ভারত মাতা কী – জয়!

হৌখিবা চহি 75 অসিদা কর্তব্য পথ অসিদা খোন্থাং য়ৈখিবা খোঞ্জেল অদুদগী হেন্না অহৌবা খোঞ্জেলদা ঐহাক্কা লোয়ননা হায়বীয়ু -

ভারত মাতা কী জয়!

ভারত মাতা কী জয়!

ভারত মাতা কী জয়!

কেন্দ্রগী মন্ত্রী মন্দলদা ঐগী মরুপ ওইরিবা, অমিত ভাই, কিশন রেদ্দী, অনুরাগ থাকুর, অর্জুন রাম মেঘৱাল, মীনাক্ষী লেখী, নিশিথ প্রমানিক, লৈবাক শিনবা থুংবদগী মফম অসিদা লাকপীরিবা ঐখোয়গী নহা ওইরিবা মরুপশিং অমসুং ঐগী ইমুং মনুংশিং!

ঙসি আইরন মন সরদার বল্লভভাই পতেলগী মপোক কুমওন অসিদা কর্তব্য পথনা পুৱারী ওইরবা মহায়জ্ঞ অমা উবা ফংলি। মার্চ 12, 2021 অসি দান্দী য়াত্রাগী নুমিৎনি, মার্চ 12, 2021দা গান্ধীজীগী ইথিলগা লোয়ননা সাবরমতী আশ্রমদগী আজাদী কা অমৃত মহোৎসব হৌদোকখি, ঙসি ওক্তোবর 31, 2023 সরদার সাহেবকী মপোক কুমওন অসিদা মফম অসিদা লোইশিল্লি, মসি লোইশিনবগী মীকুপনি। ইরৈবাকচাশিংনা দান্দী য়াত্রা য়াওবা হৌখিবা অদুম্না আজাদী কা অমৃত মহোৎসবদা মীয়াম্না চাউনা শরুক য়াদুনা অনৌবা পুৱারী অমা শেমখি।

দান্দী য়াত্রানা ভারতকী নীংতম্বগী মৈরি হেনগৎহনখি। চহি 75গী খোঙচৎ  অসিনা চাউখৎপা ভারত অমগী মঙলান মঙফাওননবা মতম ওইরক্লি। চহি 2  চত্থরকপা মহোৎসব অসি মেরী মাতী, মেরা দেশ অভিয়ানগা লোয়ননা লোইশিল্লি। ঙসি আজাদী কা অমৃত মহোৎসবকী মেমোরিএল অমগী উরেপ-উয়ুংসু তমখ্রে। মেমোরিএল অসি পুৱারী ওইরবা থৌরম অসিবু হৌরক্লিবা মীরোলশিংদা মতম চুপ্পদা নীংশিংদুনা লৈহল্লগনি। রাজ্য, মন্ত্রালয় অমসুং বিভাগ খরদা থৌরম অসি শীংথানীংঙাই ওইনা পাঙথোকপগীদমক এৱার্দশিংসু পীখি। ঐহাক্না এৱার্দ ফংলবশিং অমসুং রাজ্য অদুগী প্রজাশিংদা নুংঙাইবা ফোঙদোকচরি।

ঐগী ইমুং-মনুংশিং,

অমরোমদা ঙসি ঐখোয়না মহা উৎসব অমা লোইশিল্লি অদুবু চপ মান্ননা ঐখোয়না অনৌবা ৱাশক অমা লৌরি। ঙসি মেরা য়ুবা ভারত সঙ্গথন হায়বদি MY ভারত হৌদোকখ্রে। 21শুবা চহিচা অসিদা জাতি শেমগৎপদা মেরা য়ুবা ভারত সঙ্গথন্না অচৌবা থৌদাং অমা লৌগদৌরি। মসিগীদমক ঐহাক্না লৈবাক অসিদা মরু ওইনা লৈবাক্কী নহারোলশিংদা নুংঙাইবা ফোঙদোকচরি।

