ঐগী নুংশিরবা ইমুং-মনুংগী মীওইশিং,

ঐখোয়গী মীৎ মাংদা পুৱারি অমা শেম্বদা ঐখোয় উবা ফংবদা পুন্সি অসি মহৈ য়াল্লে। অসিগুম্বা পুৱারিগী থৌদোক অসি লৈবাক অসিগী ওইনা কাউবা ঙম্লোরোইদবা মিকুপ অমনি। মসিগী তাঞ্জা অসি চাউখৎলবা ভারত অমগী মাইপাকপনি। তাঞ্জা অসি অনৌবা ভারতগী হরাওবনি। মসিগী তাঞ্জা অসি অৱাবশিংগী ইপাক লান্থোকপনি। মসিগী মিকুপ অসি থাগী লম্বীদা মাইপাকপগী খোঙচৎনি। মসিগী মিকুপ অসি ভারতমচা করোর ১৪০গী মাইপাকপনি।  মসি ভারতকী অনৌবা শক্তি, অনৌবা থাজবা অমসুং অনৌবা ৱাখল্লোনগী তাঞ্জানি। মিকুপ অসি ভারতকী লাইবক ফবা হেনগৎলকপনি। ঐখোয়না মালেমদা ৱাশক অমা লৌরে অমসুং মসি থাদা থবক ওইনা পাংথোক্লে। ঐখোয়গী সাইন্তিস্ত মরুপ-মপাঙশিংনা হায়খি মদুদি হৌজিক ভারত থাদা য়ৌরে। ঙসি ঐখোয়না স্পেসতা অনৌবা ভারতকী অনৌবা ফ্লাইত উবা ফংলে।

ঐগী নুংশিরবা ইমুং-মনুংগী মীওইশিং,

ব্রিক্স মীফম য়াওনবা ঐ হৌজিক খা অফ্রিকাদা লৈরি। অদুবু, লৈবাক অসিগী মীওই খুদিংমক্কী মতৌগুম, ঐগী ৱাখলসু চন্দ্রয়ান মহা অভিয়ানদা মীৎয়েং থম্লে। অনৌবা পুৱারি হেক শেম্বগা, ভারতমচা খুদিংম হরাও-মথোই কারে, য়ুমথোং খুদিংমক হরাও-তয়াম্বা ফোঙদোকপা হৌরে। ঐগী থম্মোয়নুংদগী, ঐগী ইমুং-মনুংগী মীওইশিংগা লোয়ননা ঐসু হরাওবা ফোঙদোকচরি। মিকুপ অসিগীদমক চহি কয়া কন্না হোৎনরকখিবা তিম চন্দ্রয়ান, ইসরো অমসুং সাইন্তিস্ত খুদিংমক ঐনা থম্মোয় শেংনা থাগৎচরি। হরাওবনা থল্লবা মিকুপ অসিগীদমক ঐনা লৈবাক অসিগী মীওই করোর ১৪০শু থাগৎপা ফোঙদোকচরি।

ঐগী নুংশিরবা ইমুং-মনুংগী মীওইশিং,

ঐখোয়গী সাইন্তিস্তশিংগী হৈথোই-শিংথোইবা অমসুং কন্না হোৎনবদগী, হৌজিক ফাওবা মালেমগী লৈবাক অমতনা য়ৌবা ঙমদ্রিবা থাগী খা মেরুদা ভারতনা য়ৌরে। ঙসিদগী, থাগা মরী লৈনবা থাজনবশিং অহোংবা লৈরগনি, ৱারিশু হোঙলগনি অমসুং অনৌবা মীরোলদা প্রমান-পান্থৈশিংশু হোংলগনি। ভারত্তা, ঐখোয়না মালেম অসি ইমা হায়না কৌনরি অমসুং থানা মামা হায়না কৌনরি। মতম অমদা চান্দা মামা অসি য়াম্না লাপ্পী হায়নরমখি। চান্দা মামা ফাওবা চৎপা অসি য়াম্না নকপা খোঙচৎ অমনি হায়না অঙাংশিংনা হায়গদবা নুমিৎ অদু য়ৌরক্লগনি।

