খা অফ্রিকাগী রাস্ত্রপতি মাতামেলা সিরিল রামাফোসানা চেবাউ পীরকপদগী খা অফ্রিকানা চিয়ারমেন ওইদুনা জোহেন্সবার্গতা পাংথোক্কদবা ১৫শুবা ব্রিক্স মীফম শরুক য়ানবা ওগস্ত ২২-ওগস্ত ২৪,২০২৩ ফাওবা ঐ খা অফ্রিকাগী  চৎলি।

তোঙান-তোঙানবা হিরমশিংদা মতেং পীনবা হেনগৎহন্নবা ব্রিক্সনা তকশিল্লি। চাউখৎ-থৌরাং অমসুং মালেমগী লুপশিংগী থবকশিংদা অওনবা পুরক্নবা য়াওনা গ্লোবেল সাউথকী ৱাফমশিং খন্ননবা ব্রিক্সনা মফম অমা ওইরে হায়না ঐখোয়না লৌরে। তুংগী মতেং পাংনগদবা হিরমশিং মশক খঙদোক্নবা অমসুং ইন্সতিতুৎশিংনা পায়খৎলিবা চাউখৎ-থৌরাংগী থবকশিং হন্না য়েংশিন্নবা ব্রিক্সকী কান্নরবা খুদোংচাবা অমা মীফম অসিনা পীরগনি।

ঐনা জোহেন্সবার্গতা লৈরিঙৈদা, ব্রিক্স মীফমগী থবকশিংগী শরুক অমা ওইনা পাংথোক্কদবা ‘বিক্স-অফ্রিকা আউতরিচ এন্দ ব্রিকস প্লস দাইলোগ’ অখন্নবা থৌরম অমদা শরুক য়াগনি। মীফম অসি শরুক য়াবা লাক্কবা লৈবাকশিংগী লুচিংবশিংগা ৱারি শানগনি হায়বগী থাজবা ঐনা থম্লি।

খোঙচৎ মনুংদা প্রধান মন্ত্রীনা জোহেন্সবার্গতা লুচিংবা খরগা লৈবাক অনিগী ওইবা মীফমশিং পাংথোক্কনি হায়বগী থাজবা ঐনা থম্লি।

খা অফ্রিকা খোঙচৎ মতুংদা, ঐ ওগস্ত ২৫,২০২৩দা গ্রিসতা চৎকনি। মসি গ্রিসকী প্রধান মন্ত্রী কিরিয়াকো মিতসোতাকিসনা চেবাউ পীরকপগী চৎকদবনি। অরিবা লৈবাক অসিদা চৎপা মসিনা ঐগী অহানবা খোঙচৎনি। চহি ৪০গী মতুংদা গ্রিসতা চৎপা  ভারতকী অহানবা প্রধান মন্ত্রী ওইগদবা অসিদা ঐ হরাওই।

ঐখোয়গী সভেত্য অনিগী মরক্ত মরী লৈনরক্নবা চহি লিশিং অনি হেল্লে। অনৌবা যুগশিংদা, লৈবাক অনিনা শরুক য়ামিন্নরিবা গনতন্ত্রগী গুনশিং, আইনগী কাংলোনশিং, ললোন-ইতিক, শেন থাদবা, ঙাক-শেন, কলচর অমসুং মীগা মীগা লৈনবা মরীশিং য়াওনা হিরম কয়াদা মতেং পীনবা হেনগৎহন্দুনা ঐখোয়গী লৈবাক অনিগী মরীশিং হেন্না চেৎশিনহল্লে।

ঐখোয়গী হিরম কয়াদা লৈরিবা মরুপ-মপাং ওইবা মরী অসি ঐগী গ্রিস খোঙচৎ অসিনা অনৌবা পান্দুপ অমা হাংদোক্লগনি হায়না ঐনা থাজবা থম্লি।

****