প্রধান মন্ত্রী, শ্রী নরেন্দ্র মোদীনা ঙসি মধ্য প্রদেশকী বিনাদা লৈবা BPCLগী বিনা রিফাইনরীদা লৈগদবা দাউনস্ত্রীম পেত্রোকেমিকেল কমপ্লেক্স অমসুং রিফাইনরী এক্সপান্সন প্রোজেক্তকী উরেপ উয়ুং ঙসি মফমসিদা তমখ্রে। লুপা করোর 49,000 চঙনা শেমগৎকদবা মসিগুম্বা স্তেত-ওফ-দি-আর্ত রিফাইনরী অসিনা অতোপ্পা সেক্তর কয়াগী মনুংদগী তেক্সতাইল, পেকেজিং, ফার্মাগুম্বা সেক্তরগী মরু ওইবা পোৎলম ওইগদৌরিবা ইথাইলীন অমসুং প্রোপাইলীনগী চাউরাকপা 1200 KTPA (চহি অমদা কিলো তন) পুথোক্কনি। প্রোজেক্ত অসিনা  লৈবাক অসিনা পোৎলমশিং অসিগীদমক্তা ইম্পোর্তকী মখা পোল্লিবা অসি হন্থহনগনি, মসিমক প্রধান মন্ত্রীগী ‘আত্মানির্ভর ভারত’কী মঙলান মঙফাওনবগী মাইকৈদা থাংজিনবা খোঙথাং অমা ওইগনি। মেগা প্রোজেক্ত অসিনা থবক্কী খুদোংচাবা কয়াসু পীগনি অমসুং পেত্রোলিয়ম সেক্তরগী দাউনস্ত্রীম ইন্দস্ত্রীগী মশিংসু হেনগৎহনগনি।

প্রধান মন্ত্রীনা ঙসিগী থৌরমদা ৱা ঙাঙবদা অসুম্না হায়খি, “মধ্য প্রদেশনা চাউখৎ থৌরাংগী অনৌবা থাক অমদা য়ৌবা ঙমহন্নবা, মধ্য প্রদেশকী ইমুং খুদিংগী পুন্সি মহিং নুংঙাইহন্দুনা নুংঙাই য়াইফবগী ফিভম লৈহন্নবা ঐখোয়না লেপ্তনা হোৎনরি। মোদীনা পীবা গেরেন্তীগী ত্রেক রেকোর্দ অসিদি অদোমগী মাঙদা লৈরে”। রাজ্যসিগী লাইরবশিংগীদমক্তা পক্কা য়ুম চাউরাকপা লাখ 40 শাখিবা অমসুং অমাংশঙ, লেম্না লাইয়েংবা, বেঙ্ক একাউন্ত হাংদোকপা অমসুং মৈখু থোক্তবা চাকখুমগী ৱাশক ঙাকখিবগী মতাংদসু মহাক্না পাউদমখি। রক্ষা বন্ধনগী মতমদা গ্যাস সিলিন্দরগী মমল হন্থখিবগী মতাংদসু মহাক্না পনবদা য়াওখি। “পুম্নমক অসিনা মরম ওইরগা, উজ্বালাগী বেনেফিশরী ওইরিবা ইচে-ইচলশিংনা গ্যাস সিলিন্দর অসি লুপা 400 হোংথনা ফংলে”, মহাক্না হায়খি। “মরম অদুনা, কেন্দ্র সরকারনা ঙরাং অতোপ্পা অচৌবা ৱারেপ অমসু লৌখ্রে। হৌজিক্তি, লৈবাক্কী অতোপ্পা ইচে-ইচল লাখ 75গী মফমদা গ্যাস কন্নেক্সন লেম্না অমুক পীরগনি। ঐখোয়গী ইচে-ইচল অমত্তা চিত্থদনা গ্যাস কন্নেক্সন ফংহনবা হায়বসি ঐখোয়গী পান্দম্নি”, প্রধান মন্ত্রীনা মখা তাখি।

