அமேதியில் உள்ள என் அன்பான குடும்ப உறுப்பினர்களுக்கு வணக்கம்!

அமேதியில் நடந்த அமேதி நாடாளுமன்றத் தொகுதி விளையாட்டுகளின் நிறைவு நிகழ்வில் நான் உங்களுடன் இருப்பது மிகவும் சிறப்பு வாய்ந்தது. இந்த மாதம் நம் நாடு விளையாட்டுக்கு உகந்ததாக இருக்கிறது. ஆசிய விளையாட்டுப் போட்டிகளில் நமது வீரர்கள் ஒரு சதம் பதக்கங்களை வென்றுள்ளனர். இந்த விளையாட்டுப் போட்டிகளிலும், அமேதியைச் சேர்ந்த விளையாட்டு வீரர்கள் தங்கள் திறமையை வெளிப்படுத்தியுள்ளனர். அமேதி நாடாளுமன்றத் தொகுதி விளையாட்டுகளில் பங்கேற்ற அனைத்து விளையாட்டு வீரர்களையும் நான் பாராட்டுகிறேன். இந்த போட்டி வழங்கிய புதிய ஆற்றலையும், நம்பிக்கையையும் நீங்கள் உணர்ந்திருக்க வேண்டும், நீங்கள் மட்டுமல்ல, பிராந்தியம் முழுவதும் உள்ள மக்களும் அதை உணர்கிறார்கள், அதைப் பற்றி கேட்பது எனக்கும் அதே உணர்வை ஏற்படுத்துகிறது. இந்த உற்சாகத்தையும், தன்னம்பிக்கையையும் நாம் முன்னெடுக்க வேண்டும். கடந்த 25 நாட்களில் நீங்கள் பெற்ற அனுபவங்கள் உங்கள் விளையாட்டு வாழ்க்கைக்கு ஒரு குறிப்பிடத்தக்க சொத்து. இன்று, ஒரு ஆசிரியர், மேற்பார்வையாளர், பள்ளி மற்றும் கல்லூரி பிரதிநிதியாக பங்கு வகித்த மற்றும் இந்த மகத்தான பிரச்சாரத்தின் மூலம் இந்த இளம் விளையாட்டு வீரர்களுக்கு ஆதரவளித்து ஊக்குவித்த அனைவரையும் நான் பாராட்டுகிறேன். ஒரு லட்சத்துக்கும் மேற்பட்ட விளையாட்டு வீரர்கள், குறிப்பாக இவ்வளவு சிறிய பகுதியில் கூடியது ஒரு குறிப்பிடத்தக்க சாதனையாகும். இந்த நிகழ்ச்சியை வெற்றிகரமாக நடத்திய அமேதி நாடாளுமன்ற உறுப்பினர் ஸ்மிருதி இரானி அவர்களுக்கு எனது வாழ்த்துக்களை தெரிவித்துக் கொள்கிறேன்.

நண்பர்களே,

எந்தவொரு சமூகத்தின் வளர்ச்சிக்கும் விளையாட்டுகளில் வளர்ச்சி இருப்பதும், விளையாட்டுகள் மற்றும் விளையாட்டு வீரர்கள் இருவரும் செழிக்க வாய்ப்புகளை வழங்குவதும் முக்கியம். இலக்குகளை அடைவதற்கான கடின உழைப்பு, தோல்விக்குப் பிறகு விடாமுயற்சி, அணியுடன் முன்னேறுதல் மற்றும் ஆளுமை வளர்ச்சி போன்ற மதிப்புகள் அனைத்தும் விளையாட்டுகள் மூலம் இளைஞர்களிடையே எளிதில் வளர்க்கப்படுகின்றன. நூற்றுக்கணக்கான பிஜேபி எம்.பி.க்கள் அந்தந்த பகுதிகளில் விளையாட்டுப் போட்டிகளை ஏற்பாடு செய்வதன் மூலம் சமூகம் மற்றும் நாட்டின் வளர்ச்சிக்கு வழிவகுத்துள்ளனர். இம்முயற்சிகளின் பலன்கள் எதிர்வரும் ஆண்டுகளில் தேசத்திற்குத் தெரியவரும் என்பதில் ஐயமில்லை. அமேதியின் இளம் விளையாட்டு வீரர்கள் வரும் ஆண்டுகளில் தேசிய மற்றும் சர்வதேச அளவில் பதக்கங்களை வெல்வார்கள் என்று எனக்கு முழு நம்பிக்கை உள்ளது. இந்த போட்டியின் மூலம் பெறும் அனுபவம் அதை அடைவதில் மிகவும் மதிப்புமிக்கதாக இருக்கும்.

