ঙসি নিউ দিল্লিদা প্রধান মন্ত্রী শ্রী নরেন্দ্র মোদী বি-২০ সম্মিৎ ইন্দিয়া ২০২৩ দা ৱা ঙাংখ্রে। বি-২০ ইন্দিয়া কম্মুনিকিউ খন্ননবা  বি-২০ সম্মিৎ ইন্দিয়াদা মালেমগী মফম শীনবা থুংবগী থৌশিল শেম্বশিং, ললোন-ইতিক্কী লুচিংবশিং অমসুং অখঙ-অহৈশিং পুনখি। বি-২০ ইন্দিয়া কম্মুনিকিউদা জি-২০দা পীশিন্নবা রিকমেন্দেসন ৫৪ অমসুং পোলিসি এক্সন ১৭২ য়াওরি।

মীফম অদুদা তিনখিবা মীয়ামদা ৱা ঙাংবদা ওগস্ত ২৩দা চন্দ্রয়ন মিসন মাইপাকপগী হরাওবা ফোঙদোক্লদুনা প্রধান মন্ত্রী শ্রী নরেন্দ্র মোদীনা হায়খি ভারতকী কুম্মৈ-হরাওগী মতম হান্না য়ৌরকখ্রে, মীয়াম অমসুং ললোন-ইতিক্কী থবকশিং হরাও-তয়াম্বগী ফিবম অমদা লৈরি। থাগী খোঙচৎ অসি মাইপাকপদা ইসরোগী থৌদাং থাগৎনিঙাইনি। চন্দ্রয়নগী মচাকশিং লনাই সেক্তর অমসুং এম.এস.এম.ইশিংনা পীবা মরম্না মিসন অসিদা ভারতকী উদোগশিংনা অচৌবা থৌদাং লৌখি। মসি সাইন্স অমসুং উদোগ অনিমক্কী মাইপাকপনি।

মহাক্না হায়খি ভারতকা লোনননা মালেম শীনবা থুংনা হরাওবা ফোঙদোক্লি অমসুং মসিগী হরাওবা অসি দাইত্ব লৈবা স্পেসকী থৌরম অমা পাংথোকপগীদমক হরাওবনি। হরাওবা ফোঙদোক্লিবা অসি ঙসিগী বি-২০গী পান্দম দাইত্ব লৌবা, খুমাঙচাউশিনবা, অনৌবা পাংথোকপা, তুংকোইনা চৎনবা থবক পায়খৎপা অমসুং মান্নবা অসিগীদমক্নি। মীফম অসি মীওইবা খুন্নাইগীদমক্নি অমসুং ‘মালেম অমা, ইমুং অমা অমসুং তুংলমচৎ অমগী’ মতাংদনি।

বি-২০গী পান্দম রাইজ (R.A.I.S.E)গী মতাংদা প্রধান মন্ত্রীনা হায়খি ‘আই’না ইন্নোবেসন হায়বনি, মহাক্না অতোপ্পা অমদা ‘আই’না ইনক্লুসিপনেস হায়খি। জি-২০দা লেংদবা মেম্বর ওইহন্নবা অফ্রিকান য়ুনিয়ন চেবাউ পীবদা মসগিঈ পান্দম অসি থমখি। বি-২০ ফাওবদা, অফ্রিকাগী শেন-থুম চাউখৎহনবা হায়বসি অখন্নবা হিরম অমা ওইরি। খুদিংমক কোনশিন্নবা লুপ অসিগী পান্দম অসিনা লুপ অসি হকথেংননা কান্নবা অমা পীগনি হায়বা ভারতনা থাজৈ। মফম অসিদগী লৌখিবা ৱারেপশিংগী মাইপাকপনা মালেমগী শেন-থুমশিং খুদোংচাদবশিং মায়োক্নবা অমসুং তুংকোইনা চাউখৎপদা হকথেংননা কান্নবা অমা পীগনি।

