છ રાજ્યો/કેન્દ્રશાસિત પ્રદેશો માટે રાષ્ટ્રીય આયુષ મિશન પર પૂર્વ, મધ્ય અને દક્ષિણ ઝોન પછી સતત ચોથી પ્રાદેશિક સમીક્ષા બેઠક યોજાઈ હતી, જેનું આજે મુંબઈમાં આયોજન કરવામાં આવ્યું હતું, જેમાં રાજસ્થાન, ગુજરાત, મહારાષ્ટ્ર, ગોવા અને કેન્દ્રશાસિત પ્રદેશો - આંદામાન અને નિકોબાર ટાપુઓ, દાદરા અને નગર હવેલી, દમણ અને દીવના આયુષ રાજ્યોના અધિકારીઓ અને પ્રતિનિધિઓ એકઠા થયા હતા.

આ બેઠકનું ઉદઘાટન આયુષ અને પોર્ટ્સ, શિપિંગ અને જળમાર્ગ મંત્રી શ્રી સર્વાનંદ સોનોવાલે કર્યું હતું. આ પ્રસંગે કેન્દ્રીય આયુષ અને મહિલા અને બાળ વિકાસ રાજયમંત્રી ડો.મુંજપરા મહેન્દ્રભાઈ સહિત આયુષ વૈદ્ય રાજેશ કોટેચા પણ ઉપસ્થિત રહ્યા હતા.

આયુષ મંત્રાલયના મુખ્ય કાર્યક્રમ તરીકે રાષ્ટ્રીય આયુષ મિશન વિશે વાત કરતા શ્રી સર્વાનંદ સોનોવાલે જણાવ્યું હતું કે, "રાષ્ટ્રીય આયુષ મિશન (એનએએમ)નો અમલ આયુષ આરોગ્ય સંભાળ સુવિધાઓને મજબૂત કરીને અને તેમાં સુધારો કરીને, જરૂરિયાતમંદ લોકોને માહિતગાર પસંદગી પ્રદાન કરવા માટે સમગ્ર દેશમાં આયુષ આરોગ્ય સેવાઓ પ્રદાન કરવાના વિઝન અને ઉદ્દેશો સાથે કરવામાં આવી રહ્યો છે."

આયુષને તમામ માટે ઉપલબ્ધ કરાવવાનાં મહત્ત્વ પર ભાર મૂકીને તેમણે કહ્યું હતું કે, "જન ભાગીદારી મારફતે આ હેલ્થકેર સિસ્ટમને પાયાનાં સ્તરે ઉપલબ્ધ કરાવવા માટે રાષ્ટ્રીય આયુષ મિશન મારફતે રાજ્યો/કેન્દ્રશાસિત પ્રદેશોને આપવામાં આવતા સાથ સહકારને ચેનલાઇઝ કરવાની સહિયારી જવાબદારી છે."

કેન્દ્રીય મંત્રીએ સંકલિત આરોગ્ય સંભાળ પર ભાર મૂક્યો હતો અને કહ્યું હતું કે, "આધુનિક અને પરંપરાગત ઔષધિ પ્રણાલીઓએ લોકોને શ્રેષ્ઠ આરોગ્ય સંભાળ પૂરી પાડવા ખભેખભો મિલાવીને કામ કરવું પડશે."

કેન્દ્રીય મંત્રીએ પરંપરાગત ચિકિત્સાના પ્રચારમાં વિશ્વ સ્વાસ્થ્ય સંગઠન અને ભારત સરકારની ભૂમિકાને પણ બિરદાવી હતી અને કહ્યું હતું કે, જામનગર ગુજરાતમાં ગ્લોબલ સેન્ટર ઓફ ટ્રેડિશનલ મેડિસિનની સ્થાપનાએ ભારતની વૈજ્ઞાનિક અને પુરાવા આધારિત પરંપરાગત ચિકિત્સા પ્રણાલીના વિકાસના નવા દ્વાર ખોલ્યા છે અને રાષ્ટ્રીય આયુષ મિશન જેવા મુખ્ય કાર્યક્રમ મારફતે અમે એ સુનિશ્ચિત કરી રહ્યા છીએ કે પરંપરાગત ચિકિત્સાનો લાભ દેશના ખૂણે ખૂણે પહોંચે.

