ফম্বাক্তা লেংখৎপীরিবা রাজস্থানগী রাজ্যপাল, শ্রীমান কলরাজ মিশ্রাজী, কেন্দ্র মন্ত্রী মন্দলগী ঐহাক্কী মরুপ অমসুং লমদম অসিগী সেবক ভাই গজেন্দ্র সিংহ সেখাৱাত, কৈলাশ চৌধুরী, রাজস্থান সরকারগী মন্ত্রী, ভাই ভজনলাল, পার্লিয়ামেন্তকী মেম্বর অমসুং রাজ্যসিগী বি.জে.পি.গী প্রসিদেন্ত, শ্রীমান সি.পি. জোশীজী, অতোপ্পা এম.পি.শিং, মীয়ামগী মীহুৎ অমদি ইবেম্মা অমসুং ইবুংঙোশিং!

ঐহাক্না অহানবমক্তদা, সুর্য়নগরী, মন্দোর, বীর দুর্গাদাস রাথোরজীগী মসিগুম্লবা থৌনা লৈবা লমদমসিবু ইকোক নোন্দুনা খুরুমজরি। ঙসিদি, মারৱারগী শেংলবা লমদম জোধপুরদা চাউখৎ থৌরাংগী থবক কয়া মীয়ামদা খুৎশিন্নবগা লোয়ননা উরেপ উয়ুংসু তমখ্রে। হৌখিবা চহি 9দা ঐখোয়না রাজস্থানগী চাউখৎ থৌরাংগীদমক্তা লেপ্তনা হোৎনদুনা লাক্লি, মসিগী মহৈদি ঐখোয়না থেংনরি, উজরি। মসিগুম্বা চাউখৎ থৌরাংগী থবকশিং অসিগীদমক্তা ঐহাক্না অদোম খ্বাই খিবীকপু থাগৎচরি।

মরুপশিং,

রাজস্থান হায়বা রাজ্যসিদি থাইনগী নীংথিবা মতৌ কয়া উবা ফংবা মফম্নি। মসিদা ভারতকী মথৌনা, নুংঙাই য়াফবগী মতৌ অমসুং কলচরগী শক্তম কয়াগী মমি তারি। মতম খরগী মমাংদা, জোধপুরদা G20গী মীফম পাংথোকখি, মদুবু মালেম পুম্বগী মীথুংলেনশিংনা থাগৎনখি। ভারত মচা ওইরো, নত্ত্রগা অতোপ্পা লৈবাক্কী লমকোয়বা ওইরো, মীপুম খুদিংনা সন সিতী জোধপুরবু অমুক্তা ওইরবসু য়েংবা চৎপা হায়বসি পুম্নমক্কী অপাম্বনি। মীপুম খুদিংনা লৈঙোইনা থনবা পাৎ মপান, মেহরানগর অমসুং জস্বন্ত থাদাবু শোইদনা য়েংবা পাম্নৈ। মফমসিগী হেন্দিক্রাফতা পুম্নমক্কী থৱাই তানরিবনি। মরম অদুনা, ভারতকী নীংথিরবা থাইনগী মতমগী শক্তম উৎলিবা রাজস্থান্না ভারতকী তুংগী মতমগী মীহুৎ ওইহনবা হায়বসিসু য়াম্না তঙাই ফদবা ৱাফম অমনি। মেৱারদগী মারৱার ফাওবা, অমসুং অপুনবা রাজস্থান্না চাউখৎপগী অৱাংবা থাক্তা লৈদুনা, লমদমসিগী ইনফ্রাস্ত্রকচরনা মতমগা চুনরকপা মতমদা হায়রিবা ৱাফম অসি ওইথোক্কদবনি। বিকানেরদগী বারমের ফাওদুনা জাম্নগর ফাওবা চৎলিবা এক্সপ্রেসৱে কোরিদোর, দিল্লী মুম্বাই এক্সপ্রেসৱে, রাজস্থানগী হাই-তেক ইনফ্রাস্ত্রকচরনা খুদম অমসু ওইরি। ভারত সরকারনা রাজস্থান্দা রেল অমসুং রোদ য়াওনা সেক্তর খুদিংদা চাউখৎ থৌরাং পুরক্নবা খোঙজেল য়াঙনা থবক তৌরি।

