Ka National Anti-Doping Agency (NADA), ka la pynlong ia ka jingialang “Road to Paris 2024: Championing Clean Sports and Uniting for Anti-Doping” Conference ha New Delhi mynta ka sngi.

Ha ka jingialang u Anurag Singh Thakur u la plie paidbah lyngba ka bor internet ia ka Centre of Excellence for Nutritional Supplements Testing (CoE-NSTS) ha National Forensic Sciences University (NFSU) ha Gandhinagar, Gujarat. La ithuh ia kane kum ka jaka ba kongsan jong ka ri, bad kane ka jaka treikam kaba la biang lut jong ka NFSU kalong kum ka dak jong ka jingsaindur thymmai bad jingshemphang ha ka forensic bad cyber sciences.

La pynlong ia kane ka jingialang ha India International Centre, New Delhi, bad kalong ka rynsan ba kongsan ia kito kiba don bynta ha ki kam ialehkai ban pyniasoh, ban iamir jingmut bad pynkhreh kam na ka bynta ka jingtehlakam ia ka jingpyndonkam ia ki dawai pynkhlain ha shuwa ka Paris Olympics 2024.

Ha ka jingai jingkren jong u, u Anurag Singh Thakur u la ban jur ia ki jingngeit jong ka jingialehkai kaba shai, ka mynsiem jong ka jingiakhun, bad ka jingkongsan ban pynneh ia ka burom ha ki jingialehkai. U la iaroh ia ka jingaiti bad jingtbit jong ki nongialehkai jong ka ri bad u la ban jur ia ka bynta ba kongsan jong ka NADA ban pynkhlain ia ki kam jong ka ri ban tehlakam ia ka jingpyndonkam ia ki dawai pynkhlain ha ki kam ialehkai.

U la ong, “Ka jingplie ia ka Centre of Excellence for Nutritional Supplements Testing na ka bynta ki nongialehkai ka iadei bad ka thong kaba la slem jong ka Tnat ban shna ia ki jaka test ia ki jingdih pynkhlain ha India.”

U Myntri Sorkar Pdeng, u Anurag Singh Thakur u la ong ruh ba ka phang pdeng “Road to Paris 2024” ka iahap bha bad ki jingthmu jong ngi kum ka ri ha ki lympung ialehkai jong ka pyrthei. U la bynrap “Ngi la jam shaphrang, bad ka jingiaid lynti kalong ka dak ka jingkut jingmut bad jingtrei shitom jong ki nongialehkai jong ngi kiba la trei borbah ban wanrah burom ia ka ri jong ngi.”

Ha ka jingkren shaphang ka rukom ialehkai jong ki nongialehkai ka ri, u la ong ka jinglehbha ka ri ha ki lympung ialehkai shabar ri kum ka Olympics, Paralympics, Commonwealth Games, Asian Games, bad kiwei kiwei ki lympung ialehkai, ka pyni ia ka jingkut jijngmut bad ka sap ba ki nongialehkai jong ngi ki don.

Haba iaroh ia ki sienjam jong ka NADA u Anurag Singh Thakur u la ong “Ki sienjam jong ka NADA ha ka jingkyntiew ia ka jingialehkai kaba khuid bad ki sienjam ban tehlakam ia ka jingpyndonkam ia ki dawai pynkhlain kilong kiba dei ban iaroh. Ka la leh ia ka bynta ba kongsan ban ai jinghikai ia ki nongialehkai, ban pynlong ia ki test, bad pyntreikam ia ki kyndon bad ki polisi kiba tehlakam ia ka jingpyndonkam ia ki dawai pynkhlain ha ki kam ialehkai.”

U Myntri Sorkar Pdeng, Anurag Singh Thakur u la ban ruh ba ki sienjam ban tehlakam ia ka jingpyndonkam ia ki dawai pynkhlain ha ki kam ialehkai kilong kiba kongsan ban pynthikna ka rukom ialehkai kaba shai bad kaba khuid, bad ka sorkar ka ithuh ia ka sienjam ba kongsan jong ka NADA ha kane ka kam.

U la bynrap ba “Ka National Dope Testing Laboratory (NDTL) ruh ka don ka bynta ba kongsan ban pynthikna ia ki rukom test kiba bha bad kiba lah ban shaniah bad ka jingkyrshan jong ka sorkar, ha ka liang ki jingmang tyngka bad ka jingkyntiew ia ki jingdon jingem, kan pynkup bor ia kine ki kynhun ba ki jingtreikam jong ki kin long kiba seisoh.”

Ka Conference ka la don ruh ia ka jingpyllait paidbah ia ka kot “Essential Insights & Facts on Nutritional Supplements”, kaba thmu ban ai jingpynshai ia ki nongialehkai shaphang ki kyndon bad ki sienjam ba shngain ha kaba iadei bad ki jingdih pynkhlain na ka bynta ka bha ka miat jong ki.

Ka NADA ka la pyllait ia ka “The Paris Pinnacle: NADA’s Guide to Ethical Sporting”, ka kot kaba batai shaphang ki kyndon ia ki nongialehkai kiba dang pynkhreh ban iashim bynta ha ka Paris Olympics 2024. Kane ka kot ka ai jingmut ia ki nongialehkai bad ka pynkupbor ia ki ba kin iashim bynta ha ka rukom kaba don burom bad ba kin bat ia ki jingngeit ha ka rukom ialehkai kaba bha.

Ha kane ka jingialang la sakhi ka jingiashim bynta ki kynrem ki lyndan, kynthup ki heh ophisar sorkar, ki dkhot na ki kynhun ialehkai jong ka ri, ki kito kiba don bynta ha ki kam bad ki nongpathai khubor. Ka jingiatreilang jong ki bad ka jingiahap jingmut lang jong ki ka dei ka dak jong ka jingkut jingmut ka India ban kyntiew ia ki rukom ialehkai kiba bha bad ka jingwanrah ia ki jingiakhun kiba don burom ha ki lympung ialehkai ha kylleng ka pyrthei.

Katba ki nongialehkai na kylleng ka pyrthei ki ialum lang ha Paris na ka bynta ka 2024 Olympics, ka “Road to Paris 2024” conference ka long kum ka dak jong ka jingkut jingmut ka India ban kyntiew ia ki rukom ialehkai kiba don burom bad ka jingiatylli pyrshah ka jingpyndonkam ia ki dawai pynkhlain ha ki jingialehkai. Lyngba ka jingiatreilang bad ka jingkut jingmut lang, ka India ka ieng skhem kum ka nongialam na ka bynta ka jingialehkai kaba don burom, bad ka rukom ialehkai kaba bha.

*****