য়োর এক্সলেন্সী, রাস্ত্রপতি, রানিল ৱিক্রেমাসিঙ্গেজী; য়োর এক্সলেন্সী, প্রধান মন্ত্রী, প্রবিন্দ জগনোথজী, ভারতকী ফোরেন মন্ত্রী, দাঃ জয়শঙ্করজী, শ্রী লঙ্কা, মোরিসস অমসুং ভারতকী সেন্ত্রেল বেঙ্কশিংগী গবর্নর অমসুং ঙসিগী মশক নাইরবা থৌরম অসিদা শরুক য়ারিবা মরুপশিং!

ইন্দিয়ন ওসীনগী য়ুম্লোন্নবা অমসুং মরুপ মপাং ওইরিবা লৈবাক অহুমগী ওইনা ঙসিগী নুমিৎ অসিদি য়াম্না অখন্নবা নুমিৎ অমনি। ঐখোয়গী পুৱারীগী মরীবু ঐখোয়না ঙসিদি মতমগা চুনবা দিজিতেলগী মরী অমদা শক্তাক পীরে। মসিদি ঐখোয়গী মীয়াম্না চাউখৎ থৌরাংগীদমক্তা খোঙফম চেৎনরিবা অসিগী খুদম্নি। ফিন্তেক কন্নেক্তবিতী অসিদি শুপ্নগী ক্রোস-বোর্দর ত্রাঞ্জেক্সনখক্কী নত্তে, মসিনা ক্রোস-বোর্দর কন্নেক্সন্দসু মপাঙ্গল হাপকনি। ভারতকী য়ুনিফাইদ পেমেন্ত ইন্তর্ফেস, হায়বদি, UPI  অসিনা অনৌবা থৌদাং অমা অমুক লৌরে – ভারতকা পার্ত্নরশিংগা অমত্তা ওইহনবগী থৌদাং।

মরুপশিং,

দিজিতেল পব্লিক ইনফ্রাস্ত্রকচর অসিনা ভারত্তা অচৌবা অহোংবা অমা পুরকখি। ঐখোয়গী খুঙ্গংগী মনুং হঞ্জিনবদা লৈবা খ্বাইদগী পীকপা ভেন্দর ফাওবনা UPIগী খুত্থাংদা ত্রাঞ্জেক্সন তৌরি অমসুং দিজিতেল পেমেন্ত পাংথোকপা ঙম্লে। মমাংগী চহিদা UPIগী খুত্থাংদা ত্রাঞ্জেক্সন বিলিয়ন 100 হেন্না পাংথোকখি, মসিগী শেনফমদি ভারতকী ওইনা লুপা করোর লাক্ষ 2, শ্রী লঙ্কাগী ওইনা রুপী ত্রিলিয়ন 8 অমসুং মোরিসসকী ওইনা মোরিসস রুপী ত্রিলিয়ন 1 ওইগনি। বেঙ্ক একাউন্ত, আধার অমসুং মোবাইল ফোনগী JAM ত্রিনিতীগী খুত্থাংদা ঐখোয়না লাস্ত-মাইল দেলিভরী তৌরি। লুপা করোর লাক্ষ 34 নত্ত্রগা US দোল্লর বিলিয়ন 400 অসিবু বেনেফিশরীশিংগী বেঙ্ক একাউন্ততা হাপখি। কোবিদ লাইচৎ মনুংদা ভারতনা কোৱিন প্লেতফোর্ম শিজিন্নদুনা মালেমগী খ্বাইদগী চাউবা ভেক্সিনেসন কেম্পেন পাংথোকখি। তেক্নোলোজী শিজিন্নবনা নুং-পান ফাওনা উহনবগী থৌওং খুমাং চাউশিনহল্লি, শেঞ্জা থুমজা হন্থহল্লি অমসুং খুন্নাইদা ইনক্লুসিবিতী হেনগৎহল্লি। মসিগা লোয়ননা, মীয়াম্না সরকারদা থাজবসু হেনগৎলে।

