প্রধানমন্ত্রীগী লোইশঙ
প্রধান মন্ত্রীনা নিউ দিল্লিদা ‘ইন্তরনেসনেল লোয়ার্স কনফরেন্স ২০২৩’ হৌদোকখ্রে
“চহি কয়া জুদিসিয়ারি অমসুং বারনা ভারতকী ৱায়েন পথাপকী থবকশিং লমজিংদুনা লাক্লি”
“আইনগী শীনফমদা থবক তৌরকপগী হৈশিংবা অসিনা নিংতম্লবা ভারতকী য়ুম্ফম মপাঙ্গল কনখৎহন্নবা থবক তৌরে অমসুং ঙসি লৈরিবা মীচং-মীখাই নাইদবা ৱায়েনবগী থবক্না মালেমদা ভারতকী থাজবা হেনগৎহনবদা মতেং পাংলে”
“ভারত্তা নুপীনা লমজিংদুনা চাউখৎপদা নারী শক্তি বন্দন এক্তনা অনৌবা মাইকৈ অমসুং শক্তি পীরগনি”
“মালেমগী অৱাবশিং থেংনবা মতমদা, মখোয় থেংননবা লম্বীশিং অদু মালেমগী ওইগদবনি”
“আইন অসি মখোয়গীনি হায়বা মীয়াম্না খনগদবনি”
“ভারত্তা অনৌবা আইনশিং অচম্বা লোলদা শেম্নবা হৌজিক ঐখোয় খন্নরি”
“আইনগী লমদা থবক তৌরিবশিংনা অনৌবা তেক্নোলোজিগী চাউখৎপশিং শীজিন্নগদবনি”
Posted On:
23 SEP 2023 11:50AM by PIB Imphal
প্রধান মন্ত্রী শ্রী নরেন্দ্র মোদীনা ঙসি নিউ দিল্লিগী বিগ্যান ভাবন্দা ‘ইন্তরনেসেনেল লোয়ার্স কনফরেন্স ২০২৩’ হৌদোকখ্রে। জাতিগী অমসুং মালেমগী মরুওইবা আইনগী হিরমশিং খন্ন-নৈনবা, অনৌবা ৱাখল্লোনশিং পীথোক-পীশিন তৌনবা অমসুং আইনগী ওইবা ৱাফমশিংদা মালেমগী ওইনা মতেং পীনবা হেনগৎহন্নবা ৱারি শান্নবা মফম অমা পীনবা পান্দমদা কনফরেন্স অসি পাংথোকপনি।
থৌরম অদুদা তিনখিবা মীয়ামদা ৱা ঙাংবদা প্রধান মন্ত্রীনা হায়খি মালেমগী ওইনা আইনগী লমদা থবক তৌরিবা শক্নাইরবশিংগা উনবগী খুদোংচাবা অমা ফংবদা অপেনবা পোকই। মীফম অসিদা ইংলেন্দগী লোর্দ চান্সেল্লর এলেক্স চোক্ল, বার এসোসিএসন ওফ ইংলেন্দগী মীহুৎশিং, কম্মনৱেল্থ অমসুং অফ্রিকাগী লৈবাকশিংগী মীহুৎশিং অমসুং লৈবাক অসিগী মফম কয়াগী মীওইশিং শরুক য়ারি। ‘ইন্তরনেসনেল লোয়ার্স কনফরেন্স ২০২৩’ অসি বসুধাইব কুতুম্বমক’গী ৱাখল্লোনগী খুদম অমনি। প্রধান মন্ত্রীনা মপান লৈবাকশিংগী শক্নাইরবশিং ভারত্তা তরাম্না ওকখি অমসুং থৌরম অসি শীনবগীদমক বার এসোসিএসন ওফ ইন্দিয়া থাগৎপা ফোঙদোকখি।
