবিতীগী খুত্থাংদগী ঐখোয়না মসিগুম্বা অরানবা থাজনবা অসিবু মাঙহনবা ঙমগনি। অদোম্না থবক অসি শোইদনা পাংথোকফম থোকই হায়না ঐহাক্না য়াম্না কন্না হকচিন্না খল্লি। পুন্সিগী নুমিৎ অমা উৎপনা, নুপীশিংগী, শন শেনবা ওইরো, লৌ উবা ওইরো নত্ত্রগা শিন্মী ওইরো, হোৎনবা লেপ্তবগী মতৌ শোইদনা উৎপা ঙমগনি।

মরুপশিং,

স্বচ্ছ ভারতনা মায় পাকখিবগী মতাংদা অদোম্না খঙলে, মসিদা অদোমগী থৌদাংশু য়াওরি। অদুবু, মসিদি হৌজিক চত্থরিবা মীয়ামগী ইহৌনি। কৈ অমনা ঈশিং থক্কে তৌবদা, ঈশিগদা পাস্তিক বোত্তল অমা তারম্বদগী মচিন্না বোত্তল চিক্তুনা মফম চানা হুন্দোক্নবা হোৎনবগী হন্দক্তা থোকপা রীল অমা ঐহাক্না উখি। মোদীগী পাউজেলশিংবু মীয়ামদা য়ৌহনবগী পাম্বৈ অমা মসিনা ওইরি। খঙলেকো? অদোমশু পাম্বৈ অসিগুম্বা মীয়ামদা য়ৌবা য়াগনি। মরম অদুনা অদোম্না হীরম অসিদা লেপ্তনা ইনগেজ তৌবা তাবনি। ঐহাক্না অদোমগা মরু ওইবা হীরম অমগী মতাংদা খন্নবা পাম্মি। অদোম্না মেন্তেল হেল্থকী মতাংদা থৌদাং য়াহন্নীংই। কন্তেন্ত শেম্বা মীওই কয়ানা মেন্তেল হেল্থকী মতাংদা থাগৎনীংঙাই ওইরবা থবক কয়া পাংথোক্তবা নত্তে। য়াম্না মশক থোকপা থবক কয়া পাংথোক্লি। অদুবু, ঐহাক্না অখন্ননা পাম্বদি, লোকেলগী লোলদা পাংথোকপা অসিনি। শহরদা লৈবা মীওইদি মসি নীংথিনা খঙনৈ, মখোয়গীদি মসি মখোয়না নুমিৎ খুদিংগী থেংনবা মতৌ অমা ওইরে। অঙাংশিংশু মসিগী হীরম অসি মাইয়োক্নৈ, অদুবু ঐখোয়না নীংথিনা খঞ্জিল্লুদে। থাইনগী মতমগা য়েংনবদা, হৌজিক্কানগী মমা মপাশিংদি থবক চিনবা হেনগৎলকপনা, মচা শেন্নবগী থবক অসি নেন্নীশিগদা অয়াম্বা শিন্নথোক্লে। মসিনা মরম ওইরগা মখোয়গী অৱাবা মতৌশিং মথন্নতা খঙজিল্লে, মরু ওইবা পরিক্ষাগী মতমদা। পরিক্ষাগীদমক্তা ৱাখল ৱাবনা পেনি এতেক থোকহল্লি। অদুনা মখোয়না মরুপশিংগা ৱারী শান্নৈ। করিগুম্বা মতমদা, মখোয়না সুইসাইদকুম্বা অহকপা ৱাখল খঞ্জিনবশু য়াওদবা নত্তে। ঐহাক্না চহি 12-15গী মমাংদা য়েংখিবা অতেনবা ফিল্ম অমা নীংশিংলক্লে, মতমদুদা ভিদিও অসি হৌজিক্কী মতৌগুম্বা মীয়াম পুম্বনা খঙনবা পাম্বৈ ওইরমদে। অদুবু ঐদি য়াম্না মুন্না য়েংশিনগল্লি। অরানবা খোঙথাং অমা থাংদ্রিঙৈদা, নুংঙাইবা পুন্সি হিংবনা হেন্না ফগনি হায়না ফিল্ম অসিনা পাউদম্লি। ঐ অকুপ্পশিংদি কাওরে। ফিল্ম অসিদা পরিক্ষা নকশিল্লক্লবা অঙাং অমা উৎলি। মহাক্না তৌফম খঙদ্রদুনা, সুইসাইদ তৌরগে খল্লম্মি। মহাক্না থৌরী য়াল্লগে খনবদগী, দুকান্দা থৌরী লৈবা চৎলম্মি। দুকান্দারনা ফীত কয়া য়াম্না শাংবা থৌরী পাম্বগে হংবদা, ফীত হায়বা ৱাহৈ অসিদা মহাক চমম্নরে। মদুদগী মহাক্না য়ুমদা হল্লগা ফীতকী মতাংদা তম্লে। মদুগী মতুংদা মহাক্না দুকান অদুদা অমুক্কা চৎপদা, দুকান ফম্বা মীওই অদুনা য়োৎকী হুক নত্ত্রগা অতোপ্পা মেতরিএলগী পাম্বরা হংখি। অঙাং অদু অমুক হন্না চমম্নবদগী ময়ুমদা অমুক চৎলগা হেন্না খঙনবা থীরে, তম্লে। মদুদগী মহাক্না শিবগী মহুত্তা লাইরিক তম্বনা হেন্না অফবা ওইরম্লে হায়বা অকোনবদা খঙখি। মসিদি শুপ্নগী মিনিত 7-8দা পীবা মগুন লৈরবা পাউজেল অমনি। ঐহাক্না ফিল্ম অসি য়েংবদা, মহৈরোই অমনা করীগীদমক্তা শিজগে খল্লিবনো হায়বা ঐহাক্না মুন্না খনখি। ফিল্ম অসিনা পীরিবা পাউজেল অসি য়াম্না অচম্বা ওইরম্বদি য়াই, অদুবু মসিনা কনাগুম্বা অমগী পুন্সিদা অনৌবা লম্বী অমা তাক্লি। ঐহাক্না ‘পরিক্ষা পে চর্চা’দা পরিক্ষাগা মরী লৈনবা ৱাফম কয়া অমগী ৱারী শাবা অদোম্না খঙলে। প্রধান মন্ত্রীনা অঙাশিংশিংগা পরিক্ষাগী ৱারী শারগা লৈরে হায়না মীওই খরনা নোক্নৈ। সরকারগী মায়কৈদগী সর্ক্যুলর থোকপখক্তনা অঙাংশিংগী পুন্সি নুংঙাইহনবা ঙম্লোই হায়বা ঐ খঙই; অদুবু, মখোয়গা পুন্দবদি য়াদে, মখোয়গী অৱাবা খঙদবা য়াদে, অশেংবা মতেং পাংদবদি য়াদে। মরম অদুনা, ঐহাক্না প্রোগ্রাম অসি চহি খুদিংগী পাংথোক্লিবনি। হীরম অমগী মতাংদা ফোংনা ৱারী শাবনা কনাগুম্বা অমগী পুন্সিদা অহোংবা পুরক্কনি হায়না ঐহাক থাজৈ। ঐহাক্কী পান্দমদি অঙাংশিংগী মফমদা য়ৌবনি, মখোয়গী থম্মোইদা য়ৌবনি, মখোয়বু তেংবাংবনি, মখোয়গী মমা-মপা অমদি ওজাশিংগা পাউ ফাওনবনি।

