কেন্দ্র মন্ত্রী শ্রী অনুরাগ থাকুরনা ঙসি সেন্ত্রেল ব্যুরো ওফ কম্ম্যুনিকেসন, ইনফোর্মেসন এন্দ ব্রোদকাস্তিং মন্ত্রালয় অমদি গ্রাফিতি স্তুদিওজনা পুথোকপা সীজন অনি য়াওবা এনিমেতেদ সেরিজ অমা ওইরিবা কে.তি.বি. – ভারত হে হম পুথোকখ্রে‍। সেরিজ অসিদা ১৫০০গী মতমদগি ১৯৪৭ ফাওবগী ভারতকী নীংতম ঈহৌগী ৱারীশিং য়াওবা মিনৎ ১১ শাংব তাঙ্কক ৫২ য়াওরি‍। সেরিজ অসি মমীং লৈরবা এনিমেতেদ কেরেক্তর কৃশ, ত্রিশ অমদি বাল্তি বোইনা হোস্ত তৌবনি‍। সেরিজ অসি গ্রাফিতি স্তুদিওজকী ক্রিএতর অনি মুঞ্জল শ্রোফ অমদি তিলকরাজ সেত্তীনা শেম্বনি‍।

থৌরমদুদা ৱা ঙাঙলদুনা, মন্ত্রীনা সেরিজ অসি মশক নীংথিন খঙবিদ্রবা অদুবু নীংতম ঈহৌদা মশক থোক্না থৌদাং য়ারম্বা, মমাঙগী মহৈ মশিংগী সিস্তেম্না কাউথোকপিরম্লবা থৌদাং য়াখিবা মীওইশিং, অমদি মতিক চানা মমিং পনবিদ্রবা মীওইশিংগী মতাংদা নহাশিংদা খঙহন্নবগী থৌরাং অমনি হায়খি‍।

“অমরোমদনা সেরিজ অসিনা অনৌবা ভারত শেম্বদা থৌদাং য়ারম্বা মীওইশিংগী ৱারীশিং পুথোক্তুনা নহা মীরোলবু পুক্নিং থৌগৎনবা থৌরাং অমসু তৌরি‍। সেরিজ অসিনা, মপান লমগী লোলশিং য়াওনা লোল কয়াদা ফোঙদুনা, লোলগী পল নমখায়রগনি অমদি মখোয়গী ৱারীশিংবু মালেম পুম্বদা পুদুনা চৎলগনি”, হায়না মহাক্না মখা তাখি‍।

দুরদর্শন, নেৎফ্লিক অমদি এমাজোন প্রাইম্না মমাঙদা অমুক্তা তৌখিদ্রিবা থৌরাং অমদা, চপ মান্নবা মতমদা এনিমেতেদ সেরিজ অসি শন্দোক্কনি হায়না শ্রী থাকুরনা হায়খি‍। সেরিজ অসিদা য়াওরিবা মরুওইবা মীৎয়েঙ থম্ফম অমদি মপান লমগী লোইলম শন্দোকপশিংগী মায়োক্তা নুপী অমদি ত্রাইবেল নীংতম লান্মীশিংনা লৌখিবা থৌদাংশিংদুনা ওইরি‍ হায়খি‍।

সেরিজ অসি মথঙগী সেসন্দা পার্লিয়ামেন্তরিয়ন পুম্নমক্তা উৎকনি হায়না মন্ত্রীনা লাউথোকখি‍।

প্রধান মন্ত্রী শ্রী নরেন্দ্র মোদীগী ৱাশক মঙাবু অমুক নৌহৌননা নীংশিংলদুনা, নীংতম লান্মীশিংনা মখোয় মশাবু কত্থোককি অদুগা ঙসিগী নহাশিংনা লৈবাক অসিবু অমৃৎকালতগী স্বর্নিমকালদা পুননবা থৌদাং য়াবা তাই হায়রদুনা, মহাক্না মীয়ামদা লৈবাক শেম্বদা মখোয়গী থৌদাং য়ানবা ৱাফম থমখি‍।

আই. এন্দ বি. সেক্রেতরী শ্রী অপুর্ব চন্দ্রনা ভারত মীয়ামদা, অখন্ননা লৈবাকসিগী অঙাংশিংদা পান্দম থম্বা এনিমেতেদ সেরিজ অসি অহানবা ওইনা পুথোকপা মরম্না মসি মন্ত্রালয় অসিগী নীংশিংনিংঙাই ওইরবা থৌরম অমনি হায়খি‍। শেল চৎপদনা মশরুক ওইরম্বা সেন্ত্রেল ব্যুরো ওফ কম্ম্যুনিকেসন্না অহানবা ওইনা রিভিন্যু তানবগী দোমেন্দা চঙশিল্লি হায়না মহাক্না মখা তানা পাউদমখি‍।

