ঙসি প্রধান মন্ত্রী শ্রী নরেন্দ্র মোদীনা মধ্য প্রদেসকী গ্বালিয়রদা লুপা করোর ১৯,২৬০ রোমগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং মীয়ামদা কৎথোকখ্রে। প্রোজেকশিংগী মনুংদা দিল্লি-বদোদারা এক্সপ্রেসৱে কৎথোকপা,  পি.এম.এ.ৱাই-গ্রামিনগী মখাদা শাবা য়ুম লাখ ২.২ হেনবগী গ্রিহ প্রভেস পাংথোকপা অমসুং পি.এম.এ.ৱাই-অর্বানগী মখাদা শাবা য়ুমশিং খুৎশীন্নবা, জল জিবন মিসনশিংগী প্রোজেকশিং উরেপ-উয়ুং তম্বা, অয়ুস্মান ভারত হেল্থ ইনফ্রাস্ত্রকচর মিসনগী মখাদা হেল্থ সেন্তর ৯গী উরেপ-উয়ুং তম্বা, আই.আই.তি ইন্দোরগী একাদেমিক বিল্দিং খুৎশীন্নবা অমসুং হোস্তেল অমসুং কেম্পসতা অতোপ্পা বিল্দিংশিং শানবা উরেপ-উয়ুং তম্বা অমসুং ইন্দোরদা মল্তি-মোদাল লোজিস্তিক্স পার্ক শানবা উরেপ-উয়ুং তম্বা য়াওরি।

তিনখিবা মীয়ামদা ৱা ঙাংবদা, প্রধান মন্ত্রীনা হায়খি গ্বালিয়র লমদম অসি থৌনা ফবা, মশানা মশাবু ইকায়খুম্নবা, ঈশৈ, মথেল-লুকোই অমসুং হঙ্গামগী লমদম অমনি। লমদম অসিদগী লৈবাক্কীদমক নিংতম লান্মী কয়া অমসুং আর্মদ ফোর্সশিংদা থবক তৌরিবা লান্মী কয়া পুথোকখ্রে। গ্বালিয়রনা সরকার পায়রিবা দলগী থৌশিল কয়া শেমখি অমসুং লুচিংবা কয়া পুথোকখি। লমদম অসিদগী রাজমাতা বিজয়া রাজে সিন্দিয়া, কুসাবাউ থাক্রে অমসুং অতল বিহারি বাজপায়ী পুথোকখি। গ্বালিয়র লমদম অসি মশামক ইথিল পীবা লম অমনি। লমদম অসিগী লৈবাক-লৈহাওদগী চাউরকখিবা মচাশিং লৈবাক্কীদমক মখোয়গী থৱায় কৎখি। 

প্রধান মন্ত্রীনা হায়খি হৌজিক্কী মীরোলগী মীয়াম্না নিংতম লালহৌ শরুক য়ানবগী খুদোংচাবা অমা ফংদ্রবসু চাউখৎলবা  অমসুং নুংঙাই-য়াইফবা ভারত অমা শেমগৎনবা থৌদাং ঐখোয়গী খুত্তা লৈরে। সরকার কয়ানা চহি অমদা পায়খৎপা ঙমখিদবা প্রোজেক কয়া সরকার অসিনা নোংমদা পুরকপা ঙম্লে।

প্রধান মন্ত্রী মোদীনা হায়খি দশেরা, দিৱালি অমসুং ধান্তেরাস হেক মমাঙদা ইমুং লাখ ২ রোমদা গ্রিহ প্রভেস পাংথোক্লে অমসুং লম্বী-থোংগী প্রোজেক কয়া খুৎশীন্নরে। উজ্জেনগী বিক্রম উদোগপুরি অমসুং মল্তি-মোদাল লোজিস্তিক্স পার্কনা মধ্য প্রদেসতা উদোগ চাউখৎহনবদা ইনোৎ অমা পীরগনি। গ্বালিয়র আই.আই.তিদা অনৌবা প্রোজেকশিং পায়খৎলে। অয়ুস্মান ভারত হেল্থ ইনফ্রাস্ত্রকচরগী মখাদা বিদিসা, বাইতুল, কাত্নি, বুরহানপুর, নরশিংহপুর, দামোহ অমসুং সাজাপুরদা অনৌবা হেল্থ সেন্তরশিং লিংখৎলগনি।

প্রধান মন্ত্রীনা হায়খি চাউখৎ-থৌরাংগী প্রোজেকশিং অসি দবল-ইঞ্জিন সরকারনা হোৎনবদগী পায়খৎপনি। মীয়ামগীদমক কৎথোকপগী চপ মান্নবা ৱাখল্লোন চেনবা সরকারশিং দিল্লি অমসুং ভোপাল অনিমক্তা লৈবা মতমদা চাউখৎপগী খোঙজেল য়াংখৎলকপনি। মরম অদুনা মধ্য প্রদেসকী মীয়াম্না দবল-ইঞ্জিন সরকারদা থাজবা থম্লে। দবল-ইঞ্জিন হায়বদি মধ্য প্রদেস শরুক অনি চাউখৎপা হায়বনি।

