চন্দ্রয়ান-৩ মায় পাকখিবা অসি তোপ তোপ্পা অমা নত্তে, ভারতকী খুন্নাই, কল্চরেল অমদি সাইন্তিফিক ত্রেন্দ চাওখৎলকপগী মহৈনি‍। ৱাফম অসি ঙাকশেল মন্ত্রী শ্রী রাজনাথ সিংহনা সেপ্তেম্পর ২১, ২০২৩দা লোক সভাদা চন্দ্রয়ান-৩ মিসন মায় পাকখিবা অমদি স্পেস সেক্তরদা লৈবাকসিগী অতৈ মায় পাকপশিংগী মতাঙদা খন্ন-নৈনবদা ফোঙদোকখিবনি‍।

ঙাকশেল মন্ত্রীনা চন্দ্রয়ান-৩ মায় পাকখিববু লৈবাকসিদা ওইরক্লিবা অচৌবা সাইন্তিফিক ইকোসিস্তেম অসিগী মহৈনি হায়না শন্দোক্না তাকখি‍। “চন্দ্রয়ান-৩না ঐখোয়গী স্কুল অমদি কলেজশিংদা সাইন্সকী এজুকেসন ফগৎলক্লি অমদি ইন্দস্ত্রীশিংনা মতিং লৈবা পোত্থোকশিং পুথোক্লি অমদি সপ্লাই তৌরি হায়বা উৎলি‍। মমাঙগী লৈঙাকশিংনসু কয়া অমা হোৎনরমখি‍। মরম অদুনা লৈবাকসিদা সাইন্তিফিক তেম্পরেমেন্ত শেমগৎপদা থৌদাং য়াখিবা মীপুম খুদিংমক থাগৎপদা মতিক চাবা ঙাক্তনি,” হায়না মহাক্না হায়খি‍।

শ্রী রাজনাথ সিংহনা চন্দ্রয়ান-৩বু লৈবাক পুম্বগী অচৌবা মায় পাকপা অমনি হায়খি অমদি, মচাক মথুম মরাং কায়না লৈজরবসু থাগী লৈমায়দা য়ৌননবা হোৎনরিবা চাওখৎলবা লৈবাক কয়া অমা লৈরি, অদুগা ভারতনা মচাক মথুম মরাং কায়জদ্রবসু থাগী খা থংবা পোলদা য়ৌবা অহানবা লৈবাক ওইররে হায়খি‍। মায় পাকপা অসিগীদমক মহাক্না ইস্রো সাইন্তিস্তশিংগী হৈশিংবগী মতিক অমদি লৈবাক চাওখৎহনবগী মায়কৈদা পুক্নিং লুপ্লিবা অসিবু শিংথাখি‍। ভারত ঙসিদি মাগী হন্বা লৈতনা হোৎনজবগী মহৈনা সাইন্সকী লমদা মাঙজিল থাবা লৈবাকশিংগী মনুংদা অমা ওইরে হায়না মহাক্না হায়খি‍।

ঙাকশেল মন্ত্রীনা ভারতনা থাগৎখিবা মপান লৈবাকশিংগী সেতলাইত ৪২৪গী মনুংদা ৩৮৯দি প্রধান মন্ত্রী শ্রী নরেন্দ্র মোদীনা লুচিংবা লৈঙাক অসিনা পানখিবা হৌখিবা চহি মাপনসিদা থাগৎখিবনি হায়বা ৱাফম থমখি‍। মপান লৈবাকশিংগী সেতলাইতশিং মায় পাক্না থাগৎপগা লোয়ননা, ভারতকী স্পেস সেক্তর অসি মালেমগী থাক্তা খোঙলৈ থুনা মফম অমা কনবা ঙম্লক্লি হায়না মহাক্না মখা তাখি‍।

