হৌখিবা জুন ২০২০দগী মে ২০২১ ফাওবা অমসুং জুন ২০২১দগী মে ২০২২ ফাওবা মহাক্কী অনিশুবা তার্মদা প্রধান মন্ত্রী শ্রী নরেন্দ্র মোদীনা পীখিবা ৱারোলশিংগী খোমজিনবা ভোলুম অনিগী লাইরিক ‘সবকা সাথ, সবকা বিকাস, সবকা বিশ্বাস’ ঙসি ভোপালগী কুসাভাব থাক্রে ইন্তরনেসনেল কনভেন্সন সেন্তরদা ইনফোর্মেসন অমসুং ব্রোদকাস্তিং, য়ুথ এফেয়ার্স অমসুং স্পোর্তসকী য়ুনিয়ন মিনিস্তর শ্রী অনুরাগ থাকুর অমসুং চীফ মিনিস্তর শ্রী সিবরাজ চৌহান্না ফোঙখ্রে। হায়রিবা লাইরকশিং অসি ইনফোর্মেসন অমসুং ব্রোদকাস্তিং মিনিস্ত্রিগী পব্লিকেসন দিবিজন্না খোমজিনবনি।

থৌরম অদুদা ৱা ঙাংবদা য়ুনিয়ন মিনিস্তর শ্রী অনুরাগ থাকুরনা হায়খি প্রধান মন্ত্রী নরেন্দ্র মোদীগী ৱারোলশিং অসি ইথিল পীনবগী হৌরকফম অমনি। মহাক্কী ৱারোল খুদিংমক তম্বা য়াবা পারাশিং য়াওরি। কান্নরবা মচাক কয়া মরাংকাইনা য়াওবা মরম্না লাইরিক ওইনা শেমগৎনবা ৱারোলশিংগী মরক্তগী খনগৎপা অসি অরুবা থবক অমনি।

মিনিস্তরনা হায়খি লাইরিক অসিগী সেক্সন অমদা ৱারোল ৮৬ য়াওরি অমসুং অতোপ্পা সেক্সন অমদা ৱারোল ৮০ য়াওরি। মরুওইবা হিরম কয়াদা প্রধান মন্ত্রী নরেন্দ্র মোদীগী ৱারোলশিং অসি খোমজিনবনি। স্তার্দঅপ ইন্দিয়া, অফবা লৈঙাক, নুপীশিংদা শক্তি পীবা, লৈবাক্কী শক্তি, অত্মানির্ভর ভারত, জয় বিগ্যান, জয় কিষন অসিনচিংবা হিরমশিংদা মীচম মীয়ামদা প্রধান মন্ত্রীনা পীখিবা ৱারোলশিং য়াওরে।

মিনিস্তরনা মখা তানা হায়খি নহারোলশিং অমসুং রিছার্স তৌরিবশিংনা লাইরিক অসি পাগদবনি। লাইরিকশিং অসিদগী খঙগদবা অমসুং তমগদবা কয়া লৈরি। অহানবা ওইনা থাগী খা মেরুদা মাইপাক্না বিক্রম লেন্দর তাবদা শ্রী থাকুরনা থাগৎপা ফোঙদোকখি, মসি ভারতকী শিংথানিঙাই ওইবা মাইপাকপা অমনি হায়খি।

য়ু.পি.আই অমসুং ভিম এপ্পশিং পল্লদুনা, য়ুনিয়ন মিনিস্তরনা হায়খি হৌজিক মালেমগী ওইনা চৎথরিবা দিজিতেল পেমেন্তশিংদা, ভারত্তা দিজিতেল পেমেন্ত চাদা ৪৬ পাংথোক্লি। হৌজিক বেনিফিসরিশিংগী বেঙ্ক একাউন্ত করোর ৪৫ হেনবদা দাইরেক্ত বিনিফিত ত্রান্সফর(দি বি তি)গী খুৎথাংদা শেনফমশিং ফংহল্লে।

নহারোলশিংগী থৌদাংগী মতাংদা, শ্রী থাকুরনা হায়খি হৌজিক ভারতকী নহারোলশিংনা থবক পীবা ঙম্লে। মালেমগী লৈবাকশিংগা চাংদম্নবদা ভারত্তা স্তার্দঅপ লাখ ১ হেন্না লৈরি। মালেমদা খ্বাইদগী হোঙবা দেতা ভারত্তা ফংলি। লৈবাক অসিনা মশাগী ফাইব-জি তেক্নোলোজি পুথোকচরে অমসুং তুংগীদমক সিক্স-জি তেক্নোলোজি শেমগৎলি। অমৃত মহোৎসবকী ৭৫শুবা চহিদা, ভারত মালেমদা খ্বাইদগী চাউবা মঙাশুবা ইকোনোমি ওইরে।

