মন্ত্রীমন্দল
azadi ka amrit mahotsav g20-india-2023

কেবিনেতনা চন্দ্রয়ান-৩ মিসনগী পুৱারি ওইরবা মাইপাকপা অসিবু সেলেব্রেত তৌনবগী মতাংদা লৌখিবা ৱারেপ

Posted On: 29 AUG 2023 4:09PM by PIB Imphal

কেন্দ্রগী কেবিনেতনা লৈবাক অসিগী মীয়ামগা লোইননা থাগী লৈবাক্তা চৎখিবা চন্দ্রয়ান-৩ মিসনগী পুৱারি ওইরবা মাইপাকপা অসিগী নুংঙাইবা ফোংদোকপদা শরুক য়ারি। কেবিনেতনা ঐখোয়গী সাইন্তিস্তশিংগী য়াম্না শিংথানিংঙাই ওইবা মওংদা মাইপাকপা পুরকপা অদুগীদমক্তা থাগৎপা ফোংদোকখি। মসি ঐখোয়গী স্পেস এজেন্সী খক্তগী মাইপাকপা নত্তে, মসি ভারতকী চাউখৎ-খোংথাং খুমাং চাউশিনবা অমসুং মালেমগী থাক্তা কাখৎলকখিবগী ময়েক লারবা খুদম্নি। কেবিনেতনা ওগস্তকী ২৩বু “নেস্নেল স্পেস দে” ওইনা সেলেব্রেত তৌববু তরাম্না ওকখি।

কেবিনেতনা ইন্দিয়ন স্পেস রিসর্চ ওর্গনাইজেশন (ISRO)বু মখোয়না হোৎনখিবশিং অদুগীদমক্তা থাগৎপা ফোংদোকখি। ঐখোয়গী সাইন্তিস্তশিংগী মপালদগী, ভারতনা থাগী সাউথ পোল মনাক্তা তাবা ঙম্বা অহানবা লৈবাক অমা ওইরে। থাদা পানখিবা এক্যুরেসীগা লোইননা তাবা ঙম্বা অসিমক য়াম্না শিংথানিংঙাই ওইবা মাইপাকপা অমনি। য়াম্না খুদোংচাদাবা অরুবা ফিভম কয়া মায়োক্নদুনা মাইপাক্না থাগী সাউথ পোল মনাক্তা তাবা ঙম্বা অসিমক চহি চা কয়াদগী মীওইবগী ৱাখল-লৌশিংগী ঙমখৈ অদুবু নমখাইদুনা মদুগী ৱাংমা লান্নবা হোৎনখিবা ঐখোয়গী সাইন্তিস্তশিংগী নিংহন্নবা লৈত্রবা ৱাখল্লোন অদুগী ময়েক লারবা খুদম্নি। থাগ লৈমাইদগী ‘প্রগ্যান’ রোভরনা থারকপা মপাল নাইদ্রবা মমল য়াম্লবা ই-পাউশিং অদুনা ৱাখল-লৌশিং হেন্না খুমাং চাউশিনহল্লগনি অমসুং থা অমসুং মসিগী ৱাংমদা লৈরিবা কয়া অমগী মতাংদা খঙবা ঙমদনা লৈরিবশিং অদুগী মতাংদা গ্রোউন্দ-ব্রেকিং দিসকোভরীশিং অমসুং অনৌবা ৱাখল-লৌশিং কয়া অমা পীরগনি।