লৈবাক অমা অমদি মীওইবা খুন্নাইনা চাওখৎপদা সাইন্স অসি মরু ওইবগা লোয়ননা কলচরসু চপ চানা মরু ওইরি হায়না শ্রী রাজনাথ সিংহনা হায়খ‍ি‍। লৈঙাক অসিনা হীরম অনিসিদা চপ মান্নবা মীৎয়েঙ থম্নবগীদমক লেপ্লিবা খোঙথাঙবু মহাক্না ফোঙদোকখি‍। “সাইন্স অসি ভেল্যু ন্যুত্রেলনি‍। মসিনা ঐখোয়দা ন্যুক্লিয়র পৱারগী ৱাখল লৌশিং পীবা ঙম্মি, অদুবু মসিবু ঐখোয় ইশা চাওখৎহন্নবগীদমক ইনর্জী ওইনা শীজিন্নগদ্রা নৎত্রগা অতোপ্পশিংবু থুগাইনবা খুৎলায় ওইনা শীজিন্নগদ্রা হায়বসিনা ঐখোয়গী কলচরনা তাক্লি‍। সাইন্সনা ফনা য়াম্না খুমাঙ চাওশিল্লবসু, কলচর অমদি ভেল্যু য়াওদ্রবদি মসি মপুং ফারোই‍। মার্তিন লুথর কিংনা হায়রম্মি: ‘সাইন্সনা মীওইবদা, ৱাখল লৌশিং পী, মসিনা মতিক্নি‍। লাইনিংনা মীওইবদা লৌশিং পী, মসিনা কন্ত্রোলনি’‍। ঐখোয়না ঐখোয়গী ইনাৎপু থাদোক্লগা সাইন্সপু লৌশিনগদবনি হায়রিবশিং অদুনা নাৎ অমদি সাইন্স অমনা অমবু মপুং ফাহল্লিবনি হায়বসি খঙজিনগদবনি,” হায়না মহাক্না হায়খি‍।

“মায় পাকপা অসিগী হৌরকফমদি, সাইন্স অমসুং লাইনিংগী মরক্তা অমত্তা ওইবগী মরী থম্লম্বা ঐখোয়গী মাঙলমচত্তা ফুমদুনা লৈরবনি‍। মীরমগী লম খোপচিনবশিংনা মরম ওইরগা ঐখোয়গী খোঙজেলদা অপনবা অমা থোকখি, অদুবু হৌজিক্তি ঐখোয় অমুক হন্না ইচঙ থৌনা অহেনবা পাঙ্গলগা লোয়ননা চঙশিল্লক্লি অমদি নুমিৎ, থা অমদি থৱানমিচাকশিং য়ৌনবা শেম শাদুনা লৈরে,” হায়না ঙাকশেল মন্ত্রীনা হায়খি‍।

শ্রী রাজনাৎ সিংহনা কল্চরেল সিক্যুরিতীগী মরুওইবা ৱাফমশিং থম্লদুনা মসিবু ঙমখৈ, স্পেস, সাইবর, শেন্মিৎলোন, খুন্নাই, চীঞ্জাক, ইনর্জী অমদি এনভাইরনমেন্তেল সিক্যুরিতীগা চপ মান্ননা মরুওই হায়খ‍ি‍। কলচরেল সিক্যুরিতী হায়বসি লৈবাক অমগী অমদি লৈঙাক্কী শক্তম ঙাক্তুনা থম্বদা মরুওই হায়বগা লোয়ননা ভারতকী কলচরেল হেরিতেজ অসিসু সিক্যুরিতী ইসুশিংগী মতাঙদা কলচরেল সিক্যুরিতীগুম্না মরুওই হায়নসু মহাক্না হায়খি‍। লৈবাক অমত্তনা কলচরেলগী অওনবা য়াওদনা শেন্মিৎলোন, খুন্নাই, রাজনিতী অমদি সাইন্তিফিক ওইবা খোঙজেল পুরকপা ঙমখিদ্রি হায়না মহাক্না হায়খি অমদি লৈবাক অসিবু মাঙদা পুখৎনবগীদমক ভারতকী মশাগী ওইবা নাত্তগী তমবা য়াবশিংসু তমশিনবা মথৌ তাই হায়নসু মহাক্না মখা তাখি‍। 

