Ka jingiaid iew jong ki FM channel shimet ha ka ri ha kaba ki don palat 380 tylli ki channel ha ki ktien bapher bapher bad ha jan baroh ki jylla jong ka ri ka la pynlong ba kine ki dei ki rynsan kiba donkam bha ia ka Sorkar Pdeng ba kan ai jingtip shaphang ki polisi bad ki prokram jong ka Sorkar kiba ai jingiarap ia ki briew ba kin ioh ia ki jingmyntoi jong ki skhim bad ki prokram na ka bynta ka bha ka miat. Ha kaba iadei bad kane, ka tnat Information & Broadcasting ka la ai jingmynjur ia ki dor ba thymmai na ka bynta ki jingpynbna lyngba ki FM radio station shaphang ki polisi bad ki prokram katkum ki jingai jingmut ka Rate Structure Committee kaba ka la sdang. Kane ka long u mawmer ha ki jingpyrshang jong ka tnat ban pynthikna ia ka rukom buh dor kaba iahap bad kaba lah ban kyrshan ia ki FM radio station shimet.

Ki dor ba thymmai ba la ai jingmynjur da ka tnat ha u bnai Nailur, 2023 ki kynthup ka jingkyntiew kaba 43% jong ka nongrim jong ka jingbuh dor da kaba pyrkhat ruh ia ka jingkiew dor na ka bynta ka samoi hapdeng u Nohprah 2015 haduh u Lber 2023. Lyngba kane ka jingkyntiew, ka dor Gross Base na ka bynta ki jingpynbna lyngba ki FM radio kan kiew na ka T 52 sha ka T 74 ia man ka 10 sekon. La leh ia kane khnang ban don ka jingryntih bad ki dor ba iaid mynta. Ka jingkyntiew ia ka dor Gross base kan iarap ruh ia palat 400 tylli ki Community Radio Station kiba dang treikam ha ka ri.

Shuh shuh, ka tnat ka la rai ban bteng ia ka rukom khein ia ki dor katkum ki nongbah. Kane ka rukom khein ka peit ia ki bynta bapher bapher kum ka jingdon briew ha ka nongbah bad ka jingdon ki nongsngap katkum ki jingtip kiba ioh na ka India Readership Survey (IRS) jong u snem 2019. Lyngba kane ka rukom khein bad ka jingkyntiew ia ka dor base rate, jan baroh ki FM Radio Station shimet kin ioh jingmyntoi na ki jingai jingmut ba thymmai halor ki dor ha ki percentage bapher bapher kiba shong ha ka jingdon ki nongsngap bad kane kan ai jingmyntoi ruh ia ki FM station bad ki briew ba ka CBC ka ai jingshakri. Katkum kane ka rukom khein, ka dor na ka bynta 106 tylli ki station kan kiew da 100 %, ka jingkiew kaba 50 haduh 100% ia 81 tylli ki station, bad ka jingkiew ka bym tam ia ka 50% ia 65 tylli ki station ia kiba don jingtip shaphang ka jingdon ki nongsngap.

Ia ka Rate Structure Committee na ka bynta ki FM Radio Station shimet la sdang da ka tnat ha une u snem ba la dep ban peit bad ai jingmut shaphang ki dor ba thymmai ia kiba la pynkylla khatduh ha u snem 2015. Ka Committee ka la ai ia ki jingmut jong ka hadien ba ka la pynlong shibun ki jingialang bad ki riewshemphang ha kane ka kam bad ruh kito kiba don bynta ha kane ka kam ha ryngkat ka jingshim jingmut na ki kynhun kum ka Association of Radio Operators of India.

*****