মখোয়গী খুৎইশিংগীদমক চহি ২০২৩গী মনা ফংলবশিং ইকায়খুম্নবা উৎনবা ওক্তোবর ২৩,২০২৩দা নিউ দিল্লিগী বিগ্যান ভাবন্দা পেন্সন অমসুং পেন্সন্নরস ৱেলফিয়ার দিপার্তমেন্তনা শীন্দুনা অনুভাব এৱার্দ ২০২৩ য়েন্থোকপগী থৌরম পাংথোক্কনি। পর্সোনেল, পব্লিক গ্রিভান্সেস অমসুং পেন্সন্সকী য়ুনিয়ন মিনিস্তর দোক্তর জিতেন্দ্র সিংহনা মনাশিং য়েন্থোক্কনি।

প্রধান মন্ত্রীগী লুচিং মখাদা ২০১৫দা পেন্সন অমসুং পেন্সন্নরস ৱেলফিয়ার দিপার্তমেন্তনা অনুভাব পোর্তেল হৌদোকখি। থবক্তগী পোথারগদবা/পোথারবা ইমপ্লোয়িশিংনা মখোয়না পাংথোকখিবা অফবা থবকশিং উৎনবা অমসুং পীশিন্নবা, সরকারগী থবক তৌবদা থেংনখিবা থৌদোকশিং অমসুং লৈঙাক থবক ফগৎহন্নবা পাউতাকশিং পীশিন্নবা পোর্তেল অসিনা ওনলাইনগী সিস্তেম অমা পীরি। দিপার্তমেন্ত অসিগী অনুভাব পোর্তেলদা মিনিস্ত্রিশিং/দিপার্তমেন্তশিং/লুপশিং ৯৬ রেজিস্তার তৌরে অমসুং হৌজিক ফাওবদা খুৎই ১০০০০ হেন্না ফোঙখ্রে।

অথুবা মতমদা থবক্তগী পোথারগদবা/পোথারবা ইমপ্লোয়িশিংনা খ্বাইদগী মশিং য়াম্না খুৎইশিং পীশিন্নবা অনুভাব থৌরম অসি পাংথোকপনি। থৌরম অসি ২০১৫দা হৌদোকপদগী খ্বাইদগী মশিং য়াম্বা ওইনা খোঙজং অসিগী ফল ওইনা অনুভাবকী লাইরিক ১৯০১ ফোঙখ্রে। সি.আই.এস.এফকী রাইত অপসনা মশিং খ্বাইদগী য়ামখি। মখোয় চেকশিন্না য়েংশিল্লবা মতুংদা, অনুভাব মনা ৪ অমসুং জুরিল সর্তফিকেদ ৯ পীনবা ৱারেপ লৌখিবনি। মনা ফংলবা মীওইশিং অদু তোঙান-তোঙানবা দিপার্তমেন্ত/মিনিস্ত্রি ৮দগীনি। থবক অসি পাক-শন্না শরুক য়ানবা পুক্নিং থৌগৎনবা অহানবা ওইনা জুরি সর্তফিকেদ ৯ পীগনি। অনুভাব মনা ফংলবা মীওই অমদা মেদল অমা, সর্তিফিকেদ অমা অমসুং লুপা লিশিং ১০ পীগনি। জুরি সর্তিফিকেদ ফংলবশিংদা মেদল অমা অমসুং সর্তিফিকেদ অমা পীগনি।

পেন্সন্নরশিং হিংবদা লাইনবা মাইকৈদা থাংজিনবা অনৌবা খোঙথাং অমা ওইনা ভারত সরকারগী থবক্তগী পোথারবা ইমপ্লোয়িশিং কান্নবা পীনবা পেন্সন অমসুং পেন্সন্নরস ৱেলফিয়ার দিপার্তমেন্তনা শীন্দুনা প্রি-রিতাইয়রমেন্ত কাউন্সেল্লিং ৱার্কশোপসু পাংথোক্লি। ৱার্কশোপ অদুদা, অথুবা মতমদা থবক্তগী পোথারগদবা ইমপ্লোইয়িশিংদা পোথারবা মতুংদা ফংগদবা কান্নবশিং অমসুং সেঙ্কসন তৌনবগী মতাংদা মরী লৈনবা ই-পাউশিং পীগনি।

পেন্সনগী খুদোংচাদবশিং কোকহন্নবা অফবা মফম অমা ওইনা ওল ইন্দিয়া পেন্সন অদালত লৈরে। হৌজিক ফাওবদা পেন্সন অমসুং পেন্সন্নরস ৱেলফিয়ার দিপার্তমেন্তনা শীন্দুনা পেন্সন অদালত ৮ পাংথোকখ্রে অমসুং পেন্সন অদালত্তা লৌখৎখিবা কেস ২৪,৬৭১গী মনুংদা খুদোংচাদবা কেস ১৭,৫৫১(চাদা ৭১) ৱারোইশিন পুরকখ্রে অমসুং মসিদা তোঙান-তোঙানবা মিনিস্ত্রিশিং/দিপার্তমেন্তশিং/লুপশিং শরুক য়াখি।

