ভারতকী জি২০ প্রেসিদেন্সী অসি লৈবাকসিনা স্পেসকী লমদা মিংচৎ পুরক্লিবসিগা মপা চানরি, হায়না সাইন্স অমসুং তেক্নোলোজীগী কেন্দ্রগী রাজ্য মন্ত্রী (ইন্দিপেন্দেন্ত চার্জ); এম.ও.এস. পি.এম.ও., পর্সোনেল, পব্লিক গ্রিভান্সেস, পেন্সন্স, স্পেস অমদি এতোমিক ইনর্জী দোক্তর জিতেন্দ্র সিংহনা হায়খ্রে‍।

“জি২০ মীফম অসি প্রধান মন্ত্রী শ্রী নরেন্দ্র মোদীনা মালেমগী খ্বায়দগী হেন্না মশক নাইবা লুচিংবা অমা ওইরকপা মতমসিদা ভারত্তা পাঙথোক্লি‍। মীফম অসি ভারতকী ফিরালনা থাগী খা থংবা পোলদা হাইনা হুম্না পাইরিবা, থাগী অসোম থংবা মায়কৈদা স্পেসক্রাফ্ত অহানবা ওইনা তাখিবা, অমদি কোবিদ ভেক্সিনগী মতাঙদা লময়ানবা ওইখিবা আর. অমসুং দি.গী মায় পাকপগী ৱারী য়াওনা লৈবাকসিনা সাইন্স অমসুং তেক্নোলোজীগী লমদা মায় পাকপা কয়া পুরক্লিবা মতমসিদা পাঙথোক্লি,” হায়না মন্ত্রীনা হায়খি‍।

নই দিল্লীদা পাঙথোক্কদৌরিবা জি২০ মীফমগী থিম ‘বসুদেব কুতুম্বকম’গী ৱাখল্লোন পরিংগা চুননা মালেম অসিনা ঙসিদি পি.এম. মোদীগী ‘মালেম অমা, ইমুং অমা, তুংলমচৎ অমা’ হায়রিবা লাইৱা অসিবু শকখঙলি হায়না দোক্তর জিতেন্দ্র সিংহনা হায়খ‍ি‍।

নই দিল্লীদা পাঙথোক্কদৌরিবা জি২০ মীফম নোংমা ৱাৎলিঙৈদা দুরদর্শন্দা পীবা ইন্তরভিউ অমদা, ভারত মালেম অসিবু মায়কৈ অমদগী হেনবদা লমজিংবা ঙম্লগনি হায়না দোক্তর জিতেন্দ্র সিংহনা হায়খি‍। স্পেস সেক্তর য়াওনা তুংগী সাইন্সকী থৌরাং অমা হেক্তদা, মালেমগী স্তেকহোল্দর লৈবাক পুম্নমক্না পুন্না চঙশিমিন্নবা মথৌ তাগনি হায়না মহাক্না মখা তাখি‍।

“করিগুম্বা ঐখোয় মসিদগী হেন্না চঙশিনসি হায়রগদি, ঐখোয় পুন্না চৎমিন্নবা মথৌ তাগনি, মরমদি ঐখোয় অপুনবা মালেমগী শরুক অমনি‍। অসুম্না মখা তাবা চাওখৎ থৌরাংগী থবকশিং মসিদগী হেন্না পুনশিন্নদুনা চৎমিন্নবা তাই‍। মতাঙসিদগী তুংদা লাক্কদৌরিবা চাওখৎপগী মরুওইবা মশক তেক্নোলোজীনা চাউনা থৌদুনা পুবা শক্তম অমা ওইগনি,” হায়না দোক্তর জিতেন্দ্র সিংহনা হায়খি‍।

হৌজিক্তি ভারতকী স্পেস প্রোগ্রাম অসি মালেমগী মাঙজিল থাবা স্পেস এজেন্সীশিংগা থোং মান্নবা ফীভমদা লৈরে হায়রদুনা, দোক্তর জিতেন্দ্রনা নাসানা থাদা ইহান হান্না তাখিবা ওইরম্বদি য়াই, অদুবু থাদা ঈশিং লৈরম্বা য়াবগী খুদম ফংখিবা অদু ভারতকী চন্দ্রয়ান-১নি অমদি হৌজিক্না চন্দ্রয়ান-৩না অহানবা ওইনা থাগী খা থংবা পোলদা তাখিবনি হায়না দোক্তর জিতেন্দ্র সিংহনা হায়খি‍।

