প্রধান মন্ত্রী শ্রী নরেন্দ্র মোদীনা সেপ্তেম্বর 26-27, 2023দা গুজরাত্তা চৎকনি। সেপ্তেম্বর 27গী অয়ুক পুং 10 তাবা মতমদা প্রধান মন্ত্রীনা বাইব্রেন্ত গুজরাত গ্লোবেল সম্মিৎনা চহি 20 শুরকপগী পালন থৌরমদা শরুক য়াগনি। মসিগী মতুং তারকপদা নুমিৎ য়ুংবা মতুং 12:45রোম তারকপদা প্রধান মন্ত্রীনা ছোতাউদেপুরগী বোদেলীদা থুংগনি, মফম অসিদ মহাক্না লুপা করোর 5200 হেনবা প্রোজেক্তশিং জাতিদা কৎথোক্কনি অমসুং উরেপ-উয়ুং তমগনি।

বাইব্রেন্ত গুজরাত গ্লোবেল সম্মিৎ চহি 20 শুরকপা

প্রধান মন্ত্রীনা অহমদাবাদকী সাইন্স সিতীদা বাইব্রেন্ত গুজরাত গ্লোবেল সম্মিৎনা চহি 20 শুরকপগী পালন থৌরমদা শরুক য়াগনি। মসিদা ইন্দস্ত্রী এসোসিএসনশিং, ত্রেদ অমসুং কম্মর্সকী লমদগী মশক নাইবা মীওইশিং, হৌগৎলক্লিবা ওন্তপ্রিনোরশিং, হায়র এন্দ তেক্নিকেল এজুকেসন কোলেজশিংগী মহৈরোয়শিং, অমদি অতোপ্পা কয়ানা শরুক য়াবা উবা ফংগনি।

বাইব্রেন্ত গুজরাত গ্লোবেল সম্মিৎ অসি চহি 20গী মমাংদা মতম অদুগী গুজরাতকী মুখ্য মন্ত্রী, শ্রী নরেন্দ্রগী মীৎয়েং শান্না য়েংবা লিচিং মখাদা হৌখিবনি। সেপ্তেম্বর 28, 2003 দা বাইব্রেন্ত গুজরাত গ্লোবেল সম্মিৎকী খোঙচৎ হৌখি। মতমগা ইরোইননা মসি ভারতকী খ্বাইদগী অৱাংবা থাক্কী বিজিনেস সম্মিৎশিংগী মনুংদা অমগী থাক য়ৌদুনা তশেংনা গ্লোবেল ইভেন্ত অমা ওইরকখি। 2003দা ইন্তর্নেস্নেল পার্তিসিপেন্ত 300রোম য়াওদুনা হৌদোকখিবদগী 2019দা লৈবাক 135 হেনবদগী দেলিগেৎ লিশিং কয়ানা চাউনা শরুক য়াবা উবা ফংখি।

হৌখিবা চহি 20 অসিদা বাইব্রেন্ত গুজরাত গ্লোবেল সম্মিৎনা “গুজরাতপু পাম্নরবা ইনভেস্তমেন্ত দেস্তিনেসন অমা ওইনা শেমগৎপদগী” “অনৌবা ভারত অমা শেমগৎপা” ওইনা ওইরকখি। বাইব্রেন্ত গুজরাত চুনা মাইপাকপনা লৈবাক পুম্বগী ফীদম্নফম ওইবা মোদেল অমা ওইরকখি অমসুং ভারতকী রাজ্যশিংদা অসিগুম্বা ইনভেস্তমেন্ত সম্মিৎশিং পাঙথোক্নবা ইথিলসু পীখি।

ছোতাউদেপুরগী বোদেলীদা পি.এম.

‘মিসন স্কুল্স ওফ এক্সিলেন্স’ প্রোগ্রামগী মখাদা লুপা করোর 4500 হেনবগী প্রোজেক্ত কয়ামরুম প্রধান মন্ত্রীনা জাতিদা কৎথোক্কদৌরিবা অমসুং উরেপ-উয়ুং তমগদৌরিবা অসিনা গুজরাত শিনবা থুংবদা লৈরিবা স্কুল ইনফ্রাস্ত্রকচরনা অচৌবা শাহৌ অমা ফংলগনি। গুজরাত্তা লৈরিবা স্কিলশিংদা শাখিবা অনৌবা ক্লাসরুম, কম্প্যুতর লেব, STEM (সাইন্স, তেক্নোলোজী ইঞ্জিনীয়রিং এন্দ মেথমেতিক্স) লেব লিশিং কয়া অমসুং অতোপ্পা ইনফ্রাস্ত্রকচরশিংবু প্রধান মন্ত্রীনা জাতিদা কৎথোক্কনি। মহাক্না মিসন অসিগী মখাদা গুজরাতকী স্কুলশিংদা ক্লাসরুম কয়া ফগৎহন্নবা অমসুং অপগ্রেদ তৌনবগী উরেপ-উয়ুংসু তমগনি।

প্রধান মন্ত্রীনা ‘বিদ্যা সমীক্ষা কেন্দ্র 2.0’ প্রোজেক্কী উরেপ-উয়ুংসু তমগনি। প্রোজেক্ত অসি স্কুলশিং লেপ্পা লৈতনা মোনিতর তৌবা অমসুং স্তুদেন্ত লর্নিং আউৎকমশিং ফগৎহনবা ঙমখিবা ‘বিদ্যা সমীক্ষা কেন্দ্র’ মাইপাকখিবদা য়ুম্ফম ওইরগা শেমগৎকনি। ‘বিদ্যা সমীক্ষা কেন্দ্র 2.0’ অসিনা গুজরাতকী জিলা অমদি ব্লোকশিংদা বিদ্যা সমীক্ষা কেন্দ্রশিং লিংখৎপা ঙমহনগনি।

থৌরম অসিদা প্রধান মন্ত্রীনা ভদোদরা জিলাগী তালুকা সিনোরদা ‘ওদারা দাভোই-সিনোর-মালসর-আসা রোদ’তা নর্মদা তুরেল মথক্তা শাখিবা অনৌবা থোং; দাহোদকী চাব তলাব নৌনা শেমগৎ-শাগৎপগী প্রোজেক্ত, ৱাতর সপ্লাই প্রোজেক্ত, ভদোদরাগী শেল-থুমগী ফীভমদা শোত্থরবা শরুক্কীদমক নৌনা শাখিবা য়ুম 400রোম, গুজরাত শিনবা থুংবদা লৈরিবা খুঙ্গং 7500 শিনবা থুংবদা ভিলেজ ৱাই-ফাই প্রোজেক্ত; অমসুং দাহোদতা নৌনা শাখিবা জবাহর নবোদয় বিদ্যালয় য়াওনা চাউখৎ-থৌরাংগী প্রোজেক্ত কয়ামরুম জাতিদা কৎথোক্কনি।

প্রধান মন্ত্রীনা ছোতাউদেপুরদা ৱাতর সপ্লাই প্রোজেক্ত; পঞ্চমহলগী গোধরাদা ফ্লাইওভর ব্রিদজ; অমসুং কেন্দ্র সরকারগী ‘ব্রোদকাস্তিং ইনফ্রাস্ত্রকচর এন্দ নেৎৱার্ক দিবেলপমেন্ত (BIND)’ স্কিমগী মখাদা দাহোদতা শাখিবা FM রেদিও স্তুদিওগী উরেপ উয়ুং তমগনি।

*****