মরুপশিং,

ঐহাক্তি রীল শাবগী মতম লৈতে, ঐহাক্তি মসিগুম্বা থবক ওইনা পাংথোকই। অদুবু, অদোমশু মসি পাংথোকপা য়াইনা। নিশাগী ফত্তবগী মতাংদা নহাশিংদা খঙহনবা কন্তেন্ত ঐখোয়না পুথোকপা য়াদবরা? নিশা অসি অফবা নত্তে হায়বা পাউজেল শন্দোকপা য়াইনা।

মরুপশিং,

অদোম্না মতাং অসিদা অচৌবা থৌদাং য়াবা য়াই, অদোমদি মখোয়গা পাউ ফাওনবা ঙম্মি।

মরুপশিং,

নুমিৎ খরনিগী মতুংদা লোক সভাগী মীখল লাক্লগনি। ঙসিগী থৌরম অসি মদুগা মরী লৈনৈ হায়না লৌবীগনুকো। মথংগী শিবরাত্রী মনুংদা, মসিগুম্বা থৌরম অমা শিনগনি হায়না ঐহাক্কী গেরেন্তী পীজরি, তাংদি খরা খেন্নবা য়াই। ঐহানা লোক সভাগী হীরম পুখৎলক্লিবা অসিদি তোঙানবা মরম অমনি। ঐহাক ইশাদা খোঙফম চেৎচবদগী অদোম্না হেল্লি হায়বা ঐ খঙই।