প্রধান মন্ত্রীনা হায়খি মধ্য প্রদেস অসি ‘বিমারু রাজ্য(চাউখৎত্রিবা রাজ্য) অমা ওইরম্বদগী হৌখিবা চহি খর অসিদা সরকারনা লৈবাক অসিগী মকোক থোংবা রাজ্য ১০গী মনুংদা য়াওহল্লে। মফম অসিদগী হৌরগা, ভারতকী মকোক থোংবা রাজ্য ৩দা মধ্য প্রদেস য়াওহন্নবা সরকারনা পান্দম থম্লি। মধ্য প্রদেস মকোক থোংবা রাজ্য অহুমগী মনুং চনবা ঙম্নবা দাইত্ব খঙবা নাগরিক অমা ওইনা মীয়াম্না মখোয়গী ভোৎ থাদগদবনি।

প্রধান মন্ত্রীনা হায়খি মালেম্না মসিগী তুংগী থাজবা ভারত্তা থম্লি। হৌখিবা চহি ৯দা ভারতনা মালেমদা খ্বাইদগী চাউবা ১০শুবা ইকোনোমি ওইরম্বদগী হৌজিক ৫শুবা মফমদা হাইগৎলে। ভারতকী খোঙজেল অসিদা থাজবা ঙমদবা মীওই কয়া লৈরি। সরকারগী মথংগী মতমদা মালেমগী মকোক থোংবা ইকোনোমি অহুমগী মনুংদা ভারত য়াওবা ঙমগনি হায়বসি মোদীনা পীবা থাজবনি।

লায়রবশিং, দলিতশিং, তোল্লবশিং অমসুং ত্রাইবেল ইমুং-মনুংশিংদা পাক্কাগী য়ুমশিং ফংহনগনি হায়না মোদীনা থাজবা পীখি। হৌজিক ফাওবদা লৈবাক অসিদা ইমুং করোর ৪দা পাক্কাগী য়ুমশিং খুৎশীন্নখ্রে। হৌজিক ফাওবদা মধ্য প্রদেসতা লায়রবা ইমুংশিংদা য়ুম লাখ কয়া ফংহনখ্রে অমসুং ঙসি ফাওবদা য়ুম কয়া শঙ্গারে। মমাঙগী সরকারশিংনা অরানবা স্কিম কয়া পায়খৎখি অমসুং লায়রবশিংদা ফত্তবা য়ুমশিং ফংহনখি। হৌজিক্কী সরকারনা শারিবা য়ুমশিং অসি বেনিফিসরিশিংনা দরকার ওইবা মতুংইন্না শাজবনি অমসুং তেক্নোলোজিগী মতেংনা মখোয়গী থবকশিং পায়খৎলিবা অদু য়েংশিল্লবা মতুংদা মখোয়গী বেঙ্ক একাউন্তশিংদা হকথেংননা শেন হাপচিল্লি। য়ুমশিং তোইলেতশিং, মৈ, তোতি ঈশিং অমসুং উজৱালা গ্যস য়াওরে। ঙসি হৌদোক্লিবা জল জিবন মিসনগী প্রোজেকশিংনা হায়রিবা য়ুমশিং অসিদা তোতি ঈশিং ফংহনবদা মতেং পাংলগনি।

শ্রী মোদীনা মখা তানা হায়খি য়ুমগী নুপীশিংগী মিংদা য়ুমশিংগী মমিং পাল্লে। মসিনা ‘লাখপতি’ ইচল কয়া শেমগৎপা ঙম্লে। য়ুমশিং মপু ওইরিবী নুপীশিংনা মখোয়গী মচাশিং লাইরিক তমহনবদা মীৎয়েং চঙগদবনি। ভোৎ ফংনবা ৱাফম অমা নত্তনা লৈবাক অমুক হন্না শেমগৎনবা অমসুং লৈবাক্কী য়াইফনবা নুপীশিংদা শক্তি পীবা হায়বসি পান্দম অমনি। নুপীশিংদা শক্তি পীনবা হন্দক নারী শক্তি বন্দন অধিনিয়ম পাস তৌখ্রে। মোদী গরেন্তি হায়বগী ৱাহন্থোক্তি থাজবা খুদিংমক থবক ওইনা পাংথোকপনি। লৈবাক চাউখৎনবা খোঙচত্তা মাত্রুশক্তি হেন্না শরুক য়াগদবনি।