মতুং তারকপদা, নিউ দিল্লিদা থিমেতিক ওল ইন্দিয়া পেন্সন অদালত পাংথোক্কনি অমসুং মসিদা পেন্সন অমসুং পেন্সন্নরস ৱেলফিয়ার দিপার্তমেন্তনা শীন্দুনা মিনিস্ত্রিশিং/দিপার্তমেন্তশিংগী পন্দুনা লৈরিবা পেন্সন পীনবগী কেসশিং লৌখৎকনি অমসুং ভারতকী অতোপ্পা মফমশিংদসু পাংথোক্কনি।

নৌনা শেমখিবা “ইন্তেগ্রেতেদ পেন্সন্নরস পোর্তেল”(https://ipension.nic.in) দা পোর্তেলশিং হায়বদি পেন্সন দিসবর্সিং বেঙ্ক পোর্তেল, অনুভাব, সি.পি.ই.এন.জি.আর.এ.এম.এস, সি.জি.ঐচ.এস পুনশিনগনি অমসুং পেন্সন ফংলবশিং হিংনবদা লাইহন্নবা পেন্সন অমসুং পেন্সন্নরস ৱেলফিয়ার দিপার্তমেন্তনা ৱারেপ লৌরে।

পেন্সন ফংলবশিংনা বেঙ্কতা থেংনরিবা খুদোংচাদবশিং হায়বদি বেঙ্ক হোংবা, লাইফ সর্তিফিকেদ পীশিনবা, পেন্সন ফংলবশিংগী দেথ সর্তিফিকেদ পীশিনবা, পেন্সন স্লিপ অমসুং পেন্সন শ্লিপ অমুক লৌবা, ইনকম তেক্স ককপগী দেতা/ফোর্ম ১৬, পেন্সন রিসিপগী খুদোংচাদবশিং কোকহন্নবা পেন্সন পীরিবা বেঙ্কশিংগী ৱেবসাইতশিং ইন্তেগ্রেতেদ পেন্সন্নরস পোর্তেলদা পুনশিনগনি। এস.বি.আইগী পেন্সন সেবা পোর্তেল অমসুং কনারা বেঙ্কগী ভবিস্যা পোর্তেল পুনশিনবগী থবক লোইরে।

হৌজিক পঞ্জাব নেসনেল বেঙ্ক অমসুং বেঙ্ক ওফ বরোদা মখোয়গী পেন্সন পোর্তেলশিং ইন্তেগ্রেতেদ পেন্সন্নরস পোর্তেলগা পুনশিল্লে। খুদোংচাবা ৪ হায়বদি, থাগী পেন্সন শ্লিপ, লাইফ সর্তিফিকেদকী ফিবম, পেন্সন্নরশিংগী ফোর্ম ১৬ পীশিনবা অমসুং পেন্সন এরিয়ারগী দিউ অমসুং দ্রাউনগী ৱারোলশিং হায়রিবা বেঙ্কশিং অসিনা পীগনি। থৌরম অদুদা য়ুনিয়ন মিনিস্তরনা পঞ্জাব নেসনেল বেঙ্ক অমসুং বেঙ্ক ওফ বরোদাগী ইন্তেগ্রেতেদ পেন্সন্নরস পোর্তেল হৌদোক্কনি।

কেন্দ্র সরকারগী পেন্সন ফংলবা ইমপ্লোয়ি লাখ ৭০ না মখোয়গী লাইফ সর্তফিকেদ পীশিনবা ঙম্নবা নবেম্বর ২০২৩দা পেন্সন অমসুং পেন্সন্নরস ৱেলফিয়ার দিপার্তমেন্তনা শীন্দুনা লৈবাক শীনবা থুংনা দিজিতেল লাইফ সর্তিফিকেদ কেম্পেন ২.০ পাংথোক্কনি। বেঙ্ক ১৭ কা খুৎশম্নদুনা ভারতকী সহর ১০০গী মফম ৫০০ হেনবদা দি.এল.সি কেম্পশিং পাংথোক্কনি। মসিগী কেম্পেন অসি য়েংশিন্নবা নিউ দিল্লিগী বিগ্যান ভাবন্দা ওক্তোবর ২৩,২০২৩দা য়ুনিয়ন মিনিস্তরনা নেসনেল দি.এল.সি পোর্তেল হৌদোক্কনি।

****