ভারতকী রাস্ত্রপতি, শ্রীমতি দ্রৌপদি মুর্মুনা ঙসি (ওক্তোবর 27, 2023), তমিল নাদুগী চেন্নৈদা লৈবা ইন্দিয়ন মেরিতাইম য়ুনিভর্সিতীগী 8শুবা কনভোকেসন্দা শরুক য়াখিবগা লোয়ননা মহাক মশাগী ৱারোল খরসু থমখ্রে।

রাস্ত্রপতিনা ঙসিগী থৌরমদা ৱা ঙাঙবদা, ভারত্তা কিলোমীতর 7,500 শাংবা সমুদ্রগী তোর্বান অমসুং ওফশোর ইথৎ 1,382গা লোয়ননা মশক থোকপা মেরিতাইম পোজিসন অমা লৈ হায়খি। মেরিতাইম ত্রেদ রুতকী ওইনা য়েংলুবদা স্ত্রেতজিক য়াম্না লৈবা মফম অমদা লৈবগা লোয়ননা ভারতকী চত্থোক চৎশিন য়াগদবা কিলোমীতর 14,500গী ঈশিং লম্বী লৈ হায়না মহাক্না মখা তাখি। লৈবাক্কী মেরিতাইম সেক্তরনা লৈবাক্কী ত্রেদ অমসুং শেন্মিৎলোনগী শাহৌদা য়াম্না মরু ওইরিবনি, অমসুং লৈবাক্কী অপুনবা ত্রেদকী চাংবু ভোল্যুম অমসুং ভেল্যুদা য়েংবদা মথংশিৎনা চাদা 95 অমসুং চাদা 65কী শরুক্তি মেরিতাইম ত্রান্সপোর্তকী খুত্থাংদা পাংথোক্লিবনি। কোস্তেল ইকোনোমীনা ভারত্তা ঙামী মিলিয়ন 4দগী হেনবগী পুন্সি মহিং তালহল্লি অমসুং ভারত অসি ঙা ফানবা হি চাউরাক্না 2,50,000 লৈদুনা মালেমগী ঙা পুথোকপা লৈবাক্কী ওইনা অনিশুবা থাক্তা লৈরিবনি।

ঐখোয়না সেক্তর অসিগী মপুং ফাবা কান্নবা লৌদ্রিঙৈগী মমাংদা, ঐখোয়গী নুংগী ওইবা শিংনবশিংবু মায়থীবা হান্না পীবগী মথৌ তাই হায়না রাস্ত্রপতিনা হায়খি। লুবগী মতাংদা অকক্নবা খরা লৈবনা, য়াম্লবা কার্গো জহাজ কয়া অমা মনাক নকপা অতোপ্পা লৈবাকশিংদা থৌদোকখ্রবনি হায়না মহাক্না মখা তাখি। মর্চেন্ত অমসুং সিভিলিয়ন শিপবিলদিং ইন্দস্ত্রীগী ওইনা, ঐখোয়না ইফিসিএন্সী, ইফিকেসী অমসুং কম্পিতিতিবনেসকী মতাংদা খ্বাইদগী ৱাংবা স্তেন্দর্দ লৈনবা পান্দম থম্বগী মথৌ তাই হায়না মহাক্না অমুক্কা মখা তারদুনা হায়খি। ভারতকী হিথাংফমশিংগী তর্নঅরাউন্দ তাইম অমসুং থবক নীংথিনা তৌবগী চাং অসিগা মালেমগী বেঞ্চমার্ক ওইরিবা স্তেন্দর্দশিংগা মান্নহনবগী মথৌ তাই হায়বা ৱাফমদা মহাক্না পুম্নমক্কী পুক্নীংন চীংশিনখি। ভারতকী হিথাংফমশিংনা মথংগী থাক্তা কাদ্রিঙৈদা, ইনফ্রাস্ত্রকচর অমসুং ওপরেসনগা মরী লৈনবা শিংনবশিং হান্না মাইয়োক্নবা তারি হায়না মহাক্না ফোংদোকখি। সাগরমালা প্রোগ্রাম্না “পোর্ত দিভেলপমেন্ত”তগী “পোর্ত লেদ দিভেলপমেন্ত”তা লাকহনখিবা মশক নাইরবা খোঙথাং অমনি হায়না মহাক্না হায়খি।

ঐখোয়গী মতমগী খ্বাইদগী চাউবা শিংনবা অসিদি অইং-অশাগী শিংনবশিং অমসুং মসিনা থোকহনবা ঙম্বা অমাঙ-অতা কয়াশিং অসিনি হায়না রাস্ত্রপতিনা হায়খি। মসিগী মনুংদা তেম্পেরেচর অমসুং সমুদ্রগী থাক ৱাংখৎলক্লিবা অসিসু য়াওরি। মেরিতাইম সেক্তরনা মিৎকুপ নাহুম শিংনা লৈদুনা মরী লৈনবা থৌদোক থোক্লকপা মতমদা মীয়ামগী তেংবাংনবা শেম শাদুনা লৈবগী মথৌ তাই। মহৈরোইশিংগী মফমদা প্রোফেস্নেল ওইবগী থৌদাংখক্তা নত্তনা খুন্নাইগী ইকোলোজী অমসুং ইকোসীস্তেম ফনা থম্বগা মরী লৈনবা থৌদাং অমসু লৈগদবনি হায়না মহাক্না হায়খি। হৌজিক মতমগী খ্বাইদগী মরু ওইবা ৱাফম অসিদি শিপ্পিং য়াওনা মেরিতাইমগা মরী লৈনবা থবক থৌরম খুদিংনা সস্তেনেবল ওইবা অসিনি। সমুদ্রদা হান্নদগী হেন্না রেজিলিএন্ত ওইবা অমসুং গ্রীনর প্রেক্তিস শিজিন্নবা হায়বসি অফবা ইকোসীস্তেম অমগীদমক্তা তঙাই ফদবনি।

সেন্ত্রেল য়ুনিভর্সিতীশিংগী মরক্তা খ্বাইদগী নৌরিবশিংগী মনুং চঞ্জরবসু, ইন্দিয়ন মেরিতাইম য়ুনিভর্সিতীনা মশাগী মতিক তাক্লে হায়না রাস্ত্রপতিনা হায়খি। মখোয়না মালেমগী মমিং চৎলবা মেরিতাইম এজুকেসন, রিসর্চ, ত্রেনিংগী মফম ওইদুনা মেরিতাইম লো, ওসীন গবর্নেন্স অমসুং মেরিতাইম সাইন্সকুম্বা মরী লৈনবা হীরমশিংদা লৈরিবা মখোয় মহৈ-মশিংবু হেন্না পাকথোক চাউথোকহনবগা লোয়ননা একাদমিক পার্ত্নরশিপ অমসুং কেপাসিতী বিলদিং তৌবা ঙম্বা মফম অমা ওইবগী মতিক মখোয়দা লৈ।

রাস্ত্রপতিগী ৱারোল মফমসিদা নম্বীদুনা পাবীয়ু

***