“ঐখোয়গী লাইনিং অমদি নাৎকী মচত্তি পুম্নমক কোনশিন্দুনা চৎলি‍। ঐখোয়গী কলচরেল নেস্নেলজম্না মীওইবা পুম্নমক অমত্তনি হায়বগী ৱাখল্লোন তাকপিরি‍। মালেমগী ওইনা জিওপোলিতিকেলগী খুদোংচাদবা ফীভমশিং লৈরগসু, ঐখোয়না জি-২০ মীফম মায় পাক্না পাঙথোকখি অমদি নিউ দিল্লী দিক্লারেসন্দা অমত্তা ওইনা য়ানবা পুরক্নবা শিনখি‍। মসিগী মরুমদা ঐখোয়গী প্রধান মন্ত্রী শ্রী নরেন্দ্র মোদীনা পীবা: ‘মালেম অমা, ইমুং অমা, তুংলমচৎ অমা’ হায়রিবা পাউজেল অসি য়াওরি‍। মালেমগী মচিন মনাও ওইবগী ভারত্তা লৈরিবা ৱাখল্লোন অসি, ঐখোয়গী প্রধান মন্ত্রীনা জি-২০বু ভারতখক্তগী মায় পাকপখক নত্তনা, মালেম পুম্বগী মায় পাকপনি হায়খিবদুনা তাক্লি‍,” হায়না রক্সা মন্ত্রীনা হায়খি‍।

শ্রী রাজনাথ সিংহনা চন্দ্রয়ান-৩ মায় পাকপগী ক্রেদিৎ ভারতকী নুপীগী মতিক মথৌনাদু পীদুনা মখোয়না লৈবাকসিদা অনৌবা মশক অমা পুরকপগী কত্থোকপগা লোয়ননা লৌখিবা থৌদাংবুসু শিংথাখি‍। মহাক্না ‘নারি শক্তি বন্দন’ বিলবু ইস্রোগী নুপী সাইন্তিস্তশিংগা লোয়ননা সাইন্তিফিক কম্ম্যুনিতীদা লৈরিবা নুপী পুম্নমক্কী মফমদা তৌবিমল খঙবা উৎপা ওইনা লৈবাকসিনা পীবা খুদোলনি হায়বা ৱাফমসু মহাক্না থমখি‍।

ঙাকশেল মন্ত্রীনা স্পেসকী লমদা মায় পাকপনা মীয়ামদা করিগুম্বা মখল অমদি ইথিল পীবা লৈতে হায়না খন্নরিবা ৱাফমবু য়ানিংদবা ফোঙদোকখি‍। “ঐখোয়গী স্পেস মিসনগী তোঙান তোঙানবা হীরমদা শীজিন্নফম লৈ, অমদি মসিনা মীয়ামদসু চাউনা ইথিল পীরি‍। খুদম ওইনা, নোং খঙহৈ হৈথরকপগী থৌওংবু হেন্না ফবা মওংদা মাঙজৌননা তাকপনা ঐখোয়গী লৌমীশিংদা কান্নগদৌরিবনি‍। সাইক্লোনগী মরমদা হেন্না ফবা মওংদা মাঙজৌননা খঙহনহৌবনা সমুদ্র খোঙবান্দা খুন্দারিবা অমদি ঙামীশিংদা কান্নহনগদৌরিবনি‍। হেন্না মরুওইবদা, থা নৎত্রগা নুমিৎগী মনাক্তা থাগৎলিবা স্পেস মিসনশিংনা অরাপ্পা খুঙ্গংগী লমদা লৈরিবা অঙাংশিংদা সাইন্তিফিক তেম্পরেমেন্ত য়াকায়হনবদা মতেং পাংলি‍। মসিনা নহা ওইরিবা পুক্নিং ৱাখলশিংদা তুংদা করিগুম্বা খরদং ওইরবসু তৌনিংহন্নবা পুক্নিং থৌগৎলিবনি,” হায়না মহাক্না হায়খি‍।

*****