সাইন্স অমসুং তেক্নোলোজী (ইন্দিপেন্দেন্ত চার্জ); MoS PMO; পর্সোন্নেল, পব্লিক গ্রাইবেন্স, পেন্সন, এতোমিক ইনর্জী অমসুং স্পেসকী কেন্দ্রগী রাজ্য মন্ত্রী, দাঃ জিতেন্দ্র সিংহনা ঙসি নই দিল্লীদা লৈবা মহাক্কী ময়ুমদা ISROগী নুপী সাইন্তিস্তশিং, চাউরাক্না 255কী ওইবা রিপব্লিক দে রিসেপ্সনগী থৌরম অমা য়ুম্বু ওইদুনা পাংথোকখ্রে।

হায়রিবা নুপী সাইন্তিস্তশিংগী মনুংদা মালেম্না থাগৎনখ্রবা অমসুং ভারত মীয়াম করোর 140বু ISROগা মরী লৈনহনখিবা চন্দ্রয়ান, অদিত্য L1 অমসুং হন্দক ফংখিবা অতোপ্পা মায় পাকপা থৌওং কয়া উৎখিবা রিপব্লিক দে ISRO তেব্লোবু লুচিংখিবী শক্নাইরবী নুপী সাইন্তিস্তশিং য়াওরি।

ISRO তেব্লো অসি নুপী সাইন্তিস্ত নিপান্না মপুং ফানা লুচিংখি, অদুগা অতোপ্পা নুপী সাইন্তিস্ত 220না মখোয়গী মপুরোইবশিংগা লোয়ননা কন্তিঞ্জেন্ত অসিগী পুক্নিং থৌগৎখিবনি। নুপী ঙাক্তগী কন্তিঞ্জেন্ত অসি বেঙ্গালুরু, অহমেদবাদ, তিরুবন্থাপুরম অমসুং শ্রীহরিকোতাগী তোঙান-তোঙানবা ISRO সেন্তরশিংদগী খনগৎখিবনি।

প্রধান মন্ত্রী, শ্রী নরেন্দ্র মোদীনা স্পেসকী অনৌবা রিফোর্ম কয়া পুরক্তুনা স্পেস সেক্তরবু মমাংদা লৈরম্বা অয়েৎপা কয়াদগী মনিং তমহনখিবদগী ঙসিগী মায় পাকপগী নুমিৎ অসি ওইথোকপা ঙম্লিবনি হায়না দাঃ জিতেন্দ্র সিংহনা হায়খি।

নুপী সাইন্তিস্তশিংনা হায়খিবদা, মখোয়গী ISRO তেব্লোনা কর্তব্যা পথতা পেরেদ চৎপা মতমদা মীয়াম্না অমত্তা ওইনা হরাওনা খুবাক খুনখিবা পুঙফমদা মখোয়না চাউথোকচবা ফাওজবগা লোয়ননা লাইবক ফবনি হায়না খঞ্জখি।

লৈবাক মীয়াম মাঙদা মখোয়গী মায় পাকপশিং উৎপগী খুদোংচাবা পীবিবগীদমক্তা প্রধান মন্ত্রীবু থাগৎলদুনা, মখোয়না লৈবাক্কী কোনুং অসিনা তরাম্না ওকপীখিবা অদুনা মখোয়গী পুক্নিং শুমহৎখি অমসুং দিল্লীগী অইংববু কাওথোকপা ঙমখি হায়না পাউদমখি।

ISRO তেব্লোনা রাস্ত্রপতিগী লেপফম য়ৌরকপদা মখোয়বু ISRO – “চাউখৎপা ভারতকী শক্তাক” হায়না লাউথোকখি হায়না দাঃ জিতেন্দ্র সিংহনা পাউদমখি।

স্পেস এজেন্সী অসিনা মখোয়গী স্পেসক্রাফ চন্দ্রয়ান 3না মমাংগী চহিগী ওগস্ত 23দা থাগী লৈমায়দা মায় পাক্না খোঙদাখিবা পুৱারী ওইরবা পুঙফম অদুবু উৎখি। মসিগুম্বা মশক নাইবা মায় পাকপা অসিনা ভারতপু মমাংদা কনা অমত্তনা খোঙদাখিদ্রিবা থাগী সাউথ পোল মনাক্তা খোঙদাবা ঙম্বা অহানবা অমসুং অমত্তা ঙাইরবা লৈবাক ওইহনখিবনি হায়না দাঃ জিতেন্দ্র সিংহনা মখা তাখি।

ISRO অসিদি ভারতকী নারিশক্তিগী চাউরবা খুদম অমনি, মসিদা নুপী সাইন্তিস্তশিংনা শরুক য়াবতা নত্তনা স্পেস রিসর্চ প্রোগ্রামগী থবক কয়াদা লুচিংবগী থৌদাং লৌখি হায়না দাঃ জিতেন্দ্র সিংহনা হায়খি। শুকুমারী নিগর শাজীনা অদিত্য L1 মিসনগী প্রোজেক্ত দাইরেক্তর ওইবনি অদুগা শুকুমারী কলপনা কলাহস্তীনা চন্দ্রয়ান-3গী এসোসিএত প্রোজেক্ত দাইরেক্তর ওইবনি হায়না মহাক্না মখা তাখি।

রিসেপ্সনগী থৌরম মনুংদা, ISRO চেয়রমেন, দাঃ এস. সোম্নাথনা ISROগী ‘সন্নী লেদী’ নিগর শাজীগুম্বী নুপী প্রোজেক্ত দাইরেক্তর অমসুং সাইতিস্ত; , ADRILগী দাঃ রাধা দেবী অমসুং কলপনা কলাহস্তী, রীমা ঘোশ, রিতু করিধল অমসুং নিধী পোর্ৱালগুম্বী পুৱারী শেমখ্রবী অতোপ্পা শক্নাইরবী সাইন্তিস্ত কয়াবু মন্ত্রীগী মফমদা শক্তাকখি।

অমৃত কালগী মনুংসিদা নুপীশিংনা লৈবাক্কী খোঙচৎ অসিদা চপ মান্নবা খোঙলোই ওইগনি অমসুং ঐখোয়না বিকশিৎ ভারত @2047গী মাইকৈদা চঙশিল্লিবা খোঙচৎ অসিদা ISROগী নুপী সাইন্তিস্তশিংনা লমজিং মৈরা পায়দুনা চৎকনি হায়না দাঃ জিতেন্দ্র সিংহনা হায়খি।

***