রেলৱেজ মন্ত্রালয়না IRCTC Ltd কা খুৎশম্নরগা, কোয়বা চৎপদা কা হেন্না য়ৌশিন্দবা ভারতকী অৱাং নোংপোক স্তেতশিংবু য়োকখৎনবগীদমক “নোর্থ ইস্ত দিস্কভরী” তুর থাগদৌরি‍। ভারত গৌরব দিলক্স AC তুরিস্ত ত্রেন্দা চৎকদবা অখন্ননা শেম শারবা খোঙচৎ অসি নবেম্বর ১৬, ২০২৩দা দিল্লী সফদারজং রেলৱে স্তেসন্দগী লমথাগনি‍। খোঙচৎ অসিনা নুমিৎ ১৫ চুপ্না অসামদা গুৱাহাতী, সিবসাগর, জোর্হত অমসুং কাজিরঙ্গা, ত্রিপুরাদা উনাকোতী, অগর্তলা অমদি উদয়পুর, নগালেন্দা দিমাপুর অমদি কোহিমা অমসুং মেঘালয়দা সিলোং অমদি চেরাপুঞ্জী কোনশিনগনি‍।

ভারত গৌরব দিলক্স AC তুরিস্ত ত্রেন অসিদা দাইনিং কার/রেস্তোরেন্ত অনি, কন্তেম্পররী চাকখুম ( মৈরী থোক্তবা) অমা, AC I অমদি AC II কোচশিংদা ঈরুজফম ক্যুবিকলশিং, সেন্সর-বেজ ৱাস্রুম ফংসন, ফুৎ মসাজর অমদি মিনি লাইব্রেরী অমা য়াওনা মতমগা চুনবা ফীচর কয়া য়াওরি‍। মপুং থানা এয়র কন্দিসন ওইবা ত্রেন অসিনা AC I, AC II অমদি AC III হায়না একোমোদেসন মখল অহুম পীরি‍। ত্রেন অসিদা CCTV কেমেরা, ইলেক্ত্রোনিক সেফ অমদি কোচ খুদিংগী অখন্ননা পীবা সিক্যুরিতী গার্দনচিংবা অহেনবা সিক্যুরিতী ফীচরশিংসু য়াওরি‍।

অহিং ১৪ অমদি নুংথিল ১৫ চুপ্না চৎকদবা খোঙচৎ অসিদা অহানবদা গুৱাহাতীদা খামদুনা মফমদুদা লম কোয়বশিংনা কমখ্য লাইশঙ, মথঙদা উমানন্দ লাইশঙদা চৎকনি অমদি ব্রহ্মপুত্রা তুরেলদা নুমিদাংৱাইরমগী হিগী তোংগনি‍। ত্রেন অসিনা মখা তানা অহিংগী খোঙচত্তা, মথঙগী পন্থুংফম ওইগদৌরিবা অরুনাচল প্রদেশকী কোনুং ইতানগরদগী কিলোমিতর ৩০ লাপ্না লৈবা নহরলাগুন রেলৱে স্তেসন তান্না চৎকনি‍। মথঙ থুংগদবা ময়োল্লম্না অসামগী নোংপোক থংবা শরুক্তা লৈরিবা অহোম নিংথৌগী অরিবা কোনুং সিবসাগরদনি‍। তলতল ঘর অমদি রঙ্গ ঘর (কোলোজিয়ম ওফ ইস্ত)নচিংবা পারী পুরীগী লন ওইরিবা মফমশিংগী মথক্তা মমিং চৎলবা সিব লাইশঙ সিবদোলসু খোঙচৎ অসিগী শরুক অমা ওইরি‍। মখা তারকপদা, লম কোয়বশিংনা জোরহৎকী চাগী লৈকোল অমদি কাজিরঙ্গদা অহিং লেক্লগা অয়ুক অঙনবদা কাজিরঙ্গ নেস্নেল পার্ক্কী উমং খোঙচৎ চৎপা ফংগনি‍। তুংদা, ত্রেন অসিনা ত্রিপুরাগীদমক খোঙশান্দুনা মফমদুদা মখোয়না জম্পুই চীংগী অশোংবা উমঙলক্তা লৈবা মমিং লৈরবা পারী পুরীগী মফম ওইরিবা উনাকোতী য়েংগনি‍। তুংদা মখোয়না, মমিং লৈরবা উজ্জয়ন্ত কোনুং, নীরমহল অমদি উদয়পুরগী ত্রিপুরা সুন্দরী মন্দির য়াওবা খোঙচৎ অমদা কোংনুং অগর্তলাদা চৎকনি‍।