সরকার অসিনা পীখিবা গেরেন্তী খুদিংমক পাংথোক্নবা থম্মোই শেংনা হোৎনরি হায়না প্রধান মন্ত্রীনা পাউদমখি। মিদ্দলমেন লৌথোক্তুনা বেনেফিশরী খুদিংনা কান্নবা মপুং ফানা ফংনখিবগী মতাংদা মহাক্না পল্লদুনা লৌমীশিংনা মশাগী বেঙ্ক একাউন্ততা লুপা 28,000 হকথেংননা ফংলিবা পি.এম. কিসান সম্মান নিধীগী খুদমসু পীখি। সরকারনা স্কিম অসিগীদমক্তা লুপা করোর 2,60,000 হেন্না চাদিং তৌখ্রবনি হায়না প্রধান মন্ত্রীনা হায়খি। মমাংগী চহি 9দা, কেন্দ্র সরকারনা লৌমীশিংনা লৌউবদা চঙবা শেল হন্থহন্নবা, অহোঙবা মমলদা হার ফংহন্নবা হোৎনখিবা অমসুং মসিগীদমক্তা মমাংগী চহি 9দা লুপা করোর লাখ 10 হেন্না চাদিং তৌখি হায়নসু মহাক্না পাউদমখি। অমেরিকাগী লৌমী অমনা লুপা 3000দা লৈরিবা হারগী বোরা অদুমক ঐখোয়গী লৌমীশিংদা লুপা 300দগী তানা ফংহল্লি হায়না মহাক্না হায়খি। লুপা করোর লিশিং কয়াগী মমাংগী য়ুরিয়াগী ৱাথোক্কী মতাংদা মহাক্না পল্লদুনা ঙসিদি মদুগী য়ুরিয়াশিং অদু মফম খুদিংদা লাইনা ফংনরে হায়না মহাক্না হায়খি।

মধ্য প্রদেশকী রাজ্যপাল, শ্রী মঙ্গুভাই পতেল, মুখ্য মন্ত্রী, শ্রী শিবরাজ সিংহ চাউহান, পেত্রোলিয়ম অমসুং নেচরেল গ্যাসকী কেন্দ্র মন্ত্রী, শ্রী হর্দীপ সিংহ পুরীসু ঙসিগী থৌরমদা শরুক য়াখি।

পেত্রোলিয়ম অমসুং নেচরেল গ্যাসকী কেন্দ্র মন্ত্রী, শ্রী হর্দীপ সিংহ পুরীনা ঙসিগী মীয়ামদা ৱা ঙাঙবদা অসুম্না হায়খি, “মসিগী পেত্রোকেমিকেল প্লান্ত অসিদি বিনাখক্তা নত্তনা বুন্দেলখান্দ অমসুং মধ্য প্রদেশকী মফমদা প্রধান মন্ত্রীনা পীবা খুদোল অমনি”।

মধ্য প্রদেশকী বুন্দেলখান্দ লমদম অসিদা লৈগদৌরিবা অনৌবা পেত্রোকেমিকেল কমপ্লেক্স অসিনা প্লাস্তিক, পেকেজিং তৌনবা মেতরিএল, প্লাস্তিক শীত অমসুং য়ুম অমদি ইন্দস্ত্রীদা শিজিন্নবা য়াবা অতোপ্পা পোৎলম কয়াগা মরী লৈনবা দাউনস্ত্রীম য়ুনিৎ কয়াসু হেন্না খুমাং চাউশিলহল্লগনি হায়না মহাক্না মখা তাবা ওইনা ফোংদোকখি। মসিনা বুলন্দ বুন্দেলখন্দগী ফম্বাক অমা শেম্লগনি হায়না মহাক্না মখা তাখি।

কেন্দ্র মন্ত্রী অসিনা গুজরাতকী দহেজ লমদম্বু চাউখৎহনবদা থৌদাং য়াখিবা অমসুং তেংবাংখিবা OPAL প্লান্তকী খুদম নীংশিংলদুনা, প্রোজেক্ত অসি মায় পাক্না লোইশিনবা মতমদা মসিনা মধ্য প্রদেশ অমদি বুন্দেলখান্দগী ইন্দস্ত্রীশিংগী চাউখৎ থৌরাংদা অহোংবা ফিভম অমা লাক্কনি অমসুং থৌওংশিং অসিনা চাউখৎপা ভারতকী পান্দম ফংহনবদা তেংবাংগনি হায়না ফোংদোকখি।

