Hapdeng ka jingduhnong kaba haduh T. 20,000 klur man u snem namar ka jingpyniaid iew tuh ia ki phlim, ka Tnat Information and Broadcasting ka la shim ia ki sienjam ba tyngeh ban tehlakam ia kane ka jingpyniaid iew tuh ia ki phlim ha ka ri. Hadien ba ka Parliament ka la mynjur ia ka Cinematograph (Amendment) Act, 1952 ha kane ka Dorbar Lyiur mynta u snem, ka Tnat Information and Broadcasting ka la sdang pyntreikam ia ki Nodal Ophisar ban pdiang ia ki jingujor pyrshah ka jingpyniaid iew tuh ia ki phlim bad ban hukum ia ki nongpyni phlim ba kin weng ia ki phlim ba shu pyniaid tuh na ki rynsan digital jong ki.

Haduh mynta, kam don ka rukom treikam ban shim ia ki sienjam pyrshah ia ki jingpyniaid iew tuh ia ki phlim lait noh ka jingujor sha ka ain hapoh ka Copyright Act bad IPC. Namar ka jingpur ka internet bad ka jingkwah jong baroh ban peit ei ia ki phlim, ka jingpyniaid iew tuh ia ki phlim ka la pur bha. Ka jingleh ia kane kan wanrah ia ka jingpynshitom ba mardor da ka tnat Information and Broadcasting haba don ka jingpyniaid iew tuh ia ki phlim bad kane kan iarap bha ia ki nongpynmih phlim.

Ka jingpyniaid iew tuh ia ki phlim ka wanrah ia ka jingduhnong palat arphew hajar klur ia ki nongpynmih phlim man u snem. Ka jingshna phlim ka dei ka kam kaba shim da ki snem bad kane ka pulom lut namar ka jingpyniaid iew tuh ia ki phlim. Ban tehlakam ia kane ka jingsniew, ka Sorkar ka la mynjur ia kane ka Ain, bad kito kiba pynmih phlim ki la iaroh bha ia kane. Kane ka Ain ka thmu ban tehlakam ia ka jingpyniaid iew tuh ia ki phlim, kaba long ka sienjam kaba ki nongpynmih phlim ki la dawa la slem bha mynta ha ryngkat ka jingthung ia ki Nodal Ophisar kaba long ka sienjam kaba heh ha kane ka kam.

Lah ban shu kdew hangne ba ia kane ka Ain la pynkylla hadien 40 snem ban wanrah ia ki bynta kiba iadei bad ka jingpyniaid iew tuh ia ki phlim, kaba kynthup ia ka jingpyniaid tuh lyngba ki lad digital hadien ba la wanrah ia ki jingkylla ha u snem 1984. Kane ka jingpynkylla ka kynthup ia ka jingpynshitom ha kaba lah ban set patok 3 bnai ha kaba duna duh bad ka jingdain kuna kaba T 3 lak ba lah ban bteng sha ka 3 snem ka jingshah set patok bad ka jingdain kuna kaba haduh 5% jong ka bai pynmih ia ka phlim.

Mano ba lah ban ioh bynta? Uno uno uba don ka copyright lane u briew ba ki la aibor na ka bynta kane ka kam ki lah ban aplai sha u Nodal Ophisar ban phah weng ia ka phlim ba pyniaid tuh. Lada ka jingujor ka wan na u briew u bym don ka copyright lade u bym iohbor na u nongbat copyright, u Nodal Ophisar u lah ban pynlong ia ka jingtohkit katkum ka jingjia ban rai shaphang ka jingiahap jong ka jingujor shuwa ban un ai hukum.

Hadien ba la ioh ia ka hukum na u Nodal Ophisar hapoh ka ain, ka rynsan digital kan hap ban weng ia ki internet link hapoh ka 48 kynta.

Ka Cinematograph (Amendment) Act, 2023 (12 jong ka 2023) kaba la mynjur da ka Parliament ha ka Dorbar Lyiur ka peit ia ki kam kiba iadei bad ka phlim certification kaba kynthup ia ka jingai jingbit ban ring bad pyni ia ki phlim bad ruh ka jingpyniaid iew tuh ia ki phlim da kaba pyni khlem da ioh jingbit ha ka internet bad ka buh ruh ia ki jingpynshitom kiba khlain pyrshah kane ka jingpyniad iew tuh. Kine ki jingpynkylla ki iahap bad ki ain kiba la don lypa kiba peit ia ka jingpyniaid iew tuh ia ki phlim kum ka Copyright Act, 1957 bad ka Information Technology Act (IT) 2000.

Ka section 6AB kaba la wanrah thymmai ha ka Cinematograph Act, 1952 ka ong ba yn ym don mano mano ban pyndonkam ne iarap ban pyndonkam tuh ia kano kano ka phlim ban pyni ia ki paidbah khnang ban iohnong ha kano kano ka jaka kaba khlem pat ioh jingbit hapoh kane ka Ain ne ki kyndon hapoh kane ka Ain; lane ha ka rukom kaba long kum ka jingpynkhein ia ka copyright hapoh ki kyndon jong ka Copyright Act, 1957 lane kano kano ka ain ha ka por ba dang pyntreikam ia ka. Shuh shuh ka section 7(1B)(ii) kaba la wanrah thymmai ha ka Cinematograph Act ka ong ba ka Sorkar ka lah ban shim ia kano kano ka sienjam kaba iahap ban weng ne pynduh ia ka jingioh peit ia kano kano ka jingpyniaid iew tuh ha kano kano ka rynsan ha ka rukom kaba pynkhein ia ka section 6AB kaba la kdew hangne haneng.

******