गोंय/मुंबई, 21 नोव्‍हेंबर 2023

केंद्रीय म्हायती आनी वितरावणी मंत्री, श्री. अनुराग सिंग ठाकुर हांणी आयज, गोंयांत सुरु आशिल्ल्या 54व्या आंतरराष्ट्रीय चित्रपट महोत्सवाचो एक भाग म्हूण व्हीएफएक्स आनी टेक पॅव्हिलियनाचें उक्तावण केलें. एनएफडीसीन इफ्फीत फिल्म बाजारच्या इतिहासांत पयलेच खेपे स्थापन केल्लो व्हीएफएक्स आनी टेक पॅव्हिलियन हे एनिमेशन, व्हिज्युअल इफेक्ट्स, व्हर्च्युअल रियलिटी आनी सीजीआय ह्या मळार, फिल्म निर्मिती तंत्रज्ञानांतल्या कांय गतीशील, सर्जनशील आनी अत्याधुनीक प्रगतीचें प्रदर्शन करतले.

मंत्री ठाकूर हाणी पॅव्हिलियनाच्या वेगवेगळ्या विभागांचें उक्तावण करून पळोवणी केली. तातूंत सिने म्युझियम, ऍमेझॉन प्राइमचे व्ह्यूइंग झोन आनी नेटफ्लिक्स, तशेच हेर विभाग आसात. मंत्री ठाकूर हांणी सोनीच्या फुल फ्रेम सिनेमा लायन कॅमेऱ्यांचें प्रात्यक्षिक पळयलें आनी '75 क्रिएटिव्ह माइंड्स ऑफ टुमॉरो' उपक्रमांतल्यान वेंचून काडिल्ल्या तरणाट्या फिल्म निर्मात्यांकडेन संवाद सादलो. तशेंच टेक पॅव्हिलियनाच्या 'बुक टू बॉक्स' विभागांत वेंचून काडिल्ल्या काय लेखकांकडेन तांणी संवाद सादलो.

श्री ठाकुर हांणी सांगलें, की भारतान सगळ्यांत व्हड माध्यम आनी मनरिजवणेची अर्थवेवस्था म्हण, 10व्या क्रमांकांवेल्यान 5 व्या क्रमांकाचेर मारिल्ले पावल अदभूत आसा. तांणी मुखार म्हळे, कि "देशांत तयार जावपी फिल्म आनी मिडिया सामुग्रीची प्रतिभा आनी आवाट पळयल्यार, भारत बेगीनूच संवसारांतलो 3रो व्हडलो माध्यम आनी मनरिजवण उद्देग जातलो." 

भारत फिल्म निर्मितींत नवे तंत्रीक आनी नवनिर्माण आपणायता, अशें सांगून ''आमचे तरणाटे आनी भुरग्यांच्या प्रतिभेचो तशेच उद्देग फुडाऱ्यांच्या नवनिर्माणाचो आदार घेवन, फिल्म शूट आनी पोस्ट प्रोडक्शना खातीर भारत सगळ्यांत चड मागणी आशिल्लें थळ आसा,'' अशेंय मंत्री ठाकूर हाणी सांगले. 

नव्या तंत्रज्ञानाची भुमिका म्हत्वाची आशिल्ल्याचे सांगून, मंत्री ठाकूर हांणी सांगलें, कि ''भारत हो कथा सांगप्याचो देश आनी लोकांक सर्जनशील, सृजनशील आनी मूळ सामुग्री आवडटा आनी ताचो वापर हांगा जाता.'' कंटेंट निर्मात्यांनी माध्यमांत आनी फिल्म निर्मितीत सदांच विकसीत जावपी तंत्रज्ञानाचो वापर करचो. तशेच मनरिजवणे वांगडाच प्रेक्षकांक म्हायती दिवप आनी शिक्षण दिवपाचेर भर दिवची.

श्री. ठाकुर हांणी मुखार सांगलें, "भारत हें पोस्ट-प्रोडक्शनाचें केंद्र आसा. नव्यान स्थापन जाल्ल्या व्हीएफएक्स आनी टेक पॅव्हिलियनाक लागून, फिल्म निर्मितींत पोस्ट प्रोडक्शन उद्देगाक आनीक चालना मेळटली."

सृजनशील आनी एआय स्पेसिसातले तज्ञ, आभासी जग, बुदवंत पात्रां तयार करून  कॅमेऱ्या भायली जादू दाखोवपा खातीर वैयक्तीक अणभव वांटून, सिनेमा निर्मितींतल्यो शक्यताय आनी उदरगत  मुखार हाडटले.

अंदूं सहभागी जाल्ल्या काय ब्रँडां मदीं गूगल आर्ट्स अँड कल्चर, नेटफ्लिक्स आनी अमेझॉन हांचो आस्पाव जाता.

मंत्री ठाकूर हांचेवांगडा ह्यावेळार अतिरिक्त सचीव, म्हायती आनी वितरावणी, नीरजा सेखर, आनी संयुक्त सचीव (फिल्म) आनी एमडी, एनएफडीसी, पृथुल कुमार हाजीर आशिल्ले. 

* * *

PIB Mumbai | S.Jan/M.Prabhugaonkar/D.Rane

सोशल मिडियावर आम्हाला फॉलो करा:@PIBPanaji    /PIBPanaji    /pib_goa   pibgoa[at]gmail[dot]com  /PIBGoa