ইকায়খুম্নরবশিং, ইবেম্মাশিং অমসুং ইবুংঙোশিং, খুরুমজরি!

ইন্তরনেসনেল ইনর্জি এজেন্সিগী মিনিস্তরশিংগী মীফমদা শরুক য়ারিবা মীওই খুদিংমক তরাম্না ওকচরি। ইন্তরনেসনেল ইনর্জি এজেন্সি লিংখৎপগী ৫০শুবা মপোক কুমওন থৌরম পাংথোক্লিবা অসি য়াম্না মরুওইবনি। মসিগী খুমাঙচাউশিনবা অসিগীদমক থাগৎপা ফোঙদোকচরি। মীফম অসিদা কো-চিয়ার ওইবগীদমক ঐনা আইরলেন্ত অমসুং ফ্রান্সতা ঐগী তৌবীমল খঙবা উৎচরি।

মরুপশিং,

ভারত মালেমদা খ্বাইদগী য়াংনা চাউখৎলক্লিবা অচৌবা ইকোনোমিনি। লেপ্তনা চাউখৎনবা ইনর্জি ৱাৎহন্দবা অমসুং তুংকোইনা শীজিন্নবা দরকার ওই। চহি ১০দা, ঐখোয় ১১শুবা খ্বাইদগী চাউবা ইকোনোমি ওইরম্বদগী ৫শুবা মফমদা হাইগৎলক্লে। হায়রিবা মতম অসিদা, ঐখোয়না সোলার ইনর্জি পুথোকপা অসি শরুক ২৬ হেনগৎলকখি। ঐখোয়গী রিনিউএবল ইনর্জি পুথোকপা ঙম্বশু শরুক অনি হেনগৎলকখি। হিরম অসিদা,অপীবা মতমদগী ঙনখৎনা, ঐখোয়না পেরিসতা পীখিবা থাজবশিং ঐখোয়না থবক ওইনা পাংথোক্লে।

মরুপশিং,

ভারত অসি মালেমগী অপুনবা মীশিংগী চাদা ১৭গী য়ুমনি। ঐখোয়দা মালেমদা খ্বাইদগী চাউবা ইনর্জি ফংহন্নবা থবক কয়া পায়খৎলি। অদুবু, ঐখোয়গী কার্বোন থাদোকপা অসি মালেমগী অপুনবগী চাদা ৪ খক্তনি। অদুম ওইনমক, ঐখোয়না অইং-অশাগী খল হোংলকপা থেংননবা অচেৎপা থবক পায়খৎলি। ঐখোয়গী থবকশিং অসি অপুনবা অমসুং থবক্তা য়ুম্ফম ওইবনি। ভারতনা ইন্তরনেসনেল সোলার এল্লাইন্সগুম্বা থবকশিং হৌদোক্লে। অপুনবগী ওইনা কান্নবা অমা ফংনবা পৃথিবী অসিগা চুনবা পুন্সি মহিং অমা খন্নবা ঐখোয়গী মিসন লাইফনা পান্দম থম্লি। ‘রিদিউজ, রিয়ুজ অমসুং রিসাইকল’ অসি ভারতকী পুন্সি মহিংগী শরুক অমনি। হিরম অসিদা ভারতনা জি-২০গী প্রসিদেন্ত ওইবা মতমদা শিংথাবা য়াবা থবকশিং উখ্রে। গ্লোবেল বাইওফুয়েল এল্লাইন্স হৌদোকখিবা অসি থবকশিংগী মনুংদা অমনি। থবক অসিদা মখোয়না শৌগৎপগীদমক ঐনা আই.ই.এ থাগৎপা ফোঙদোকচরি।

মরুপশিং,

পুন্না থবক তৌমিন্নবনা লোয়শঙ অমগী থবক তৌবা ঙম্বগী শক্তি হেনগৎহল্লি। ভারতমচা করোর ১৪০না লৌশিং, তেক্নোলোজি অমসুং অনৌবা থবক উৎলে। মিসন খুদিংমক্তা ঐখোয়না পাক-চাউবা অমসুং খোঙজেল, মশিং অমসুং মগুন লৈহল্লে। মসিদা ভারতনা অচৌবা থৌদাং অমা লৌবদা আই.ই.এ কান্নবা ফংগনি হায়না ঐনা থাজৈ। ইন্তরনেসনেল ইনর্জি এজেন্সিগী মিনিস্তরশিংগী মীফম মাইপাক্নবা ঐনা ঐগী য়াইফ-পাউজেল পীজরি। মীফম অসি হৌজিক লৈরিবা মরীশিং হেন্না চেৎশীনহন্নবা অমসুং অনৌবশিং শেমগৎনবা ওইহল্লসি। ঐখোয় পুন্না হেন্না মশা নানবা, মৈখু চেন্দবা অমসুং পুন্না হিংমিন্নবা মালেম অমা শেমগৎলসি।

অদোম থাগৎচরি।

অদোম ঙমখৈ লৈতনা থাগৎচরি।

****