ঐগী ইমুং-মনুংশিং,

মেরী মাতী মেরা দেশ অভিয়ান অসি ভারতকী নহারোলনা পান্দম খুদিংমক করম্না ওর্গনাইজ তৌই অমসুং ফংবা ঙম্মি হায়বগী হকথেংনবা খুদম অমনি। মেরী মাতী মেরা দেশ অভিয়ান  অসিদা খুঙ্গং খুদিংমক্তগী অমসুং লৈরক খুদিংমক্তগী নহারোলনা করোর কয়ানা শরুক য়ারি। লৈবাক শিনবা থুংবদা থৌরম লাখ কয়া পাঙথোক্লি। মশিং লাকঙমদ্রবা ভারত মচাশিংনা মখোয়গী শুমাংদগী অমসুং লৌবুক্তগী লৈপাক অদুবু মখোয় মশাগী মখুৎনা অমৃত কলশতা হৈখি। ঙসি মফম অসিদা লৈবাক শিনবা থুংবদগী পুরকখিবা অমৃত কলশ লিশিং নিপান মখাই য়ৌরক্লে। অভিয়ান অসিগী মখাদা ভারত মচা করোর কয়ানা পঞ্চ প্রনগী ৱাশক লৌখি। ভারত মচা করোর কয়ানা কেম্পেন ৱেবসাইৎতসু মখোয়গী সেল্ফীশিং অপলোদ তৌখি।

মরুপশিং,

মীওই কয়াগী ৱাখলদা করিগীদমক লৈপাক খক্তা হায়না ৱাহং হংলমবা য়াই? করিগীদমক লৈপাক য়াওবা চফু খক্তা? কবী অমনা অসুম্না হায়রমখি -

য়হ ৱহ মিত্তী জিসকে রস সে, জীবন পলতা আয়া,

জিসকে বল পর আদিম য়ুগ সে, মানৱ চলতা আয়া।

য়হ তেরী সভ্যতা সংস্কৃতি, ইস পর হী অবলম্বিত,

য়ুগো-য়ুগো কে চরন চিহ, ইসকী ছাতী পর অনকিত।

অচৌবা সভ্যতা কয়া লোইখ্রে অদুবু ভারতকী লৈহাওদা কন্সিয়সনেস অমা য়াওরি, ভারতকী লৈহাওদা অরিবা মতমদগী হৌদুনা ঙসি ফাওবা লৈবাক অসিবু কনখিবা লাইফ ফোর্স য়াওরি। মসি অচেৎপা মরী অমসুং স্পিরিচুএলিতীগী খুত্থাংদা লৈবাক্কী কাচিন কোয়া খুদিংমক্কা ঐখোয়গী থৱায়শিংগা শম্নহল্লিবা লৈপাক অদুনি। লৈপাক অসি পাইদুনা ৱাশক শক্তুনা ঐখোয়গী অথৌবশিংনা নীংতম্বগী লান শোক্নখি।

লৈপাক্কা মরী লৈনবা ৱারী কয়া লৈ। মসিগী লৈপাক অসিদা চহি চামাগী মমাংদা অপীকপা অঙাং অমনা উদা হকল্লম্মি। অমসুং মহাক্কী মপানা মহাক্না শারিবা অদু করিনো হংলমখি, মহাক্না খুমখি মহাক্না শারিবা অসি নোংমৈনি। মহাক্কী মপানা নোংমৈ অদুনা মহাক করি তৌগদৌরিবনো হংখি, নুপামচা অদুনা হায়খি, “ঐহাক্কী লৈবাক নীংখা তমহনগদৌরিবনি”। হায়রিবা অঙাং অদু চাউরকখি অমসুং ঙসি ফাওবা য়ৌবদা ৱানা থোকপা, কত্থোকপগী অৱাবা পনখৈ য়ৌবা ঙমখি। নুপামচা অদু অতৈ কনাসু নত্তে অথৌবা ভগত সিংহনি।

লৈপাক অসিগী মতাংদা লান্মী অমনা অসুম্না হায়রমখি -

“দিল সে নিকলেগী ন মর কর ভী বতন কী উল্ফত,

মেরী মিত্তী সে ভী খুসবু-এ-বফা আয়েগী”

