মমিং লৈরবা স্তারলেৎ মিস ৱাহীদা রেহমন ইং ২০২১গী দাদাসাহেব ফাল্কে লাইফতাইম এচীভমেন্ত এৱার্দ পীদুনা ইকায়খুম্নবা উৎলগনি হায়না ঙসি কেন্দ্র মন্ত্রী শ্রী অনুরাগ থাকুরনা লাউথোকখ্রে‍। ফিরেপ অসি পাউদম্লদুনা, ভারতকী সিনেমাদা মশক নাইরবা থৌদাং লৌরম্বগীদমক মহাক্কী মফমদা মনা অসি পীননবা লাউথোকপদা য়াম্না নুংঙাইবা অমদি ইকায়খুম্নবা ফাওই হায়না মন্ত্রীনা হায়খি‍।

মিস রেহমন হিন্দী ফিল্মশিংদা মহাক্না লাংখিবা শক্লোনশিংগীদমক য়াম্না শিংথানৈ, মখোয়গী মনুংদা মশক নাইবা খরদি প্যাসা, কাগজ কে ফুল, চৌধ্বী কা চান্দ, সাহেব বিবি ঔর ঘুলাম, গাইদ, খামোসী অমদি অতৈ কয়া পনবা য়াই হায়না মন্ত্রীনা মখা তাখি‍। মহাক্কী এক্তিংগী মতিংগী মতাঙদা, “দেকেদ ৫ লৈখিবা মহাক্কী করিয়রদা, মহাক্না য়াম্না মওং মরিল তানা মহাক্কী শক্লোনশিং লাংদুনা, রেশ্মা অমদি শেরা ফিল্মদা ক্লান্সৱুমেন অমগী শক্লোন লাংখিবগীদমক নেস্নেল ফিল্ম ঋৱার্দ ফংখি‍। পদ্ম শ্রী অমদি পদ্ম ভুসন মনা ফংখ্রবা ৱাহীদা জীদা মহাক্কী কন্না হোৎনজবনা শিন্ফমগী খ্বায়দগী ৱাংবা থাক য়ৌবা ঙম্লিবা ভারত নুপী অমগী কত্থোকপা, ফোঙফম অমদি মপাঙ্গল উৎখি,” হায়না মন্ত্রীনা হায়খি‍।

ভেতেরন এক্ত্রেস অসিদা লান্থোক্কদৌরিবা মনা অসি নারী শক্তী বন্দন অধিনিয়ম পাস তৌবগা মপা চাননা লাক্লি হায়রদুনা, “পার্লিয়ামেন্ততা পুৱারী ওইরবা নারী শক্তী বন্দন অধিনিয়ম পাস তৌবা মতমসিদা, মহাক্কী মফমদা লাইফতাইম এচীভমেন্ত মনা লান্থোক্কদৌরিবা অসি ভারতকী সিনেমাগী মকোক চিংবা নুপীশিংগী মরক্তগী অমা ওইরিবা অমদি ফিল্মগী মতুংদা মীয়ামগী মতেঙ পাংদুনা খুন্নাইগী য়াইফনবগীদমক মপুন্সি কত্থোক্লিবা মীশক অমদা উৎপা চপ চারবা ইকায়খুম্নবা অমনি,” হায়না মন্ত্রীনা হায়খি‍।

মনা অসি ৬৯শুবা নেস্নেল ফিল্ম এৱার্দ থৌরমদা লান্থোক্কনি‍।

মখাদা পীরিবশিং অসি দাদা সাহেব ফাল্কে এৱার্দ সেলেক্সন কম্মিতীগী মেম্বরশিংনি:

১.      মিস অসা পরেখ

২.     মিস্তর চিরঞ্জীবী

৩.     মিস্তর পরেশ রৱল

৪.     মিস্তর প্রোসেঞ্জিৎ চেত্তর্জী

৫.     মিস্তর সেখর কাপুর

হৌখিবা চহিশিংদা, ভেতেরান এক্ত্রেস অসিনা মহাক্কী মতমগী এক্ত্রেস খরখক্তনা ফংবা ঙমখিবশিং ফংদুনা লাকখি‍। মহাক্কী এক্তিংগী মতিংগা লোয়ননা, ৱাহীদা রেহমন্না মনা কয়া অমা ফংখি‍। মহাক্না গাইদ (১৯৬৫) অমদি নীল কমল (১৯৬৮)দা লাংখিবা শক্লোনশিংগীদমক ফিল্মফেয়র বেস্ত এক্ত্রেস এৱার্দ ফংখি‍। এক্ত্রেস অসিনা নেস্নেল এৱার্দ ফোর বেস্ত এক্ত্রেস (১৯৭১)সু ফংখি অমদি ভারত লৈঙাক্না ১৯৭২দা পদ্ম শ্রী লান্থোক্তুনা ইকায়খুম্নখি, তুংদা ২০১১দা পদ্ম ভুসন ফংখি‍। ৱাহীদা রেহমন্না, মহাক্কী দেকেদ মঙা হেনবগী করিয়রদা ফিল্ম ৯০ হেন্না কুমখি অমদি মীয়াম্না নীংথিনা শিংথানখি‍।

***