U Myntri Rangbah Duh, Narendra Modi u la aiti sha ka ri bad buh maw nongrim ia ki projek ka roi ka par kiba kot sha ka T 15,000 klur ha Krishnanagar, Nadia district, West Bengal mynta ka sngi. Kine ki projek ki iadei bad ki ka bording elektrik, ki lynti rel bad ki surok.

Ha ka jingai jingkren ha ka jingialang, u Myntri Rangbah Duh u la ong ba mynta ka sngi ka dei ka dak jong sa kawei pat ka sienjam sha ka jingpynkylla ia ka West Bengal sha ka jylla Viksit. U la kren shaphang ka prokram ba la pynlong hynnin ka sngi ha Arambagh ha kaba u la plie paidbah bad buh maw nongrim ia ki projek bapher bapher na ka bynta ka roi ka par kiba kot sha palat T. 7,000 klur kiba iadei bad ki kam lynti rel, ki kad lieng bad ka petroleum. Wat mynta ka sngi ruh, u Myntri Rangbah Duh u la ong, “Nga donbok ba ki projek ka roi ka par kiba tam ia ka T 15,000 klur ki dei kiba dang plie paidbah bad la buh maw nongrim na ka bynta kine ki projek kiba iadei bad ki kam bording, surok, bad lynti rel ban wanrah ia ka jingsuk ha ka jingim jong ki briew jong ka West Bengal.” U la ong ba kine ki projek kin pynsted ia ka roi ka par ha West Bengal bad kin plie lad ioh kam ia ki samla. U Myntri Rangbah Duh u la kitbok kitrwiang ia ki briew na a bynta kine ki projek ka roi ka par.

Da kaba ban jur halor ka jingkongsan jong ka bording elektrik ha ka jingwanrah ia ka roi ka par, u Myntri Rangbah Duh u la ong ba ka Sorkar ka dang trei ban pynlong ia ka West Bengal kaba lah ban pyndap ia ki jingdonkam lajong ia ka bording elektrik.

U la ong ba ka Raghunathpur Thermal Power Station Phase II (2x660 MW) jong ka Damodar Valley Corporation, kaba don ha Raghunathpur ha ka distrik Purulia, ka thermal power project kaba don nongrim ha u dewiong kan wanrah palat T 11,000 klur ka jingbei tyngka ha ka jylla. Kane kan pynbiang ia ki jingdonkam bording elektrik jong ka jylla bad kan kyntiew ia ka jingkiew ka ioh ka kot ha ka thain ruh, u la ong. Shuh shuh, u la ong ba ka Flue gas desulfurization (FGD) system jong ka Unit 7 & 8 jong ka Mejia Thermal Power Station, kaba la tei ha ka jinglut jingsep kaba kot sha kumba T 650 klur ka dei ka nuksa jong ka jingshim khia ka India ia ki kam kiba iadei bad ka mariang.

U Myntri Rangbah Duh u la ong ba ka West Bengal ka long kum ka khyrdop sha ka thain mihngi ia ka ri bad ba ki don shibun ki lad ki lynti sha ka thain mihngi nangne. Kumta, ka Sorkar ka la trei na ka bynta ki surok, ki lynti rel, ki kam liengsuin bad ki lad lyngba ki jaka shong um. U la ong ba ka projek surok na ka bynta ka jingpynkylla four lane ia ka bynta Farakka-Raiganj jong ka NH-12 (100 Km) ia kaba la plie paidbah mynta ks sngi ka la don ka jingmang tyngka kaba kumba T 2000 klur bad kane kan pynduna shiteng ia ka por kaba shim ha ka leit ka wan. Kane kan pynduna ia ka jingsahkut ki kali ha ki shnong ba marjan, kan iarap ruh ia ki nongrep bad kan kyntiew ia ki kam ka ioh ka kot ha ka thain.

Na ka liang jong ki jingdon jingem, u Myntri rangbah Duh u la ong ba kam rel ki la long shi bynta ka histori jong ka West Bengal bad u la ong ba u sngewsih ba ym shym la rah shakhmat ia ka hiar pateng jong ka jylla ha ka rukom kaba iahap da ki Sorkar ba la dep namar kane ka la wanrah ia ka jingsahkut ka roi ka par. U Myntri Rangbah Duh u la kdew sha ki sienjam jong ka Sorkar ban pynskhem ia ki jingdon jingem kiba iadei bad ki kam rel ha West Bengal ha kine ki 10 snem ba la dep bad u la batai kumno la pynlut arshah ka posa haba ianujor bad ki por mynshuwa. U la ong ba ka jingaiti ia saw tylli ki projek rel sha ka roi ka par jong ka jylla bad u la ong ba kine kin iarap bha ban pynurlong ia ka jingkut jingmut na ka bynta ka Viksit Bengal. U la pynkut ia ka jingai jingkren da kaba kitbok kitrwiang ia ki briew jong ka ri.

U lat ka West Bengal, Dr C V Ananda Bose bad u Myntri Khynnah ka Sorkar Pdeng ba dei khmih ia ka tnat Ports, Shipping and Waterways, u Shantanu Thakur ki la iadon lang ha kane ka sngi ha ryngkat kiwei kiwei.

Ka Nongrim

U Myntri Rangbah Duh u la buh maw nongrim ia ka Raghunathpur Thermal Power Station Phase II (2x660 MW) kaba don ha Raghunathpur ha ka distrik Purulia. Kane ka thermal power project kaba don nongrim ha u dewiong ka dei jong ka Damodar Valley Corporation bad ka pyndonkam ia ki teknoloji ba seisoh bha. Kane ka plant kaba thymmai ka dei ka sienjam ban pynkhlain shuh shuh kajingshngain jong ka ri ha ki kam bording.

U Myntri Rangbah Duh u la plie paidbah ia ka Flue gas desulfurization (FGD) system jong ka Unit 7 & 8 jong ka Mejia Thermal Power Station. La tei ia kane ha ka jinglut jingsep kaba kumba T 650 klur bad kane ka FGD system kan weng ia ka sulphur dioxide na ki flue gas bad pynmih ia ka flue gas kaba khuid bad kaba pynmih ia u gypsum, ba pyndonkam ha ki kam shna dewbilat.

U Myntri Rangbah Duh u la plie paidbah ruh ia ka projek surok na ka bynta ka jingpynkylla four lane ia ka bynta Farakka-Raiganj jong ka NH-12 (100 Km). La tei ia kane ha ka jinglut jingsep kaba kumba T 1986 klur bad kane ka projek kan pynduna ia ka jingkhapniah ki kali, kyntiew ia ka jingiasoh bad don bynta ha ka jingkyntiew ia ka imlang sahlang bad ka ioh ka kot jong ka North Bengal bad ka thain shatei.

U Myntri Rangbah Duh u la aiti sha ka ri saw tylli ki projek rel kiba kot sha palat T 940 klur ha West Bengal ba kynthup ia ka projek na ka bynta ka doubling ia ka lynti rel Damodar - Mohishila; ka third line hapdeng ka Rampurhat bad Murarai; ka doubling jong ka lynti rel Bazarsau - Azimganj; ka lynti rel ba thymmai ba pyniasoh ia ka Azimganj – Murshidabad. Kine ki projek kin kyntiew ia ka jingiasoh lyngba ki lynti rel, plie lad ia ka jingpynkit mar bad don bynta ha ka jingkiew ka ioh ka kot bad ki kam karkhana ha kane ka thain.