চহি ১০০গী মনুংদা অমুক খক থোকপা কোবিদ-১৯ লাইচৎনা তম্বীখিবা পারাশিংগী মতাংদা শ্রী মোদীনা হায়খি শেন থাদবদা ঐখোয়না দরকার ওইরিবা অসি ‘অমনা অমবু থাজনবনি হায়বা লাইচৎ অসিনা ঐখোয়দা তম্বীরে। লাইচৎ অসিনা অমনা অমবু থাজনবা মাঙহনখি। থাজবা অমসুং মীওইবা খুন্নাইগীদমক ভারতনা লেপ্পদগী অমনা অমবু থাজনবা হেনগৎলকখি। ভারতনা শাবা হিদাক-লাংথকশিং মালেমগী লৈবাক ১৫০ হেনবদা ফংহনখি, লৈবাক অসি মালেমগী ফার্মাসিগী থাক্তা লৈখি। মীওই করোর কয়া কন্নবা তিকা পুথোকপা হেনগৎলে। লৈবাক অসিগী থবকশিংদা ভারতকী গনতন্ত্রগী গুনশিং অদু উৎলে। ভারতকী সহর ৫০ হেনবদা জি-২০গী মীফমশিং পাংথোকপা অসিনা ভারতকী গনতন্ত্রগী মগুনশিং অদু উৎথোক্লে।

মালেমগী ললোন-ইতিক তৌরিবশিংনা ভারতকা লোয়ননা ললোন-ইতিক পাংথোকপা পাম্লিবা অসিগী মতাংদা প্রধান মন্ত্রীনা হায়খি ভারতকী হৈথোই-শিংথোইরবা নহারোলশিং লৈরি অমসুং লৈবাক অসিদা দিজিতেলগী অওনবা লৈরে। অদোম্না ভারতকা অচেৎপা মরী হেন্না লৈরিবমখৈ, নাক অনিমক হেন্না নুংঙাইগনি। ললোন-ইতিক্নবা তৌবা ঙম্বশিং নুংঙাইবদা ওন্থোকপা ঙমগনি, অৱাবশিং খুদোংচাবশিংদা ওন্থোকপা ঙমগনি, অনিংবশিং মাইপাকপশিংদা ওন্থোকপা ঙমগনি। মখোয় অপীকপা নত্ত্রগা অচৌবা ওইগেরা, ললোন-ইতিক্কী থবকশিংনা মীওই খুদিংমক নুংঙাইহনগনি। মরম অদুনা তুংদা মালেমগী চাউখৎপা অসি তুংগী ললোন-ইতিক্কী মখা পোল্লি।

কোবিদ-১৯ লাইচৎ হৌরকপদা পুন্সিদা অহোঙবশিং লাকখিবগী মতাংদা প্রধান মন্ত্রীনা হায়খি হন্দোক-হঞ্জিন য়াদবা অহোংবশিংনা মালেমগী সপ্লাই চেন্দা অপনবা পীখি। মালেম্না দরকার ওইরকপা মতমদা মালেমগী সপ্লাই চেনগী থবকশিং লেপখি। ঙসি মালেম্না থেংনরিবা অৱাবশিং অসি কোক্নবা পাম্বৈশিং ভারতনা পুথোকখি। মতিক চাবা অমসুং থাজবা য়াবা মালেমগী সপ্লাই চেন অমা শেমগৎপদা ভারতনা মরুওইবা মফম অমা কল্লি।

