য়ুনিয়ন হোম অমসুং কোওপরেশন মিনিস্তর, শ্রী অমিত শাহনা ঙসি রাজস্থানগী গঙ্গাপুর সহরদা সাহাকার কিসান সম্মেলনদা ৱা ঙাংখ্রে। থৌরম অসিদা লোক সভাগী স্পীকর, শ্রী ওম বির্লা, IFFCOগী চিয়রমেন, শ্রী দিলীপ সংঘানি অমসুং অতোপ্পা অঙম-অথৌ কয়া অমনা শরুক য়াখি।

মহাক্কী ৱারোল অদুদা, শ্রী অমিত শাহনা হায়খি মদুদি প্রধান মন্ত্রী, শ্রী নরেন্দ্র মোদীনা লৈবাক অসিদা তোঙানবা কোওপরেশনগী মন্ত্রালয় অমা শেমদুনা লৈবাক অসিগী লৌমীশিংগী দেকেদ কয়া লিরবা দিমান্দ কয়া অমা নিংবা থুংহল্লি। মহাক্না মখা তারকখি মদুদি প্রধান মন্ত্রী ওইবদগী, শ্রী নরেন্দ্র মোদীনা লৈবাক অসিদা থোইদোক-হেন্দোক্না শিংথানিংঙাই ওইরবা থবক-থৌরাম কয়া অমা তৌরখি, খুদম ওইনা কোওপরেশনগী তোঙানবা মন্ত্রালয় শেম্বা অমসুং হন্দক্তা থাগী সাউথ পোলদা ঐখোয়গী চন্দ্রয়ান-৩না মাইপাক্না তাবা ঙমখিবা হায়রিবশিং অসিনি।  মহাক্না হায়খি মদুদি চন্দ্রবান-৩ মিসনগী মাইপাকপা অসিনা লৈবাক পুম্বদা অনৌবা শক্তি অমসুং থাজবা পুরক্লে, মরমদি অতোপ্পা লৈবাক অমত্তনা হৌজিক ফাওবদা ধাগী খা থংবা পোলদা য়ৌখিদ্রি।  শ্রী শাহনা হায়খি মদুদি প্রধান মন্ত্রী, শ্রী নরেন্দ্র মোদীনা লৈবাক অসিগী স্পেস মিসনদা অনৌবা খোংঝেল অমসুং শক্তি পীখি, মসিনা মরম ওইরগা ঙসি ভারতনা থাগী লৈমাইগী সাউথ পোলদা য়ৌবা ঙম্বা অহানবা লৈবাক ওইরে, মসি লৈবাক পুম্বগী ওইনা য়াম্না চাউথোকচনিংঙাই ওইবা ৱাফম অমনি।

য়ুনিয়ন মিনিস্তর ওফ কোওপরেশননা হায়খি মদুদি সেন্তরদা প্রধান মন্ত্রী, শ্রী নরেন্দ্র মোদীনা লুচিংবা সরকার অসিনা দিজিতেল ওইবা পাম্বৈশিংগী খুত্থাংদা লৌমীশিংগী কান্ননবগীদমক্তা স্কীম কয়া অমা হৌদোরকখ্রে। মহাক্না হায়খি মদুদি প্রধান মন্ত্রী, শ্রী নরেন্দ্র মোদীনা লৈবাক অসিগী লৌমী খুদিংমক্তা লুপা ৬০০০ ফংহল্লি।  মসিগী মথক্তা, লৌউ-শিংউগী লোনশিংগী অমসুং মহৈ-মরোংশিংগ ইন্সুরেন্সকীদমক্তা থবক কয়া অমা তৌখ্রে। মহাক্না হায়খি মদুদি লৌউ-শিংউগী বজেত অসি হান্নগী সরকারগি মতমদা লুপা করোর ২২০০০ ওইরম্মি, মসিবু প্রধান মন্ত্রী, শ্রী নরেন্দ্র মোদীনা শরুক ৬ থোক্না লুপা করোর ১২৫০০০দা হেনগৎখি। মহাক্না হায়খি মদুদি হান্নদি লৌমীশিংদা লুপা করোর লাখ ৭ ফাওবগী ওইবা লোনশিং পীরম্মি, হায়রিবা অসি প্রধান মন্ত্রী, শ্রী নরেন্দ্র মোদীনা লুপা করোর লাখ ২০দা হানগৎখ্রে। শ্রী শাহনা হায়খি মদুদি লৈবাক অসিদা হৱাই-চেংৱাইগী পোত্থোক অসি মিলিয়ন ২৬৫ তন ওইরম্মি, অদুবু হৌজিক্তি মিলিয়ন তন ৩২৩ য়ৌখ্রে। গেহুগী প্রোক্যোরমেন্ত তৌবা অদু মেত্রিক তন লাখ ২৫১ ওইরম্মি, হায়রিবা অসি প্রধান মন্ত্রী, শ্রী নরেন্দ্র মোদীনা মেত্রিক তন লাখ ৪৩৩দা হেনগৎখ্রে। মসিগা লোইন-লোইননা প্রধান মন্ত্রী, শ্রী নরেন্দ্র মোদীগী লুচিং মখাদা সরকারনা গেহুগী MSP অদু লুপা ১৪০০দগী লুপা ২১০০দা হেনগৎখ্রে। সরকারনা হঙ্গাম মরুগী MSP অদু লুপা ৩০৫০দগী লুপা ৫৪০০দা হেনগৎখ্রে।

শ্রী অমিত শাহনা হায়খি মদুদি প্রধান মন্ত্রী, শ্রী নরেন্দ্র মোদীনা লৈবাক অসিদা প্রাইমরী এগ্রিকলচর ক্রেদিৎ সোসাইতী (PACS)গী মপাঙ্গল কনখৎহন্নবা স্কীম ২০ হেন্না হৌদোরকখ্রে। মহাক্না হায়খি মদুদি ঙসিদি IFFCOনা কোওপরেতিব সোসাইতী ৩৫০০ হেনবগী খুত্থাংদা লৈবাক অসিদা লৈরিবা কোওপরেতিবশিং অদুবু হেন্না মপাঙ্গল কনখৎহন্নবা হোৎনরি। মহাক্না হায়খি মদুদি প্রধান মন্ত্রী, শ্রী নরেন্দ্র মোদীনা ৱারেপ লৌখি মদুদি লৈবাক অসিদা অনৌবা প্রাইমরী এগ্রিকলচর ক্রেদিৎ সোসাইতী লাখ অনি লিংখৎপনা পঞ্চায়ত খুদিংমক্তা PACS শেম্লগনি।

শ্রী শাহনা হায়খি মদুদি প্রধান মন্ত্রী, শ্রী নরেনদ্র মোদীনা লৌমীশিংনা অফবা মখলগী মরু ফংনবা, মখোয়না মখোয়গী পোত্থোক অদুবু এক্সপোর্ত তৌবা ঙম্নবা অমসুং ওর্গানিক ফার্মিং তৌরিবা লৌমীশিংনা খুমাং চাউশিনবা ঙম্নবা কোওপরেতিব সোসাইতী অহুম শেমখ্রে। মহাক্না হায়খি মদুদি প্রধান মন্ত্রী, শ্রী নরেন্দ্র মোদীনা লৈবাক শিনবা থুংনা লৌমীশিংগী বেঙ্ক একাউন্তশিংদা চহি খুদিংগী DBTগী খুত্থাংদা লুপা ৬০০০ থাদুনা ‘কিসানমিত্রা’ অমা ওইনা থবক তৌখি।

******