হন্দক্কী চহি অসিদসু, রেলৱেগী লমদা চাউখৎপা পুরক্নবগীদমক্তা চাউরাক্না লুপা করোর লিশিং মাপন মখায়গী বজেৎপু রাজস্থান্দা পীখি। মসিনা মমাংগী সরকারনা রাজস্থান্দা থাদরম্বা চহিগী বজেত্তগী শরুক 14 হেনবনি। মসি হায়রগা ঐহাক্না রাজনীতিগী লাল্লোং শান্নবা নত্তে, অশেঙবা ৱাফম পাউদম্বনি, নত্ত্রগদি মীদিয়াশিংনা মোদীনা অচৌবা লান্দা অমা তৌখ্রে অমুক হায়নগনি। নিংতম্লবা মতুংগী দিকেদ কয়া অসিদগী ইং 2014 ফাওবদা, রাজস্থান্দা শুপ্নগী কিলোমীতর 600কী রেল লম্বী শেম্লমখি। হৌখিবা চহি 9দা কিলোমীতর 3700গী রেল লম্বীসু ঐখোয়না ইলেক্ত্রিফিকেসন তৌখি। লম্বীশিং অসিদা দিজলগী মহুত্তা ইলেক্ত্রিক ইঞ্জিনগী ত্রেন ওইনা চেল্লে। মসিনা রাজস্থানগী পোল্ল্যুসন হন্থহনবগা লোয়ননা মতমগা চুননা চাউখৎপগী ফিভমসু লৈরক্লিবনি। ঐখোয়গী লমদমসিদা নীংথিরবা এয়রপোর্ত শাবগী ফেশন্দি লৈনৈ, চাউর-চাউরবা মীয়াম্না মফমদুদা চৎনৈ, অদুবু মোদীগী সংসার অসিদি খরা তোঙাল্লি, ঐহাক্তি লাইরবা নত্ত্রগা মিদ্দল ক্লাস মীওইশিংনা চৎপা রেলৱে স্তেসন অদুবু এয়রপোর্ত্তগী হেন্না নীংথিজনা শাগনি। মসিদা ঐখোয়গী জোধপুর রেলৱে স্তেসনসু মনুং চল্লিবনি।

ইচিল ইনাওশিং,

ঙসি হৌদোক্লিবা রেল অমসুং রোদকী প্রোজেক্তশিং অসিনা চাউখৎ থৌরাংগী মসিগুম্বা খোঙথাং অসিগী খোঙজেল হাপকনি। রেল লাইনবু দব্লিং তৌবনা পেসেঞ্জরশিংগী মতম য়াম্না কনগনি, অদুগা নুংঙাইবগী ফিভমসু হেনগৎহনগনি। ঐহাক্না জৈশলমের-দিল্লী এক্সপ্রেস ত্রেন অমসুং মারৱার-খাম্বলী ঘাত ত্রেনবু অশংবা ফিরাল হাইদুনা লম্থাবগী খুদোংচাবা ফংজখ্রে। ঙসি মফমসিদা, রোদকী প্রোজেক্ত অহুমগী উরেপ উয়ুংসু তমখ্রে। ঙসি, জোধপুর অমসুং উদয়পুর এয়রপোর্তকী অনৌবা পেসেঞ্জর তর্মিনেল বিলদিংগী উরেপ উয়ুং তমখ্রে। মসিগুম্বা চাউখৎ থৌরাংগী থবকশিং অসিনা লমদম অসিগী শেন্মিৎলোন্দা শাফু পীগনি, অমসুং থবক্কী অনৌবা খুদোংচাবসু লৈহনগনি। মসিনা তুরিজম সেক্তরদা ইনোৎ হাপ্পদসু মতেং পাংগনি।