মরুপশিং,

লোক সভাগী মতাংদা ঐহাক্না পল্লিবা অসিদি মসিদা ক্রিএতিব ইন্দস্ত্রীনা তেংবাংবা য়াগদবা লৈবগীনি। অহানবা ওইনা ভোত থাদগদৌরিবা মীয়ামদা এৱিয়র্নেস পীনবা ঐখোয়না করি তৌবা য়াবগে? ভোত থাদবা হায়বসি কাবা নত্ত্রগা পোবখক্কী ৱা নত্তে, মসিদি চাউরবা লৈবাক্কী ৱারেপ লৌবদা শরুক য়াবনি। লৈবাক্কী তুংগী মতম অমা শেম্বদা মখোয়গী মথৌ তাই, অদুনা মখোয়দা ৱাফম অসি খঙহনবগী মথৌ তাই। কনাদা ভোত থাদগনি হায়না কৈদৌনুংদা নমগদবা নত্তে, ভোত থাদবগী মরু ওইবদা মিৎয়েং চঙদৌনি। কনাদা থাদগনি হায়বদি মশানা লেপহল্লি। মালেমগী মফম কয়াদা নুংঙাই য়াইফবগী চাং হেনগৎলকপগা লোয়ননা ভোতিং পেত্তরন হন্থরকই। লৈবাক কয়ানা তোঙানবা পথাপ কয়াগী মখাদা নুংঙাই য়াইফবা ওই, অদুগা গনতন্ত্রা চৎলকই। ভারতনা গনতন্ত্রগী মগুনবু 100% ঙাক্তুনা চাউখৎপা লৈবাক অমা ওইনবা হোৎনরি, মালেমগী মফমদা খুদম ওইরি। মসিনা য়াম্না কান্নবা মোদেল অমা মালেমগী ওইনা ওইরিবনি। অদুবু, চহি 18দগী 21 ফাওবগী লৈবাক্কী নহাশিংনা ভোতকী থৌওংদা থৱাই য়াওনা শরুক য়ানবা হায়জরি।

মরুপশিং,

অতৈদগী তোঙানবা অখন্নবা মতৌ লৈবা নত্ত্রগা ‘বিব্যাংজন’শিংদা তেলেন্ত য়াম্না লৈ হায়বা ঐখোয়না উরে। অদোম্না মখোয়গী অফবা ফম্বাক অমা ওইনা মখোয়বু তেংবাংবা য়াই। মখোয়গী নুংগী পাঙ্গল মীয়ামদা খঙহনদুনা সোসিএল মীদিয়াগী খুত্থাংদা মখোয়গী অপাম্বা খঙহনবা য়াই।

মরুপশিং,

অতোপ্পা হীরম অমনা ভারতকী ইথিলবু ঙমখৈ ৱাংমা লানহনন্নবা হোৎনবনি। মালেমগী ওইরিবা হৌজিক্কী ফিভম খঙবা মীওইশিংনা ভারতকী মচু অহুমগী ফিরাল অমসুং পাস্পোর্তকী মরী লৈনবা চাউথোকচনীংঙাই ওইবগী মতিক খঙলমগনি। মহৈরোইশিংনা য়ুক্রেন থাদোক্নবা হোৎনবদা মখোয়না ভারতকী ফিরাল উৎপদা মখোয়গী মতেং য়াম্না ফংই। মসিগী পঙ্গল অসি ঐখোয়না পুম্নমক্না হোৎনমিন্নবদগী লাকপা ঙম্বনি, তরাইনা লাকপা নত্তে। মালেমগী মিৎয়েংদা অহোংবা কয়া লাক্লবশু, ঐখোয়গী মরমদা মখোয়না খনবা ৱাখল্লোন খরা ঐখোয়না হোংদোক্তবা য়াদ্রি। ঐহাক্কী মীরম খোঙচৎ অমদা ঐহাক্কী ত্রানেলেতর ওইওবা ইঞ্জিনিয়র অমগা নুমিৎ হুম্নিমুক পুনবদগী কোইনরক্তবগী থৌদোক অমা নীংশিংলক্লে। মহাক্না তন্না-তন্না ৱাহং অমা কোন্না হংলকখি। লিন জগোই, শেমজিন-শাজিনবা অমসুং ভুত শান্নবগী থৌওং হৌজিক মখা তানা লৈবাক অসিদা চৎনরিবরা হংলকখি। ঐখোয়গী ইপা-ইপুশিংনা মশা মউ ফবনা মরম ওইরগা মসিগুম্বা চৎনবী অসি থাইনগী মমাংদা ইন্নরম্মি হায়না ঐহাক্না মহাক্কী মফমদা তাকখি। লিন ফাবা হায়বসি য়াম্না চাউবা থবক ওইরমদে, অদুবু, ঐখোয়গী পাঙ্গল হৌজিক হন্থরক্লে, অদুনা হৌজিক্তি ঐখোয়না মাউস (কম্প্যুতরগী মাউস) ওইনা পায়রে। ঐখোয়না মালেম্বু মাউসনা লেংহল্লি।

