சந்திரயான் -3 இன் வெற்றி, இந்தியாவின் சமூக, கலாச்சார மற்றும் அறிவியல்  வளர்ச்சியின் விளைவாகும். செப்டம்பர் 21  அன்று மக்களவையில் சந்திரயான் -3 திட்டத்தின் வெற்றி மற்றும் விண்வெளித் துறையில் நாட்டின் பிற சாதனைகள் குறித்த விவாதத்தின் போது பாதுகாப்புத் துறை அமைச்சர் திரு ராஜ்நாத் சிங் இதனைத் தெரிவித்தார்.

சந்திரயான் -3 இன் வெற்றி நாட்டில் வலுவான அறிவியல் சுற்றுச்சூழல் அமைப்பு உருவெடுக்கிறது என்பதற்கான சான்றாகும் என்று பாதுகாப்புத் துறை அமைச்சர் விவரித்தார். "சந்திரயான் -3 நமது பள்ளிகள் மற்றும் கல்லூரிகளில் அறிவியல் கல்வி மேம்பட்டு வருவதைக் காட்டுகிறது, மேலும் தொழிற்சாலைகள் தரமான தயாரிப்புகளை உற்பத்தி செய்து வழங்குகின்றன. இதற்கான முயற்சிகளும் முந்தைய அரசுகளால் மேற்கொள்ளப்பட்டன. எனவே, நாட்டிற்குள் அறிவியல் மனப்பான்மையை வளர்ப்பதற்கு பங்களித்த ஒவ்வொருவரும் பாராட்டுக்குரியவர்கள்" என்று அவர் கூறினார்.

சந்திரயான் -3 முழு நாட்டிற்கும் ஒரு பெரிய சாதனை என்று கூறிய திரு ராஜ்நாத் சிங், பல வளர்ந்த நாடுகள், அதிக வளங்கள் நிறைந்ததாக இருந்து கொண்டு, சந்திரனை அடைய முயற்சிக்கின்றன, அதே நேரத்தில் இந்தியா வரையறுக்கப்பட்ட வளங்களுடன் நிலவின் தென் துருவத்தை அடைந்த முதல் நாடாக மாறியுள்ளது என்று கூறினார். இந்த வெற்றிக்கு இஸ்ரோ விஞ்ஞானிகளின் அறிவுத்திறன் மற்றும் நாட்டின் வளர்ச்சிக்கான அர்ப்பணிப்பு தான் காரணம் என்று அவர் பாராட்டினார். அவர்களின் அயராத முயற்சியால் இன்று அறிவியல் துறையில் முன்னணி நாடுகளில் ஒன்றாக இந்தியா திகழ்கிறது என்றார் அவர்.

இந்தியா இதுவரை செலுத்திய 424  வெளிநாட்டு செயற்கைக்கோள்களில் 389  செயற்கைக்கோள்கள் பிரதமர் திரு. நரேந்திர மோடி தலைமையிலான அரசாங்கத்தின் கடந்த ஒன்பது ஆண்டுகளில் விண்ணில் செலுத்தப்பட்டுள்ளன என்று பாதுகாப்புத் துறை அமைச்சர் சுட்டிக்காட்டினார். வெளிநாட்டு செயற்கைக்கோள்களை வெற்றிகரமாக விண்ணில் செலுத்தியதன் மூலம், இந்தியாவின் விண்வெளித் துறை உலகில் ஒரு முக்கிய இடத்தை விரைவாகப் பெற்று வருகிறது என்று அவர் கூறினார்.

ஒரு தேசம் மற்றும் ஒட்டுமொத்த மனிதகுலத்தின் வளர்ச்சிக்கு அறிவியல் முக்கியமானது என்றாலும், கலாச்சாரம் சமமான முக்கியத்துவத்தைக் கொண்டுள்ளது என்று திரு ராஜ்நாத் சிங் வலியுறுத்தினார். இரண்டு அம்சங்களுக்கும் சமமான முக்கியத்துவத்தை வழங்குவதற்கான அரசாங்கத்தின் உறுதிப்பாட்டை அவர் வெளிப்படுத்தினார். "அறிவியல் மதிப்பு நடுநிலையானது. அது நமக்கு அணுசக்தி பற்றிய அறிவைத் தரலாம், ஆனால் அந்தச் சக்தியை நமது சொந்த வளர்ச்சிக்கு சக்தி வடிவில் பயன்படுத்துகிறோமா அல்லது மற்றவர்களை அழிக்க ஆயுத வடிவில் பயன்படுத்துகிறோமா என்பதைச் சொல்வது நமது கலாச்சாரம்தான். விஞ்ஞானம் எவ்வளவு முன்னேற்றம் அடைந்தாலும், கலாச்சாரம் மற்றும் மதிப்புகள் இல்லாமல் அது முழுமையடையாது. மார்ட்டின் லூதர் கிங் சொன்னது போல: 'விஞ்ஞானம் மனிதனுக்கு அறிவைத் தருகிறது, அதுதான் சக்தி. மதம் மனிதனுக்கு ஞானத்தைக் கொடுக்கிறது, அதுதான் கட்டுப்பாடு'. நமது பண்பாட்டிலிருந்து விடுபட்டு அறிவியலைத் தழுவ வேண்டும் என்று சொல்பவர்கள், கலாச்சாரமும் அறிவியலும் ஒன்றுக்கொன்று துணைபுரிகின்றன என்பதைப் புரிந்துகொள்ள வேண்டும் என்று அவர் கூறினார்.