প্রধান মন্ত্রীনা হায়খি মমাঙদা আইন লৈতবা, চাউখৎপা ৱাৎপা অমসুং খুন্নাইগী অচুম্বা লৈতবা লমদম অমা ওইরম্বদগী সরকারনা কন্না হোৎনবদগী গ্বালিয়র অমসুং চম্বল খুদোংচাবশিংগী লমদম অমা ওইরে। ঐখোয়না মনিং হন্দুনা চৎপা তৌরোইদবনি। অনৌবা ইনফ্রাস্ত্রকচর অমসুং অকনবা লো অমসুং ওর্দরনা লৌমীশিং অমসুং উদোগশিং অনিমক কান্নবা ফংহল্লি। চাউখৎপগী ময়োক্তা লৈবা সরকার অমা লৈবদগী সিস্তেম অনিমক নিঙখায়খি। চাউখৎপগী ময়োক্তা লৈবা সরকার অমা লৈবদগী মীহাৎ-মীপুন হেনগৎলকখি, মসিনা মরম ওইদুনা গুন্দাশিং, মীফত্তশিং অমসুং হুরানবশিং মনিং তৌহনখি অমসুং নুপীশিং, দলিতশিং, তোল্লবশিং অমসুং ত্রাইবেলশিংগী মথক্তা মীওৎ-মীনৈ চৎথবা হেনগৎলকখি। অসিগুম্বা চাউখৎপগী ময়োক্তা লৈবা মীওইশিংদগী মধ্য প্রদেসকী মীয়াম্না মীকুপ-নাহুম শিংনা লৈগদবনি।

প্রধান মন্ত্রীনা হায়খি কাংলুপ খুদিংমক অমসুং লমদম খুদিং চাউখৎহন্নবা ঐখোয়গী সরকারনা কৎথোক্লে। জিনকো কোই নহি পুছতা, উনকো মোদী পুছতা হাই, মোদী পুজতা হায়-কনা অমতনা য়েংশিনবীদ্রবশিং, মোদীনা মখোয় য়েংশিল্লি, মোদীনা মখোয় লাৎলি। অনৌবা খুৎলায়শিং অমসুং কম্মন সাইন লেঙ্গোইজ শীজিন্নদুনা দিবয়াংজনশিংগী য়াইফনবা থবকশিং পায়খৎলি। ঙসি গ্বালিয়রদা দিবয়াং শান্নরোয়শিংগী অনৌবা স্পোর্তস সেন্তর অমা শঙ্গারে। চহি কয়া মীরাইদুনা লাক্লবা লায়রবা লৌমীশিং হৌজিক য়েংশিল্লে। সরকারনা হৌজিক ফাওবদা পি.এম কিষান সম্মান নিধিগী খুৎথাংদা লৈবাক অসিগী অপীকপা লৌমী খুদিংমক্কী একাউন্তশিংদা লুপা লিশিং ২৮ হাপচিনখ্রে। ঐখোয়গী লৈবাক্তা কোর্স গ্রেনশিং থাবা লৌমী করোর ২.৫ লৈরি। মমাঙদা কোর্স গ্রেন থাবা অপীকপা লৌমীশিং কনা অমতনা থওইরমদে। ঐখোয়গী সরকারনা ভারতকী চীঞ্জাক্তা মিল্লেতকী মশক তাক্লে অমসুং মসি মালেম শীনবা থুংবগী কৈথেলশিংদা ফংহল্লে।

প্রধান মন্ত্রীনা মখা তানা হায়খি পি.এম বিশ্বকর্মা য়োজননা কুমহার, য়োৎশুবা, সনা শাবা, ফি তুবা, ফিশুবা, খোঙউপ শাবা অমসুং শম ককপশিং কান্নবা পীরগনি। খুন্নাইদা কাংলুপ অসি নাথৈদুনা থম্লকখি। মখোয় চাউখৎনবা মোদীনা অচৌবা কেম্পেন অমা হৌদোক্লে। মখোয় ত্রেনিং পীনবা শেনফম সরকারনা পুথোক্কনি অমসুং মখোয়দা লুপা ১৫,০০০গী অনৌবা খুৎলায়শিং ফংহনগনি। মখোয়দা লুপা লাখ কয়াগী অহোংবা লোনশিং ফংহনখ্রে। বিশ্বকর্মাশিংদা লোন পীনবা গরেন্তি মোদীনা ওইরে।

দবল-ইঞ্জিন সরকারগী তুংগী থবকশিং অমসুং লৈবাক অসিগী মকোক থোংবা রাজ্য অহুমগী মনুংদা মধ্য প্রদেস য়াওহন্নবা থাজবা প্রধান মন্ত্রীনা অমুক হন্না পীখি।