বি-২০না জি-২০ লৈবাকশিংগী ললোন-ইতিকশিংগী মরক্তা মতিক চাবা মফম অমা ওইরকপদা হরাওবা ফোঙদোক্লদুনা প্রধান মন্ত্রীনা হায়খি তুংকোইনা চৎনবা য়াগদবা থবকশিং পায়খৎনবা মীৎয়েং চঙবা দরকার ওই। তুংকোইনা চৎনহনবা হায়বসি খুদোংচাবা অমনি অমসুং ললোন-ইতিক্কী নমুনা অমনি। মিল্লেত অসি অকোয়বগী ফিবম শোকহন্দবা অমসুং য়াম্না কানরবা চীঞ্জাক অমনি অমসুং মসি শেন্মিৎলোন অমসুং পুন্সি মহিংগী মীৎয়েংদা অপীকপা লৌমীশিংগী কান্নবা অমনি। সার্কলার ইকোনোমি অমসুং গ্রিন ইনর্জিগী লমদা ভারতনা থবক কয়া পায়খৎলে। ভারতনা মালেমগা লোয়ননা পায়খৎলিবা থবকশিং ইন্তরনেসনেল সোলার এল্লাইন্সগুম্বা থবকশিংদা উবা ফংলে।

প্রধান মন্ত্রীনা হায়খি কোরোনা মতুংগী মালেমদা মীওই খুদিংমক মখোয়গী হকশেলগী মররমদা কা হেন্না লাংতক্নবা উবা ফংলে অমসুং মসিনা মখোয়গী নোংমগী থবক-থৌরমশিংদা চৈথেং পীরে। অসিগুম্বা লাইচৎ অমা হেক্তা লাকপা মতমদা ফংগদবা চৈথেংগী মতাংদা মীয়াম্না মাঙজৌননা খনবা হৌরে। ললোন-ইতিক্কী থবকশিং অমসুং খুন্নাইনা মালেমগী অসিগী মতাংদা মান্নবা মীৎয়েং লৈগদবনি অমসুং মখোয়গী ৱারেপশিংনা গ্রহ অসিদা পীগদবা চৈথেং অদু নৈনগদবনি। গ্রহ অসি ফনা থম্বা হায়বসি ঐখোয়গী থৌদাংনি।

মিসন লাইফকী মতাংদা প্রধান মন্ত্রীনা হায়খি মিসন অসিগী পান্দমদি মালেমগী য়াইফনবা খনবা মীওই কাংলুপ অমা শেমগৎপনি। পুন্সি মহিং অমসুং ললোন-ইতিকশিং অনিমক্না গ্রহ অসিগী য়াইফনবা খনবা মতমদা খুদোংচাদবশিং তঙখাই অমা হন্থগনি। পুন্সি অমসুং ললোন-ইতিক অকোয়গী ফিবমগা চুনশিন্নবা হোৎনগদবনি অমসুং অফবা গ্রহ অমা  ওইনবা থবকশিংদা মীৎয়েং থম্বা ললোন-ইতিক্কী গ্রিন ক্রেদিৎকী ঙাক্লৌ অমা ভারতনা শেম-শারে। মালেমগী অচৌবা ললোন-ইতিকশিংনা মসিদা শরুক য়াগদবনি অমসুং মসি মালেমগী খোঙজং অমা ওইহনসি।

প্রধান মন্ত্রীনা হায়খি ব্রান্দ অমসুং য়োনবা খক্তগী খনবগী ৱাংমদা খনবা দরকার ওইরে। ললোন-ইতিক অমা ওইনা, মসিনা তুংকোইনা ঐখোয়দা কান্নবা পীগদবা ফিবম অমা শেমগৎনবা ঐখোয়না মীৎয়েং চঙগদবনি। হৌখিবা চহি খরদা ভারতনা পায়খৎখিবা থৌশিলশিংনা মরম ওইদুনা, শুপ্নগী চহি ৫ দা মীওই করোর ১৩.৫ লায়রবা কোক্লে। হায়রিবা মীওইশিং অসি অনৌবা কঞ্জুমরশিংনি। ভারত চাউখৎপদা নিও মিদল ক্লাসশিংনসু ইনোৎ হাপ্লি। লায়রবশিংগী সরকারনা পায়খৎলিবা থবকশিং অসিগী কান্নবশিং ঐখোয়গী মিদল ক্লাস অমসুং ঐখোয়গী এম.এস.এম.ইশিংশু ফংলে।

