রেলৱেগী লন-থুম, পেসেঞ্জরগী মফম অমসুং পেসেঞ্জরশিংগী ঙাক শেনবগী থৌদাং খুদিংমক রেলৱে প্রোতেক্সন ফোর্স (RPF)কী মফমদা শিন্নৈ। ফোর্স অসিনা পেসেঞ্জরশিংদা তেক্ত-কায়দবা, অশোক-অপন লৈতবা অমসুং নুংঙাইনা ত্রাভেল তৌবদা তেংবাংনবা মতম চুপ্পদা থবক তৌই। মসিনা ইন্দিয়ন রেলৱেজতা মখোয়গী কস্তমরশিংদা অশোয়-অঙাম য়াওদবা ফ্রৈত ত্রান্সপোর্ত সর্ভিস পীবদসু তেংবাংই। RPFনা রেলৱেগী য়াম্লবা লন-থুম ঙাক শেনবগী থৌদাং মশক থোক্না পাংথোক্লি অমসুং লৈবাক্কী মফম খুদিংদা লৈদুনা রেলৱেগী লন-থুমগী মাঙহন-তাকহনবা অমসুং হুরান চিন্থী থোকহন্দনা অমসুং থোক্লকপা মতমদসু মতিক চাবা থবক পায়খত্তুনা লাক্লি অমসুং মরী লৈনবা চেকশিন থৌরাং কয়াসু লৌখৎলি।

সেপ্তেম্বর 2023দা RPFনা ফংখিবা মায় পাকপশিংগী শম্লপ্পা ৱারোল খরা মখাদা পীরি –

• অঙাংশিং কনবা অমসুং ওপরেসন ফরিশ্তে – তোঙান-তোঙানবা মরম কয়াদগী মাঙখ্রবা অঙাং কয়াগা মমা মপাশিংগা অমুক্কা হন্না উন্নহনবদা RPFনা মরু ওইবা থৌদাং অমা লৌরি। হীরম অসিগী মতাংদা, ইন্দিয়ন রেলৱেজনা ওপরেসন ‘ননহে ফরিশ্তে’ হৌদোকখি অমসুং খোঙথাং অসিগী মখাদা, সেপ্তেম্বর 2023দা ইন্দিয়ন রেলৱেজনা থেংনরকখিবা ঙাকপী শেনবীবগী মথৌ তাবা অঙাং 895 (নুপামচাঃ 573 অমসুং নুপীমচাঃ 322) কনখি অমসুং মখোয়বু মরী লৈনবা ওথোরিতীশিংদা খুৎশিন্নরবা মতুংদা মখোয়গী ইমুং মনুংদা তেক্ত কায়দনা য়ৌহনখি।
• হ্যুমেন ত্রাফিক্কিং অমসুং ওপরেসন HHT  - হ্যুমেন ত্রাফিক্করশিংগী ফত্ত্রবা থৌরাংশিংগা মাইয়োক্নবা ঙম্নবগীদমক্তা RPFকী এন্তি হ্যুমেন ত্রাফিক্কিং য়ুনিৎনা ইন্দিয়ন রেলৱেজকী পোস্ত লেভেল (থাবা লেভেল)গী থাক্তা মথৌ তৌরি। মসিগুম্বা AHTUশিং অসিগা হ্যুমেন ত্রাফিক্কিং থিংনবগীদমক্তা লৈবা এজেন্সী অমসুং NGOশিংগা চাং নাইনা পাউ ফাওনৈ অমসুং ত্রাফিক তৌরবা অঙাংশিং কনবদা মখোয়গী মতেংসু পাংলি। সেপ্তেম্বর 2023গী থাদা মীওই 29বু হ্যুমেন ত্রাফিক তৌবা মীওইশিংগী মখুত্তগী কনবা ঙমখি অমসুং হ্যুমেন ত্রাফিক তৌবা মীওই 14সু ফাগৎপা ঙমখি।
• ওপরেসন “জীবন রক্ষা” – RPFকী খোঙজেল য়াঙবা অমসুং মীকুপ নাহুম শিংবা মতৌনা, ত্রেন্না তক্কে খজিক্তং ঙাইবা পেসেঞ্জর 265পু RPFনা রেলৱে ত্রেক অমসুং প্লেতফোর্মদগী কনবা ঙমহনখি। থবকশিং অসি ওপরেসন জীবন রক্ষাগী মখাদা পাংথোকখিবনি।
• নুপীশিংগী তেক্ত কায়দবা – নুপী পেসেঞ্জরশিংগী তেক্ত কায়দবা হায়বসিনা ইন্দিয়ন রেলৱেজকী খ্বাইদগী মরু ওইবা ৱাখল্লোন ওইদুনা লাক্লি। হীরম অসিগা মরী লৈননা, ‘মেরি সহেলী’ কৌবা খোঙথাং অমা হৌদোকখি অমসুং মসিগী মখা পোন্না, লোং দিস্তেন্স ত্রেন, মরু ওইনা ক্রাইম থোকপা য়াবা মফমদা মথন্তনা চৎপীশিংবু শোইদ-ঙামদনা ঙাক শেনবগী থবক পায়খৎলি। মখা তারকপা ওইনা, সেপ্তেম্বর 2023দা মেরি সহেলী 231না ত্রেন 13071 শেন্নখি অমসুং নুপী পেসেঞ্জর 421198তা সেক্যুরিতী এসিস্তেন্স পীখি।

মখা তারকপদা, নুপীশিংগী খাকপা কোচতা ত্রাভেল তৌরম্বা মীওই 6033গী মাইয়োক্তা RPFনা সেপ্তেম্বর 2023দা থবক পায়খৎখি।

• তিকেত কালা বজার তৌবা অমসুং ওপরেসন “উপ্লব্ধ” – RPFনা হীরম অসিগা মরী লৈননা সেপ্তেম্বর 2023দা তিকেত কালা বজার তৌবা মীওই 405 ফাগৎখি অমসুং মখোয়গী মথক্তা আইনগী মখা পোনবা থবকসু পায়খৎখিবগা লোয়ননা চাউরাকপা লুপা লাখ 36.43গী ফ্যুচর তিকেত কয়াসু ফাগৎপা ঙমখি।
• ওপরেসন ‘নার্কোস’ – সেপ্তেম্বর 2023গী মনুংদা, লুপা করোর 2.65কী NDPSকা লোয়ননা মীওই 70 ফাগৎখি, ফাগৎলবা মীওইশিং অসিবু আইনগী মখা পোনবা থবক পায়খৎনবগীদমক্তা মরী লৈনবা এজেন্সীশিংগী মফমদা খুৎশিন্নখি।
• ইমর্জেন্সী রেস্পোন্স অমসুং ওপরেসন ‘য়াত্রী সুরক্ষা’ – অৱাবা তারবা পেসেঞ্জরশিংগী সেক্যুরিতীগা মরী লৈনবা ৱাকৎ লৌদুনা মদুগী ৱারোইশিন পীনবা অমসুং খুদক্কী ওইবা তেংবাং পীনবগীদমক্তা, পেসেঞ্জরশিংনা রেল মদদ পোর্তেল নত্ত্রগা হেল্পলাইন নম্বর-139 (ইমর্জেন্সী রেস্পোন্স সপ্পোর্ত সীস্তেম নম্বর – 112গা পুনশিল্লবা)দা পাউ পীবা য়াগনি। সেপ্তেম্বর 2023গী মনুংদা, ৱাকৎ 28,000 হেন্না ফংখি অমসুং মখোয়গী ৱারোইশিন পীনবগীদমক্তা তঙাই ফদবা থবকশিং পায়খৎখি।

***