“চন্দ্রয়ান অসি মালেম পুম্বগী সাইন্তিফিক কম্ম্যুনিতী পুম্বনা মীৎয়েঙ থম্নরি মরমদি মখোয়না মফমদুদগী, চন্দ্রয়ান-৩না করিগুম্বা অনৌবা খরা ফংলক্কনি হায়না থাজনরি মরমদি মসিনা হান্না য়ৌশিন্নদ্রিবা মফমদা চঙশিনখিবনি‍। মরম অসিনা, মফমদুদগী লাক্লিবা ইনপুৎশিং, মচাকশিং অদুনা অতৈ স্পেস এজেন্সী পুম্নমক্কী লোয়ননা মখোয়গী তুংগী প্রোজেক্ত অমদি প্লান্নিংশিংদা কান্নগদৌরিবনি,” হায়না মহাক্না হায়খি‍।

হন্দক্তা প্রধান মন্ত্রী শ্রী নরেন্দ্র মোদীনা য়ুনাইতেদ স্তেতসতা চৎলুবা মতমদা খুৎয়েক পীনখিবা য়ানচে পুম্নমক – অর্তেমিস একোর্দতগী হৌরজা ইন্তরনেস্নেল স্পেস স্তেসন্দা জোইইন্ত এক্সপিদিসন চৎপা ফাওবা অমদি ভারতনা সেমিকন্দক্তর কন্সোর্তিয়ম খুৎয়েক পীবা ফাওবা – তেক্নোলোজীনা থৌদুনা চৎপনি হায়না দোক্তর জিতেন্দ্র সিংহনা হায়খি‍।

ইস্রোনা মপান লৈবাক্কী সেতলাইত ৩৮০ হেন্না থাগত্তুনা, য়ুরোপিয়ন অমদি অমেরিকান সেতলাইতশিং থাগৎপদা য়ুরো মিলিয়ন ২৫০ অমদি য়ু.এস. দোলর মিলিয়ন ১৭০ হেন্না তানখি হায়না দোক্তর জিতেন্দ্র সিংহনা হায়খি‍।

“ভারতকী মপুং ওইবা স্পেসকী শেন্মিৎলোন ঙসিদি দোলর বিলিয়ন ৮ য়ৌদুনা, মালেমগী (কৈথেলগী শেয়র) ২% ওইরি, অদুবু মালেম পুম্বনা খোঙজেল য়াঙশিনবা মতৌ অসিবু শকখঙলি অমদি মরম অসিননি ২০৪০ ফাওবদা দোলর বিলিয়ন ৪০ য়ৌনবগী কঞ্জার্বেতিব প্রোজেক্সন পীরিবা, অদুবু তুংদা ঐখোয়দা ভারতকী স্পেসকী শেন্মিৎলোন অসি ২০৪০ ফাওবদা দোলর বিলিয়ন ১০০ য়ৌনা চাওখৎলক্কনি হায়না পীরিবা, এ.দি.এল. (অর্থর দি লিতল) রিপোর্ত লৈরে‍। মরম অসিনা ঐখোয় খোঙজেল য়াঙনা চঙশিনবা হৌরে, ঐখোয় ইশাগী ইভালুএসন্দা হৌজিকসু কঞ্জার্বেতিব ওইরি, অদুবু অতোপ্পনা নৈনবদদি মসিদগী য়াম্না হেল্লি, মসিনা তাক্লিবদি ঐখোয় মফমদু য়ৌরক্লে হায়বনি,” হায়না মহাক্না হায়খি‍।

স্মার্ত সেক্তর প্রোজেক্ত, রেলৱে ত্রেক অমদি মী পানদবা রেলৱে ক্রোসিংগী মেনেজমেন্ত, লম্বী অমদি বিল্দিং, তেলিমেদিসিন, গভর্নেন্স, অমদি খ্বায়দগী মরুওইনা, ‘স্বামিত্ব’ জি.পি.এস. লেন্দ-মেপ্পিংনচিংবা সেক্তর অয়াম্বদা স্পেস এপ্লিকেসন শিজিন্নরি হায়না দোক্তর জিতেন্দ্র সিংহন হায়খি‍।

পি.এম. মোদীগী চহি মাপনগী লৈঙাকসিদা, ভারতকী দিজাস্তর কেপেবিলিতী মালেমগী থাক য়ৌরক্লে অমদি ঐখোয়না য়ুম্লোন্নবা লৈবাকশিংগীসু দিজাস্তর ফোর্কাস্ত ফাওবা পীরি হায়না দোক্তর জিতেন্দ্র সিংহনা হায়খি‍।

“দিজাস্তর ফোর্কাস্তিং অমদি মেনেজমেন্তকী লমদা স্পেস রিছর্চ শীজিন্নবনা স্পেস মিসনশিংদা থাদরিবা শেলদগী হেন্না কনবা ঙম্লি,” হায়না মহাক্না মখা তানা ফোঙদোকখি‍।

*****