প্রধান মন্ত্রীনা হায়খি লৈবাক অমগী চাউখৎ-থৌরাংদা আইনগী লমদা থবক তৌরিবশিংগী অচৌবা থৌদাং লৈ। চহি কয়া জুদিসিয়ারি অমসুং বারনা ভারতকী ৱায়েন পথাপকী থবকশিং লমজিংদুনা লাক্লি। নিংতম ইহৌদা আইনগী শীনফমদা লৈবা মীওইশিংনা অচৌবা থৌদাং লৌখি। মহাক্না মহাত্মা গান্ধী, বাবা সাহেব অম্বেদকার, বাবু রাজেন্দ্র প্রসাদ, জৱাহরলাল নেহরু, সারদার পতেল, লোক মন্যা তিলক অমসুং বির সাভারকার মহাক্না পনখি। মহাক্না হায়খি আইনগী শীনফমদা থবক তৌরকপগী হৈশিংবা অসিনা নিংতম্লবা ভারতকী য়ুম্ফম মপাঙ্গল কনখৎহন্নবা থবক তৌরে অমসুং ঙসি লৈরিবা মীচং-মীখাই নাইদবা ৱায়েনবগী থবক্না মালেমদা ভারতকী থাজবা হেনগৎহনবদা মতেং পাংলে।
প্রধান মন্ত্রীনা হায়খি লৈবাক অসিনা পুৱারি ওইরবা ৱারেপ কয়া লৌবা মতম অমদা মালেমগী উকিলশিংগী মীফম পাংথোক্লি অমসুং লোক সভা অমসুং বিধান সভাদা নুপীশিংগী সিত চাদা ৩৩ খাক্তুনা থম্নবা লোক সভা অমসুং রাজ্য সভাদা নারী শক্তি বন্দন অধিনিয়ম পাস তৌরে। ভারত্তা নুপীনা লমজিংদুনা চাউখৎপদা নারী শক্তি বন্দন এক্তনা অনৌবা মাইকৈ অমসুং শক্তি পীরগনি। হন্দক নিউ দিল্লিদা পাংথোকখিবা জি-২০ মীফমদা মালেম্না ভারতকী গনতন্ত্র, মীশিং অমসুং দিপ্লোমেসি উখ্রে। থা অমগী মমাংদা, নুমিৎ অসিদা, থাগী খা মেরুদা চন্দ্রয়ান-৩ মাইপাক্না তাদুনা ভারতনা মালেমদা অহানবা লৈবাক ওইরে।
প্রধান মন্ত্রীনা হায়খি ২০৪৭দা চাউখৎলবা ভারত অমা ওইহন্নবা মশাগী থাজবগা লোয়ননা ঙসি ভারতনা থবক তৌরি। চাউখৎলবা লৈবাক অমগী পান্দম অমা ফংবা ঙম্নবা ভারত্তা মপাঙ্গল কনবা, মনিংতম্বা অমসুং মীচং-মীখাই নাইদবা ৱায়েন-থৌদাগী থবক অমা দরকার ওইরে। ‘ইন্তরনেসনেল লোয়ার্স কনফরেন্স ২০২৩’ অসি অচৌবা মাইপাকপা অমা ওইগনি অমসুং লৈবাক খুদিংমক্না অতোপ্পা লৈবাকশিংগী খ্বাইদগী ফবা থবকশিং তম্বা য়াগনি।
প্রধান মন্ত্রীনা হায়খি ঙসিগী মালেম অসিদা ঙমখৈগী মরমদা করি অমতা খন্দবা শক্তি কয়া লৈরি। মালেমগী অৱাবশিং থেংনবা মতমদা, মখোয় থেংননবা লম্বীশিং অদু মালেমগী ওইগদবনি। সাইবর তেরোরিজম, মনি লাউন্দরিং অমসুং আর্তিফিসিএল ইন্তিজিলেন্স লান্নবা শীজিন্নবগী খুদোংচাদবা মায়োক্নরি। অসিগুম্বা ৱাফমশিং থেংন্নবা মালেমগী ঙাক্লৌ অমা শেম্বদা সরকারগী ৱাংমদা লৈরি অমসুং তোঙান-তোঙানবা লৈবাকশিংগী আইনগী থবকশিং পুন্না থবক তৌমিন্নবা দরকার ওইরে।
প্রধান মন্ত্রীনা হায়খি অলতরনেত দিস্পুত রিজোলুসন অসি মালেম শীনবা থুংনা মালেম শীনবা থুংনা য়ানবা হৌরে। ভারত্তা য়ানদবশিং য়ানবা পুরক্নবা ভারত সরকারনা মেদিএসন এক্ত অমা চৎনরে। লোক অদালাতশিংনা অচৌবা থৌদাং অমা লৌরে অমসুং হৌখিবা চহি ৬ তা কেস লাখ ৭ রোম য়ানবা পুরকখ্রে।