ত্রিপুরাগী মতুংদা, নগালেন্দ স্তেত কোয়নবগীদমক ত্রেন অসিনা দিমাপুরগীদমক খোঙশানগনি‍। বদরপুর স্তেসন্দগী লুমদিং জংসন ফাওবগী পুক্নিং হুনা ফজরবা শক্তমশিং মীথুংশিংদুনা মখোয়গী ফম্ফমদগী অয়ুক অঙনবগী মতমদা উবা ফংগন‍ি‍। দিমাপুর স্তেসন্দগী, লম কোয়বশিংবু নগাগী পুন্সি মহিং খঙননবগীদমক খোনোমা খুঙ্গংগী খোঙচৎ য়াওনা মফম কয়া চৎনবগীদমক বসতা কোহিমা তান্না পুগনি‍। তুরিস্ত ত্রেন অসিগী মথঙ খাম্ফমদি গুৱাহাতীদা ওইদুনা লম য়েংবা লাক্লিবশিংবু লম্বীদা মেঘালয়গী কোনুং সিলোং তম্না পুগনি অমদি লম্বীদা লৈবা নীংথিরবা উমিয়ম পাত্তা ঙাইহাক খামগনি‍। মথঙগী নুমিত্তা ইস্ত খাসী চীংশাং পরেংদা য়াতাদুনা লৈরিবা চেরাপুঞ্জীগী খোঙচৎ অমনা হৌগনি‍। নুমিৎ অসিদা য়েংগদবা মফমশিংদি সিলোং চীংদোল, ইলিফেন্ত ফোল, নোখালিকাই ফোল অমদি মোস্মাই লৈনুংহুৎনি‍। চেরাপুঞ্জীদগী লম কোয়বশিং গুৱাহাতী স্তেসন্দা হল্লক্তুনা দিল্লীদা হল্লক্নবগী ত্রেন তোংগনি‍। ত্রেনগী খোঙচৎ অসি কিলোমিতর ৫৮০০ রোমগী খোঙচৎ ওইগনি‍।

মতাঙসিদা পনবা য়াবদি ভারত গৌরব তুরিস্ত ত্রেন হৌদোকখিবসি লৈবাক মনুংগী লম কোয়বশিং পুক্নিং থৌগৎনবগীদমক ভারত লৈঙাক্না পায়খৎপা “এক ভারত শ্রেস্থ ভারত” অমদি “দেখো অপ্না দেশ” হায়রিবা থৌরাংশিংগী পরিংদনি‍।  IRCTC তুরিস্ত ত্রেন অসি মশা মশাগী ক্লাসশিংদা চৎকদবা ত্রেনগী খোঙচৎ, AC হোতেলশিংদা নুমিদাং লৈবা, চাক্লেন পুম্বা (ভেজিতরিয়ন খক্তমক), বস্তা ত্রান্সফর অমদি লম য়েংবা চৎপা, ত্রাভেল ইন্স্যুরেন্স, তুর এস্কোর্তকী সর্ভিসনচিংবা পুম্নমক শুপ্না য়াওরবা নুমিৎ ১৫নিগী খোঙচৎ অমনি‍। মথৌ তাবা হকশেলগী চেকশিন থৌরাংশিং পায়খৎকনি অমদি IRCTC না মীথুংশিংদা শাফবা অমদি নীংশিংদুনা লৈহৌগদবা মহাও অমা পীননবা থৌরাং পুম্বা পায়খৎকনি‍।

অহেনবা ৱাফমশিংগীদমক অদোম্না ফর্স্ত কম ফর্স্ত সর্ব মওংদা ওনলাইন বুকিংগী খুদোংচাবসু ফংলিবা https://www.irctctourism.com/bharatgaurav দা চঙবিবা য়াগন‍ি‍।

***