প্রধান মন্ত্রীনা হায়খি মীয়াম পোৎ-চৈ লৈবা ঙম্বগী শক্তি হেনগৎহন্নবা ললোন-ইতিকশিংনা মীৎয়েং চঙগদবনি অমসুং মীওই অয়াম্বনা মশাগীতা খনবা থৌওংশিংনা মীওই খুদিংমক মাঙহনগনি। মরুওইবা পোৎলমশিং অমসুং রিয়ার আর্থ মেতেলশিং থোং মান্ননা ফংবা অমসুং লৈবাক খুদিংমক ফংবদগী খুদোংচাদবা থেংনরি। করিগুম্বা মখোয়দা মালেমগী দাইত্ব ওইনা য়েংদবশিং অদুনা লোয়লম লৈঙাক্কী অনৌবা নমুনা অমা শেমগৎকনি।

প্রধান মন্ত্রীনা হায়খি পোৎথোক পুথোক্লিবশিং অমসুং কঞ্জুমরশিংগী অপাম্বশিং খল চানা থম্লবা মতমদা শেন্দোং লৈবা কৈথেল অমা লৈহনবা ঙমগনি অমসুং মসি লৈবাকশিংনা চৎনরি। অতোপ্পা লৈবাকশিং কৈথেল অমা ওইনা উবা খক্তনা তুংদা পোৎথোক পুথোক্লিবা লৈবাকশিং মাংজবা ওইগনি। কঞ্জুমরশিং অদু লৈবাকশিং ওইগেরা নত্ত্রগা লনাই মীওইশিং ওইগেরা ললোন-ইতিক পাংথোকপা মতমদা কঞ্জুমরশিংগী হেন্না খনগদবনি। কঞ্জুমরশিংগী য়াইফনবা অমসুং মখোয়গী কৈথেলশিংগী য়াইফনবা মখোয় মশামক ৱাশক লৌনবা চহি খুদিংগী মালেমগী ললোন-ইতিকশিং পুনগদবনি।

শ্রী মোদীনা হায়খি কঞ্জুমরশিংগী য়াইফনবা ৱারি শান্নবা মালেমগী ললোন-ইতিকশিংনা নোংমগী মতম কাইথোক্কদবনি। ঐখোয়না কঞ্জুমরশিংগী হকশিংগী মতাংদা ৱারি শারকপা মতমদা, ঐখোয়না ‘ইন্তরনেসনেল কঞ্জুমর কিয়ার দে’গী সিস্তেম অমগী মতাংদা খনগদবনি। মসিনা ললোন-ইতিকশিং অমসুং কঞ্জুমরশিংগী মরক্তা থাজনবা হেনগৎহনগনি। কঞ্জুমরশিং অসি অকক্নবা মফম অমগী  রিতেল কঞ্জুমরশিং খক্ত নত্তে, মসি মালেমগী ললোন-ইতিক, মালেমগী পোৎলমশিং অমসুং থবকশিংগী লৈবাকশিংসু য়াওরি। ক্রিপতোকরেন্সিশিংগী মতাংদা অপুনবা থবক অমা পায়খৎপা দরকার ওইরে।

প্রধান মন্ত্রীনা হায়খি মালেমগী অৱাবশিং কোকহন্নবা অমগা অমগা মতেং পীনবা অসি দরকার ওই। অইং-অশাগী খল হোংলকপা, ইনর্জিগী অৱাবা, চানবা চীঞ্জাক ফংহনবদা খল মান্নদবা, ঈশিং ফংদবা, সাইবর সেকুরিতি অসিনচিংবনা ললোন-ইতিক্তা অচৌবা চৈথেং পীরে অমসুং মসি থেংননবা থবক পায়খৎপা হেনগৎহনগদবনি।

প্রধান মন্ত্রীনা হায়খি মরী লৈনবা খুদিংমক্কী অৱাবশিং কোকহন্নবা অপুনবা থৌরাং অমা অমসুং মালেমগী ঙাক্লৌ অমা শেম্বা দরকার ওইরে। কাংলোন চুম্বা এ.আই য়োকখৎনবা মালেমগী ললোন-ইতিক্কী কাংবু অমসুং সরকারশিং পুন্না থবক তৌমিন্নগদবনি। মসিনা তোঙান-তোঙানবা হিরমশিংদা অকায়বা থোকহনবা য়াবগী ওইথোকপশিং লৈরে।