આ પ્રસંગે ડો.મુંજપરા મહેન્દ્રભાઈએ જણાવ્યું હતું કે, "હું માનું છું કે આપણે આઉટપુટ કરતાં પ્રોગ્રામ વેલ્યુના વધુ અર્થપૂર્ણ માપદંડ તરીકે પરિણામો પર ભાર મૂકવો પડશે. આપણે આપણી કામગીરીનું આયોજન કરવા, તેનો અમલ કરવા અને અહેવાલ આપવા માટે આપણી વ્યૂહરચનાઓ અને તકનીકોને નવેસરથી ગોઠવવી પડી શકે છે, જે પરિણામોના માપને સરળ બનાવે છે. મને વિશ્વાસ છે કે આ પ્રકારની ચર્ચાઓ આપણને એકબીજાની શ્રેષ્ઠ પદ્ધતિઓમાંથી શીખવાની તક આપશે અને આપણા બધા વચ્ચે મજબૂત જોડાણનું નિર્માણ કરશે."

આયુષ મંત્રાલયના સચિવ વૈદ્ય રાજેશ કોટેચાએ રાષ્ટ્રીય આયુષ મિશન માટે હાથ ધરવામાં આવેલી પ્રાદેશિક સમીક્ષા બેઠકો વિશેની વિગતો શેર કરતા જણાવ્યું હતું કે, "રાષ્ટ્રીય આયુષ મિશન એ આયુષ મંત્રાલયની મુખ્ય યોજના છે, જે દેશમાં આયુષ પદ્ધતિઓના વિકાસ અને પ્રોત્સાહન માટે રાજ્ય / કેન્દ્રશાસિત પ્રદેશોની સરકારો દ્વારા અમલમાં મૂકવામાં આવી રહી છે. એનએએમ યોજના માટે અંદાજપત્રીય જોગવાઈઓ પણ 800 કરોડથી વધીને 1200 કરોડ થઈ ગઈ છે. મંત્રાલયે તમામ રાજ્યો/કેન્દ્રશાસિત પ્રદેશો સાથે વન-ટુ-વન સમીક્ષા બેઠકોનું આયોજન કર્યું છે. આ સમીક્ષા બેઠકોમાં વિવિધ રાજ્યો/કેન્દ્રશાસિત પ્રદેશોના વરિષ્ઠ અધિકારીઓ, કમિશનરો અને મિશન ડિરેક્ટર્સ ઉપસ્થિત રહ્યા હતા અને સમીક્ષા દરમિયાન ફળદાયી ચર્ચા-વિચારણા કરવામાં આવી હતી."

આયુષ મંત્રાલયનાં સંયુક્ત સચિવ સુશ્રી કવિતા ગર્ગે આયુષની અત્યાર સુધીની પ્રગતિ અને વર્ષ 2025 માટે આયુષ માટેનાં રોડમેપ પર પ્રેઝન્ટેશન પ્રસ્તુત કર્યું હતું.

ઉદ્ઘાટન સત્રનું સમાપન 5 મિનિટના વાય-બ્રેક (યોગ વિરામ) કોમન યોગ પ્રોટોકોલ સાથે થયું હતું.

આ કાર્યક્રમમાં મહારાષ્ટ્ર, ગોવા, રાજસ્થાન, ગુજરાત, આંદામાન અને નિકોબાર તથા દાદરા અને નગર હવેલી તથા દમણ અને દીવે પોતપોતાના પ્રદેશમાં રાષ્ટ્રીય આયુષ મિશનની વિસ્તૃત રૂપરેખા પ્રસ્તુત કરી હતી તથા જ્ઞાનની વહેંચણીના ભાગરૂપે મુખ્ય મુદ્દાઓ, આગળનો માર્ગ, સફળતાની ગાથાઓ વગેરે પર વિચાર-વિમર્શ કર્યો હતો.

તેમાં સહભાગી રિસર્ચ કાઉન્સિલ્સ/નેશનલ ઇન્સ્ટિટ્યૂટ્સ ઓફ આયુષ મંત્રાલય દ્વારા પ્રેઝન્ટેશન કરવામાં આવ્યું હતું અને તમામ સહભાગીઓએ વિરામ દરમિયાન પાંચ મિનિટના કોમન યોગ પ્રોટોકોલ વાય-બ્રેકનું પણ અવલોકન કર્યું હતું.

CB/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com