Ka Swachh Bharat Mission-Urban ka la ioh ia ka bor kaba thymmai haba palat 4000 tylli ki kynhun na ki nongbah ki la iashim bynta ha ka bynta kaba 2 jong ka Indian Swachhata League (ISL). Ka ISL ka dei ka sienjam ba ialam lynti da ki samla ban kyntiew ia ka jingiashim bynta ki samla ha ki kam kiba iadei bad ka jingkhuid. Kum shi bynta ka ISL, ki kynhun na ki nongbah ki pynkhuid ia ki jaka khap duriaw, ki jaka jngoh kai bad ki Lum kum ki lahduh jong ka jingkhuid. Ka bynta kaba nyngkong jong ka ISL ha u snem 2022, hapoh ka Swachh Bharat Mission-Urban (SBM-U) ka la long kaba jop ha kaba sanphew hajar ngut ki samla ba trei mon sngewbha ki la iatrei lang ban pyllait ia ki nongbah na ka jingbret niut pathar.

Ka Swachhata Pakhwada - Swachhata Hi Seva 2023 ka dei kaba dang pynlong hapdeng ka 15 tarik u Nailur bad ka 2 tarik u Risaw, ka sngi kaba rakhe kum ka Swachh Bharat Diwas (SBD) ha ka Jayanti jong u Mahatma Gandhi. Ka ISL, SafaiMitra Suraksha Shivir & Swachhata Diwa ki dei ki campaign hapoh ka Swachhata Pakhwada.

Ki nongbah ki la jied ia ki kyrteng ba kyrpang jong ki kynhun, na ka bynta ka ISL 2.0, ki nongialam ba la jied ki kynthup ia ka PV Sindhu, u Ripudaman Bevli, ka Swastika Gosh, Ramveer Tanwar. Ki lahduh jong u snem ba la dep, ki Chandigarh Challengers, Hunsur Heroes, Viktamasingapuram, Dandeli Swachhta Warriors, Kushtagi Champions bad Arsikere Army ki dei ki khynhun kiba nyngkong ban pynrung kyrteng.

Ki nongbah ki la pynlong ia ki jingpynkhuid shnong bad ki la buh ia ki mural, ki la pynlong ia ki jingiasnoh kti kiba don nongrim ha ka phang jong ka ISL 2.0 bad ka Jan Andolan na ka bynta ka jingkhuid. Ha Bhopal, la rakhe ia ka Yoga Day ha ka jaka kaba ju long ka jaka theh niut mynshuwa. Ki paidbah, ki NCC cadet, ki Scouts and Guides bad kiwei kiwei ki la iawan lang ban rakhe ia ka Yoga Day ha kane ka jaka ba la pynkhuid bad pynkylla sha ka jaka kaba khuid.

Jan 4,000 ngut ki khynnah ki la iashim bynta ha ka prokram ha Devenagere, Karnataka ban shna ia ka map jong ka India, ki lahduh jong u snem ba la dep, ki Chandigarh Challengers ki la pynlong ia ka SUP free Maha langar ban ai bam ia 10,000 ngut ki briew, katba ha Alleppey ka la don ka prokram ‘Save the Lake’ ban pynkhuid ia ki nan.

Ki Myntri Rangbah na ki jylla bapher bapher ki la wan iashim bynta bad ki la ai mynsiem ia ki briew ba kin iasnoh kti lang bad ka jan andolan na ka bynta ka jingkhuid. U Myntri Rangbah ka UP, u Yogi Adityanath u la pynkup burom ia 5 ngut ki Safai Mitra hapoh ka Swachhata Hi Seva bad u la sam ruh ia ki jain bad ki tupia ISL 2.0. U Myntri Rangbah ka Manipur, u N. Biren Singh u la plie paidbah ia ka Swachhata Hi Seva campaign ha Manipur bad u la kyntu ia baroh ba kin noh synniang na ka bynta ka Swachh Bharat. U Myntri Rangbah ka Uttarakhand, u Pushkar Singh Dhami u la plie paidbah ia ka Indian Swachhata League da kaba pynher ia ka lama kaba jyrngam ha ka 'Swachhata League Marathon,' ha kaba ka jingmareh ka long 10, 5, bad 2 kilometer.

***