কেবিনেতনা খোংজেল য়াংনা তেক্নোলোজীগী লমদা খুমাং চাউশিল্লিবা অমসুং অনৌবা কয়া অমা পুথোক্নবগীদমক্তা থিবা-হুম্বা কয়া অমা তৌরিবা অসিনা মশক তাকপা য়ুগ অসিদা ভারতকী সাইন্তিস্তশিংনা ৱাখল-লৌশিং, হোৎনবা কনবা অমসুং হৈ-শিংবা মশেক-মঙাল লৈরবা লমজিং মৈরা অমা ওইনা লেপ্লরে হায়বা ৱাফম অসিদা য়াম্না চেৎনা থাজৈ। মখোয়গী খন্ন-নৈনবগী মতাংদা খুমাং চাউশিল্লিবা অসিনা ৱাহং-পাউহং অমসুং থু-হুম্বদা খোংফম চেৎনা থৱাই য়াওনা লৌরিবা অচেৎপা ফিরেপ অদুগা লোইননা লৈবাক অসিবু মালেমগী থাক্তা বিগ্যানগী লমদা মাইপাকপগী মতাংদা মাংজিল থাদুনা পুখৎলক্লি। মখোয়গী খ্বাইদগী অথোইবা তান্নবদা হালেংবা লৈতনা হোৎনবা, নিংহন্নবা তৌদনা খঙনিংবা, হৈনিংবা অমসুং শিংনবা কয়া অমবু মায়োক্নবা ঙম্নবা মখোয়গী নামথবা ঙম্লরোইদবা ৱাখল্লোনশিং অদুনা অন্তরাস্ত্রগী থাক্তা মখোয়গী মিংচৎ অদুবু হেন্না মপাঙ্গল লৈহনবদা নত্তনা মশিং লাকঙমদ্রবা অতোপ্পা কয়া অমবুশু মঙলান চাউনা মঙনবা অমসুং মালেমগী লৈরিবা মহৈ-মশিং, ৱাখল-লৌশিংগী পাক-চাউরবা লিক্লাং পরেংশিং অসিদা শরুক য়ানবা পুক্নিং থৌগৎলি। 

কেবিনেত অসিনা চন্দ্রয়ান-৩ অমসুং মরু ওইনা ভারতকী স্পেস প্রোগ্রামগী মাইপাকপদা মশিং য়াম্লবা নুপী সাইন্তিস্ত কয়া অমা শরুক য়াখিবা অসিদা চাউথোকচবা ফাওই। মসিনা লাক্কদাব চহিশিংদা মসিবু পামজবা নুপী সাইন্তিস্তশিং কয়া অমবু পুক্নিং থৌগৎলগনি।

কেবিনেত অসিনা প্রধান মন্ত্রী, শ্রী নরেন্দ্র মোদীবু মহাক্কী তুংগী শান্না উবা ঙম্বা মিৎয়েং অমসুং মহাক্কী থোইদোক হেন্দোকপা লুচিং, অমসুং মীওইবা জাতিগী য়াইফ-থৌরাং অমসুং বিগ্যানগী লমদা খুমাং চাউশিন্নবগীদমক্তা ভারতকী স্পেস প্রোগ্রামদা মহাক্কী নিংহন্নবা লৈতনা লেপ্লিবা ফিরেপ অদুগীদমক্তশু থাগৎপা ফোংদোকখি। ঐখোয়গী সাইন্তিস্তশিংগী তৌবা ঙম্বগী মতিক-মগুনদা মহাক্কী থাজবা অমসুং মহাক্না লেপ্তনা পুক্নিং থগৎপীবা অদুনা মখোয়গী ৱাখল্লোন অদুবু য়েম্না চেৎশিনহনখি।

সরকারগী মপী-মপা অমা ওইনা মহাক্কী শাংলবা চহি ২২ অসিদা, মহাক্না অহানবা ওইনা গুজরাত রাজ্যদা অমসুং মতুং তারকপদা প্রধান মন্ত্রী ওইনা, শ্রী নরেন্দ্র মোদীনা চন্দ্রয়ান মিসন খুদিংমক্কা নুংগী ওইবা মরি অমা লৈ। হান্নগী প্রধান মন্ত্রী, শ্রী অতল বিহারি ভাজপায় জীনা অসিগুম্বা মিসন অসিগী ৱাখল্লোন অসি লাউথোরকপা মতমদা মহাক্না মুখ্য মন্ত্রী ওইনা থৌ পুরম্মি। চন্দ্রয়ান-১না ২০০৮তা মাইপাক্না থাগৎখিবা মতমদা, মহাক্না ISROদা চৎখি অমসুং সাইন্তিস্তশিং অদুবু হকথেংননা থাগৎপা ফোংদোকখি। ২০১৯দা চন্দ্রয়ান-২গী মতাংদা, ভারতনা স্পেসকী মতাংদা, থাগী লৈমাইদগী শম্নাদা খিক্তমক ৱাৎহৌবা মতমদা, প্রধান মন্ত্রীগী য়াম্না হৈ-শিংলবা লুচিং অমসুং মীওইবা অমা ওইবগী মওং-মতৌ অদুনা সাইন্তিস্তশিংগী থৌনা হাপ্পীখি, মখোয়গী ফিরেপ অদুবু খোংফম চেৎনা লেপহনখি অমসুং মখোয়বু হেন্না চাউবা মরম অমগা লোইননা মিসন অসিগীদমক্তা হোৎননবা পুক্নিং থৌগৎখি।

