“এক তারীখ, এক ঘন্তা, এক সাথ অসিদি শ্রামদান সে স্বচ্ছতা হায়রিবা তরু-তনানবগী অকনবা খোঙথাং অসিগীদমক্তা অখন্ননা থম্বা খোল্লাওনি। মসিদি ৱাশক শকপা, লমজেল চেনবা, রঙ্গোলী কম্পিতিসন, ৱাল পেন্তিং, নুক্কর, নাতক্কী থৌওং অমত্তা নত্তে। শ্রামদান হায়বসিদি লৈবাক শিনবা থুংবদা চত্থগদৌরিবা তরু-তনানবগী থবকশিংখক্কীনি”, হাউজিং অমসুং অর্বান এফিয়র্স; পেত্রোলিয়ম অমসুং নেচরেল গ্যাসকী কেন্দ্র মন্ত্রী, শ্রী হর্দীপ সিংহ পুরীনা হায়খি। প্রধান মন্ত্রীনা মহাক্কী মন কী বাতকী 105শুবা তাঙ্কক্তা ওক্তোবর 1গী অয়ুক্কী পুং 10 তাবা মতমদা লৈবাক মীয়াম্না অমত্তা ওইনা বাপুজীগী মপোক কুমওনগী নোংমা মাংওইননা মহাক্কী মফমদা ‘স্বচ্ছাঞ্জলী’ কৎসি হায়না ফোংদোকখিবনি। মসিগুম্বা তরু-তনানবগী অচৌবা খোঙথাং অসিনা পুন্সিগী থেংখাং খুদিংগী মীয়ামগী মফমদা কৈথেল, রেলৱে ত্রেক, ঈশিং লৈফম, লমকোয়ফম, লাইনীংফম্নচিংবা মীয়ামগী মফমশিংবু তসেংনা শেংদোকসি, য়েংবদা লু-নান্না উহনসি হায়না হায়খিবনি।

ঙসি মীদিয়াগী মীওইশিংগা ‘স্বচ্ছতা হি সেবা’গী মতাংদা উন্নবদা, রুরেল অমসুং অর্বান ভারতকী মফম লাখ 6.4 হেনববু শ্রামদানগীদমক্তা খনগৎখি হায়না মহাক্না পাউদমখি। লম তু শেংদোকপগী অচৌবা খোঙথাং অসিনা অমোৎপা য়াম্না পৈশিনগনবা মফম, রেলৱে লম্বী অমসুং স্তেসন, এয়রপোর্ত অমসুং মনাক নকপগী মফম, শোরোক মপান – নেস্নেল অমসুং স্তেত হাইৱেগী পরিং খরা, ঈশিং লৈফম, ঘাত, স্লম, থোং মখা, কৈথেল, বেক লেন, লাইনীংফম, লমকোয়ফম, বস স্তেন্দ/তোল প্লাজা, জু অমসুং লম্লক্কী শা লৈফম, ঘাউসালা, চিং, সমুদ্র মপান, হিথাংফম, মৈ লৈনবা মফম, আঙ্গনৱারী, স্কুল/কোলেজনচিংবা মফমশিং শেংদোকপগী পান্দম থম্লি।

স্বচ্ছতা ইভেন্ত অসিদা তেংবাংনবগীদমক্তা, ULB, তাউন, গ্রাম পঞ্চায়ত, মন্ত্রালয়শিংনা স্বচ্ছতা শ্রামদানগী থৌরমশিংবু স্বচ্ছতা হি সেবা – সিতিজন্স পোর্তেল, https://swachhatahiseva.com/ অসিদা হাপচিনখ্রে। মীয়াম্না অখন্ননা মওং-মতৌ শেম্লবা IT প্লেতফোর্ম অসিদা মখোয়গী খ্বাইদগী নকপদা পাংথোক্লিবা তরু-তনান্না থম্বগী থৌরমশিং য়েংবা য়াগনি অমসুং শরুক য়ানবা য়াওবসু য়াওগনি। শ্রামদান সে স্বচ্ছতাগী কেম্পনে মনুংদা লম-তু শেংদোক্লিবা মফমশিংগী ফোতো নমদুনা মীয়াম্না পোর্তেল অসিদা অপ্লোদ তৌবা য়াগনি। মীয়াম্বু শরুক য়াবীনবা পাউজেল পীবা, ইনফ্লুএন্সরশিংনা জন আন্দোলন অসিদা শরুক য়ানবা অমসুং স্বচ্ছতা এম্বেসেদর ওইদুনা মীয়ামগী ইহৌ অসিবু লুচিংবগী সেক্সন কয়া পোর্তেল অসিদা য়াওরি।

