ইমা ভারতনা য়াইফরে,

ইমা ভারতনা য়াইফরে.

ভাগবান বিরসা মুন্দানা য়াইফরে.

ভাগবান বিরসা মুন্দানা য়াইফরে.

ঝারখন্দগী রাজ্যপাল সি.পি রাধাকৃষ্ণন জি, চীফ মিনিস্তর হেমন্ত সোরেন জি, কেন্দ্র সরকারগী মিনিস্তরশিং অর্জুন মুন্দা জি অন্নাপুর্না দেবী জি, ঐখোয়গী অহল ওইরবা লুচিংবা করিয়া মুন্দা জি, ঐগী নুংশিরবা মরুপ বাবু লাল মরান্দি জি, অতোপ্পা শক্নাইরবশিং অমসুং ঝারখন্দগী ঐগী নুংশিরবা ইমুং-মনুংগী মীওইশিং।

ঙসি অসি মপুংফাবা হরাওবা নুমিৎ অমনি। ঐ ঙাইহাক্কী মমাঙদা ভাগবন বিরসা মুন্দগী পোক্নফম উলিহাতুদগী হল্লকপনি। ঐনা মহাক্কী ইমুং-মনুংগী মীওইশিংগা উনখি অমসুং ঐগী লাইবক্তা শেংলবা লৈবাক-লৈহাও নম্নবগী অচৌবা খুদোংচাবা অমা লৈনা ফংলে। ঐনা ভাগবন বিরসা মুন্দা মেমোরিএল পার্ক অমসুং ফ্রিদম ফাইত্তর মিউজমদা চৎনবগী খুদোংচাবা অমসু ফংখি। ঙসিদগী চহি অনিগী মমাঙদা, মিউজম অসি লৈবাক অসিগী মীয়ামদা কৎথোক্নবগী খুদোংচাবা অমা ঐনা ফংখি। জনজাতিয়া গৌরব দিবস লাকপদা লৈবাক অসিগী মীয়ামদা ঐনা য়াইফ-পাউজেল পীজরি। লৈবাক অসিগী মফম কয়াদা, লৈবাক অসিগী অহল-লমনশিংসু ঙসি ঝারখন্দ লিংখৎখিবগী নুমিৎকী থৌরম পাংথোক্লি। অতল জিনা হোৎনবদগী রাজ্য অসি শেমখিবনি। লৈবাক অসিনা, মরুওইনা ঝারখন্দনা তোঙান-তোঙানবা স্কিমশিংগী লুপা করোর লিশিং ৫০গী খুদোল অমা ফংলে। রেলৱে অমসুং লম্বী-থোংগী ইনফ্রাস্ত্রকচর ফগৎহন্নবা ঙসি ঝারখন্দদা তোঙান-তোঙানবা রেলৱে প্রোজেক কয়া হৌদোক্লে। ঝারখন্দ অসি লৈবাক অসিদা চাদা ১০০ রেল রুতশিং ইলেক্ত্রিক ফংবা রাজ্য ওইরে হায়বা খঙবদা অদোম হরাওগনি। হায়রিবা প্রোজেকশিং অসিগীদমক ঐনা ঝারখন্দগী মীয়ামদা নুংঙাইবা ফোঙদোকচরি।

ঐগী ইমুং-মনুংগী মীওইশিং,

ত্রাইবেলগী চাউথোকচবা অমসুং লালহৌগী খুদম অমা ওইরিবা ভাগবন বিরসা মুন্দাগী ৱারিনা লৈবাক অসিগী মীওই খুদিংমক ইথিল পীরি। ঝারখন্দগী মফম খুদিংমক মহাকগুম্বা অথৌবশিংগী থৌনা অমসুং চোকথবা নাইদনা হোৎনবগা মরী লৈনরি। তিলকা মানঝি, সিধু কানহু, চান্দ ভাইরব, ফুলো ঝানো, নিলম্বর, পিতাম্বর, জাতারা তানা ভাগৎ অমসুং অলবার্ত ইক্কাগুম্বা অথৌবা কয়ানা লৈবাক অসি চাউথোকচবা পোকহল্লে। করিগুম্বা ঐখোয়না নিংতম ইহৌ হনগৎনা য়েংলবদি, ত্রাইবেল লান্মীশিংনা মাংজিল থাখিদবা লানফম অমতা লৈবাক অসিগী মফম অতৈদা থিবা ফংলোই। মনগার্হ ধামদা গুরু গোবিন্দনা পাংথোকখিবা থবক কনানা কাউবা ঙমগনি। মধ্য প্রদেসকী তনত্যা ভিল, ছতিসগরগী অথৌবা নরায়ন সিংহ, বির গুন্দাধুর, মনিপুরগী রানি গাইদিনলু, তেলঙ্গানাগী বির রামজি গোন্দ, অন্ধ্র প্রদেসকী অল্লুরি সিতারম রাজুনা ত্রাইবেলশিং ইনোৎ হাপখি। ঙসি লৈবাক অসিনা অথৌবশিং অসিগী লমন তোল্লে। নিংতম্লবা মতুংদা অসিগুম্বা অথৌবশিং অসি লৈবাক অসিনা ইকায়খুম্নবা উৎতবা অসি অরানবা অমনি। নিংতম্বা চহি ৭৫ মপুংফারকপগী অমৃত মহোৎসবতা অথৌবশিং নিংশিংবা অমসুং তুংগী মীরোলদা মখোয়গী ৱারিশিং খঙহনবা অসিদা ঐ অপেনবা পোকই।