প্রধান মন্ত্রীনা হায়খি ভারত্তা অনৌবা আইনশিং অচম্বা লোলদা শেম্নবা হৌজিক ঐখোয় খন্নরি। আইন অসি মখোয়গীনি হায়বা মীয়াম্না খনগদবনি। অচম্বা লোলদা আইন শেম্নবা সরকারনা থবক অমা পায়খৎলে অমসুং দেতা প্রোতেকসন লো অমা শেম্লে। ভারতকী সুপ্রিম কোর্তনা মসিগী ৱায়েনশিং লোল মরি হায়বদি হিন্দী, তামিল, গুজরাতি অমসুং উরিয়াদা হন্দোকপা অসিদা প্রধান মন্ত্রীনা থাগৎপা ফোঙদোকখি অমসুং মসি ভারতকী ৱায়েন-থৌদাগী থবক্তা অচৌবা অহোঙবা অমনি হায়না থাগৎখি।
লোইশিল্লকপদা প্রধান মন্ত্রীনা হায়খি তেক্নোলোজি, অহোংবশিং অমসুং অনৌবা জুদিসিএলগী থবকশিংগী খুৎথাংদা আইনগী থবকশিংগী মপুংফানা পাংথোক্নবা লম্বীশিং থিবা দরকার ওইরে। আইনগী লমদা থবক তৌরিবশিংনা অনৌবা তেক্নোলোজিগী চাউখৎপশিং শীজিন্নগদবনি।
থৌরম অসিদা ভারতকী চীফ জর্জতিস, দোক্তর দি.ৱাই চান্দ্রচুর, লো অমসুং জর্জতিসকী য়ুনিয়ন মিনিস্তর শ্রী অর্জুন রাম মেঘৱাল, ভারতকী এতোরনি জেনেরেল শ্রী আর. ভেনকাতারমনি, ভারতকী সোলিসিএতর জেনেরেল শ্রী তুসার মেহতা, ভারতকী বার কাউন্সিলগী চিয়ারমেন শ্রী মনান কুমার মিশ্রা অমসুং য়ু.কেগী লোর্দ চান্সেল্লর এলেক্স চোক্ল শরুক য়াখি।
নুঙগীৱারোল
‘ইন্তরনেসেনেল লোয়ার্স কনফরেন্স ২০২৩’ অসি বার কাউন্সিল ওফ ইন্দিয়ানা শীন্দুনা ‘অচুম্বা ৱায়েন ফংহনবগী থবক্তা থেংনরিবা খুদোংচাদবশিং’ হায়বা থিমদা সেপ্তেম্বর ২৩ অমসুং সেপ্তেম্বর ২৪,২০২৩দা পাংথোক্কদবনি। জাতিগী অমসুং মালেমগী মরুওইবা আইনগী হিরমশিং খন্ন-নৈনবা, অনৌবা ৱাখল্লোনশিং পীথোক-পীশিন তৌনবা অমসুং আইনগী ওইবা ৱাফমশিংদা মালেমগী ওইনা মতেং পীনবা হেনগৎহন্নবা ৱারি শান্নবা মফম অমা পীনবা পান্দমদা কনফরেন্স অসি পাংথোক্কদবনি। লৈবাক অসিদা অহানবা ওইনা পাংথোক্কদৌরিবা মীফম অসিদা, হৌজিক ওইরক্লিবা আইনগী চৎনবীশিং, ঙমখৈ লান্না কেস থেংনবদা থেংনরিবা খুদোংচাদবশিং, আইনগী তেক্নোলোজি অমসুং মহৌশাগী অকোয়বগী ফিবমগী আইনগী মতাংদা খন্নগনি।
মীফম অদুদা শক্নাইরবা জর্জশিং, আইনগী শীনফমদা লৈরিবা মীওইশিং অমসুং মালেমগী ওইনা আইনগী লমদা থবক তৌরিবা শক্নাইরবা মীওইশিং শরুক য়াখি।
*****
(Release ID: 1959859)
Visitor Counter : 100
Read this release in:
Marathi
,
English
,
Urdu
,
Hindi
,
Bengali
,
Assamese
,
Punjabi
,
Gujarati
,
Odia
,
Tamil
,
Telugu
,
Kannada
,
Malayalam