রেসিদেন্ত ৱেলফিয়র এসোসিএসন মশিং য়াম্বনা মী লৈনবা মফম চাউরাক্না লাখ 1দা শ্রামদান পাংথোক্নবা মাঙ থানা থোকলকখি অমসুং খুঙ্গংগী কম্ম্যুনিতীশিংনা লৈবাক শিনবা থুংবগী আঙ্গনৱারী সেন্তর চাউরাক্না 35,000বু কোনশিন্নবা মাঙ থানা থোক্নরকখি হায়না মন্ত্রীনা মীদিয়াগী মফমদা পাউদমখি। NGO, কৈথেলগী লুপ, SHG, ধর্মগী কাঙলুপ, লল্লোন ইতিক্কী লুপ, প্রাইভেত সেক্তরনচিংবনা মার্কেত এরিয়া 22,000; ঈশিং লৈফম 10,000; চাউরাকপা বস স্তেন্দ/তোল প্লাজা 7,000, চাউরাকপা ঘাউসালা 1000, জু অমসুং লম্লক্কী শা লৈবা মফম চাউরাকপা 300 অমসুং রুরেল অমসুং অর্বান ভারতকী লম-তু শেংদোকপগী অচৌবা থবকশিং পাংথোক্কদবা মফমশিংদা শ্রামদান পাংথোক্কে হায়না মাঙজিল থানা থোক্নরকখি।

মখা তাবা ওইনা, অহানবা ওইনা পাংথোকপা মতৌ ওইনা, আর্মী, নেভী, এয়র ফোর্সনা মীচম মীয়ামগা অমত্তা ওইনা পুনদুনা অমোৎ অকায় য়াম্না পৈশিনগনবা মফম, রেল লম্বী, হেরিতেজ বিলদিং, স্তেপ ৱেল, লানবনশিং শেংদোক্কনি হায়না মন্ত্রীনা হায়খি। বাবা রামদেবগী পতাঞ্জলী য়োগাপীথ অমসুং লোকেলগী অতোপ্পা কাঙলুপশিংনা নেস্নেল হাইৱেগী অশাংবা পরিংসু শেন্দোক্কে হায়না মাঙ থানা থোক্লকখি। অফ্রোজ শাহ অমসুং সুদর্শন পত্নাইক্না লুচিংবা মমিং লৈবা লুপশিংনা সমুদ্রগী তোর্বান কয়াবু শ্রামদানগীদমক্তা খনগৎনখি। সুলাভ ইন্তর্নেস্নেলনা ওক্তোবর 1দা কম্ম্যুনিতী অমসুং পব্লিক তোইলেত শেংদোক্নবা থোক্লকখি।

শ্রী হর্দীপ সিংহ পুরীনা তোঙান-তোঙানবা লুপ কয়ানা লৈবাক শিনবা থুংবগী ম্যুজিয়ম, মোন্যুমেন্ত অমসুং লানবনশিং শেংদোক্কে হায়না থোক্নরকখি হায়না ফোংদোকখি। স্কুল/কোলেজশিংদা লম-তু শেংদোকপগী থবক্কী শরুক অমা ওইনা, মাতা অমৃতাঅনন্দমায়ীগী অম্মা ফাউন্দেসন্না লৈবাক্কী স্কুলশিংদা শ্রামদাম পাংথোকচগে হায়না হায়জরকখি। প্রদীপ সাংৱানগী হিলিং হিমালয়ানা উত্তরাখন্দগী হিমালয়গী পরিং শেংদোক্নবা থোক্লকখি। ISKCON তেম্পল এসোসিএসন্না লাইনীংফম শেংদোকচগে হায়রকখি অমসুং রামকৃষ্ণ মথনা মথকী মফমশিংদা শ্রামদান পাংথোক্কনি। FICCI, CII, CREDAI, শ্রী সত্যা সাই লোক সেবা, লাইওন্স ক্লব, রোতারী ক্লবকুম্বা NGO, UNICEF, অগা খান ফাউন্দেসন্না ওক্তোবর 1দা মরী লৈনবা থবকশিংদা শরুক য়াশিল্লক্কনি।

রাজ্যশিংগী মরক্তগী, উত্তর প্রদেশনা লম তু শেংদোক্নবা মফম লাখ 1 হেন্না লৌশিনখ্রে, অদুগা মহারাস্ত্রনা মফম 62,000 হেনবদা লম তু শেংবগী থবক পাংথোক্কনি অমসুং মসিদা মীয়ামসু শরুক য়াশিন্দুনা সমুদ্র মপান, লাইগী মফম, স্কুল/কোলেজ, ঈশিং লৈফমশিং শেংবদা মতেং পাংশিনগনি। তেলঙ্গানাগী ওইনা, রাজ্যসিদা লৈবা পুৱারীগা মরী লৈনবা লাইশঙশিং শেংদোকপগী পান্দম থম্লি। মধ্য প্রদেশনা ওক্তোবর 1দা মফম 57,000 শেংনবা শেম শারি; আন্ধ্র প্রদেশ অমসুং গুজরাতনা মথংশিৎনা মফম 40,000 অমসুং 35,000দা শ্রামদান পাংথোক্নবা থৌরাং য়াৎলি। কেন্দ্রগী কেবিনেত মন্ত্রী, এম.পি., মুখ্য মন্ত্রী কয়াগা লোয়ননা মেয়র, সর্পঞ্চ অমসুং রাজনীতিগী লুচিংবশিংনা মীয়াম্না লুচিংদুনা পাংথোকপা তরু-তনানবগী থৌরমশিংদা শরুক য়াগনি।