প্রধান মন্ত্রী, নরেন্দ্র মোদীনা মতম চুপ্পদা বিগ্যান অমসুং অনৌবা কয়া অমা পুথোকপগী ৱাখল্লোনা অসিবু থৌগৎখি। হৌখিবা চহি ৯ অসিদা, অওনবা কয়া অমা পুরকখি, মসিনা মরম ওইরগা রিসর্চ অমসুং ইনোভেশনবু হেন্না লাইহনখি। স্পেস সেক্তরগীদমক্তা, প্রধান মন্ত্রীনা ভারত্তা প্রাইভেত সেক্তর অমসুং স্তার্তঅপশিংদা হেন্না খুদোংচাবা ফংহন্নবা হোৎনখি। ইন্দস্ত্রী, একাদেমিয়া অমসুং স্তার্তঅপশিংগী ইকোসীস্তেম অমা শেম্নবা অমসুং গ্লোবল স্পেস ইকোনোমীদা অচৌবা শিয়র অমা চিশিনবগীদমক্তা দিপার্তমেন্ত ওফ স্পেসকী মখাদা ওতোনোমস বোদী অমা ওইনা IN-SPACe লিংখৎপা অসি ২০২০গী জুনদা হৌদোকখি। মসিনা স্পেসকী লমদা ভারতনা থাংলিবা খোংথাং অদুবু হেন্না মপাঙ্গল কনখৎহন্নবগী পাম্বৈ অমা ওইরক্লি। হেকাথোনশিংদা মরু ওইবা পীবা অসিনা নহা ওইরিবা ভারতমচাশিংগীদমক্তা খুদোংচাবা কয়া অমা পূরক্লি।

কেবিনেতনা থাগী পোইন্ত অনিদা তিরঙ্গা পোইন্ত (চন্দ্রয়ান-২গী খোঙ্গুল) অমসুং শিবশক্তি পোইন্ত (চন্দ্রয়ান-৩না তাখিবা মফম) হায়না মমিং থোনখিবা অদুবু তরাম্না লৌখি। মসিগী মমিংশিং অসিনা মতম অসিগী অনৌবা ৱাখল্লোনশিং অদুবুশু শাগোন্নদুনা ঐখোয়গী হৌখিবা পুৱারিশিং অদুগী মরু ওইবা অদুবু য়াম্না ফজনা উৎলি। মখোয়না ঐখোয়গী চহি লিশিং কয়া লিরবা হেরিতেজ অদুবু ঐখোয়গী বিগ্যানগী ওইবা অনিংবা-অপাম্বশিং অদুগা য়াম্না চেকশিন্না শম্নহল্লিবা লংলা অমা শেম্লি।

চন্দ্রয়ান-৩গী মাইপাকপা অসি প্রধান মন্ত্রী, নরেন্দ্র মোদীগী “জয় ৱিগ্যান, জয় অনুসাধন” গী ক্লেরিয়ন কোল অসিদা য়াম্না চাউরবা খুদম অমনি। স্পেস সেক্তর অসিনা হৌজিক্তি ভারত মশা-মক্না শেমগৎচবা স্তার্ত-অপশিং অমসুং MSMEশিংদা খুদোংচাবা পীরগনি অমসুং থবক লাখ কয়া অমা ফংহল্লগনি অমসুং অনৌবা ইনভেন্সনশিংগীদমক্তা স্কোপ পীরগনি। মসিনা ভারতকী নহাশিংগীদমক্তা ওইথোকপা য়াবা কয়া অমা পুরক্লগনি।

