প্রধান মন্ত্রী শ্রী নরেন্দ্র মোদীনা লুচিংবা কেন্দ্রগী মন্ত্রীমন্দলনা বেত্তরি স্তোরেজ সিস্তেমস(বেস) চাউখৎহন্নবা ভাইয়েবিলিতি গেপ ফন্দিং(ভি জি এফ) অয়াবা পীরে। ভাইয়েবিলিতি গেপ ফন্দিংগী মওংদা অপুনবগী শেনফমগী চাদা ৪০ ফাওবা শেন্থং অমা পীদুনা, ২০৩০-৩১ ফাওবদা বেস প্রোজেকশিংনা অপুনবা মেগাৱাত অৱার ৪০০০ পুথোক্নবা স্কিম অসিনা পান্দম থম্লি। মহৌশাগী অকোয়বগী ফিবম ফনবা থম্নবা সরকারনা পায়খৎলিবা থবকশিংদা মরুওইবা তাঙ্কক অমা ওইনা, খোঙথাং অসিনা বেত্তরি স্তোরেজ সিস্তেমশিংগী মমল হন্থহনবা ঙমগনি হায়বগী থাজবা থম্লি।

নুমিৎ মঙাল অমসুং নুংশিত্তগী মৈ পুথোক্নবা শেম-শারিবা স্কিম অসিনা মীয়ামদা মৈখু চেন্দবা অমসুং মমল হোংবা মৈ ফংহনবা ঙমগনি। বেস স্কিম চাউখৎনবা ভি.জি.এফ অসি লুপা করোর ৩,৭৬০গী বজেতকী মতেং অমা য়াওনা, অহানবা ওইনা লুপা করোর ৯,৪০০ খাক্তুনা থম্লে। ভি.জি.এফকী মতেং পাংদুনা, লৈবাক শীনবা থুংনা মৈ খ্বাইদগী য়াম্না দরকার ওইরকপা মতমদা মৈ ফংহন্নবা রিনিউএবল ইনর্জি থমজিন্নবা, লেভেলাইজ কোস্ত ওফ স্তোরেজ(এল সি ও এস) কিলোৱাত-অৱার অমদা লুপা ৫.৫০দগী লুপা ৬.৬০ ফাওবদা লৈনবা স্কিম অসিনা পান্দম থম্লি। বেস প্রোজেকশিংগী তোঙান-তোঙানবা তাঙ্ককশিংদা ভি.জি.এফ তাঙ্কক মঙা থোক্নবা পীগনি।

স্কিমগী কান্নবশিং কঞ্জুমরশিংদা ফংহন্নবা, য়ামদ্রবদা বেস প্রোজেক্না পুথোকপা মৈগী চাদা ৮৫ দিস্ত্রিবিউসন কম্পেনিশিংদা পীগনি। মসিনা রিনিউএবল ইনর্জি ইলেক্ত্রিসিতি গ্রিত্তা য়াওহনবা হেনগৎহনবা খক নত্তনা ত্রান্সমিসন নেতৱার্কশিং মপুংফানা শীজিন্নদুনা মৈ মাঙবা হন্থহনবা ঙমগনি। মখা তারকপদা, মসিনা ইনফ্রাস্ত্রকচর ফগৎহনবদা চঙবা শেনফম হন্থহনগনি।

সরকার অমসুং লনাইগী লুপশিং শরুক য়াবা ঙম্নবা, অরোন-অথুপ লৈতবা কম্পিতিতিপ বিদ্দিং অমগী খুৎথাংদা ভি.জি.এফ গ্রান্তশিং পীগদবা বেস দিবলপ্পরশিং খনগনি। মসিনা মরুপ-মপাং ওইনা চাংদম্নবা হেনগৎহনগনি অমসুং শেন থাদরক্নবা অমসুং থবক তৌমিন্নবা ইন্দস্ত্রিশিংগী খুদোংচাবশিং পীনবা বেসগী অফবা ফিবম অমা শেমগৎপা ঙমগনি।

মৈখু থাংদবা ইনর্জি শীজিন্নবা পুক্নিং থৌগৎনবা সরকারনা থবক পায়খৎলে অমসুং বেস স্কিম অসি পান্দম অসি ফংনবা মাইকৈদা থাংজিনবা মরুওইবা খোঙথাং অমনি। রিনিউএবল ইনর্জি লৌশিন্দুনা অমসুং বেত্তরিদা থমজিনবা পুক্নিং থৌগৎতুনা, মীওই খুদিংমক হেন্না মঙাল ফংনবা অমসুং অকোয়বগী ফিবম ফবা তুংলমচৎ অমা শেমগৎনবা সরকারনা পান্দম থম্লি।

****