அறிவியலுக்கும் நம்பிக்கைக்கும் இடையே நல்லிணக்கம் இருந்த நமது கடந்த காலத்தில் இந்த வெற்றிக்கான ஆதாரங்கள் மறைந்துள்ளன. வெளிநாட்டு படையெடுப்பாளர்களால், நமது முன்னேற்றம் தடைபட்டது, ஆனால் இப்போது நாம் முன்பை விட அதிக வலிமையுடன் மீண்டும் கர்ஜிக்கிறோம், சூரியன், சந்திரன் மற்றும் நட்சத்திரங்களைத் தொட தயாராக இருக்கிறோம்" என்று பாதுகாப்புத் துறை அமைச்சர் கூறினார்.

எல்லை, விண்வெளி, சைபர், பொருளாதாரம், சமூகம், உணவு, எரிசக்தி மற்றும் சுற்றுச்சூழல் பாதுகாப்புக்கு சமமாக கலாச்சார பாதுகாப்பின் முக்கியத்துவத்தை திரு ராஜ்நாத் சிங் வலியுறுத்தினார். ஒரு தேசத்தின் அடையாளத்தைப் பராமரிக்க கலாச்சாரப் பாதுகாப்பு அவசியம் என்றும், இந்திய கலாச்சார பாரம்பரியத்திற்கு முக்கியத்துவம் கொடுக்கும் அதே நேரத்தில், பாதுகாப்பு பிரச்சினைகள் குறித்து எவ்வளவு தீவிரமாக இருக்கிறதோ, அதே அளவுக்கு கலாச்சார பாதுகாப்பிலும் அரசாங்கம் தீவிரமாக உள்ளது என்றும் அவர் கூறினார். கலாச்சார மறுமலர்ச்சி இல்லாமல் எந்த நாடும் பொருளாதார, சமூக, அரசியல் மற்றும் அறிவியல் முன்னேற்றம் அடையவில்லை என்று கூறிய அவர், நமது தேசத்தை முன்னோக்கி கொண்டு செல்ல, இந்தியாவின் சொந்த கலாச்சாரத்திலிருந்து கற்றுக்கொள்வது அவசியம் என்றார்.

"நமது  நம்பிக்கை மற்றும் கலாச்சாரம் அனைவரையும் உள்ளடக்கிய தன்மை கொண்டது. நமது பண்பாட்டுத் தேசியம் அனைத்து மனிதகுலத்தின் சகோதரத்துவம் என்ற கருத்தை நமக்குக் கற்பிக்கிறது. பூகோள அரசியல் ரீதியாக கடினமான உலகளாவிய சூழ்நிலைகள் இருந்தபோதிலும், நாம் ஜி -20 உச்சிமாநாட்டை வெற்றிகரமாக ஏற்பாடு செய்தோம். புதுதில்லி பிரகடனத்தில் ஒருமித்த கருத்தை உறுதி செய்தோம். 'ஒரே உலகம், ஒரே குடும்பம், ஒரே எதிர்காலம்' என்ற நமது பிரதமர் திரு. நரேந்திர மோடியின் செய்தி இதன் பின்னணியில் உள்ளது. ஜி-20 மாநாட்டை இந்தியாவின் வெற்றி மட்டுமல்ல, ஒட்டுமொத்த உலகத்தின் வெற்றி என்று பிரதமர் கூறியபோது இந்தியாவின் உலகளாவிய சகோதரத்துவத்தின் இந்த உணர்வு தெளிவாகத் தெரிந்தது" என்று பாதுகாப்பு அமைச்சர் கூறினார்.

சந்திரயான் -3 திட்டத்தின் வெற்றிக்கு இந்தியாவின் பெண்கள் சக்தி தான் காரணம் என்று கூறிய ராஜ்நாத் சிங், தேசத்திற்கு ஒரு புதிய அடையாளத்தை வழங்குவதற்கான அவர்களின் அர்ப்பணிப்பு மற்றும் தியாகத்தை பாராட்டினார். 'நாரி சக்தி வந்தன்' மசோதா இஸ்ரோவின் பெண் விஞ்ஞானிகளுக்கும், ஒட்டுமொத்த பெண் அறிவியல் சமூகத்திற்கும் நன்றியுள்ள தேசம் அளித்த பரிசு என்று அவர் கூறினார்.

விண்வெளியில் சாதனைகள் மக்களிடம் எந்த தாக்கத்தையும் ஏற்படுத்தாது என்ற கருத்தை பாதுகாப்புத் துறை அமைச்சர் எதிர்த்தார். "நமது விண்வெளி பயணங்களின் பல பரிமாண பயன்பாடு உள்ளது, இது மக்களிடமும் பெரும் தாக்கத்தை ஏற்படுத்துகிறது. எடுத்துக்காட்டாக, மேக வெடிப்பு போன்றவற்றின் சிறந்த கணிப்புகள் நமது விவசாயிகளுக்கு நன்மை பயக்கும். சூறாவளிகளை நன்கு கணிப்பது கடலோரப் பகுதிகளில் வசிப்பவர்களுக்கும் மீனவர்களுக்கும் பயனளிக்கும். மிக முக்கியமாக, சந்திரன் அல்லது சூரியனுக்கான விண்வெளிப் பயணங்கள் தொலைதூர கிராமத்தில் வசிக்கும் ஒரு குழந்தையின் அறிவியல் மனப்பான்மையை எழுப்ப உதவுகின்றன. இவை எதிர்காலத்தில் ஏதாவது செய்ய இளம் மனங்களை ஊக்குவிக்கின்றன, "என்று அவர் கூறினார்.

***

ANU/AD/PKV/GK