​মরুপশিং,

ঝারখন্দা লাকপা অসিদা হৌখ্রবা থৌদোকশিং নিংশিংনবা খুদোংচাবা অমা ঐঙোন্দা পীরে। লায়রবশিংদা থৌনা হাপ্লিবা অয়ুস্মান য়োজনা ঝারখন্দদা হৌদোকখিবনি। চহি খরগী মমাঙদা ঐনা খুন্তিদা সোলারনা মৈ পীবা দিস্ত্রিক কোর্ত অমা শঙ্গাখি। ঙসি শেংলবা ঝারখন্দ লমদমদা পুৱারি ওইনা লৈহৌরগদবা কেম্পেন অনি হৌদোক্লগনি। বিকাস ভারত সংকল্প যাত্রা অসি সরকারগী পান্দমশিং ফংনবা শক্তি লৈরবা পাম্বৈ অমনি। পি.এম ত্রাইব অদিবাসি ন্যয়া মহা অভিয়াননা মুৎখিগদৌরবা ত্রাইবশিং ঙাক-শেনগনি অমসুং মখোয়গী য়াইফনবা থবক তৌগনি। হায়রিবা কেম্পেন অনি অসিনা অমৃত কালদা ভারতকী চাউখৎপগী খোঙচৎতা অনৌবা থৌনা পীগনি।

ঐগী ইমুং-মনুংগী মীওইশিং,

ঐনা সরকারগী মকোক ওইনা থৌ পুরকপা চহি ২০ হেল্লে। লৈবাক অসিগী মীয়ামগী অনিংবশিং খঙনবা খুদোংচাবা অমা ঐনা ফংখি। ঙসি ঐনা অদোমগী মাঙদা অমৃত মন্ত্র অমা থম্লে। মসি ঐনা ভাগবন বিরসা মুন্দাগী লৈশাদগী লৌরকপনি। করিগুম্বা ঐখোয়না মথং চহি ২৫দা চাউখৎলবা ভারত অমা শেমগৎলবদি, ঐখোয়না মসিগী অমৃত য়ুম্বী মখোঙ মরি মপাঙ্গল কনখৎহনগদবনি, মখা তানা মখোয়না ফনা থমগদবনি। চহি ১০গী ঐখোয়গী সরকারগী মতম অসিদা, হৌজিক ঐখোয়না অমৃত য়ুম্বী মরি অসিদা শেন থাদরে অমসুং অহেনবা থৌনা হাপ্লে। চাউখৎলবা ভারতকী অমৃত য়ুম্বী মরি অসি অদোমগী মফমদা খঙহনবা ঐনা পাম্মী। অহানবা অমৃত য়ুম্বীদি- ঐখোয়গী ভারতকী নুপীশিং, ঐখোয়গী ইমাশিং-ইচলশিং, ঐখোয়গী নুপীশিংগী থৌনা অসিনি। অনিশুবা অমৃত য়ুম্বীনা-ঐখোয়গী ভারতকী লৌমীশিং ইচিন-ইনাওশিং অমসুং ইচল-ইচেশিং অমসুং লৌউ-শিংউগা মরি লৈনবা থবকশিং, শা-ষন লোইবা, ঙা য়োকপা ওইবা য়াই, হায়রিবা থবকশিং অসিনা ঐখোয়গী চীঞ্জাক পীরি। অহুমশুবা য়ুম্বীনা-ভারতকী নহারোলশিং, মথং চহি ২৫দা লৈবাক অসি অনৌবা থাকশিংদা পুখৎকদৌরিবা খ্বাইদগী চাউবা শক্তি ওইরিবা ঐখোয়গী লৈবাক্কী নহারোলশিংগী শক্তি অসিনি। মরিশুবা অমৃত য়ুম্বী অসিনা- ভারতকী মিদল ক্লাস, নিও মিদল ক্লাস অমসুং ভারতকী ঐগী লায়রবা ইচিন-ইনাওশিং অমসুং ইচল-ইচেশিং অসিনি। ঐখোয়না য়ুম্বী মরি অসি মপাঙ্গল কনখৎহল্লিবমখৈ, চাউখৎলবা ভারত অমা ওইহনবা ঙমগনি। হৌখিবা চহি ১০ অসিদা হায়রিবা অমৃত য়ুম্বী মরি অসি মপাঙ্গল কনখৎহন্নবা হান্না অমুক্তা ওইখিদ্রিবা মওংদা থবক পাংথোকপা অসিদা ঐ অপেনবা পোকই।