শ্রী মুঞ্জল শ্রোফনা য়েংলিবা মীয়ামদা, মীওই লিশিং অমা হেনবনা সেরিজ অসি পুথোকপদা অচৌবা থবক অমা পায়খি হায়না পাউদমখি‍। মসিদা থাদখিবা থবক্কী পাক চাউবগী মতাঙদা শন্দোক্না তাক্লদুনা, অচম্বা এনিমেসন সো অমদা বেকগ্রাউন্দ ৪০ রোমগা লোয়ননা কেরেক্তর ২৫ দগী ৩০ ফাওবা চঙই, অদুগা ভারত হে হমগী এপিজোদ অমখক্তদা চাংচত্তা বেকগ্রাউন্দ ৫০ অমদি কেরেক্তর ৫০ দগী ১০০ ফাওবগী চাংদা চঙই হায়না মহাক্না ফোঙদোকখি‍।

কে.তি.বি.-ভারত হে হমগী মরমদা

ইনফোর্মেসন অমদি ব্রোদকাস্তিং মন্ত্রালয়না ভারতকী অঙাংশিংদা ঐখোয়গী মশক নাইরবা নীংতম ঈহৌ অমদি ঈরৈবাকসিগীদমক থৱায় কৎখিবা লৈবাক শিনবা থুংবদগী মশিং থিঙমদ্রবা হিরোশিংগী মরমদা খঙহন্নবগীদমক কেম্পেন অমা পায়খৎনবা ফিরেপ লৌখি‍।

এপিজোদ খুদিংদা মমাঙদা মীয়াম্না পাম্নখিবা কে.তি.বি. মুভী সেরিজতগী মীয়াম্না শকখঙনরবা কৃশ, ত্রিশ অমদি বাল্তি বোইনা মীথানবিদ্রবা হিরোশিংগী ৱারীশিং নৈনদুনা ৱারী শানবগী মতৌ য়াওরি‍।

ভারতকী নীংতম ঈহৌগী খেন্নবা মশকপু কোনশিল্লদুনা, সেরিজ অসিনা তোঙান তোঙানবা মফমশিংগী খোঙচত্তা হিমাঞ্চল প্রদেশ, বেঙ্গল, পঞ্জাব, কেরলা অমদি মসিগী ৱাংমদগী লাকখিবা নীংতম লান্মীশিং উৎকনি‍। সেন্ত্রেল ব্যুরো ওফ কম্ম্যুনিকেসন অমদি গ্রাফিতি স্তুদিওনা পুথোকপা সেরিজ অসি লাইনিংগী পল নমখায়দুনা লৈবাকসিগী লাইনিং অমদি থাজনবীবু পুনশিল্লিবা লাইনিং অমদি লিংজেল মান্নবগী খুদম অমসু ওইরি‍।

রানী অব্বক্কা, তিল্কা মান্ঝী, তিরোৎ সিংহ, পীর অলি, তান্তিয়া তোপে, কোত্বাল ধন সিংহ, কুনৱর সিংহ (চহি ৮০গী নীংতম লান্মী), রানী চেন্নম্মা, তিকেন্দ্রজীঈ সিংহ, অমদি অতৈ মশিং থিঙমদ্রবা থৌনা ফবা মীওইশিংনা মমৈথঙদা এনিমেতেদ মাস্তরপীস অসিগী খুত্থাঙদা পুৱারীদা মখোয়গী মতিক চাবা মফম কল্লগনি‍।

হৈথোই শিংথোইরবা মুঞ্জল শ্রোফ অমদি তিলক সেত্তীনা শেম শারিবা সেরিজ অসিনা সীজন ১ দা মিনৎ ১১গী এনিমেত তৌরবা ৱারীগী এপিজোদ ২৬ য়াওগনি‍।

সেরিজ অসি মখাগী লোল ১২ অসিদা পুথোক্লি:

হিন্দী (মাস্তর), তামিল, তেলুগু, কন্নারা, মলয়ালম, মরাথী, গুজরাতী, পঞ্জাবী, বেঙ্গলি, অসামিজ, ওরিয়া অমদি ইংলিস‍।

সেরিজ অসি মখাগী মালেমগী লোলশিং অসিদসু দব তৌগনি:

ফ্রেঞ্চ, স্পেনিস, রসিয়ন, অরাবিক, চাইনিজ, জাপানিজ, অমদি কোরিয়ন‍।

ও.তি.তি.দা, সেরিজ অসি, অহানবা ওইনা ও.তি.তি. প্লেৎফোর্ম অনি – নেৎফ্লিক অমদি এমাজোন প্রাইম ভিদিওদা চপ মান্নবা মতমদা শন্দোক্তুনা, পুৱারী ওইবা মওংদা হৌদোক্কনি, অমদি মালেমগী ওইনা ভারতকী লোল ১২ অমসুং মালেমগী লোল ৭তা ফোঙগনি‍।

*******