মালেমগী মফম শিনবা থুংবদগী মমিং লৈরবা ফিল্মমেকরশিং, সিনেমাতোগ্রাফরশিং, ফিল্ম প্রদ্যুসরশিংবু ৫৪শুবা IFFIগী ইন্তরনেস্নেল জুরী ওইনা ফিল্ম কুমহৈ অসিদা ইন্তরনেস্নেল কম্পিতিসন অমদি বেস্ত দেবু ফীচর ফিল্ম ওফ এ দাইরেক্তর মনা খন্ননবগীদমক পাউকৎ পীখ্রে‍। চহি অসিগী কুমহৈ অসিদা রেকোর্দ ওইনা লৈবাক ১০৫দগী এন্ত্রী ২৯২৬ লাকখি‍।

‘ইন্তরনেস্নেল কম্পিতিসন’ অসি মাস্তর অমদি নহা ওইরিবা খোঞ্জেলশিংনা শেম্বা ফিল্মগী মশক মওং অমদি পোলিতিক্সকী নৌনা থোরক্লিবা মচৎপু মহুৎ শিল্লিবা মরুওইবা জনরশিংগী মীয়াম্না শিংথানবা ফীচর ফিল্ম ১৫ খনগৎপনি‍। ইন্তরনেস্নেল জুরী অসিনা গোল্দন পীকোক, লুপা লাখ ৪০গী শেলগী মনা অমদি দাইরেক্তর অমদি প্রদ্যুসরগী সর্তিফিকেৎ য়াওবা বেস্ত ফিল্ম এৱার্দ ফংগদবা ফিল্ম খনগনি‍।

বেস্ত ফিল্মগী মথক্তা, জুরী অসিনা বেস্ত দাইরেক্তর, বেস্ত এক্তর (নুপা), বেস্ত এক্তর (নুপী) অমদি স্পিসিএল জুরী প্রাইজকী অথোইবশিংসু লেপকনি‍।

‘কম্পিতিসন ফোর বেস্ত দেবু ফীচর ফিল্ম ওফ এ দাইরেক্তর’ অসি মথঙগী মীরোলগী ফিল্মমেকরশিংনা স্ক্রীন্দা পুশিল্লক্লিবা মচৎশিংবু তাকপা ফিক্সন ফীচর অহানবা পুথোকপশিংগী খোমজিনবা অমনি‍। সিল্ভর পীকোকো লুপা লাখ ১০ অমদি সর্তিফিকেৎ য়াওবা লেমজনিংঙাই ওইরবা মনা অসিগীদমক অহানবা ফিল্ম পুথোকপা মীওই ৭না অথোই অহেন তান্নগনি‍।

ইন্তরনেস্নেল জুরীগী মেম্বরশিং ফিল্মমেকিংগী মচং ওইবা মায়ওনশিংগী মহুৎ শিল্লিবা মমিং লৈরবা ইন্দস্ত্রী অসিদা মতম কুইনা থবক তৌরক্লবা মীওইশিংনি‍।

১.         মিস্তর সেখর কপুর (ফিল্মমেকর) – চেয়রমেন, জুরী – সেখর কপুর মমিং লৈরবা ফিল্মমেকর, এক্তর, নেরেতর অমদি প্রদ্যুসর অমনি‍। মহাক গোল্দন গ্লোব অমদি ওস্কারকী নোমিনেসন ফংবতা নত্তনা পদ্ম শ্রী, নেস্নেল ফিল্ম এৱার্দ, BAFTA এৱার্দ, নেস্নেল বো্দ ওফ রিভিউ এৱার্দ অমা অমদি ফিল্মফেয়র এৱার্দ অহুম য়াওনা মনা কয়া ফংখ্রবা মীওই অমনি‍‍। মহাক কেন্স ইন্তরনেস্নেল জুরী (২০১০)গী হান্নগী অমদি IFFI জুরী চেয়রমেন (২০১৫) ওইখ্রবা মীওইনি‍। মহাক ফিল্ম এন্দ তেলিভিজন ইন্সতিত্যুৎ ওফ ইন্দিয়াগী প্রেসিদেন্ত ওইনসু থৌ পুরম্লে‍।

২.         মিস্তর জোস লুইস এক্লেন (সিনেমাতোগ্রাফর) – জোস লুইস এক্লেন ১৯৭০গী মতমদা ফ্লুওরেস্সেন্ত ত্যুববু মরুওইবা লাইতিং ওইনা শীজিন্নখিবা অহানবা সিনেমাতোগ্রাফরনি‍। মহাক বেলে ইপোক (একাদমী এৱার্দ ফোর বেস্ত ফোরেন লেঙ্গুএজ ফিল্ম, ১৯৯৩), তু মচ (১৯৯৫), ব্লাস্ত ফ্রোম দি পাস্ত (১৯৯৯), অমদি দি স্কিন আই লিব (২০১১) অসিনচিংবা ফিল্মশিংদা থবক তৌখ্রে‍। মনা কয়া ফংখ্রবা জোস লুইস, পেদ্রো অল্মোদোবারগা পুন্না থবক তৌমিন্নবগীদমকসু মীয়াম্না খঙনৈ‍।