থৌরম অদুদা শরুক য়াখিবশিংগী মনুংদা মধ্য প্রদেসকী চীফ মিনিস্তর শ্রী সিবরাজ সিংহ চৌহান, য়ুনিয়ন মিনিস্তরশিং শ্রী নরেন্দ্র সিংহ তোমার, দোক্তর বিরেন্দ্র কুমার অমসুং জয়তিরাদিত্য সিন্দিয়া, এম.পিশিং অমসুং মধ্য প্রদেস সরকারগী মিনিস্তরশিং য়াওখি।

নুঙগীৱারোল

লৈবাক্কী লম্বী-থোং চাউখৎহন্নবা পায়খৎপা অতোপ্পা মশক নাইবা খোঙথাং অমা ওইনা, প্রধান মন্ত্রীনা লৈবাক মীয়ামদা দিল্লী-বদোদরা এক্সপ্রেসৱে খুৎশিন্নখ্রে। হায়রিবা প্রোজেকশিং অসি চাউরাক্না লুপা করোর ১১,৮৯৫ চঙনা শেমগৎখিবনি। মহাক্না লুপা করোর ১৮৮০ হেনবগী তোঙান-তোঙানবা রোদ প্রোজেক্ত মঙাগী উরেপ উয়ুংসু তমখ্রে।

মীপুম খুদিংগী মশাগী ময়ুম অমা শোইদনা লৈহনবা হায়বসিগীদমক্তা প্রধান মন্ত্রীনা লেপ্তনা হোৎনদুনা লাক্লি। পান্দম অসিগা মরী লৈননা, পি.এম.এ.ৱাই-গ্রামীনগী মখাদা শাখিবা য়ুম লাখ ২.২ হেনবগী গৃহ প্রবেশকী থৌরমসু প্রধান মন্ত্রীনা হৌদোকখি। পি.এম.এ.ৱাই-অর্বানগী মখাদা চাউরাক্না লুপা করোর ১৪০ চঙনা শাখিবা য়ুমশিং মহাক্না য়ুম্বুশিংদা খুৎশিন্নখি।

সরকারনা অহেনবা মিৎয়েং চঙদুনা লাকখিবা মরু ওইবা হীরমশিংগী মনুংদা অফবা অমসুং মরাং কায়বা ঈশিং ফংহনবা হায়বসিসু অমনি। পান্দম অসিবু খুমাং চাউশিলহনবা ওইনা, প্রধান মন্ত্রীনা গ্বালিয়র অমসুং শেওপুর জিলাদা লুপা করোর ১৫৩০ হেনবগী জল জীবন মিসনগী প্রোজেক্তশিংগী উরেপ উয়ুং তমখি। প্রোজেক্ত অনি অসিনা পুন্দুনা লমদমসিগী খুঙ্গং ৭২০ হেনবগী মফমদা কান্নবা ফংহনগনি।

হেল্থ ইনফ্রাস্ত্রকচর হেন্না চাউখৎহনবগী অতোপ্পা খোঙথাং অমা ওইনা, প্রধান মন্ত্রীনা অয়ুশমান ভারত হেল্থ ইনফ্রাস্ত্রকচর মিসনগী মখাদা শাগদবা হেল্থ সেন্তর মাপনগী উরেপ উয়ুং তমখ্রে। হেল্থ সেন্তরশিং অসি লুপা করোর ১৫০ হেন্না চঙদুনা শাগদবনি।

প্রধান মন্ত্রীনা আই.আই.তি ইন্দোরগী একাদমিক বিল্দিংশিং মীয়ামদা খুৎশীন্নখি অমসুং কেম্পস অসিগী মনুংদা লৈগদবা হোস্তেল অমসুং অতোপ্পা বিল্দিংশিংগী উরেপ উয়ুংসু তমখি। প্রধান মন্ত্রীনা মলতি-মোদেল লোজিস্তিক্স পার্ক অমগী উরেপ উয়ুংসু ইন্দোরদা তমখি।  তোঙান-তোঙানবা প্রোজেক্তশিংগী মনুংদগী উজেনগী ইন্তিগ্রেতেদ ইন্দস্ত্রীল তাউনশিপ, আই.ও.সি.এল বোত্তলিং প্লান্ত, গ্বালিয়রগী অতল বিহারী বাজপায় দিব্যাং স্পোর্ত ত্রেনিং সেন্তর য়াওনা প্রোজেক্ত কয়াসু মহাক্না মীয়ামদা খুৎশিন্নখি।

मध्य प्रदेश के ग्वालियर में कई विकास परियोजनाओं का उद्घाटन और शिलान्यास समाज के सभी वर्गों के सशक्तिकरण में अहम भूमिका निभाएगा। https://t.co/tfbumvkr2M

— Narendra Modi (@narendramodi) October 2, 2023

****