U Myntri Sorkar Pdeng ba dei khmih ia ka Tnat Kam Ialehkai, u Anurag Singh Thakur u la plie paidbah ia ka prokram ba kyrpang ka Khelo India Rising Talent Identification (KIRTI) hapdeng ka jingshitrhen ha Sector 7 sports complex, ha Chandigarh, ha ka sngi Ba ar. Ka jing thmu kalong na ka bynta ki khynnah skul hapdeng 9 bad 18 snem, kane ka skhim ha kylleng ka ri ka don artylli ki thong; ban wad ia ki sap na man ki kyndong kynshrot jong ka ri bad ban pyndonkam ia ki kam ialehkai kum ka atiar ban tehlakam ia ka jingkyrni dih drok bad kiwei kiwei ki tiar pynbyrnia.

Ha kane ka sngi, u Thakur u la ban jur ba ka KIRTI kadei ka jingangnud jong u Myntri Rangbah duh, Narendra Modi ban tei ia ka deiriti jong ki kam ialehkai bad ruh ban lap ia kiba don sap ba lah ban pynjop takma ia ka India ha ki lympung iakhun shabar ri kum ka Olympics bad Asian Games.

La plie paidbah ia ka KIRTI ha 50 tylli ki centre ha India. La peitbniah sanphew hajar tylli ki aplikeshon ha ka bynta ba nyngkong ha 10 tylli ki jait jinglehkai, kynthup ka athletics, boxing, wrestling, hockey, football bad wrestling. Ka KIRTI ka thmu ban pynlong 20 lak ki jingpeit bniah ha kylleng ka ri ha baroh shi snem ban ithuh ia ki sap lyngba ki Talent Assessment Centre.

Ka prokram ban wad bad ai jinghikai ha kane ka kyrdan kadei kaba nyngkong ha India bad ka wan ha ka por haba ka ri ka kwah “ban don hapdeng ki 10 tylli ki ri kiba hakhmat duh ha ka pyrthei shuwa u snem 2036 bad hapdeng ki san tylli ki ri kiba hakhmat duh hashuwa u snem 2047,” la ong u Thakur.

U Thakur u la ban jur ba ki samla kilong ki nongtei jong ka ri bad ban kot sha ka jingjop ha ki kam ialehkai, ki samla kidei ban sdang kham kloi. Da kaba ong ba u nongialehkai u donkam kumba 10 snem ka jingpynkhreh ban jop takma ha ka Olympic, u Myntri u la ong, “Ka KIRTI ka kwah ban poi sha man ki block ha ka ri bad ban pyniasoh bad kito ki khynnah kiba kwah ban lehkai hynrei ki bym tip kumno. Ngi tip ba man u khynnah uba lehkai un ym jop takma hynrei ngi kwah ban pyndonkam ia ki kam ialehkai ban pyllait ia ki samla na ki drok bad kiwei kiwei ki jingkyrni. Nga kyntu ia man u khynnah ban pynrung kyrteng lyngba ka rynsan MyBharat bad ka kamram kadei ia ngi ban leit sha ki bad pynbiang ka lad ka lynti lyngba ka KIRTI.”

Ka prokram KIRTHI kaba phaikhmat sha ki nongialehkai kadei kaba kyrpang namar ka jinglong shai jong ka ha ka rukom jied katkum ka Information Technology. La pyndonkam ia ka Data analytics katkum ka Artificial Intelligence ban batai ia ka jingtbit jong ki nongialehkai. U Thakur u la bynrap ba ka rukom wad ia kiba don sap ha kane ka kyrdan kan donkam ia ka jingiatreilang bad ki National Sports Federation bad ki sorkar jylla. U la bynrap ba ka sorkar ka ladep pynlut T. 3000 klur ha ki jingdon jingem bad ka la don palat 1000 tylli ki Khelo India Centre ha kylleng ka ri.

Ha kane ka jingialang la iadonlang ruh ka Member of Parliament na Chandigarh, Kirron Kher, u Rajiv Verma, nongai jingmut ia ka bor pyniaid kam ha Chandigarh, bad u nongjop takma rupa ha ka Hangzhou Asian Games bad u nongialehkai javelin ba tbit bad u nongiashim bynta ha ka Paris Olympics, u Kishore Kumar Jena.