লৌমী ওইরবসু থৌনা লৈবা লান্মী ওইরবসু মখোয়গী ঈখেং অমসুং হুমাং লৈপাক অসিদা য়াওদবা লৈতে। লৈপাক অসিগী মরমদা হায়নবা লৈ, লৈবাক অসিগী লৈপাক অসি চাচন্দননি, খুঙ্গং খুদিংমক লম্বোইবগী মফমনি। ঐখোয়গী লাইবক্তা ঐখোয়না লৈপাক্কী মহুৎ শিন্দুনা চাচন্দন নম্মি। ঐখোয়গী ৱাখলদা নোংমদা পুং 24 মসি খল্লি -

জো মাতী কা কঞ্চে চুকা দে, ৱহী জিন্দগানী হৈ ।।

জো মাতী কা কঞ্চে চুকা দে, ৱহী জিন্দগানী হৈ।।

মরম অসিনা মফম অসিদা পুরক্লিবা অমৃত কলশ, লৈপাক  অসিদা য়াওরিবা মরিক খুদিংমক অসি মমল য়াম্মি। ঐখোয়গীদমক্তা মখোয়গীদমক মসি চেংগা পাঙ্খক ওই। মালেম অমগী লন অসি চেং খুজোক অমদা য়াওবা অদুম্না  অমৃত কলশ লিশিং কয়া অসিদা লৈবাক্কী ইমুং খুদিংমক্কী মঙলানশিং, অনীংবশিং অমসুং মশিং লাকঙমদ্রবা ৱাশকশিং য়াওরি। লৈবাক্কী য়ুমথোং খুদিং, শুমাং খুদিংদগী মফম অসিদা য়ৌরকখিবা লৈপাক অসিনা ঐখোয়গী থৌদাং য়াবগী ৱাখল্লোন অদু মখা তানা নীংশিংহল্লগনি। লৈপাক অসিনা ঐখোয়বু বিক্ষিৎ ভারতকী ৱাশক অদু থুংহন্নবা হেন্না কন্না হোৎননীংনবা ইথিল পীরগনি।

সঙ্কল্প আজ হম লেতে হৈ জন জন লো জাকে জগায়েগে,

সৌগন্ধ মুজে ইস মিত্তী কী, হম ভারত ভব্য বনায়েগে।

মরুপশিং,

লৈবাক শিনবা থুংবদগী পুরকপা লৈপাক পুনশিন্দুনা পাম্বী থাদুনা অমৃত বাতিকা শেমখি। মফম অসিদা মসিগী উরেপ-উয়ুং তমখি। অমৃত বাতিকানা অফবা ভারত অমগীদমক লাক্কদৌরিবা মীরোলশিংদা ইথিল পীরগনি। অনৌবা পার্লিয়ামেন্ত হাউসতা ‘জন জননি জন্মভুমি’ কীবা আর্তৱার্ক অমা লৈ হায়বা মীওই খরা খক্তনা খঙলমগনি। মসি লৈবাক্কী কাচিন কোয়া খুদিংমক্তগী নুপী আর্তিস্ত 75না, লৈবাক্কী রাজ্য খুদিংমক্কী লৈপাক্তগী শেমখিবনি। মসিনা ঐখোয় পুম্নমক্তা চাউনা ইথিল পীনীংঙাই ওই।

ঐগী ইমুং-মনুংশিং,

মআজাদী কা অমৃত মহোৎসব অসি নুমিৎ লিশিং অমরোম চত্থখি। অমসুং মসিগী নুমিৎ লিশিং অমনা ভারতকী নহারোল অচৌবা অমসুং পোজিতিব ওইবা শাফু পীখি। মসিনা নারোলদা নীংতম্বগী মগুন অদু খঙহনখি।

