হকশেল অমদি য়াইফ-য়ুম্বালগী কেন্দ্র মন্ত্রী, দোক্তর মনসুখ মন্দাবিয়ানা ঙসি নগালেন্দগী মুখ্য মন্ত্রী শ্রী নৈফিউ রিও; নগালেন্দগী উপ-মুখ্য মন্ত্রী শ্রী তি.আর. জেলিয়াং অমদি নগালেন্দগী হকশেল অমদি য়াইফ-য়ুম্বাল মন্ত্রী শ্রী পি. পাইৱাং কোনয়াক য়াওবা থৌরম অমদা নগালেন্দকী কোহিমাদা নগালেন্দ ইন্সতিত্যুৎ ওফ মেদিকেল সাইন্সেস এন্দ রীছর্চ (এন.আই.এম.এস.আর.) শঙ্গাখ্রে‍।

থৌরমদুদা ৱা ঙাংলদুনা, দোক্তর মন্দাবিয়ানা হায়খি, “এন.আই.এম.এস.আর. মেদিকেল কলেলজ অমা ওইবখক নত্তনা, মসি রীছর্চ ইন্সতিত্যুৎ অমসুনি‍। মসিনা মেদিকেলগী মহৈ মশিং তম্বগী পান্দম মপুং ফাহনবখক নত্তনা নগা মীয়ামগী হকশেলগী ৱাফমশিংগীসু পাম্বৈ ওইনরগনি‍।” নগালেন্দা মেদিকেল এজুকেসনগী ফীভম ফগৎহন্নবা কেন্দ্র লৈঙাক্কী খোঙফম পল্লদুনা, শুপ্নতগী চহি ৯ গী মতমসিদা নগালেন্দকী এম.বি.বি.এস. সীত মশিং ৬৪,০০০ দগী ১,৬০,০০০দা হেনগৎলে হায়না মহাক্না হায়খি‍। “মতৌ অসুম্না পি.জি. সীতসু হৌখিবা চহি ৯ অসিদা শরুক অনিদা হেনগৎলে”, হায়না মহাক্না ফোঙদোকখি‍।

কেন্দ্রগী হকশেল মন্ত্রীনা মহৈরোয়শিং অমদি অতৈ স্তেকহোল্দরশিংদা মখোয়গী থিজিন হুমজিনবগী থবক থৌরমশিং লৈবাকসিগী ঙমখৈ মনুংদগী হেন্দোকহন্দবা তৌদনবা পুক্নিং থৌগৎখি‍। “ঐখোয়না মপান লৈবাকশিংদা লৈরিবা খুদোংচাবশিং অসিসু লৌগদবনি”, হায়না মহাক্না হায়খি‍। মহৈরোয়শিং মপান লৈবাক্তা থবক ফংবদা লায়হন্নবগীদমক কেন্দ্র লৈঙাক্না মেদিকেল এজুকেসন ইন্সতিত্যুৎ কয়াদা মপান লমগী লোলশিংগী কোর্সশিংসু হৌদোক্লে হায়না মহাক্না পাউদমখি‍।

লৈবাকসিদা মেদিকেল, নর্সিং অমদি ফার্মাসী এজুকেসন মপাঙ্গল কনখৎহনবা হায়বসি লৈবাকসিগী হকশেলগী সেক্তরদা মপুং ফানা চাওখৎপা পুরক্নবা অমদি পাকথোক চাউথোকহন্নবগীদমক কেন্দ্র লৈঙাক্না পায়খৎপা থৌরাংনি হায়না দোক্তর মন্দাবিয়ানা হায়খি‍। “থম্লিবা পান্দমদি ভারতকী সিতিজন খুদিংমক্তা লৈবাক শিনবা থুংনা পু-থাংবা ঙম্বা অমদি লায়না ফংবা য়াবা লায়েং ফংহনবনি”, হায়না মহাক্না হায়খি‍। ক্বালিতী লৈবা অমদি অহোঙবা মমলদা পুম্নমক্তা হিদাক লাংথক ফংহন্নবগীদমক লৈবাক শিনবা থুংনা জন ঔসথী কেন্দ্র পাকথোক চাউথোকহল্লে হায়বা ৱাফমসু মহাক্না থমখি‍।

“ঙসি অসি ঐখোয়না স্তেত অসিগী অহানবা মেদিকেল কলেজ শঙ্গাবগা লোয়ননা নগালেন্দ মীয়ামগী পুৱারী ওইহৌরগদবা নুমিৎনি”, হায়না শ্রী নৈফিউ রিওনা হায়খি‍। স্তেত অসিদা মেদিকেল কলেজ অমা লৈবা হায়বসি নগালেন্দ মীয়ামগী মতম কুইনদগী ঙায়জরক্লবা মঙলান অমনি হায়বা ৱাফম থম্লদুনা, মহাক্না প্রোজেক্ত অসিবু খোঙজেল য়াঙনা পায়খৎপিবগীদমক কেন্দ্র লৈঙাকপু থাগৎখি‍। এন.আই.এম.এস.আর. অসিনা স্তেত অসিগী সেকেন্দরী অমদি তর্সরী হেল্থকেয়র মপাঙ্গল কনখৎহনবদা মতেং ওইরগনি অমদি মসিনা তুংদা সেন্তর ওফ এক্সেলেন্স অমা ওইরক্কনি হায়না থাজৈ হায়না মহাক্না ফোঙদোকখি‍।