মরুপশিং,

হৌখিবা চহি ৫দা ঐখোয়গী সরকারনা মীওই করোর ১৩ হেন্না লায়রবা কোকহল্লে। হৌখিবা চহি খর অসিদা অচৌবা অওনবশিং পুরকপা উরে। ২০১৪দা মীয়ামদা ঐখোয় দিল্লিদা সরকার পায়হনখি, সরকার চল্লাইনবা দাইত্ব শীন্নখি, নুমিৎ অদুদগী ঐখোয়গী থবক তৌবগী মতম হৌখি। মীয়ামগী থবক তৌনবা ঐখোয় লাকখিবনি। ঐখোয়না সরকার পায়দ্রিঙৈ মমাঙদা মশিং য়াম্লবা ভারতকী মীওই কয়া তঙাইফদবা খুদোংচাবশিং ফংখিদে। লৈবাক অসিগী লায়রবা মীওই করোর কয়া মখোয়গী পুন্সিদা অহোংবা পুরকপগী মতাংদা থাজবা মাঙখি। সরকারশিংনা মখোয় অসি মীয়ামগী মমা অমসুং মপানি হায়না খঞ্জখি। ঐখোয়না মমা অমসুং মপাগী ৱাখল্লোন নত্তনা মীনাইগী ৱাখল্লোন্দা অদোমগী মীনাই অমগুম থবক তৌবা হৌখি। ঐখোয়না তোল্লবশিংদা খুদোংচাবশিং পীবা হৌখি। খ্বাইদগী লাপ্না লৈরে হায়না মশানা খঞ্জবা মীওইশিংগী মনাক্তা সরকারনা চৎখি। চহি কয়া মীরাইদুনা থম্লক্লবা মীওইশিং ঐখোয়গী সরকারনা মখোয় শৌগৎখি। ফম্নাইবগী থবক চপ মান্নখি, মীওই চপ মান্নৈ, ফাইলশিং চপ মান্নৈ, আইনশিং চপ মান্নৈ। অদুবু ৱাখল খনবগী মওংদি হোঙলে অমসুং ৱাখল হোঙলে, ফলশু হোঙলে। ২০১৪গী মমাঙদা লৈবাক অসিগী খুঙ্গংশিংদা সেনিতেসনগী থবক চাদা ৪০গী মখাদা লৈখি। ঙসিদি ঐখোয়না পান্দমগী চাদা ১০০ ফংবা ঙম্লে। ঐখোয়গী সরকার লাক্ত্রিঙৈদা শুপ্নগী য়ুমথোং চাদা ৫০-৫৫ খক এল.পি.জি শীজিন্নরমখি। ঙসিদি য়ুমশিংদা চাদা ১০০ নুপীশিং মৈখু থাংদ্রে। হান্না লৈবাক অসিগী অঙাং চাদা ৫৫ খক তিকা থাখি, অঙাং তঙ্খায় অমা তিকা থাখিদে। ঙসিদি অঙাং চাদা ১০০ তিকা থারে। নিংতম্বা ফংলবা চহি ৭০গী মতুংদা, লৈবাক অসিগী খুঙ্গংগী য়ুমথোং চাদা ১৭ খক তোতি ঈশিং ফংখি, চাদা ২০ ফাওবা য়ৌখিদে। ঙসিদি জল জিবন মিসন্না মরম ওইদুনা চাদা ৭০ তোতি ঈশিং ফংলে।

​মরুপশিং,

মতম অদুদা খুন্নাই অসিদা অদোম্না কনা উনখি হায়বা ঐখোয় খঙই। অহানবদা ঐনা কনা কনা উনখি? মখোয় মশক-মতৌ ফজবা মীওই ঙাক্তনি। মখোয় সরকারগা শম্নবা ইনাকখুনবা মীওই ঙাক্তনি, মখোয়না খুদোংচাবশিং ইরাই লাইনা ফংখি অমসুং মখোয়দা হেন্না পীনবা সরকারগী থৌরাং অমসুং ৱাখল্লোন লৈখি। অদুবু খুন্নাইদা নৈহৎপীরবশিং, তোল্লবশিং, কনা অমতনা য়েংশিনখিদে। লায়রবা মীওই অমগী পুন্সি খুদোংচাদবা কয়াগী মরক্তা হিংখি। মোদীনা অসিগুম্বা খুন্নাইগী তোল্লবশিং মরুওইনা লৌখি। মখোয়গুম্বা মীওইশিংগী মরক্তা হিংলকপা মরম্না, অসিগুম্বা ইমুংশিংগী তল ঐনা চাখি, খুন্নাইগী খ্বাইদগী তোল্লবা মীওইগী থুম ঐনা চাখি। ভাগবন বিরসা মুন্দগী লমন শিংনবা ঙসি মফম অসিদা লাকপনি।