நண்பர்களே,

ஒரு வீரர் களத்தில் இறங்கும்போது, அவர்களின் ஒரே குறிக்கோள் தங்களையும் தங்கள் அணியையும் வெற்றி பெறச் செய்வதுதான். இன்று நாடே விளையாட்டு வீரர்களைப் போல சிந்திக்கிறது. விளையாட்டு வீரர்கள் விளையாடும்போது, அவர்கள் முதலில் தேசத்திற்கு முன்னுரிமை அளிக்கிறார்கள். அந்த நேரத்தில், எல்லாவற்றையும் பணயம் வைத்து, நாட்டுக்காக விளையாடுகின்றனர். இந்த நேரத்தில், நாடும் ஒரு பெரிய குறிக்கோளுடன் முன்னேறி வருகிறது. ஒவ்வொரு மாவட்டத்திலும் உள்ள ஒவ்வொரு குடிமகனின் பங்கும் இந்தியாவை வளர்ச்சியடையச் செய்வதில் முக்கியமானது. இதற்காக, ஒவ்வொரு பிராந்தியமும் ஒரே உணர்வு, ஒரே குறிக்கோள், ஒரே தீர்மானத்துடன் முன்னேற வேண்டும். இந்த மனநிலையில், உங்களைப் போன்ற இளைஞர்களுக்காக டாப்ஸ் (டார்கெட் ஒலிம்பிக் போடியம் திட்டம்) மற்றும் கேலோ இந்தியா விளையாட்டு போன்ற திட்டங்களை நாட்டில் செயல்படுத்தி வருகிறோம். இன்று, டாப்ஸ் திட்டத்தின் கீழ் நூற்றுக்கணக்கான விளையாட்டு வீரர்களுக்கு உள்நாட்டிலும் வெளிநாட்டிலும் பயிற்சி மற்றும் பயிற்சி அளிக்கப்படுகிறது. இந்த வீரர்களுக்கு கோடிக்கணக்கான ரூபாய் நிதி உதவி வழங்கப்பட்டு வருகிறது. கேலோ இந்தியா விளையாட்டின் கீழ், 3,000-க்கும் மேற்பட்ட விளையாட்டு வீரர்கள் மாதத்திற்கு ரூ.50,000 உதவித்தொகையைப் பெறுகிறார்கள். இது அவர்களின் பயிற்சி, உணவு, பயிற்சி, கருவிகள், அத்தியாவசிய உபகரணங்கள் மற்றும் பிற செலவுகளை ஈடுசெய்ய உதவுகிறது.

எனதருமை குடும்ப உறுப்பினர்களே,

மாறிவரும் இன்றைய இந்தியாவில், சிறு நகரங்களைச் சேர்ந்த திறமைசாலிகள் முன் வர ஒரு சிறந்த வாய்ப்பு உள்ளது. இன்று ஸ்டார்ட் அப் நிறுவனங்களில் இந்தியாவின் பெயர் பிரதானமாக இருக்கிறது என்றால், அதற்குக் காரணம், சிறு நகர ஸ்டார்ட் அப் நிறுவனங்களும் அதில் முக்கியப் பங்கு வகிக்கின்றன. கடந்த சில ஆண்டுகளில், விளையாட்டு உலகில் சிறந்து விளங்கிய பலர் சிறிய நகரங்களிலிருந்து வெளிப்படுவதை நீங்கள் பார்த்திருப்பீர்கள். ஏனெனில் இன்று இந்தியாவில் இளைஞர்கள் முழுமையான வெளிப்படைத் தன்மையுடன் முன்னேறுவதற்கான வாய்ப்பைப் பெறுகிறார்கள். ஆசிய விளையாட்டுப் போட்டிகளில் பதக்கம் வெல்லும் வீரர்கள் கூட பெரிய நகரங்களைச் சேர்ந்தவர்கள் அல்ல. அவர்களில் பலர் சிறு நகரங்களைச் சேர்ந்தவர்கள். அவர்களின் திறமையை அங்கீகரித்து, அவர்களுக்கு தேவையான அனைத்து வசதிகளையும் செய்து கொடுத்துள்ளோம். இதன் விளைவு உத்தரபிரதேசத்தைச் சேர்ந்த அன்னு ராணி மற்றும் பருல் சவுத்ரி போன்ற விளையாட்டு வீரர்களின் செயல்திறனில் தெளிவாகத் தெரிகிறது, அவர்கள் முழு நாட்டிற்கும் பெருமை சேர்த்துள்ளனர். இந்த நிலம் சுதா சிங் போன்ற விளையாட்டு வீரர்களை நாட்டிற்கு வழங்கியுள்ளது. அத்தகைய திறமைகளை வெளிக்கொணர்ந்து வளர்த்து, அவர்கள் முன்னேற உதவ வேண்டும். அமேதி நாடாளுமன்றத் தொகுதி விளையாட்டுகள் இந்த நோக்கத்திற்காக ஒரு குறிப்பிடத்தக்க ஊடகமாக செயல்படுகிறது.

எனதருமை வீரர்களே,

உங்கள் கடின உழைப்பு வரும் நாட்களில் வெற்றியைத் தரும் என்ற முழு நம்பிக்கை எனக்கு உள்ளது. உங்களில் ஒருவர் உலக அரங்கில் மூவர்ணக் கொடியுடன் ஜொலிப்பார். அமேதி இளைஞர்கள் விளையாடி பிரகாசிக்கட்டும்! இந்த வாழ்த்துடன், உங்கள் அனைவருக்கும் வாழ்த்துக்கள்! மிகவும் நன்றி.

பொறுப்பு துறப்பு: இது பிரதமர் உரையின் தோராயமான மொழிபெயர்ப்பு. பிரதமர் திரு மோடி இந்தியில் உரை நிகழ்த்தினார்.

-----

ANU/SMB/BS/AG