শ্রী কোনয়াক্না এন.আই.এম.এস.আর. শঙ্গারিবা অসি নগালেন্দ স্তেতকী য়াইফরবা পুংফম অমনি হায়খি অমদি স্তেত অসিদা মেদিকেল এজুকেসন অমদি হকশেলগী মচাক মথুম মপাঙ্গল কনখৎহনবদা মরুওইবা মীৎয়েঙ থম্বিবগীদমক কেন্দ্র লৈঙাকপু থাগৎখি‍। এন.আই.এম.এস.আর. কোহিমা প্রোজেক্ততা য়াওরিবা ৱর্ল্দ বেঙ্ক, জপান ইন্তরনেস্নেল কোওপরেসন এজেন্সী (জিকা) অমদি অতহ খোঙবু অমসুং এজেন্সীশিংবুসু থাগৎপা ফোঙদোকখি‍।

এন.আই.এম.এস.আর. কোহিমানা এন.আই.এম.এস.আর.গী মখাদা মিং চল্লক্লিবা এম.বি.বি.এস. মহৈরোয়শিংগী মফমদা মপুং ফাবা মেদিকেল এজুকেসন পীননবা, তোঙান তোঙানবা হেল্থ কেয়র প্রোগ্রামশিং, এক্সত্রা অমদি ইন্ত্রামুরেল রীছর্চ ফেসিলিতীশিংগী খুত্থাঙদা অনাবা মীওইশিংদা মপুং ফাবা লায়েংশঙবা য়ুম্ফম ওইবা অমদি কম্ম্যুনিতী আউতরীচ হেল্থ কেয়র সর্ভিস পীননবা পান্দম থম্লি‍।

এন.আই.এম.এস.আর. অসিনা মাগী স্তেত ওফ দি আর্ত স্কিল দিভেলপমেন্ত দোমেন স্পেসিফিক তীচিং লর্নিং খুৎলায়শিং, লেবোরেতরীশিং, সেন্ত্রেল লাইব্রেরী, শান্ন-খোৎনবগী ফেসিলিতীশিং অমদি মমিং লৈরবা ফেকল্তী অমদি রেসিদেন্তশিং লৈবা মেদিকেল এজুকেসন য়ুনিৎশিংগা লোয়ননা অতৈ মমিং লৈরবা মেদিকেল কলেজশিং অমদি লৈবাকসিগী অমসুং মালেমগী মমিং লৈরবা হেল্থকেয়র ওর্গনাইজেসনশিংগা লোয়ননা খোঙবু ওইবা, এম.ও.য়ু.শিং অমদি নেতৱর্কিংগী খুত্থাঙদা মখা তানা চাওখৎপা পুরক্নবগীদমক কেপাসিতী বিল্দিং, মতিক চাবা অমদি থাজনিংঙাই ওইবা চাওখৎপা, খুৎশম্ননা চৎমিন্নবা অমদি তেংবাংনবদা মীৎয়েঙ থমগনি‍।

এন.আই.এস.এম.আর. কোহিমা নগালেন্দ য়ুনিভর্সিতীদা এফিলিএত তৌবনি‍। মসিনা এপ্রিল ২০২৩দা নেস্নেল মেদিকেল কম্মিসন (এন.এম.সি.)দগী একাদমিক চহি ২০২৩-২৪দগী হৌদুনা এম.বি.বি.এস. সীত ১০০ মিং চলহন্নবা লেত্তর ওফ পর্মিসন ফংদুনা স্তেতহুদ ফংলবা মতুং চহি ৬০গী মতুংদা স্তেত অসিদা অহানবা মেদিকেল কলেজ অমা চলাইনবগী লম্বী য়াত্তুনা, নগালেন্দ মীয়ামগী মতম কুইনা মঙজরক্লবা মঙলান মঙফাওনহনখি‍।

নগালেন্দ স্তেত্তগী এম.বি.বি.এস. মহৈরোয় ৮৫ অমদি ভারত পুম্বদগী মহৈরোয় ৬ এন.আই.এম.এস.আর.দা মিং চল্লে অমদি ১.৯.২০২৩দা পাঙথোকখিবা ইন্দক্সন প্রোগ্রাম মতুংদগী এম.বি.বি.এস. ক্লাস য়াওবা হৌখ্রে‍।

এন.আই.এম.এস.আর. কোহিমা শঙ্গাবা অসি নগালেন্দ অমদি অৱাংনোংপোক লমদম পুম্বদা মেদিকেল এজুকেসন অমদি হকশেলগী মচাক মথুমগী ক্বালিতী ফগৎহন্নবগী লৈঙাক্কী থৌরাংগী মরুওইবা শরুক অমনি‍।

নগালেন্দ লৈঙাক্কী মন্ত্রী মন্দলগী মেম্বরশিং, কেন্দ্র অমদি নগালেন্দ লৈঙাক্কী মকোক থোংবা ওফিসিএলশিং, সিভিল সোসাইতীশিংগী লুপ্লোয়শিং অমদি অখন্নবা মীথুংশিংনা থৌরমদুদা শরুক য়াখি‍।

****