মরুপশিং,

নুংঙাইরবা থৌরম অসিদা, মালেমগী মীয়াম, লৈবাক খুদিংমক্কী মীয়ামদা ঐ ৱা ঙাংবা পাম্মী। ভারতকী থাগী খোঙচৎ মাইপাকপা অসি ভারত খক্তগী নত্তে। চহি অসিদা ভারতনা জি-২০গী প্রসিদেন্ত ওইবা মালেম্না উরে। “মালেম অমা, ইমুং অমা, তুংলমচৎ অমা” হায়রিবা ঐখোয়গী পান্দম মালেম শীনবা থুংনা খোন্থাং য়ৈরে। মীওইবগী য়াইফনবা ঐখোয়না হৌদোক্লিবা ৱাফম অসি মালেম শীনবা থুংনা তরাম্না ওক্লে। মরম অদুনা, মসিগী মাইপাকপা অসি মীওই খুন্নাইগীনি। মসিনা তুংদা অতোপ্পা লৈবাকশিংগী থাগী খোঙচৎশিংদা মতেং পাংগনি। গ্লোবেল সাউথ য়াওনা মালেমগী লৈবাক খুদিংমক্না অসিগুম্বাথবক অসি পাংথোকপা ঙমগনি হায়না ঐনা থাজৈ। ঐখোয়না থা অমসুং মসিগী ৱাংমগী অপাম্বা কয়া লৈবা য়াই।

ঐগী নুংশিরবা ইমুং-মনুংগী মীওইশিং,

চন্দ্রয়ান মহা অভিয়ান মাইপাকপা অসিনা ভারতকী খোঙচৎ থাগী ওর্বিৎকী ৱাংমদা পুবা ঙম্লগনি। ঐখোয়গী ঐখোয়গী সোলার সিস্তেমগী ঙমখৈশিং চাংয়েং তৌগনি অমসুং মীওইবা খুন্নাইগীদমক তাইবংপাল অসিগী লোইবা নাইদ্রবশিং খঙনবা ঐখোয়না থবক তৌগনি। তুংগীদমক ঐখোয়না অচৌবা পান্দম কয়া থম্লে।  নুমিৎ মরমদা কুপ্না থিজিন্নবা অথুবা মতমদা ইসরোনা ‘অদিত্য এল-১’ মিসন থাগৎলগনি। মসিগী মতুংদা ইসরোগী পান্দমশিংগী মনুংদা ভেনস য়াওরি। গাগনয়ানগী খুৎথাংদা, লৈবাক অসিগী অহানবা মীওইবা শরুক য়াবা সুন্দ্রংগী খোঙচৎ চৎনবা লৈবাক অসিনা মপুংফানা থৌরাং তৌরে। ভারতনা অমুক হন্না উৎলে অমসুং অতিয়া অসিনা অরোইবা নত্তে।

ঐগী নুংশিরবা ইমুং-মনুংগী মীওইশিং,

সাইন্স অমসুং তেক্নোলোজিনা লৈবাক অসিগী অফবা তুংলমচৎকী য়ুম্ফম্নি। মরম অদুনা লৈবাক অসিনা নুমিৎ অসি মতম চুপ্পদা নিংশিংদুনা লৈহৌরগনি। নুমিৎ অসিনা ঐখোয় মাঙলোমদা চঙশিন্নবা ইথিল পীরগনি। ঐখোয়গী ৱাশকশিং ঙাক্নবা লম্বীশিং নুমিৎ অসিনা ঐখোয়দা তাক্লগনি। মাইথিবদগী পারা তম্লগা কমদৌনা মাইপাকপা ঙম্বগে হায়বা নুমিৎ অসিনা খুদম ওইরে। অমুক হন্না লৈবাক অসিগী সাইন্তিস্তশিং থাগৎচরি অমসুং তুংগী মিসনগী য়াইফ-পাউজেল পীজরি।

অদোম থাগৎচরি।

***