মরুপশিং,

লৈবাক্কী পাঙ্গল শিজিন্নদুনা মীরম লৈবাক্কী পুক্নিং চীংশিনবা হায়বসি ঐখোয়গী থৌদাং ওইগদবনি। ঐখোয়গী কন্তেন্তশিং স্ত্রেতজিক ওইবা মওংদা শেমদুনা, ঐখোয়না মীয়াম্বু ঐখোয়গী লৈবাক্কী মরমদা খঙহনবা য়াগনি। মরুপশিং অদোমদি মালেমগীদমক্তা লৈরিবা ভারতকী দিজিতেল এম্বেসেদরনি। অদোম্না মালেমগী মীয়ামদা সেকেন্দ খরদা য়ৌবা ঙম্মি। অদোম্না ভোকেল ফোর লোকেলগী এম্বেসেদরশু ওইফম থোকই। ঐহাক্না শ্রীনগরদা থেংনখিবা খোই য়োকপা মীওই অমনা দিজিতেল প্লেতফোর্মগী মতেংদগী মহাক্কী ব্রান্দবু মালেমদা খঙহনখিবগী মতৌ অসিবু খুদম ওইনা পীবা য়াই।

অদুনা মরুপশিং, ‘ক্রিএত ওন ইন্দিয়া মুবমেন্ত’ অমা হৌদোক্লসি। ঐহাক্না অদোমগী মফমদা অচৌবা থৌদাং অমা শিন্নরি। ভারতকী কলচর, হেরিতেজ অমসুং চৎনবীশিংবু মালেমগী খুন্নাইদা ঐখোয়না খঙহনগদবনি। কন্তেন্ত শেম্বা মীওই খুদিংনা মসিদা মায় ওনশিন্দুনা মালেম্না খঙবা পাম্লিবা ভারতকী ৱাফম কয়া অমা খঙহনগদবনি। ভারতকী মতাংদা খঙনীংবা ফাওনবা থৌওং কয়া অমা অদোম্না ইশাগী কন্তেন্তকী খুত্থাংদা তাকপা য়াই।

মরুপশিং,

খোঙথাংশিং অসিগী মরক্তা, কনাগুম্বা অমত্তনা তসেংবা ৱাফমদগী নাথৈবা য়াদে হায়না ঐহাক্না থাজৈ। অদোমগী স্তাইল, প্রজেন্তেসন, প্রদক্ত অমসুং ফেক্ত খুদিংমক অচুম্বা ওইগদবনি। অদোম্না ইশাগী তোঙানবা মহৈ শিজিন্নদুনা মরী লৈনবা থবক পাংথোক্লকপা মতমদা, মীপুম খুদিংগী পুক্নিং শুমহৎকনি অমসুং ঐখোয়গী অশেংবা ৱাফম খুদিংমক মখোয়গী মিৎমাঙদা শং-শঙনা উহনবা ঙমগনি। ক্রিএতিবিতীনা লৈবাক্কী শক্তাক শেমহনবা পাম্মি। অপাম্বা অসিগা লোয়ননা, পুম্নমক্না ঙসি মতম চানা লাক্তুনা থৌরম অসিবু মায় পাকহনবগীদমক্তা ঐহাক্না থাগৎচরি। ঐহাক্না জ্যুরীবুশু থাগৎচরি, এন্ত্রী লাক্ষ 1.5-1.75 এসেস তৌবা হায়বসি অরায়বা থবক্তি নত্তে। ঐখোয়গী থৌওংশিং অসি হেন্না মওং মরিল নাইহন্নবা তুংদদি হোৎনবা ঙম্লগনি, ঐহাক্না পুম্নমকপু অমুক্কা হন্না থাগৎচরি।

***