মরুপশিং,

নখোয়গুম্না ঐহাকসু, ঙসিগী মীরোলনসু মীখা পোনবা উহৌদে। নীংতম্বগী ইখৌ লাংবা, অখাং কনবা অমসুং কত্থোকপা অদু ঐহাক্না উহৌদে। ঐখোয় কয়া নীংতম্বা ফংলবা মতুংদা পোকপনি। ঐহাক্না নীংতম্বা ফংলবা মতুংদা পোকপা ভারতকী অহানবা প্রধান মন্ত্রী ওইরি। ঐহাক্না অমৃত মহোৎসব মনুংদা অনৌবা ৱাফম কয়া তাবা ফংজখি। মতম অসিগী মনুংদা ত্রাইবেল লান্মী কয়াগী মমিং খঙবা ঙমখি।

লৈবাক পুম্বনা মতম শাংনা মীখা পোন্দু লৈরিঙৈ মনুংদা নীংখা তম্বগী ইহৌ হৌখিদবা মীকুপ অমা ফাওবা য়াওখিদে হায়বা খঙবা ঙম্লে। ধর্ম, কাংলুপ অমত্তা মসিগী ইহৌদা য়াওখিদবা লৈতে। ঐহাক্না দুর্দর্শনদা শন্দোকপা স্বরাজ সিরিজ য়েংবদা ফাওবা চপ মান্নবা ৱাখল্লোন অসি লৈবাক্কী নহারোলদা ফাওবা ঐনা উবা ফংই। মহোৎসব অসিনা নীংতম ইহৌগী ৱারী কয়া হাইলাইৎ তৌখি।

মরুপশিং,

লৈবাক পুম্বনা অমৃত মহোৎসব অসি মীয়ামগী মহোৎসব ওইহনখি। হর ঘর তিরঙ্গা অভিয়ান মাইপাকপা অসি ভারত মচা খুদিংমক্কী মাইপাকপনি। লৈবাক অসিদা  লৈরিবা ইমুং করোর কয়ানা অহানবা ওইনা মখোয়গী ইমুং অমসুং মখোয়গী খুঙ্গংনা নীংতম্বা ফংবদা থৱায় য়াওনা শরুক তমখি খঙবা ঙমখি। হিস্তরী লাইরিকশিংদা য়াওদ্রবসু হৌজিক্তি খুঙ্গং খুদিংদা শাখিবা মোন্যুমেন্তশিং অমসুং ইনস্ক্রিপ্সনশিংদা মসি হক্তুনা লৈহৌরে। অমৃত মহোৎসব অসি অমরোমদা তুংগী মীরোলশিংগীদমক চীথহৌরবা পুৱারীগী লমাইশিং অদু হাপচিনবনি।

নীংতম ইহৌদা থৱায় য়াওনা শরুক য়াখিবা অচৌবা দিস্ত্রিক্ত-দিস্ত্রিক্তকী লান্মীশিংগী দেতাবেজ অমা শেমখি। অল্লুরী সীতারাম রাজু ওইরবসু, বরীকুতী চৈন্নৈয়া ওইরবসু, তানত্যা ভীল ওইরবসু, তিরোত সিংহ ওইরবসু লৈবাক পুম্বনা অসিগুম্বা লান্মী কয়াগী মরমদা খঙনবা খুদোংচাবা ফংখি। কিত্তুরগী রানী চেনম্মাদগী হৌরগা , রানী গাইদিনলু, রানী বেল নচিয়ার, মতনগিনী হাজরা, রানী লক্ষ্মীবাই, বীরাঙ্গনা ঝলকারী বাই য়াওনা অমৃত মহোৎসব মনুংদা লৈবাক্কী নারী শক্তিদা ইকাই খুম্নবা উৎখি।

