U Myntri Sorkar Pdeng, u Anurag Thakur mynta ka sngi u la pyllait paidbah ia ka trailer jong ka KTB- Bharat Hain Hum, kaba dei ka series kaba don ar tylli ki samoi ba la pynmih da ka Central Bureau of Communication, ka tnat Information and Broadcasting bad ka Graphiti Studios. Kane ka series ka don 52 tylli ki episode kiba 11 minit kiba pyni ia ki khana na ka jingiakhun ka India na ka bynta ka jinglaitluid naduh ki snem 1500 haduh u 1947. Ia kane ka series la mihkhmat da ki jingdro Krish, Trish bad Balti boy. Ia kane ka series la thaw da u Munjal Shroff bad u Tilakraj Shetty na Graphiti Studios.

Ha ka jingai jingkren jong u ha kane ka sngi, u Myntri u la ong ba kane ka series ka dei ka jingpyrshang ban ai jingtip ia ki samla shaphang kito ki briew kiba la don ka bynta ha ka jingiakhun na ka bynta ka jinglaitluid hynrei ki bym da paw pyrthei, ki briew bad ki lad ai jinghikai ki la klet ha ki por ba la leit, bad ki bym la ioh shisha ia ka jingithuh kaba ki dei ban ioh.

“Ha kajuh ka por, kane ka series ka pyrshang ban ai mynsiem ia ki samla da kaba wanrah ia ki khana jong ki briew kiba la leh ia ki kam kiba la thaw ia ka India kaba mynta. Kane ka series ka dei kaba pyllait ha ki ktien bapher bapher ba kynthup ruh ar tylli ki ktien nabar ri bad kan ym iakynduh jingeh ha kaba iadei bad ka ktien bad kan poi sha ki briew ha kylleng ka pyrthei,” u la ong.

U Thakur u la ong ba ka Doordarshan, Netflix bad Amazon Prime kin pyni ia kane ka series ha kajuh ka por bad ba ym pat ju pyrshang ban leh kumne. Kawei na ki mat ba kongsan jong kane ka series ka dei ka jingpeit ia ka bynta jong ki longkmie bad ki riewlum kiba la iakhun pyrshah ia ki mynder na ka bynta ka jinglaitluid.

U Myntri u la pynbna ruh ba yn pyni ha ka kane ka series ia baroh ki dkhot ka Parliament ha ka session ka ban wan.

Da kaba kdew sha ka Panch Pran jong u Myntri Rangbah Duh, u Narendra Modi, u la kyntu ia ki briew ba kin shim ia la ka bynta ban tei ia ka ri da kaba ong ba katba ki nongiakhih ki la aiti ia la ka jingim na ka bynta ka jinglaitluid, ki samla mynta ki dei ban noh synniang da ki jingpyrshang jong ki ban ialam ia ka ri na ka Amritkaal sha ka Swarnimkaal.

U Secretary, I&B, u Apurva Chandra u la ong ba kane ka dei ka por kaba kyrpang ia ka Tnat namar kane ka dei ka sien kaba nyngkong ba ka la pyllait ia ka series ba shu dro kaba la shna kyrpang na ka bynta ki briew jong ka ri bad khamtam ia ki khynnah jong ka ri. U la ong ruh ba kane ka dei ka sien kaba nyngkong ba ka Central Bureau of Communication kaba dei ka kynhun kaba pynlut pisa, ba kan rung ha ka kam pynmih pisa.

U Munjal Shroll, u la iathuh ba kane ka la dei ka kam kaba heh bha ha kaba la don kti palat shi hajar ngut ki briew ban shna ia kane ka series. Ha ka jingbatai shaphang ka kam u la ong ba katba kiwei kiwei ki phlim ba shu dro ki don kumba 25 ne 30 ngut ki briew ba shu dro bad kumba 40 tylli ki dur ba shadien, kawei ka episode jong ka Bharat Hain Hum ka don kumba 50 haduh 100 ngut ki briew ba shu dro bad kumno kumno 50 tylli ki dur ba shadien.

Shaphang ka KTB-Bharat Hain Hum

Ka tnat Information and Broadcasting ka la rai ban sdang ia ka prokram ba ai jingtip ia ki khynnah jong ka India shaphang ka jingiakhih jong ngi na ka bynta ka jinglaitluid bad ki riewkhraw kiba bun na kylleng ka ri kiba la aiti ia la ka jingim na ka bynta ka jinglaitluid.

Man ka episode kan don ia u Krish, Trish bad Baltiboy — kiba pawnam na ka KTB Movie series, kiba sdang ia ka jingiathuh khana shaphang kine ki riewkhraw.

Da kaba bat ia ka jingiar jong ka jingiakhih na ka bynta ka jinglaitluid, kane ka series kan iaid lyngba ki thain bapher bapher ha kaba kan pyni ia ki nongiakhih na Himanchal Pradesh, Bengal, Punjab, Kerala bad kiwei kiwei ki jaka. Kane ka series ba pynmih da ka Central Bureau of Communication bad ka Graphiti Studio ka pyni ruh ia ki jingngeit bapher bapher bad ka jingiatylli kaba la wanrah lang ia ki jingngeit bapher bapher jong ka ri.

Ki riewkhraw kum ka Rani Abbakka, Tilka Manjhi, Tirot Sing, Peer Ali, Tatya Tope, Kotwal Dhan Singh, Kunwar Singh (u nongiakhih uba 80 snem), Rani Chennamma, Tikendra Jeet Singh bad kiwei kiwei kin ioh ia ka bynta jong ki ha ka histori lyngba kane ka series.

La thaw ia kane ka series da u Munjal Shroff bad u Tilak Shetty, bad kan don 26 tylli ki episode ha ka Season kaba nyngkong ki ban jrong haduh 11 minit.

Ia kane ka series yn pynmih ha kine ki 12 tylli ki jait ktien:

Hindi (Master), Tamil, Telugu, Kannada, Malayalam, Marathi, Gujarati, Punjabi, Bengali, Assamese, Odia bad English.

Yn dub ia ka series ha kine kiwei kiwei ki ktien nabar ri:

French, Spanish, Russian, Arabic, Chinese, Japanese bad Korean.

Ha ki OTT, ka jingpyllait paidbah ia kane ka series kan long kaba kyrpang namar kane ka dei ka sien kaba nyngkong ban pyllait lang ia ka series ha ar tylli ki rynsan OTT ba heh tam - Netflix bad Amazon Prime Video bad yn pyllait sha kylleng ka pyrthei ha 12 tylli ki ktien ka India bad 7 tylli ki ktien jong kiwei kiwei ki ri.

*******