Ka Kher ka la iaroh ia ka prokram KIRTI bad ka la ong ba ka Chandigarh ka ladep pynmih ia ki khlur nongialehkai kum u Kapil Dev, Yuvraj Singh bad Abhinav Bindra bad kane ka skhim ka la long ka jingkyntiew kaba khraw ia ki nongialehkai.

“Man ki kmie ki kpa ki kwah ia ki khun jong ki ban jop ha ka jingim. Hynrei bunsien ki jingangnud bad ka jingshisha kim ju iahap. Hynrei ha ki kam ialehkai, ka KIRTI kan iarap ban weng ia kata ka jingduna. Mynta man u khynnah u kwah ban lehkai bad ka jingjop ha ka kam ialehkai kan plie lynti,” la ong ka Kher.

Bun ki samla shynrang bad ki kynthei ki la iawan na ka bynta ka jingshah jied ha Sector 7 sports complex ha Chandigarh. Ia u nongmareh ba 14 snem u Aman Sharma bad u nongiaid ba 17 snem u Jaskaran Singh, ka KIRTI ka la plie ka lad kaba khraw. “Mynta ngi tip shaei ban leit bad ban ioh jinghikai. Ka KIRTI ka ai mynsiem shikatdei ia ngi,” la ong u Jaskaran, uba dang ap ia ka pali jong u na ka bynta ka lad ban iashon dur bad u Jena u ban leit sha Paris.

U Jena uba la pynkup burom da u Thakur bad une u nongialehkai uba la iakhun bad u Neeraj Chopra  ha ka Asian Games bad ka World athletics meet ha Budapest ha u snem ba ladep u la ong, “Nga la ju ong ba ki nongialehkai kim ioh ia ka jingkyrshan ha ki jaka ba ki sdang ialehkai. Haba ki sdang ban jop ia ki takma ki ioh ia ka jingiarap pisa bad ka jingai mynsiem, bad kam dei ban long kumne. Ka KIRTI kadei ka skhim kaba biang palat bad ka pyniasoh ia ki khynnah ha ka por kaba biang. Ki dang bun kyrhai ka bor bad kane kadei ka por kaba biang ban hikai ia ki hadien ba la ithuh ia ka sap jong ki.”

U Thakur sa shisien u la ban biang ia ka jing thmu jong ka India ban pynlong ia ka Youth Olympics ha u 2030 bad ka Summer Olympics ha u 2036.

“Lada ngin long ka bor kaba khlain ha kylleng ka pyrthei, ngi hap ban pyni bad pyndonkam ia ka bor kaba wan na ki kam ialehkai. Ka put ka tem, ki kam shna phlim bad ki kam ialehkai kilong ki kor bad ngi long kiba tbit ha kine baroh. Ka KIRTI kan iarap tang ban pynkhlain ia kata. Na ka liang ka sorkar, ngi donkam ban pynsuk ia ki lad treikam bad kata kalong kaba kongsan,” la ong u Thakur, uba long ruh u Myntri Sorkar Pdeng ba dei khmih ia ka Tnat Information and Broadcasting.

KI TWITTER LINK SHA KA JINGPLIE PAIDBAH U THAKUR IA KA KIRTI:

https://x.com/ianuragthakur/status/1767477378547142685?s=48&t=i-_pAF8vR1iF0agU_b9IbA

https://x.com/ANI/status/1767438111389204991?t=8ZMxw24qK_PTE22LLduWdw&s=08

SHAPPHANG KA KHELO INDIA MISSION

Ka Skhim Khelo India, kadei ka Skhim ba kyrpang jong ka sorkar pdeng jong ka Tnat ki Kam ialehkai. Kadei ka jingsaindur jong u Myntri Rangbah duh Narendra Modi, ka Khelo India Mission ka thmu ban wanrah ia ka deiriti jong ki kam ialehkai bad ban kot sha ka jingjop ha ki kam ialehkai ha ka ri ka ban plié lad ia ki briew ba kin pyndonkam ia ka bor jong ki kam ialehkai. Hapoh ka “Sports Competitions and Talent Development” ka skhim Khelo India, ka bynta jong ka “Talent Identification and Development” kadei kaba trei na ka bynta ban ithuh bad kyntiew ia ki nongialehkai naduh ki jaka nongkyndong bad ha ki kyrdan ba la pyntbit bha ban kyntiew ia ki jinglong jingman jong ki kam ialehkai ha ka ri.

******