দিল্লীগী ওইনসু, NDMC, NGO শ্রী শ্রী আর্ত ওফ লিভিং অমসুং চিন্তন্না স্লম অমসুং অতোপ্পা মফমশিং শেংদোক্নবা শ্রামদান অসিদা শরুক য়াগনি। MCDগী মখাদা লৈবা মফম 500 হেনববুসু লম তু শেংবগী দ্রাইব অসিগীদমক্তা খন্দোকখ্রে।

চহি 9গী মমাংদা পি.এম.না ইং 2014দা থমখিবা খোল্লাওদা খুদম ওইনা পীরদুনা, মন্ত্রীনা হায়খিবদা, পি.এম.গী খোল্লাও তাদুনা মীওই কয়ানা স্বচ্ছ ভারতপু মশামক্কী থবক্নি খন্না থৱাই য়াওনা থোক্নরকখি। মসিনা মরম ওইরগা, স্বচ্ছতানা লৈবাক্কী লিচৎ শাজৎ ওইরকখি অমসুং স্বচ্ছ ভারত মিসন অসি য়ুম্থোং খুদিংদা শিজিন্নবা মিং অমা ওইরকখি হায়না মহাক্না হায়খি।

প্রধান মন্ত্রীগী এক তারীখ, এক ঘন্তা, এক সাথকী খোল্লাওগী মতাংদা পল্লদুনা, মসিনা হান্নদগী হেনবা তরু তনানবা ভারত অমগীদমক্তা মীয়াম্না মশানা য়ানা পাংথোকপা মালেমগী খ্বাইদগী চাউবা থৌওং ওইরগনি হায়না শ্রী পুরীনা মখা তাখি।

মমাংগী চহিদা তৌখিবগুম্না, হন্দক্কী চহি অসিদসু, হাউজিং অমসুং অর্বান এফিয়র্স মন্ত্রালয় (MoHUA) অমসুং দ্রিঙ্কিং ৱাতর অমসুং সেনিতেসন (DDWS)না কেন্দ্রগী অতোপ্পা মন্ত্রালয়শিংগা খুৎশম্নদুনা স্বচ্ছতা পখ্বারা – স্বচ্ছতা হি সেবা (SHS) 2023 পাংথোক্লি। পখ্বারা অসি পঞ্চায়তী রাজ অমসুং খুঙ্গং চাউখৎ থৌরাং মন্ত্রী, শ্রী গিরিরাজ সিংহ, জল শক্তি মন্ত্রী, শ্রী গজেন্দ্র সিংহ সেখাৱৎ অমসুং হাউজিং অমসুং অর্বান এফিয়র্স মন্ত্রী, শ্রী হর্দীপ শিংহ পুরীনা ভর্চুএল সম্বাদকী খুত্থাংদা DM, ম্যুনিসিপাল কম্মিস্নর অমসুং রাজ্য/UTশিংগা লোয়ননা সেপ্তেম্বর 15দা পুন্না হৌদোকমিন্নখিবনি।

স্বচ্ছতা পখ্বারা 2023গী থীমদি গার্বেজ ফ্রী ইন্দিয়া হায়বসিনি। খুঙ্গং অমসুং শহর মচা, স্কুল, আঙ্গনৱারী, হকশেলগী সেন্তর, রেলৱে স্তেসন, এয়রপোর্ত্নচিংবনা তোঙান-তোঙানবা থবক কয়া এৱিয়র্নেস পীবা অমসুং লু নানবা হেনগৎহনবদা অহেনবা মিৎয়েং চঙদুনা পাংথোক্লি। থবক থৌরমশিং পাংথোকপগী থাখায় অসিগী মনুংদা, মীওই করোর 31 হেনবনা প্লোগ রন, লম তু শেংবা, এৱিয়র্নেস প্রোগ্রাম্নচিংবশিংদা থৱাই য়াওনা শরুক য়ানখি।

লৈবাক শিনবা থুংবগী মীয়াম করোর 31না পখ্বারা অসিদা শরুক য়াখি অমসুং স্বচ্ছতাগী জন আন্দোলন অসিদা য়াওখি। তোঙান-তোঙানবা শহরশিংনা প্লোগ রন, স্বচ্ছতা রেল্লী, ৱাশক লৌবা, এৱিয়র্নেস প্রোগ্রাম, নুক্কর নাতক, রঙ্গোলী কম্পিতিসন, ৱাল আর্ত কয়া পাংথোকপগা লোয়ননা  সমুদ্র তোর্বান, মমিং লৈবা লমকোয়বগী মফম, লিগেসী ৱেস্ত সাইত, ঈশিং লৈফম্নচিংবা শেংদোকপগী থবক পাংথোক্নখি। মীয়ামগী মফম চাউরাকপা 5000, অমোৎ অকায় য়াম্না পৈশিনগনবা মফম 1000, সমুদ্র তোর্বান 500 হেনবা, ৱাতর বোদী 600, লমকোয়ফম 300 হেনবশিং অসি পখ্বারা মনুংদা শেংদোকখি।

***