প্রধান মন্ত্রী শ্রী নরেন্দ্র মোদীনা নিউ দিল্লিগী প্রগাতি মৈদান্দা লৈবা ভারত মন্দাপামদা নবেম্বর ৩গী অয়ুক পুং ১০ তাবদা অচৌবা চীঞ্জাক্কী থৌরমগী ‘ৱার্ল্দ ফুদ ইন্দিয়া ২০২৩’ গী অনিশুবা ইদিসন হৌদোক্কনি।

সেল্ফ হেল্প গ্রুপশিং মপাঙ্গল কনখৎহন্নবা পান্দমদা, প্রধান মন্ত্রীনা সেল্ফ হেল্প গ্রুপ মেম্বর লাখ ১ হেনবদা সিদ কেপিতেল এসিস্তেন্স য়েন্থোক্কনি। মসিনা সেল্ফ হেল্প গ্রুপশিংনা পোৎথোকশিং য়োম্বগী থবক ফগৎহন্দুনা অমসুং মগুন লৈবা পোৎথোক পুথোক্তুনা কৈথেলদা মমল কানা য়োনবদা মতেং পাংগনি। ‘ৱার্ল্দ ফুদ ইন্দিয়া ২০২৩’ গী শরুক অমা ওইনা প্রধান মন্ত্রীনা ফুদ স্ত্রিৎসু হৌদোক্কনি। মসিনা লমদম-লমদমগী মথেল-লুকোয়শিং অমসুং নিংথৌকোনগী মথেল-লুকোয়শিং উৎকনি অমসুং চাক-ইন্সাং থোংবা মীওই ২০০ হেন্না শরুক  য়াগনি অমসুং ভারতকী মমাংঙৈগী মথেল-লুকোয়শিং অখন্নবা অমা ওইনা উৎকনি।

ভারত অসি মালেমগী চীঞ্জাক্কী কৈ অমনি হায়বা উৎনবা থৌরম অসিনা পান্দম থম্লি অমসুং ২০২৩ অসি মালেমগী মিল্লেতশিংগী চহি ওইনা থৌরমশিং পাংথোক্লি। সরকারগী বোদিশিং, উদোগকী মীওইশিং, লৌমীশিং, ওন্ত্রেপ্রেনিউয়রশিং অমসুং অতোপ্পা মরী লৈনবশিং খন্ন-নৈনবা, পুন্না থবক তৌমিন্নবা অমসুং এগ্রি-ফুদ সেক্তরদা শেন থাদনবগী খুদোংচাবশিং থিদোক্নবা নেতৱার্কিং অমসুং ললোন-ইতিক্কী মফম অমা থৌরম অসিনা পীগনি। শেন থাদবা অমসুং ললোন-ইতিক্কী থবক লাইহনবদা মীৎয়েং থমদুনা সি.ই.ওশিংগী রাউন্দতেবল পাংথোক্কনি।

ভারতকী ফুদ প্রোসেসিং ইন্দস্ত্রিগী অনৌবা অমসুং মপাঙ্গল উৎনবা তোঙান-তোঙানবা পেভিল্লিয়নশিং হাংদোক্কনি। শেন-থুমগী খুদোংচাবা পীবা, মগুন লৈহনবা অমসুং মেছিন অমসুং তেক্নোলোজিদা অনৌবা থবকশিং পায়খৎনবা মীৎয়েং থমদুনা ফুদ প্রোসেসিং ইন্দস্ত্রিগী তোঙান-তোঙানবা হিরমশিংদা সেসন ৪৮ থৌরম অসিদা পাংথোক্কনি।

শক্নাইরবা ফুদ প্রোসেসিং কম্পেনিশিংগী সি.ই.ওশিং য়াওনা লৈবাক ৮০ হেনবগী মীওইশিং থৌরম অসিদা য়াগনি। থৌরম অসিদা রিভর্স বয়র সেল্লর মিত অমা, লৈবাক ৮০ হেনবগী বয়র ১২০০০ হেনবা শরুক য়াদুনা পাংথোক্কনি। নেদরলেন্দনা পার্তনর কন্ত্রি ওইনা শরুক য়াগনি অমসুং জপান্না থৌরমগী ফোকস কন্ত্রি ওইগনি।

****