U Myntri Sorkar Pdeng ba dei khmih ia ki tnat Information and Broadcasting, Youth Affairs & Sports, u Anurag Singh Thakur haba u la plié paidbah ia ka Film Bazar kaba long ka iew kaba heh tam ha South Asia ia ki kam kiba iadei bad ka jingpynmih phlim kaba la pynlong ha Marriott Resort, Goa mynta ka sngi u la ong ba kane ka film bazaar, kum ka iew jong ki jingmut jingpyrkhat kiba bun, ka dei ka jaka Pdeng jong ki nongshna phlim, ki producer bad ki nongiathuh khana na baroh kawei ka pyrthei. Ka dei ka jaka ba iasoh ka jingsaindur bad ka kam die kam thied, ki jingmut jingpyrkhat bad ki jingioh mynsiem kiba long ka nongrim jong kane ka iew kaba iadei bad ki kam shna phlim, u la bynrap.

Ha kane ka sngi, u Anurag Singh Thakur u la ong ba ka kam Media & Entertainment jong ka India, kiba don ka jingkiew kaba 20% ha ka shi snem ka dei ka kam kaba la ioh jingithuh kum kaba don ha ka kyrdan kaba san bad kaba saphriang tam ha ka pyrthei. Ha une u snem uba 17, ka Film Bazaar ka la long ka bynta kaba kongsan jong ka IFFI, kaba la jam ia u pud u sam bad kaba la kylla sha kawei na ki iew ba heh tam jong ka Asia ha kaba iadei bad ki phlim, la ong u Myntri.

U Myntri u la ong ba mynta u snem, ka jingjied ia ki phlim na ka bynta ka Film Bazaar ka pyni ia ka jingkhleh jong ki khana ba shu thaw, ki docu-shorts, ki documentary, ki phlim ksuid bad ki phlim ba shu dro kiba iadei bad ki phang ba iahap lang ia baroh kum ki briew kiba don shabar ri lajong, ka jinghiar pateng na ki kpa, ki jingkhuslai ha ki jaka sor, ka jingduk tasam, ki jingkylla ka suinbneng, ka jingieid ri, ki kam ialehkai bad ki kam kilan met.

Ha ka jingkren shaphang ka iew kaba iadei bad ka jingiatrei lang ban pynmih phlim, u Myntri u la ong, “Ngi sngew sarong ban wanrah ia ki khatar tylli ki documentary na 7 tylli ki ri ha ka iew, kiba pyni ia ka jingim ha ki 17 tylli ki jait ktien bapher bapher. Kane ka dei ka jingiaid lynti sha ka jingshisha lyngba ka jingsaindur jong ki nongshna phlim.”

U la ong ruh ba ka rynsan video library, ka Viewing Room, ka pyni ia 190 tylli ki phlim ba la ioh pdiang ha kaba katto katne tylli ki dei kiba la jied na ka jingai jingmut ba la ioh na ka Film Bazaar Recommends (FBR). “Ka Work-in-Progress Lab ka dei ka jaka ha kaba kine ki nongshna phlim ki pyni ia ki kam jong ki. Da kaba kyntiew arshah ia ki projek haba ianujor bad u snem ba la dep, ngi don 10 tylli ki projek ban pyni mynta u snem,” la ong u Myntri.

U Thakur u la pynbna ruh ba ha ka jingpdiang ia ka jingsaindur thymmai bad katkum ka jingkyntu u Myntri Rangbah Duh ban pynsuk ia ka kam khaii pateng, la wanrah ia ka bynta kaba thymmai kaba long ka "Book to Box Office," ka ban pyni ia 59 tylli ki phlim kiba la ioh pdiang kiba pynkylla na ki kot sha ki phlim. U Myntri u la plié paidbah ruh ia ka Google Arts and Culture Hindi exhibit kaba dei ka rynsan online kaba don ia ki dur bad ki bynta ba lyngkot na ki phlim Hindi.

Ki 10 tylli ki phlim ba la ai jingmut ban pyni ha ka Film Bazaar ha ka IFFI 54 ki kynthup ia ki documentary, ki phlim ksuid, ki phlim shaphang ka jingkylla ka suinbneng bad ki khana ba shu thaw ha ryngkat kiwei kiwei. Mynta u snem, ka Film Bazaar ka don ia ka bynta “VFX & Tech Pavilion” kaba thymmai kaba thmu ban ai jingtip ia ki nongshna phlim shaphang ki jingsaindur ba thymmai khnang ba kin lah ban ioh jingtip ia ki rukom shna phlim ba dang mih thymmai.

Ka Film Bazaar ka pyni ia ki projek ba la jied na ki jingiatreilang ha ka jingpynmih phlim na India, Bangladesh, Sri Lanka, USA, UK, Singapore, Germany, France, Poland, Luxembourg bad Israel. Ki nongshna phlim ba shah jied kin pyni ia ki phlim jong ki sha ki nongpynmih phlim, ki nongpyniaid iew, ki nongpyniaid tamasa, ki nongbei tyngka bad ki agent na India bad nabar ka ri ha ka Pitch.

Ka Film Bazaar ka dei kaba la sdang da ka National Film Development Corporation (NFDC), Film Bazaar bad ka la kylla sha kawei na ki iew phlim ba heh tam ha Asia ha kaba la pyniasoh ia ki nongshna phlim bad ki nongpynmih bad nongpyniaid iew ia ki phlim na kylleng ka pyrthei.

* * *