ঐগী ইমুং-মনুংগী মীওইশিং,

মহৌশানা, সরকার অমগী থৌওংদি, ইরাই লাইনা ফংবা পান্দম অদু ফংবনি। অদুবু ঐখোয়না অতোপ্পা লাল্লোং অমদা থবক তৌখি। ঐখোয়না লাল্লোং অদু থিজিনখি, নিংতম্বা ফংলবা চহি কয়াগী মতুংদা ফাওবা খুঙ্গং লিশিং ১৮ হেন্না মৈ ফংদনা লৈখি। ইলেক্ত্রিক ফংবদা খুদোংচাদবা কয়া মায়োক্নবা মরম্না মখোয় অমম্বা মরক্তা লৈখি। নুমিৎ লিশিং অমগী মনুংদা খুঙ্গং লিশিং ১৮ মৈ ফংহনগনি হায়না অরুবা ৱারেপ অমা ঐনা লাল কিলাদগী লৈবাক অসিদা ৱাশকখি অমসুং ঙসি ঐনা মীয়ামগী মীনাই অমা ওইনা হায়রিবা থবক অদু মতম চানা পাংথোকপা ঙমখি।

মরুপশিং,

লৈবাক অসিদা হিরম খুদিংমক্তা চাউখৎত্রিবা জিলা ১১০ হেন্না ঐখোয়গী লৈবাক অসিদা লৈরি। অরিবা সরকারশিংনা মখোয় চাউখৎত্রবা জিলাশিংনি হায়না মশক তাকখি। চহি কয়া হায়রিবা জিলাশিং অসি ইজুকেসন, হকশেল, খুদোংচাবা কয়া তমথিরবা ফিবম অমদা থমখি। হায়রিবা চাউখৎত্রিবা জিলাশিং অসি লৈবাক অসিদা ত্রাইবেল ইমুং-মনুংশিং মশিং খ্বাইদগী য়াম্না লৈবা জিলাশিংনি। ওফিসারশিং চৈরাক পীবা ওইনা পোস্তিং পীবদা হায়রিবা জিলাশিং অসি থাখি। চোকথরবা মীওই অমা, মাইথিরবা মীওই অমা,নহাক মফম অদুদা চৎলু, মফম অদুদা করিসু তৌনিংঙাই লৈতে হায়গনি। হৌজিক মহাক করি তৌরিবগে? জিলা ১১০ হেনবা অসি মথন্থা থাদোক্তুনা থম্লবদি, ভারত কৈদৌঙৈদা চাউখৎপা ঙম্লোই। মরম অদুনা তোল্লবশিংদা খুদোংচাবা পীবগী ৱাখল্লোন্দা ঐখোয়গী সরকারনা হায়রিবা জিলাশিং অসি এস্পিরেসনেল দিস্ত্রিকশিং ওইনা লাউথোক্লে। সরকারগী থাজবা লৈহন্নবা হায়রিবা জিলাশিং অসি খ্বাইদগী ফবা ওফিসারশিং থবক হাপ্নবা ঐখোয়না তকশিনখি। লাইরিক-লাইশু, হকশেল অমসুং লম্বীশিং য়াওনা হিরম কয়াদা মখোঙদগী হৌনা থবক তৌবা হৌরকপদগী হায়রিবা জিলাশিং অসি ঐখোয়না মাইপাকপগী অনৌবা থবক অমদা পুখৎলে। হৌজিক অকানক্ষি দিস্ত্রিক কেম্পেনগী মাইপাকপা অসি অকানক্ষি ব্লোক প্রোগ্রামগী মখাদা পাকথোক-চাউথোক্লে।