ঐগী ইমুং-মনুং

অফবা ৱাখল্লোনশিং খল্লবা অমসুং নেসন ফার্স্ত হায়বা ৱাখল্লোন অসি মরু ওইনা খল্লবা মতমদা খ্বাইদগী ফবা ফলশিং ফংগনি। আজাদী কা অমৃত মহোৎসব মনুংদা ভারতনা পুৱারী ওইরবা মাইপাকপশিং ফংবা ঙমখি। ঐখোয়না চহিচা অসিগী খ্বাইদগী চাউবা খুদোংথিবা, কোরোনা মাইপাক্না মায়োক্নবা ঙমখি। মতম অসিগী মনুংদা ঐখোয়না চাউখৎপা ভারত অমা শেম্নবা রোদমেপ অমা শসেমখি। অমৃত মহোৎসব মনুংদা ভারতনা মালেমগী খ্বাইদগী চাউবা মঙাশুবা ইকনোমিক পাৱর ওইবা ঙমখি। অমৃত মহোৎসব মনুংদা অচৌবা খুদোংথিবশিং মায়োক্নরবসু মালেমগী খ্বাইদগী খোঙজেল য়াংবা ইকনোমী ওইখি। ভারতকী চন্দ্রয়ান্না থা কাখি। ভারতনা পুৱারী ওইরবা G-20 সম্মিৎ পাঙথোকখি। ভারতনা এসিয়ন গেম্স অমসুং এসিয়ন পেরা গেম্সতা মেদল 100গী রেকোর্দ য়ৌবা ঙমখি।

অমৃত মহোৎসব মনুং অসিদা ভারতনা অনৌবা 21শুবা চহিচাগী পার্লিয়ামেন্ত বিল্দিং শাখি। পুৱারী ওইরবা নুপীবু শক্তি পীনবা নারী শক্তি বন্দন এক্ত পাস তৌখি। ভারতনা এক্সপোর্ত তৌবদা অনৌবা রেকোর্দশিং থমখি। লৌউ-শিংউগী পোত্থোক্তা অনৌবা রেকোর্দ থমখি। মতম অসিগী মনুংদা ভন্দে ভারত ত্রেনশিং অমুক্তা ওইখিদ্রিবা মওংদা পাকথোক চাউথোরকপা উবা ফংখি। রেলৱে স্তেসনশিংদা অওনবা পুরক্নবা অমৃত ভারত স্তেসন কেম্পেন অসি হৌদোকখি। লৈবাক অসিগী অহানবা রিজনেল রেপিদ ত্রেন, নমো ভারত চেনবা হৌখি। অমৃত সরোবর লিশিং 65 হেন্না লৈবাক শিনবা থুংবদা শাখি। ভারত্তা মেদ ইন ইন্দিয়া 5G লোঞ্চ তৌখি অমসুং খোঙজেল য়াংনা এক্সপান্দ তৌখি। ইনফ্রাস্ত্রকচর শাগৎনবগীদমক পি.এম. গতিশক্তি নেস্নেল মাস্তর প্লান অসিসু লোঞ্চ তৌখি। ঐহাক্না মশিং লাকঙমদ্রবা ৱাফম কয়া পাউদম্বা য়াই।

ঐগী ইমুং-মনুংশিং,

আজাদী কা অমৃত মহোৎসব মনুংদা লৈবাক অসিনা রাজপথতগী কর্তব্য পথ ফাওবগী খোঙচৎ মপুং ফাখি। ঐখোয়না মীখা পোনবগী খুদম কয়া মাংহনখি। হৌকিক কর্তব্য পথকী মদোন্দা আজাদ হিন্দ সরকারগী অহানবা প্রধান মন্ত্রী নেতাজী সুভাশ চন্দ্র বোসকী মীতম খিনখি। ঐখোয়গী নেবীগী ফিরাল অসি ছত্রপতি বীর শিবাজী মহারাজনা ইথিল পীবা অনৌবা ফিরালনা মহুৎ শিনখি। হৌজিক আন্দমান অমসুং নিকোবরগী ঈথৎশিং অসি ইন্দিজিনস ওইবা মমিং থোনখ্রে।

অমৃত মহোৎসব মনুংদা জনজাতীয় গৌরব দিবস পাঙথোকখি। শাহেবজাদাশিং নীংশিংদুনা অমৃত মহোৎসব মনুংদা বীর বাল দিবস লাউথোকখি। অমৃত মহোৎসব মনুংদা ওগস্ত 14 অসিনা লৈবাক অসিদা পার্তিসন দে নীংশিংহনখি।