মধ্য প্রদেসনা পায়খৎলিবা চাউখৎ-থৌরাংশিং থাগৎলদুনা, য়ুনিয়ন মিনিস্তরনা হায়খি মমাঙদা মধ্য প্রদেস অসি বিমারু হায়না খঙনরমখি। অদুবু অনৌবা সরকার শেম্লবা মতুংদা, রাজ্য অসি লৈবাক অসি মাংজিল থাবা অমসুং চাউখৎপা রাজ্যশিংগী মনুংদা অমা ওইরে। ঐখোয়গী ইমালোলদা লাইরিক তম্নবা ঐখোয়না থবক কয়া পায়খৎলে অমসুং মধ্য প্রদেস খক্তদা মেদিকেল তম্নবা সেল্লবস হিন্দীদা শেম্লে। সিখো কমাও য়োজনা অসি তোপ-তোপ্পা স্কিম অমনি অমসুং মসিদা হৌজিক ফাওবা রেজিস্তার লিশিং ৮৬ হেন্না তৌরে অমসুং মধ্য প্রদেসনা মাইপাক্না খেলো ইন্দিয়া য়ুথ গেমস পাংথোকখ্রে।

মহাক্কী ৱারোলদা, চীফ মিনিস্তর শ্রী সিবরাজ চৌহান্না হায়খি নহারোলশিংনা লাইরিক অসি পাগদবনি। মসি মমল নাইদ্রবা লন অমনি অমসুং মসিদা লৌশিংগী মনি-মুক্তাশিং ফংগনি। প্রধান মন্ত্রীগী মন কি বাত অসি মীচম মীয়ামগী খোল্লাউনি অমসুং মসিদা খুন্নাইগী ৱাফমশিং খন্ননবা মফম অমা পীরি। মসি প্রধান মন্ত্রীনা ইথিল পীবা অঙকপা থবক অমনি।

চীফ মিনিস্তরনা হায়খি প্রধান মন্ত্রী শ্রী নরেন্দ্র মোদী অসি তুংগী শান্না উবা ঙম্বা প্রধান মন্ত্রী অমনি অমসুং মহাক্কী নিংশিংবশিং মহাক্কা লোয়ন্নরি।

মহাক্না হায়খি ইন্দোরনা লেমজনিঙাই ওইরবা স্মার্দ সিতি এৱার্দ ফংলে। মসিগা ইরোইননা, ভারতকী স্মার্দ সিতি কেতেগোরিদা মধ্য প্রদেসনা লেমজনিঙাই ওইরবা খ্বাইদগী ফবা রাজ্যগী মনা ফংলে। লু-নানবগী সর্ভেশিংদা ইন্দোরনা মকোক থংদুনা লাক্লি।

থৌরম অদুদা ইনফোর্মেসন অমসুং ব্রোদকাস্তিং মিনিস্ত্রিগী জোইন্ত সেক্রেতরি শ্রী বিক্রম সাহেনা তরাম্না ওকপগী ৱারোল পীখি, তুংদা লাইরিকশিং অসিদা য়ুম্ফম ওইবা অতেনবা ফিল্ম অমা উৎখি। থৌরম অদুদা খাজুরাহোগী এম.পি শ্রী ভি.দি শর্মাশু শরুক য়াখি। পব্লিকেসন দিবিজনগী দাইরেক্তর জেনেরেল অনুপামা ভাতনগরনা থাগৎপগী ৱাহৈ পীখি।

লাইরিক ফোঙবগী থৌরমগী মমাঙদা, য়ুনিয়ন মিনিস্তর অমসুং চীফ মিনিস্তরনা সেন্ত্রেল বিউরো ওফ কম্মুনিকেসননা ‘নয়া ভারত: সাসাক্তা ভারত’ হায়বা থিমদা পাংথোকপা মল্তি-মেদিয়া একজিবিসন অমসুং ‘চহি ৯: সেবা,সুসান ঔর গরিব কলয়ান’ হৌদোকখি।

থৌরম অদুদা, পব্লিকেসন দিপার্তমেন্তনা মখোয়না ফোঙখ্রবা লাইরিকশিং উৎখি, মসিদা মীওই কয়া য়েংবা লাকখি অমসুং লাইরিকশিং লৈনখি।

***