ঐগী ইমুং-মনুংগী মীওইশিং,

লৈবাক্কী নাগরিক অমগী মথক্তা তাথি-তওইনা তৌদ্রবা মতমদা অশেংবা সেকুলারিজম লাক্কনি। মীওই খুদিংমক সরকারগী স্কিমশিংগী কান্নবশিং চপ মান্না ফংলবা মতমদা খুন্নাইগী অচুম্বা পুরক্কনি। লাইবক থিবদি, ঙসি ফাওবা রাজ্য কয়াগী লায়রবা মীওইশিং স্কিমশিংগী মতাংদা নিংথিনা খঙদ্রি। স্কিমশিংগী কান্নবা ফংনবা লায়রবা মীওই কয়া চেনশিনবা ঙম্নদ্রি। কয়াম কুইনা ঐখোয়না মখোয় মথন্থা থাদোক্তুনা থমগনি? মখোয়গী অৱাবা উবদগী ৱাখল অসি লাকপনি। মসিগী ৱাখল অসিদগী, ঙসি বিকসিত ভারত সংকল্প যাত্রা হৌদোকপনি। ঙসি ভাগবন বিরসা মুন্দাগী মপোক নুমিৎ নবেম্বর ১৫দগী হৌদোক্লিবা কেম্পেন অসি মথং চহিগী জনুৱারি ২৬ ফাওবা চৎথগনি। কেম্পেন অসিদা, মিসনগী মওংদা সরকারনা খুঙ্গং খুদিংমক্তা, লায়রবা খুদিংমক্তা চৎকনি অমসুং ফংফম থোকপা মীওইশিংদা সরকারনা কান্নবশিং ফংহনগনি। ২০১৮দা ঐনা চাংয়েং অমা তৌখি। কেন্দ্র সরকারনা গ্রাম শ্বারাজ কেম্পেন হৌদোকখি। ঐনা ভারত সরকারগী ওফিসার লিশিং ১ খুঙ্গংশিংদা থাখি। ওফিসার ১০০০ এয়র কন্দিসন কাশিং থাদোক্তুনা খুঙ্গংদা লৈখি। হন্দক্কী কেম্পেন অসিদসু অচৌবা স্কিম তরেৎকা লোয়ননা ঐখোয় খুঙ্গং খুদিংমক্তা চৎকনি। গ্রাম শ্বারাজ অভিয়ানগুম, বিকসিত ভারত সংকল্প যাত্রাদা ঐখোয়না খুঙ্গং খুদিংমক্তা চৎকনি, মীওই খুদিংমক উনগনি অমসুং মসিগী থৌরাং অসি মাইপাক্নবা ৱাশক লৌগনি। শোইদনা মাইপাক্কনি। মীওই খুদিংমক লেম্না চঙ ফংনবা রেসন কার্দ অমা পায়গদবা নুমিৎ অদু লাক্লগনি হায়না ঐনা থাজৈ। মীওই খুদিংমক উজৱালা গ্যাস ফংবা, সৌভাগ্যগী মৈ ফংবা অমসুং তোতি ঈশিং ফংবা মতম অদু লাক্লগনি। লুপা লাখ ৫ ফাওবা লেম্না লায়য়েংবগী খুদোংচাবা ফংবা অয়ুস্মান কার্দ অমা লায়রবা মীওই খুদিংমক পায়খগদবা মতম অদু য়ৌরক্লে। লায়রবা মীওই খুদিংম মশাগী য়ুম লৈরগনি। লৌমী খুদিংমক কেন্দ্র সরকারগী পেন্সন স্কিম শরুক য়াবা মতম অদু লাক্লে হায়না ঐনা থাজৈ। শীন্মী খুদিংমক পেন্সন স্কিমগী খুদোংচাবা ফংলগনি। নহারোল খুদিংমক মুদ্রা য়োজনাগী কন্নবা ফংলগনি অমসুং ওন্ত্রেপ্রেনিউয়র অমা ওইনবা মাইকৈদা খোং থাংজিল্লগনি।

​ঐগী ইমুং-মনুংগী মীওইশিং,

চাউখৎলবা ভারতকী মরুওইবা ৱারেপতি পি.এম ত্রাইব অদিবাসি ন্যয়া মহা অভিয়ান অসিনি। নিংতম্বা ফংলবা মতুংদা চহি কয়া ত্রাইবেল খুন্নাই মীরাইদুনা থমখি। অতল জিগী সরকার লাকপা মতমদা, ত্রাইবেল খুন্নাইগী তোখায়বা মিনিস্ত্রি অমা শেমখি, তোখায়বা বজেত অমা শেমখি। ঐখোয়গী সরকারগী মতমদা, হৌজিক ত্রাইবেলগী য়াইফনবা বজেত হান্নদগী শরুক ৬ হেনগৎলে। স্কিম অসিগী মমিং পি.এম জনমান হায়বদি পি.এম ত্রাইব অদিবাসি ন্যয়া মহা অভিয়ানগী মখাদা ঐখোয়গী সরকারনা হৌজিক কনা অমতা য়ৌদ্রিবা ত্রাইবেল ইচিন-ইনাওশিং অমসুং ইচল-ইচেশিং উনগনি। অরিবা মৈরোলগী ত্রাইবশিং অসি হৌজিক ফাওবা নমদুনা উমংশিংদা খুন্দাহল্লি। মহাক হৌজিক ফাওবা ত্রেন মখোল তাদ্রি। অসিগুম্বা ত্রাইবশিং লৈবাক অসিগী খুঙ্গং লিশিং ২২ হেনবদা লৈরি, অসিগুম্বা অরিবা ত্রাইব ফুরুপ ৭৫ ঐখোয়গী সরকারনা মশক খঙদোক্লে। হায়রিবা ত্রাইবেলশিং অসি খ্বাইদগী চাউখৎত্রিবা ত্রাইবেলশিংগী মনুংদা য়াওরি। লৈবাক অসিদা মখোয়গী মশিং লাখ কয়ানি। নিংতম্বা ফংলবা চহি ৭৫গী মতুংদা ফাওবা, খ্বাইদগী ফিবম শোক্লবা ত্রাইবেলশিং তঙাইফদবা খুদোংচাবশিং ফংদ্রি।