মরুপশিং,

ঐখোয়গী রাজস্থানগীদি মেদিকেল অমসুং ইঞ্জিনিয়রিং এজুকেসনগী লমদা তোঙানবা শক্তাক অমা লৈজৈ। কোতানা লৈবাক অসিদা দাক্তর অমসুং ইঞ্জিনিয়র মশিং থীঙমদনা খুদোল তমখ্রে। রাজস্থান্না এজুকেসনগা লোয়ননা মেদিকেল অমসুং ইঞ্জনিয়রিংগী লমদা অৱাংবা থাক ফংবা অফবা হব অমা ওইহনবা হায়বসি ঐখোয়গী পান্দম্নি। মসিগীদমক্তা, এমস জোধপুরদা ত্রাওমা, ইমর্জেন্সী অমসুং ক্রিতিকেল কেয়রগী থাক ৱাংবা খুদোংচাবা কয়া হাপচিল্লিবনি। প্রধান মন্ত্রী অয়ুশমান ভারত ইনফ্রাস্ত্রকচর মিশনগী মখাদা দিস্ত্রিক্ত হোস্পিতালশিংদসু ক্রিতিকেল কেয়র ব্লোক শাবগী থবক চত্থরি। এমস জোধপুর অমসুং আই.আই.তি. জোধপুর হায়রিবা ইন্সতিতুসন অসিনা রাজস্থানখক্তা নত্তনা লৈবাক পুম্বগী প্রিমিয়র ইন্সতিত্যুত অমা ওইরকপা অসিদা ঐহাক্না য়াম্না নুংঙাইবা ফাওই।

এমস জোধপুর অমসুং আই.আই.তি. জোধপুরনা পুন্দুনা মেদিকেল তেক্নোলোজীগী সেক্তরদা অনৌবা খুদোংচাবা শেমগৎপগী থবক হৌখ্রে। রোবোতিক সর্জরীগুম্বা হাইতেক মেদিকেল তেক্নোলোজী অসিদি ভারতপু রিসর্চ, ইন্দস্ত্রীগী সেক্তরদা অনৌবা অৱাংবা থাক্তা পুগদবা থবক অমনি। মসিনা মেদিকেল তুরিজম্বুসু খুমাং চাউশিলহনগনি।

মরুপশিং,

রাজস্থান অসিদি মহৌশা অমসুং অকোয়বগী শক্তম্বু নুংশিজবা মীওইশিংগী লমদম্নি। গুরু জম্বেশ্বর অমসুং বিশ্নোই খুন্নাইনা মতম কয়াদগী মসিগুম্বা পুন্সি মহিংদা হিংদুনা লাক্লি। মসিমক ঙসিদি মালেম পুম্বনা হিংবা পাম্নরিবনি। ঐখোয়গী মসিগুম্বা হেরিতেজ অসিবু ফম্বাক অমা ওইহন্দুনা, ঙসিদি, ভারতনা মালেম পুম্বদা লমজিং লমতাক্লি। ঐখোয়না মসিগুম্না হোৎনরিবা অসিনা চাউখৎপা ভারত অমা ওইহনবগী য়ুম্ফম ওইগনি হায়না ঐহাক্না থাজবা থমজৈ। রাজস্থান চাউখৎলবা মতুংদা ভারতনা চাউখৎকদবনি। ঐখোয়না পুন্দুনা রাজস্থানবু চাউখৎহনগদবনি, নুংঙাই য়াইফহনগদবনি। মসিগুম্বা ৱারেপ অসিগা লোয়ননা ঐহাক ঙসিগী থৌরম লোইশিঞ্জগে। ফম্বাক অসিগী চৎনবী খরা লৈ খঙজৈ, ঐহাক্না অদোমগী মতম য়াম্না লৌজরোই। থৌরমসিগী মতুংদা অহাঙবা লম্পাক্তা অমুক চৎকদৌরিবনি, মফমদুগী মওং মতৌসু তোঙানগনি, পান্দমসু তোঙানগনি। অদুনা, মফমদুদা ঙৈহাক অমুক অপনবা লৈতনা অমুক থেংনরসি। মীয়াম্বু হন্না হন্না থাগৎচরি।

***