ঐগী ইমুং-মনুংশিং,

হায়নবা লৈ – অন্ত অস্তি প্রারম্ভ: হায়বদি অরোইবা অমদগী করিগুম্বা অহৌবা অমা লাকই। অমৃত মহোৎসব লোইশিনখিবগা লোয়ননা মেরা য়ুব ভারত সঙ্গথন, MY ভারত ঙসি হৌদোকখি। মসি ভারতকী নহারোলগী প্রোক্লেমেসন অমনি। মসিনা লৈবাক্কী নহারোল খুদিংমকপু অচবা মেদিয়ম অমদা পুশিন্নবা প্লেৎফোর্ম অমনি। মসিনা লৈবাক্কী নহারোলশিংনা লৈবাকা শেমগৎপদা চাউনা শরুক য়াবা ঙমহল্লগনি। নহারোলগীদমক পাঙথোকপা তোঙান-তোঙানবা প্রোগ্রামশিং অসি মসিদা য়াওহনগনি। ঙসি MY ভারত ৱেবসাইৎসু লোঞ্চ তৌখি। ঐহাক্না হায়জগে মদুদি ঙসিগী নহারোলনা মসিগা য়ারিবা মখৈ কন্নেক্ত তৌবীয়ু। ভারতপু অনৌবা ইনর্জীনা থলহনবীয়ু, ভারতপু মাংদা পুখৎনবা ৱাশক লৌবীয়ু, খোঙথাংশিং লৌখৎপীয়ু অমসুং মাইপাক্নবা থৌনা লৈনা হীংবীয়ু।

মরুপশিং,

ভারতকী নীংতম্বা অসি ঐখোয়গী অমত্তা ওইবা ৱাশকখশিং অদু থুংহনবনি। ঐখোয়না মখা তানা মসিবু অমত্তা ওইনা ঙাকশেনগদবনি। ঐখোয়না 2047 ফাওবদা লৈবাক অসিনা নীংতম্বা ফংলকপা চহি 100 শুরকপা মতমদা ভারতপু চাউখৎপা লৈবাক অমা ওইহনগদবনি। ঐখোয়না লৌখিবা ৱাশক অদু থুংহনগদবনি। মরম অসিনা ঐখোয়গী খোঙথাংশিং কনশিনবা তাই। ভারত মচা খুদিংমক্না শরুক তম্বা অদু চাউখৎপা লৈবাক অমা ওইহন্নবা পান্দম ফংনবা চংশিনবদা য়াম্না মরু ওই।

লাকপীয়ু ময়াম পুন্না চাউখৎপা ভারত অমগী অমৃত কালগী অনৌবা খোংচৎ অমা অমৃত মহোৎসব লোইশিল্লকপগা লোয়ননা হৌরসি। ঐখোয়গী মঙলানশিং অসি ৱাশক ওইহল্লসি, ঐখোয়গী ৱাশক অসিগীদমক কন্না হোৎনরসি, 2047দা মাইপাকপা ফংলবা খক্তদা নখোয়না লেপকদবনি। লাক্লো নহারোল অখাং কনবগা লোয়ননা মাংদা চংশিল্লসি।

ঐহাক্কা লোয়ননা হায়বীয়ু অমসুং MY ভারত সঙ্গথন লোঞ্চ তৌবগী নুমিৎ অসিদা নখোয়গী মোবাইল ফোন পুথোক্তুবা ফ্লাশ ওন তৌবীয়ু। আজাদী কা অমৃত মহোৎসবকী অনৌবা মচুনা থল্লি, অনৌবা হরাও-নুংঙাইবা, অনৌবা খুদোংচাবশিংনা থল্লি, ঐহাক্কা লোয়ননা হায়বীয়ু -

ভারত মাতা কী – জয়!

ভারত মাতা কী – জয়!

বন্দে – মাতরম!

বন্দে – মাতরম!

বন্দে – মাতরম!

হন্না-হন্না থাগৎচরি!

*****