சீனாவின் ஹாங்சோ நகரில் செப்டம்பர் 23 முதல் அக்டோபர் 8 வரை நடைபெறவுள்ள 2022 ஆசிய விளையாட்டுப் போட்டிகளில் பங்கேற்கும் இந்திய அணிக்கான அதிகாரப்பூர்வ சம்பிரதாய உடை மற்றும் விளையாட்டு உபகரணங்களை இந்திய ஒலிம்பிக் சங்கம் செவ்வாய்க்கிழமை (செப்டம்பர் 5) வெளியிட்டது.

இந்த நிகழ்வில் மத்திய தகவல் மற்றும் ஒளிபரப்பு மற்றும் இளைஞர் விவகாரங்கள் மற்றும் விளையாட்டுத் துறை அமைச்சர் திரு அனுராக் சிங் தாக்கூர், ஐஓஏ தலைவரும் புகழ்பெற்ற ஓட்டப்பந்தய வீரருமான பி.டி.உஷா மற்றும் பிற மூத்த அதிகாரிகள் கலந்து கொண்டனர்.

இந்திய ஹாக்கி கோல்கீப்பர்கள் பி.ஆர்.ஸ்ரீஜேஷ் (ஆண்கள் அணி), சவிதா புனியா (பெண்கள் அணி), துப்பாக்கி சுடுதல் வீரர் மனு பாக்கர் மற்றும் 2018 ஆசிய விளையாட்டுப் போட்டியில் துப்பாக்கி சுடுதல் போட்டியில் தங்கப் பதக்கம் வென்ற தஜிந்தர்பால் சிங் தூர் உள்ளிட்ட பல பிரிவுகளைச் சேர்ந்த விளையாட்டு வீரர்களும் பங்கேற்றனர்.

தேசிய ஆடை வடிவமைப்புக் கழகத்தால் வடிவமைக்கப்பட்ட இந்த சம்பிரதாய உடையில் பெண்களுக்கு காக்கி நிற சேலையும், ஆண் வீரர்களுக்கு காக்கி குர்தாவும் அடங்கும். இந்த ஆடை மறுசுழற்சி செய்யப்பட்ட துணிகளுடன் இயற்கையை தழுவி தயாரிக்கப்பட்டுள்ளது. இது நிலைத்தன்மையை ஊக்குவிக்கிறது.

விழாவில் பேசிய திரு. அனுராக் சிங் தாக்கூர், "இது சீருடை மட்டுமல்ல; இது நமது விளையாட்டு வீரர்களுக்கு பெருமை மற்றும் அடையாளமாகும். இந்த சீருடை இந்தியாவின் தற்சார்பை பெருமையுடன் பிரதிபலிக்கிறது. நாட்டின் மாறுபட்ட பாரம்பரியம் மற்றும் வடிவமைப்பு தலைமையை வெளிப்படுத்துகிறது. இந்த அணி இளம் மற்றும் புதிய இந்தியாவை பிரதிநிதித்துவப்படுத்தும் என்று நான் நம்புகிறேன். நாம் வரலாற்று செயல்திறனை உறுதி செய்வோம் மற்றும் சிறந்த பதக்க எண்ணிக்கையுடன் திரும்புவோம். நமது விளையாட்டு வீரர்களின் பின்னால் நின்று அவர்களை உற்சாகப்படுத்துமாறு நாட்டை நான் கேட்டுக்கொள்கிறேன்,” என்றார்.

அணியின் அதிகாரப்பூர்வ விளையாட்டு ஆடை வடிவமைப்பு நிறுவனமான  ஜே.எஸ்.டபிள்யூ இன்ஸ்பயர் வடிவமைத்த இந்த விளையாட்டு வீரர்களுக்கான கிட், திறமையான காஷ்மீர் வடிவமைப்பாளர் ஆக்விப் வானியால் வடிவமைக்கப்பட்டுள்ளது, அவர் இந்திய கிரிக்கெட் அணியின் ஜெர்சியையும் வடிவமைத்துள்ளார்.

ஐ.ஓ.ஏ. தலைவர் டாக்டர் பி.டி.உஷா கூறுகையில், குழுவின் ஒவ்வொரு உறுப்பினரும் இந்தியாவுக்குப் பெருமை சேர்க்க சிறந்த முயற்சியை மேற்கொள்வார்கள் என்று எதிர்பார்ப்பதாக கூறினார். "2022 ஆசிய விளையாட்டுப் போட்டிகளுக்காக நாங்கள் நீண்ட காலம் காத்திருந்தோம், இந்தியா தனது மிகப்பெரிய 634 வீரர்களை அனுப்புவதில் மகிழ்ச்சியடைகிறோம். இந்த அணி இந்தியாவுக்கு சிறந்த பதக்கத்தை பெற்றுத் தரும் திறன் கொண்டது என்று நாங்கள் நம்புகிறோம், "என்று கூறினார்.

***