চন্দ্রয়ান-৩ মিসন অসিগী মাইপাকপা অসিদগী পুরকপা ৱাখল-লৌশিং অদুনা মরু ওইনা গ্লোবল সাউথকী লৈবাকশিংগী কান্নবা অমসুং মীওইবা জাতি অসিগীদমক্তা শিজিন্নগনি হায়না শেংনা ফোংদোকপা অসিনা, প্রধান মন্ত্রী, শ্রী নরেন্দ্র মোদীনা ৱাসুধৈবা কুতুম্বাকমদা মতম নাইদনা থাজবগী ৱাখল্লোন অদুবু অমুক্কশু হন্না ফাওহল্লরে। ভারত্তা খুমাং চাউশিনবগী মৈরা অদুনা মতম চুপ্পদা অতোপ্পা মফম অমদা মী কয়াগী পুন্সিবু মঙাল পীনবা হোৎনগনি।

কেবিনেতনা থাজৈ মদুদি স্পেস সেক্তরদা ভারতনা খুমাং চাউশিল্লবা অসি শিংথানিংঙাই ওইরবা বিগ্যানগী ওইবা মাইপাকপা অসিদগী য়াম্না হেল্লি। মখোয়না চাউখৎ-থৌরাংগী ভিজন, মীপাল তাংদনা মশানা মরোমদোম লেপচবা ঙম্বা অমসুং মালেমগী থাক্তা লুচিংবা অমা ওইবগী মশক তাকই। মসি হৌগৎলক্লিবা অণোবা ভারত অমগী খুদম অমশুনি। ঐখোয়না ঐখোয়গী নাগ্রিকশিংদা ইন্দস্ত্রীশিংদা, সেতলাইত কম্যুনিকেশন অমসুং মেতিয়োরোলোজীদগী হৌরগা এগ্রিকলচর অমসুং দিজসা্তর মেনেজমেন্ত লমদা খুদোংচাবা হেন্না লৈহন্নবা থাংলিবা মশিগী খোংথাংশিং অসিগী কান্নবা লৌনবা পুক্নিং থৌগৎলি। ঐখোয়না ঐখোয়গী ইনোভেশনশিং অসিনা গ্রাউন্দদা দাইরেক্ত এপ্লিকেশন লৈহন্নবা হোৎনদুনা, ঐখোয়গী ইনফ্রাস্ত্রকচর ফগৎহনবা, ঐখোয়গী দিজিতেল ইকোনোমীদা ইনোৎ হাপ্পা অমসুং সেক্তর কয়া অমদা য়াম্না মরু ওইবা দেতা পীগদবনি।

বিগ্যান, তেক্নোলোজী অমসুং ইনোভেশনগী য়ুগ অসিদা, কেবিনেতনা অখন্ননা এজুকেশনগা মরি লৈনবশিংদা বিগ্যানগী মাইকৈদা নহাশিংগী পুক্নিং থৌগৎনবা আপীল তৌরি। চন্দ্রয়ান-৩গী মাইপাকপা অসিনামসিগী লমশিং অসিদা থৱাই য়াওবগী মৈরিক অমা হৌহন্নবা অমসুং ঐখোয়গী লৈবাক অসিদা কুদোংচাবশিংগী পীরিবা তাঞ্জা অসিগী কান্নবা লৌনবগী য়াম্না অফবা তাঞ্জা অমা পীররে।

কেবিনেতনা চন্দ্রয়ান-৩ অসি ভারতনা থৱাই হকচাং য়াওনা, লেপ্পা লৈতনা হোৎনবা অমসুং নিংহন্নবা লৈতনা অচেৎপা ফিরেপকা লোইননা হোৎনবনা করি ফংবা ঙম্বগে হায়বগী ময়েক লারবা খুদম-চাংদম অমনি হায়না মশক খঙবীরদুনা মসিগী থোইদোক-হেন্দোক্না শিংথানিংঙাই ওইরবা মাইপাকপা অসিদা শরুক য়াখিবা মীওই খুদিংমকপু থাগৎপা ফোংদোকখি অমসুং তৌবীমল খঙবা উৎচরি। কেবিনেত অসিনা লৈবাক অসিগী মীয়াম্না মখোয়গী থমোইনুংদা হরাও-নুংঙাইনা অমসুং চাউথোকচবগা লোইননা ২০৪৭ ফাওবদা ভারত অসিবু চাউখৎপা লৈবাক অমা ওইনা শেমগৎনবা মশাবু অমুক হন্না অচেৎপা ফিরেপ অমা লৌরগনি হায়বগী থাজবশু ফোংদোকখি।

****



(Release ID: 1953421) Visitor Counter : 77