৩.         মিস্তর জেরোমী পাইলার্দ (ফিল্ম প্রদ্যুসর অমদি ফিল্ম মার্কেৎকী হান্নগী মকোক) – ক্লাসিকেল রেকোর্দ লেবেল অমগী ক্লাসিকেম ম্যুজিক্সিয়ন, আর্তিস্তিক দাইরেক্তর অমদি CFO ওইনা মথঙ মথঙ থবক তৌরম্লবা মতুংদা, রেরোমী পাইলার্দনা দেনিএল তোস্কন দু প্লান্তিয়রগা লোয়ননা ইরাতো ফিল্মতা সত্যজিৎ রে, মেহদী চরেফ, সুলেমান কিসে, মৌরিস পিয়ালৎ, জোন-চার্লস তচেল্লানচিংবা মমিং চৎলবা দাইরেক্তরশিংগী ফীচর ফিল্ম দজন অমা হেন্না পুথোকখ্রে‍। মদুগী তুংদা মহাক ফেস্তিবেল দি কেন্সতা ১৯৯৫ তগী ২০২২ ফাওবা মার্চ দু ফিল্মগী একজেক্যুতিব দাইরেক্তর ওইনা থৌ পুদুনা হৌজিক মালেমগী মকোক থোংবা ফিল্ম মার্কেৎ ওইরক্লিবা অসি শেমগৎ শাগৎলকপা অমদি চলাইবগী থবক য়েংশিল্লম্মি‍।

৪.         মিস কেথরিন দুসার্ত (ফিল্ম প্রদ্যুসর) – কেথরিন দুসার্ত লৈবাক ১৫ রোমদা ফিল্ম ১০০গী ময়াদা পুথোকখ্রে নৎত্রগা অতোপ্পগা পুন্না পুথোকমিন্নখ্রে‍। মহাকপু হুহুৱা সিজী লিঙ্ঘুন কে (২০১৭), দি মিসিং পিকচর (২০১৩) অমদি এক্সফিল (২০১৬)গীদমক খঙনৈ‍। মহাক্কী কুইদ্রিবা প্রদক্সনশিংগী মরক্তা অমোস গিতাইগী লাইলা ইন হাইফা (২০২০ ভেনিস ফিল্ম ফেস্তিবেলদা অথোই অহেন তান্নবা য়াওখিবা); রিথী পন্হগী লেস ইরেদিজ (ইরেদিএতেদ) (২০২০ বর্লিন ফিল্ম ফেস্তিবেলদা বেস্ত দোকুমেন্তরী মনা ফংলকখিবা) য়াওরি‍। কেথরিন দুসার্ত দোহা ফিল্ম ইন্সতিত্যুৎকী কন্সলতেন্ত অমনি‍।

৫.         মিস হেলেন লীক (ফিল্ম প্রদ্যুসর) – হেলেন লীক এ.এম. ওস্ত্রেলিয়াগী মীয়াম্না ইকায়খুম্নবা ক্রিএতিব দাইরেক্তরশিংগী মরক্তা অমনি‍। মহাক্কী ফীচর ক্রেদিৎশিংগী মরক্তা এলেকজেন্দ্রা পার্ক, সিসি স্ত্রিঙ্গর অমদি হেরী গ্রীনৱুদকা লোয়ননা থবক তৌমিন্নখিবা কার্নিফেক্স, জেসন ক্লার্ককা লোয়ননা থবক তৌমিন্নখিবা স্বর্ভ, ৱোল্ফ ক্রীক ২, রসেল ক্রোগা লোয়ননা থবক তৌমিন্নখিবা হেবন্স বর্নিং অমদি রোবর্ত কারলাইল, দেবিদ ঙুমবুজরা অমদি চার্ল্স দান্সনা কুম্বা ব্লেক এন্দ ৱাইত য়াওরি‍।

IFFI খা এসিয়াদা খ্বায়দগী চাউনা মালেমগী সিনেমাবু হরাও তয়াম্না পাঙথোক্নবগীদমক মালেমগী অমদি লৈবাকসিগী ফিল্ম ইন্দস্ত্রীগী হৈথোই শিংথোইরবশিং অমদি সিনেমাদা ঙাওজবা মীওই লিশিং কয়া তিন্দুনা য়েংবদা ফজরবা গোৱা স্তেত্তা নবেম্বর ২০ – ২৮, ২০২৩ ফাওবা পাঙথোক্কনি‍।

****