ত্রাইবেল খুন্নাইগী মীওইশিং লেংদবা য়ুম লৈতে। মীরোল কয়া মখোয়গী অঙাংশিং স্কুল ফাওবা উদ্রি। খুন্নাই অসিগী মীওইশিং স্কিল হেনগৎহন্নবা হোৎনখিদে। হৌজিক ভারত সরকারনা অখন্নবা কেম্পেন অমা পাংথোক্তুনা হায়রিবা ত্রাইবশিং অসি শেমগৎলগনি। পুন্সি খুদিংমক মপুংফানা হিংবা, পুন্সি খুদিংমক অনৌবা অপাম্বনা পীক থনবা ঐনা পাম্মী। মসিগী পান্দম অসিগা লোয়ননা ঙসি ঐনা পি.এম ত্রাইব অদিবাসি ন্যয়া মহা অভিয়ান হৌদোক্লে। কেম্পেন অসিগীদমক ভারত সরকারনা লুপা করোর লিশিং ২৪ চাদিং তৌগনি।

মরুপশিং,

অচৌবা কেম্পেন অসিগীদমক ইকায়খুম্নরবী রাস্ত্রপতি দ্রৌপতি মুর্মুজি থাগৎপা ঐনা পাম্মী। ঐখোয়না মহাক্কী ভিদিও মেসেজসু তাখ্রে। মহাক ঝাখন্দগী রাজ্যপাল  ওইরমখি অমসুং মদুগী মমাঙদা মহাক ওরিসাদা মিনিস্তর অমা ওইরমখি অমসুং মহাক্না মীয়ামগী থবক তৌবা মীওই অমা ওইখি। মহাক্না ত্রাইবেলশিং  চাউখৎনবা অহিং-নুংথিল থবক তৌখি। রাস্ত্রপতি ওইরবা ফাওবদা, মহাক মখা তানা ত্রাইবেলশিং রাস্ত্রপতি ভাবন্দা কৌখি অমসুং মখোয়গী খুদোংচাদবশিং খঙখি অমসুং মখোয়গী খুদোংচাদবশিং কোক্নবা পাম্বৈশিং খন্নখি। মহাক্না ঐখোয়দা পীরিবা থৌনা অমসুং ইথিলগা লোয়ননা পি.এম ত্রাইব অদিবাসি ন্যয়া মহা অভিয়ান অসি শোইদনা মাইপাক্কনি হায়না ঐনা থাজৈ।

​ঐগী ইমুং-মনুংগী মীওইশিং,

ঐখোয়গী রাস্ত্রপতি দ্রৌপতি মুর্মু জিসু নুপীনা মাংজিল থাদুনা চাউখৎপগী পুক্নিং থৌগৎনিঙাই ওইবা খুদম অমনি। হৌখিবা চহি খরদা নুপীশিংগী শক্তি হেনগৎহন্নবা লম্বীশিং ভারতনা মালেম শীনবা থুংনা তাক্লে। চহি অসি ঐখোয়গী ইমাশিং-ইচলশিং-ইচানুপীশিং  নুংঙাইনা, অশোই-অঙাম য়াওদনা, ইকায়খুম্নবগা লোয়ননা, হকচাং ফানা অমসুং মশানা মশাবু থবক পীদুনা লৈবা চহিনি। ঐখোয়গী ঝারখন্দগী নু্পীমচাশিং শান্নবদা মিংচৎ পুরক্লে। মখোয়গী পুন্সিগী তাঙ্কক খুদিংমক য়াইফনবা ঐখোয়গী সরকারনা নুপীশিংগী স্কিম কয়া পায়খৎলে। বেতি বচাউ বেতি পরাউনা নুপীমচাশিংগী অপুনবা মীশিং হেনগৎহল্লে অমসুং স্কুলশিংদা নুপীমচাশিং মিংচনবা হেনগৎলে। সরকারগী স্কুলশিংদা নুপীমচাশিংগী তোখায়বা তোইলেতশিং শাবা অসিনা নুপীমচাশিং নমদুনা স্কুল কাবা তোকপা হন্থহল্লে। পি.এম অৱাস য়োজনাগী মখাদা ইচলশিং য়ুম করোর কয়াগী মপু ওইরে, অহানবা ওইনা য়ুমশিং মখোয়গী মিংদা পাল্লে। অহানবা ওইনা সাইনিক স্কুল অমসুং দিফেন্স একাদেমিদা নুপীমচাশিং তম্বা য়াহল্লে। মুদ্রা য়োজনাগী মখাদা লোন লৌরিবশিংগী চাদা ৭০ ঐগী লৈবাক্কী নুপীশিং, ঐগী ইচানুপীশিংনি। ঙসি নুপী সেল্ফ হেল্প গ্রুপশিং সরকারদগী শেন্থং মতিক চানা ফংলে। লাখপতি দিদি কেম্পেন অসি তাবদা মীওই খর অঙকপা ফাওরমগনি। ঐগী মঙলান্দি নুপী করোর অনি মিল্লিয়ন্নরিশিং ওইহনবনি। নুপীশিংগী নুপী সেল্ফ হেল্প গ্রু করোর ২ মিল্লিয়ন্নরিশিং ওইবা হৌরক্লে। বিধান সভা অমসুং লোক সভাদা নুপীশিংগী সিত খাক্তুনা থম্নবা থা খরগী মমাঙদা ঐখোয়গী সরকারনা নারী শক্তি বন্দন অধিনিয়ম পাস তৌখ্রে। ঙসি শেংলবা ভাই দুজগী থৌরম্নি। লৈবাক অসিগী নুপীশিং চাউখৎনবা লম্বীদা থেংনবা অপনবা খুদিংমক মবুং ঐনা লৌথোক্কনি হায়না মবুং ঐনা থাজবা পীরি। অদোমগী অৱাবশিং কোকহন্নবা নহাক্কী নবুংনা থবক তৌগনি। চাউখৎলবা ভারত অমা শেমগৎপদা নারী শক্তিগী অমৃত য়ুম্বীনা মরুওইবা থৌদাং অমা লৌগনি।