প্রোজেক্ত অসিনা মরোমদোম লেপচবা ঙম্বা অমসুং ইন্দস্ত্রীগী সস্তেনেবল ওইবা গ্রোথ লৈহন্নবা ভারতনা খোঙফম চেৎলিবা অসিদা তেংবাংগনি, অমসুং ভারতপু পেত্রোকেমিকেল সেক্তরদা মালেমগী লুচিংবা ওইহনগনি হায়না শ্রী হর্দীপ সিংহ পুরীনা হায়খি। মালেমগী ওইনা য়েংলুবদা, ভারত অসি চাউরাকপা লুপা করোর লাখ 15.58কী মার্কেত পোতেন্সিএল লৈদুনা, পেত্রোকেমিকেলগী লমদা হৌজিক 6শুবা থাক্তা লৈরি, অমসুং মসিমক ইং 2040 ফাওবদা লুপা করোর লাখ 82 য়ৌবগী ওইথোকপা লৈরিবনি।

হন্দক্কী চহি খরসিদা, মালেমগী থাউ অমসুং গ্যাস ইন্দস্ত্রীদা তংদু লৈতাদবা কয়া লৈরক্লিবা অসিগী মতাংদা পল্লদুনা, পেত্রোলিয়ম অমসুং নেচরেল গ্যাসকী কেন্দ্র মন্ত্রীনা হায়খিবদা, মমাংগী চহি অনিসিদা মালেমগী থাউ অমসুং গ্যাস ইন্দস্ত্রীদা তংদু লৈতাদবা কয়া লৈখিবনা মরম ওইরগা, ঐখোয়গী য়ুম্লোন্নবা লৈবাক খক্তা নত্তনা চাউখৎলবা লৈবাক কয়াসু ইনর্জী ৱাৎপগী শিংনবা মাইয়োক্নখি। অতোপ্পা নাকল অমদনা, প্রধান মন্ত্রী, শ্রী নরেন্দ্র মোদীগী মিৎয়েং শানবা অমসুং মীয়ামগী নুংঙাই য়াইফবদা য়ুম্ফম ওইবা পোলিসীনা মরম ওইদুনা, ভারতনা মমাংগী চহি অনিসিদা থাউ অমসুং গ্যাসকী অৱাৎপা লৈখিদবা অমখক্তা ঙাইবা লৈবাক ওইখি অদুগা ফুএলগী মমল হেনগৎপগী ফিভমসু লৈখিদে। মালেমগী ওইবা থাউ অমসুং গ্যাসকী মমল হেনগৎখিবা অসিদগী ভারতকী মীয়াম্বু মপুং ফানা কনখি হায়না মন্ত্রীনা মখা তাখি।

শ্রী হর্দীপ সিংহ পুরীনা থৌরমসিদা থমখিবা ৱারোলদা, মধ্য প্রদেশ রাজ্যনা ইং 2014দগী হৌদুনা ইনর্জী ইনফ্রাস্ত্রকচরগা মরী লৈনবা পেরামীতর কয়াদা চাউখৎখিবগী ফিভম পনখি। রাজ্যসিদা লৈবা রিতেল আউতলেত/পেত্রোল পম্প মশিংনা ইং 2014দা ওইরম্বা 2854দগী 5938তা হেনগৎখি; অমসুং LPGগী দিস্ত্রিব্যুতর মশিংনা ইং 2014দা ওইরম্বা 866তগী ঙসিদি 1551দা হেনগৎলে হায়বা ৱাফমদা মহাক্না মিৎয়েং চঙখি। ইং 2014দা 44% ওইরম্বা LPG পেনেত্রসন অসিসু হৌজিক্তি 100% য়ৌরে। রাজ্যসিগী PNG কন্নেক্সন মশিংনা ইং 2014গী 2783দগী 2,15,185তা য়ৌরে অমসুং CNG কন্নেক্সন মশিংনা ইং 2014দা ওইরম্বা 15দগী হৌজিক 275 য়ৌরে। নেচরেল গ্যাস পাইপ্লাইন্সু মশক থোক্না চাউখৎলে, মসিগী অশাংবা অসিসু 802 kmদগী হৌজিক 6862 km য়ৌরে। 

****