মহাক্কী লোইশিল্লকপগী ৱারোলদা, প্রধান মন্ত্রীনা হায়খি অৱা-অনা মায়োক্নবা ঙম্বা সপ্লাই চেনদা মীৎয়েং থমদুনা ললোন-ইতিক্কী থবকশিং পায়খৎকদবনি। অপুনবগী ওইনা অহোঙবা অমা পুরক্নবা বি-২০ মীফম্না লম্বী অমা শেম্লে। ইশম শম্নবা মালেম অসি শুপ্নগী তেক্নোলোজি খক্তনা শম্নবা নত্তে হায়বা ঐখোয় নিংশিংসি। ইশম শম্নরবা মালেম অমা হায়বসি থবকশিং শরুক য়ামিন্নবা, মালেম অসি শরুক য়ামিন্নবা, নুংঙাইমিন্নবা অমসুং অপুনবগী তুংলমচৎ অমা শেমগৎপনি।

নুঙগীৱারোল

বি-২০ অসি মালেমগী ললোন-ইতিক তৌবা কাংলুপকী ওফিসিএল জি-২০ দাইলোগ ফোরম্নি। মসি ২০১০দা লিংখৎখি, বি-২০ অসি জি-২০গী মশক নাইবা গ্রুপশিংগী মনুংদা অমনি অমসুং মসিদা কম্পেনিশিং অমসুং ললোন-ইতিক্কী লুপশিং শরুক য়ারি। শেন-থুমগী ফিবম ফগৎনবা অমসুং চাউখৎনবা থবক ওইনা পাংথোকপা য়াবা থৌশিলশিং শেম্নবা বি-২০না থবক তৌরি।

নুমিৎ হুম্নিগী মীফম অসি ওগস্ত ২৫দগী ওগস্ত ২৭ ফাওবা পাংথোক্লি। মীফম অসিগী থিম রাইজ- হায়বদি রেন্সপোন্সিবল, এসেলেরেতেদ, ইন্নোবেসন,স্তেনেবল অমসুং ইকুইতেবল বিজিনেস হায়বনি। মসি লৈবাক ৫৫ রোমগী দেলিগেদ ১৫০০ শরুক য়াখি।

Speaking at the B20 Summit India 2023. https://t.co/dC5P5CH0ti

— Narendra Modi (@narendramodi) August 27, 2023

Our space agency @isro has a big role in the success of Chandrayaan-3 mission.

But at the same time, Indian industry has also contributed a lot in this.

Many components used in Chandrayaan have been provided by our industry, private companies, our MSMEs. pic.twitter.com/oGGl7PscVs

— PMO India (@PMOIndia) August 27, 2023

In B-20's theme- RAISE, I represents Innovation.

But along with innovation, I also see another I in it.

And this is I, Inclusiveness: PM @narendramodi pic.twitter.com/u3sn8L2GE9

— PMO India (@PMOIndia) August 27, 2023

अविश्वास के माहौल में, जो देश, पूरी संवेदनशीलता के साथ, विनम्रता के साथ, विश्वास का झंडा लेकर आपके सामने खड़ा है - वो है भारत। pic.twitter.com/YKpYaYo4xv

— PMO India (@PMOIndia) August 27, 2023

Today India has become the face of digital revolution in the era of Industry 4.0 pic.twitter.com/vevk2W3FX5

— PMO India (@PMOIndia) August 27, 2023

India holds an important place in building an efficient and trusted global supply chain. pic.twitter.com/7NyWRYxaeg

— PMO India (@PMOIndia) August 27, 2023

Making everyone equal partners in progress is the way forward. pic.twitter.com/x2QF9rzXIK

— PMO India (@PMOIndia) August 27, 2023

*****