ঐগী নুংশিরবা ইমুং-মনুংগী মীওইশিং,

চাউখৎলবা ভারত অমগী খোঙচৎতা মীওই খুদিংমক্কী থৌনা শীজিন্ননবা কেন্দ্র সরকারনা থবক পায়খৎলে। থা খরগী মমাঙদা ঐখোয়না পি.এম বিশ্বকর্মা য়োজনা হৌদোকখ্রে। মখোয়গী অরিবা খুৎকী হৈথোই-শিংথোইবশিংগীদমক মমিং চৎলবা মীওইশিং চাউখৎহন্নবা সরকারনা থবক পায়খৎলে। চফু শাবশিং, য়োৎ শুবশিং, উ শুবশিং, সনা শাবশিং, চেক শুবশিং, ফি শুবশিং, ফুরিৎ তুবশিং, খোঙউপ শাবশিং অসি ঐখোয়গী মরুপশিংনি, মখোয় স্কিম অসিগী মখাদা ঐখোয়গী বিশ্বকর্মা মরুপশিংনি। মখোয়গী মতমগী অনৌবা ত্রেনিং ফংলগনি অমসুং ত্রেনিং মনুংদা মখোয় শেনশু ফংগনি। মখোয়না অনৌবা খুৎলায়শিং, অনৌবা তেক্নোলোজি ফংগনি অমসুং মসিগীদমক লুপা কোরোর লিশিং ১৩ চাদিং তৌগনি।

ঐগী নুংশিরবা ইমুং-মনুংগী মীওইশিং,

ঙসি লৈবাক অসিগী লৌমীশিংদা পি.এম কিষান সম্মান নিধিগী ১৫শুবা ইন্সতোলমেন্ত পীরে। হৌজিক লৈবাক অসিগী লৌমীশিংগী একাউন্তশিংদা হাপচিনখিবা শেনফম লুপা করোর লাখ ২.৭৫ হেল্লে। মফম অসিদা ফম্লিবা লৌমীশিং, অদোমগী একাউন্ততা লুপা লিশিং ২ হাপচিনখিবগী মেসেজ অমা অদোমগী মোবাইল ফোনশিংদা লাক্লগনি। শেন কক্নবা কম্পেনি অমতা লৈতে, মিদলমেন অমতা লৈতে, হকথেংননা অদোমগী নাক্তা য়ৌরবনি। লৌমীশিং অসি মমাঙদা করিগুম্বা অমতা হংলকখিদবা লৌমীশিং অদুনি। হৌজিক সরকার অসিনা হায়রিবা লৌমীশিং অসিগী দরকার ওইবশিং ফংহল্লে। ঐখোয়গী সরকারনা শা-ষন লোইবা অমসুং ঙা য়োকপা লৌমীশিং কিষান ক্রেদিদ কার্দকী খুদোংচাবা ফংহল্লে। শা-ষনশিং লেম্না তিকা থানবা ঐখোয়গী সরকারনা লুপা করোর লিশিং ১৫ চাদিং তৌরে। কোরোনা মতুংদা অদোমদা তিকা থানবা লুপা করোর লিশিং কয়া চাদিং তৌরে। অদোমগী ইমুং-মনুংগী পুন্সি কন্নবা থবক খুদিংমক পায়খৎপতা নত্তনা, হৌজিক শা-ষনশিং লেম্না তিকা থানবা লুপা করোর লিশিং ১৫ চাদিং তৌরিবা অসিগী কান্নবা অদোমসু ফংলে। ঙা য়োকপগী থবক পুক্নিং থৌগৎনবা, মফম অসিদা ঐ একজিবিসন অমা শরুক য়াগনি, মসিদা লুপা লাখ কয়াগী ঙা অমসুং মুক্তাশিং উৎলে। মতস্যা সম্পদা য়োজনাগী মখাদা ঙামীশিংদা শেন্থং পীরে। হৌজিক, লৈবাক অসিদা অনৌবা ফারমর্স প্রদক য়ুনিয়ন্স(এফ পি ও) ১০,০০০ শেম্লে। মসিনা লৌমীশিং শেন চংবা হন্থহল্লে অমসুং য়োনফমশিং মরাং কাইনা ফংলে। ঐখোয়গী সরকারনা হোৎনবদগী চহি অসিদা মালেমগী মিল্লেতশিংগী চহি পাংথোক্লি। কোর্স গ্রেনশিং শ্রী অন্ন হায়না খঙনদুনা মপান লৈবাকশিংগী কৈথেলশিংদা য়োন্নবা মপুংফানা থৌরাং তৌরে। মসিনা ঐখোয়গী ত্রাইবেল ইচিন-ইনাওশিং অমসুং ইচন-ইচেশিংশু কান্নবা ফংগনি।