মরুপশিং,

ভারতকী পোলিসীদি ‘য়ুম্লোন্নবনা হান্না’ হায়বসিনি।  ঐখোয়গী মেরিতাইম ভিজন্না SAGAR, হায়বদি, সেক্যুরিতী এন্দ গ্রোথ ফোর ওল ইন দি রিজন, হায়বসিনি। ঐখোয়গী পান্দমদি অপুনবা লমদম অসিনা চাউখৎপা, তেক্ত কায়দবা অমসুং শান্তি লৈবনি। ভারতনা মশাগী চাউখৎ থৌরাংবু য়ুম্লোন্নবশিংগী চাউখৎ থৌরাংনি হায়না উই। ঐখোয়না শ্রী লঙ্কাগা লোয়ননা সেক্তর খুদিংগী কন্নেক্তিবিতী ফগৎহল্লি। শ্রী লঙ্কাগী রাস্ত্রপতিগী অকোনবা খোঙচত্তা ঐখোয়না ভিজন দোক্যুমেন্ত অমা চৎনবগী য়ানবা পুরকখি। ফাইনেন্সিএল কন্নেক্তিবিতী হেনগৎহনবা হায়বসি মদুগী মরু ওইবা হীরম অমা ওইখি। মমাংগী চহিদা ঐহাক্কা প্রধান মন্ত্রী জগনোথকসু উন্নখি। অদোমসু G20গী সম্মিত্তা অখন্নবা মীথুংলেন ওইনা লাকখিবনি। UPIগা মরী লৈনবা অসিনা শ্রী লঙ্কা অমসুং মোরিসস্তা কান্নবা পীগনি অমসুং দিজিতেল ত্রান্সফোর্মেসন্দসু অনৌবা শাফু অমা ফংগনি, লোকেল শেন্মিৎলোন্দা অফবা অওনবা অমা লাক্কনি অমসুং তুরিজম্বুসু খুমাং চাউশিলহনগনি হায়না ঐহাক্না থাজবা থম্লি। ভারতকী লমকোয়বশিংনা UPI চৎনবা পন্থুংফমশিংদা অহেনবা মিৎয়েং চঙনরক্লগনি। শ্রী লঙ্ক অমসুং মোরিসস্তা লৈবা ভারত্তগী হৌখিবা মীওই অমসুং মফম অসিদা মহৈ তম্লিবা মহৈরোইশিংনা মসিদগী কান্নবা য়াম্না ফংগনি। এসিয়াগী নেপাল, ভুতান, সিঙ্গাপোর অমসুং গল্ফতনা UAEগী মতুংদা, রুপে অসি হৌজিক মোরিসস্তগী অফ্রিকাদা হৌদোক্লি। মসিনা মোরিসস্তগী ভারত্তা লাকপা মীওইশিংদা মতেং পাংগনি। হার্দ করেন্সী লৈবগী মথৌ তাবসু হন্থরগনি। UPI অমসুং রুপে কার্দ সীস্তেম্না ইশাগী করেন্সীদা রীএল তাইম, কোস্ত-ইফেক্তিব অমসুং কনভেনিএন্ত পেমেন্ত পাংথোকপদা তেংবাংগনি। লাক্কদৌরিবা মতমশিংদা, ঐখোয়না ক্রোস-বোর্দর রেমিত্তেন্স, হায়বদি, পর্সন তু পর্সন (P2P), পেমেন্ত ফেসিলিতীগী মাইকৈদা খোঙদাবা ঙমহনগনি।

এক্সলেন্সীশিং,

ঙসিগী লোঞ্চ অসিনা গ্লোবেল সাউথ কোওপরেসনগী মায় পাকপগী মতৌ অমগী খুদম ওইরি। ঐখোয়গী মরী অসিদি শুপ্নগী ত্রাঞ্জেক্সনগীদমক নত্তে, মসিদি পুৱারীগী মরীনি। মসিনা ঐখোয়গী লৈবাক অহুমগী পীপল-তু-পীপল রিএলসন অসিগী মপাঙ্গলবু হেনগৎহল্লি। হৌখিবা চহি তরা অসিদা ভারতনা য়ুম্লোন্নবা লৈবাকশিংদা মতেং পাংদুনা লাকখি। মহৌশাগী অমাঙ-অতা থোকপা ওইরো, হকশেলগা মরী লৈনবা ওইরো, শেন্মিৎলোন নত্ত্রগা মালেমগী ফম্বাক্তা তেংবাংবা ওইরো, ইরাং লাকপা খুদিংদা ভারতনা য়ুম্লোন্নবা মরুপশিংগীদমক্তা লেপ্পি। ভারতনা খ্বাইদগী অহানবা মতেং পীবা ওইদুনা লাক্লি অমসুং থৌওং অসিমক মখা চত্থখিগনি। ঐখোয়গী G20 প্রসিদেন্সী মনুংদা গ্লোবেল সাউথকী শিংনবশিংদা ভারতনা অখন্নবা মিৎয়েং চঙখিবনি। গ্লোবেল সাউথকী লৈবাকশিংদা ভারতকী দিজিতেল পব্লিক ইনফ্রাস্ত্রকচরশিংগী কান্নবা ফংহন্নবা সোসিএল ইম্পেক্ত ফন্দ অমসু শেমখ্রবনি।

মরুপশিং,

ঙসিগী লোঞ্চ অসিদা অচৌবা থৌদাং য়াবগীদমক্তা ঐহাক্না রাস্ত্রপতি রানিল ৱিক্রেমাসিঙ্গে অমসুং প্রধান মন্ত্রী প্রবিন্দ জগনোথকী মফমদা থম্মোই শেংনা থাগৎচরি। লোয়ননা, ঙসিগী লোঞ্চ অসিবু মায় পাকহনবগীদমক্তা লৈবাক অহুমগী সেন্ত্রেল বেঙ্ক অমসুং এজেন্সীশিংবু থাগৎচরি। পুম্নমকপু থাগৎচরি।

***