মরুপশিং,

সরকারনা পায়খৎলিবা থবকশিং অসিনা মরম ওইদুনা ঝারখন্দ য়াওনা রাজ্যশিংদা নেক্সলাইতকী হিংশা হন্থরে। চহি খরগী মনুংদা, ঝারখন্দ শেমখিবা চহি ২৫ মপুংফারগনি। হায়রিবা মতম অসি ঝারখন্দগী পুক্নিং থৌগৎনিঙাই ওইবা মতমনি। খুমাঙচাউশিনবা অসিগা লোয়ননা, ঝারখন্দদা স্কিম ২৫ মপুংফানা পায়খৎনবা থবক হৌবা য়ারগনি। মথং চহি ২৫গী পান্দম থম্নবা অমসুং অচৌবা কেম্পেন অমা হৌনবা ঐনা ঝারখন্দ সরকার অমসুং ঝারখন্দগী লুচিংবশিংদা তকশিনগনি, মসিনা রাজ্য অসি চাউখৎনবা অনৌবা ইনোৎ অমা পীগনি অমসুং রাজ্য অসিগী মীয়াম হিংবদা লাইহনগনি।

লাইরিক-লাইশু তম্বগী থবক হেনগৎহন্নবা অমসুং নহারোলশিংদা খুদোংচাবশিং পীনবা ঐখোয়গী সরকারনা থবক পায়খৎলে। ঙসি লৈবাক অসিদা অনৌবা নেসনেল ইজুকেসন পোলিসি অমা শেম্লে। হৌজিক মহৈরোয়শিং মখোয়গী ইমারোলদা মেদিকেল অমসুং ইঞ্জিনিয়ারিং তম্নবা খুদোংচাবা লৈরে। হৌখিবা চহি ৯দা লৈবাক অসিদা য়ুনিভর্সিতি ৩০০ হেন্না অমসুং অনৌবা কলেজ ৫,৫০০ হেন্না লিংখৎলে। দিজিতেল ইন্দিয়া কেম্পেন্না নহারোলশিংদা অনৌবা খুদোংচাবশিং পীরে। খুঙ্গং খুদিংদা লৈরিবা কম্মন সর্বিস সেন্তরশিংনা নহারোল লিশিং কয়া থবক ফংহল্লে। স্তার্দ-অপ লাখ অমা হেন্না লৈদুনা মালেমদা স্তার্দ-অপ ইকোসিস্তেম লৈবা খ্বাইদগী চাউবা অহুমশুবা লৈবাক ভারত ওইরে। ঙসি রাঞ্চিদা আই.আই.এম কেম্পসতা অনৌবা হোস্তেলশিং অমসুং ধনবাদতা আই.আই.তি.আই.এস.এম শঙ্গারে।

মরুপশিং,

অমৃত কালগী অমৃত য়ুম্বী মরি- ঐখোয়গী নুপীশিংগী শক্তি, ঐখোয়গী নহারোলশিংগী শক্তি, ঐখোয়গী লৌউ-শিংউগী শক্তি অমসুং ঐখোয়গী মিদল ক্লাসকী শক্তি অসিনা শোইদনা ভারত অনৌবা থাকশিংদা পুখৎকনি অমসুং ভারত চাউখৎলবা লৈবাক অমা শেমগনি। লৈবাক শেমগৎনবা থবকশিং অসিদা শরুক য়ানবা ঐনা অমুক হন্না অদোমগী মফমদা হায়জরি। ঐনা মীয়াম পুম্নমক থাগৎপা ফোঙদোকচরি। ঐনা ভাগবন বিরসা মুন্দা হায়রকপা মতমদা, অদোম্না লোম্বা নাইদনা লৈরসনু হায়বীয়ু। ভাগবন বিরসা মুন্দা-লোম্বা নাইদনা লৈরসনু। ভাগবন বিরসা মুন্দা-লোম্বা নাইদনা লৈরসনু। ময়াম পুম্নমক ঙমখৈ লৈতনা থাগৎপা ফোঙদোকচরি।

​

******