WHOনা মপুং ওইনা অমসুং আয়ুশ মন্ত্রালয়না তেংবাংদুনা য়ুম্বু ওইবা হীরম অসিদা খ্বাইদগী অহানবা ওইগদৌরিবা ত্রেদিস্নেল মেদিসিনগী মালেমগী সম্মিত অমা গুজরাতকী গান্ধীনগরদা ওগস্ত 17-18, 2023দা পাংথোক্কদৌরি। সম্মিত অসিনা মরী লৈনবা হীরম অসিদা লৈরিবা লৈবাক্কী হৈথোই শিংথোইবা মতৌ অমসুং এক্সপেরিএন্সউ শকখঙগনি অমসুং খৌরাং ঙাইনরিবা থৌরম অসিনা মীপুম খুদিংগী হকশেল ফবা অমসুং নুংঙাইনা লৈবগী পান্দম থম্বগা লোয়ননা সেক্তর অসিগী খ্বাইদগী অনৌবা সাইন্তিফিক ওইবা মায় পাকপা অমসুং খুদমদা য়ুম্ফম ওইবা লৌশিং কয়া নৈননবা অখঙ-অহৈ অমসুং প্রেক্তিস্নরশিংগী ফম্বাক অমা ওইনা মথৌ তৌগনি।

WHOগী ইকায় খুম্ননীংঙাই ওইরবা দাইরেক্তর-জেনেরেল, দাঃ তেদ্রোস অধানোম ঘেব্রেসিয়সনা হকশেল মন্ত্রী, দাঃ মনশুখ মন্দাবিয়া অমসুং আয়ুশ মন্ত্রী, শ্রী সর্বানন্দ সোনোৱালনা শরুক য়াবা থৌরম অমদা সম্মিত অসি হৌদোক্কনি। G20 হকশেল মন্ত্রী, WHOগী রিজনেল দাইরেক্তর অমসুং WHOগী লমদম তরুক্কী লৈবাকশিংদগী লাক্লিবা শক্নাইরবা মীওইশিংগা লোয়ননা সাইন্তিস্ত, ত্রেদিস্নেল মেদিসিনগী প্রেক্তিস্নর, হকশেলগী থৌমী অমসুং সিভিল সোসাইতী লুপশিংগী মেম্বরশিংনা থৌরম অসিদা শরুক য়াগনি। কেন্দ্রগী আয়ুশকী রাজ্য মন্ত্রী, দাঃ মুঞ্জপারা মহেন্দ্রভাই কালুভাইনা ৱাফম অসি ঙসি নই দিল্লীদা পাংথোকখিবা প্রেস কনফরেন্স অমদা পাউদমখিবনি।

প্রেস কনফরেন্স অসিদা থৌরম অসিগী মতাংদা দাঃ মুঞ্জপারানা হায়খিবদা সম্মিত অসিগী মহৈদি ৱারেপ অমনা ওইগনি অমসুং ৱারেপ অসিনা WHO গ্লোবেল সেন্তর ফোর তেলিমেদিসিনগী তুংগী মতমগী ফিভম লেপ্পদা WHOগী মফমদা তেংবাংগনি হায়খি। “মমাংগী চহিদা জাম্নগরদা গ্লোবেল সেন্তর ফোর তেলিমেদিসিনগী উরেপ উয়ুং তম্বগী থৌরমগী মতুংদা, ঐখোয়না মসিগুম্বা মালেমগী ওইওবা থৌরম অমা ভারত্তা পাংথোকপা উবসিদি মহৌশানা তাবনি। মসিনা ঐখোয়গী লৈবাক্না হৌখিবা ইকুই কুইদ্রিবা মতমশিংদা তোঙান-তোঙানবা ত্রেদিস্নেল মেদিসিন সীস্তেম্না মাইকৈ য়াম্বা খোঙথাং কয়া পায়খৎখিবগী খুদম অমা ওইরি”।

“মিৎয়েং শানবা পোলিসী অমসুং দিজিতেল ওইবা খোঙথাং কয়ানা তেংবাংদুনা নাৎকী ওইবা থৌওংশিংগা হৌজিক্কী মতমদা চৎনরিবা থৌওংশিংগা পুনশিন্নদুনা, ভারতনা ত্রেদিস্নেল তেলিমেদিসিন পথাপশিংগী খুত্থাংদা য়ুনিভর্সেল হেল্থ কবরেজ (UHC) ফংবগী লম্বী অমা য়াৎখ্রে”, মহাক্না মখা তাখি।

WHO সাউথ ইস্ত এসিয়া রিজনেল সেন্তর্শিপকী হেল্থ সীস্তেম দিভেলপমেন্ত বিভাগকী দাইরেক্তর, শ্রী মনোজ ঝলানীনা সম্মিত অসিনা মীওইবা খুন্নাইগী হকশেল, গ্রহ অসিনা য়াইফনা লৈবা অমসুং তেক্নোলোজীদা চাউখৎলক্লিবা অসিগী মরক্তা লৈনরিবা মরীবু শকখঙদুনা তুংগী চারোন শুরোনশিংগী ওইবা হোলিস্তিক অমসুং হকশেল ফবা মালেম অমা শেম্বগী মাইকৈদা রোদমেপ অমা শেমগনি হায়বগী থাজবা থম্লি হায়না ফোংদোকখি।

শক্নাইরবা ৱাঙাংলোই কয়ানা রিসর্চ, ইভিদেন্স অমসুং লর্নিং; পোলিসী, দেতা অমসুং রেগ্যুলেসন; ইন্নোভেসন অমসুং দিজিতেল হেল্থ; বাইওদাইবর্সিতী, ইকুইতী অমসুং ত্রেদিস্নেল (হেল্থকেয়র) লৌশিং য়াওনা মরু ওইবা ফোকস এরিয়াশিংদা খন্ন-নৈনবগী থৌওং লুচিংদুনা পাংথোক্কনি।

সম্মিত অসিগী অহেনবা মশক থোকপা থৌওং অমনা মালেম শিনবা থুংবা অমসুং আয়ুশ মন্ত্রালয়গী মাইকৈদগী লান্থোকপা মেদিসিনগী নাৎকী ওইবা পথাপ কয়াগী একজিবিসন অসিনা ওইগনি। একজিবিসন অসিনা মালেমগী ত্রেদিস্নেল মেদিসিন খুদিংমক উৎকনি অমসুং ত্রেদিস্নেল মেদিসিনগা মহৌশাগী অকোয়বগী ফিভমফা ‘কলপাব্রিক্সা’গী মওংদা মরী লৈনরিবা অসিগা লোয়ননা WHOগী তোঙান-তোঙানবা রিজনেল সেন্তরশিং অমসুং আয়ূশ মন্ত্রালয়না লুচিংদুনা পুরক্লিবা সাইন্তিফিক অমসুং তেক্নোলোজীগী মায় পাকপশিংসু উৎকনি।

আয়ুশ মন্ত্রালয়গী জোইন্ত সেক্রেতরী, শ্রী রাহুল শর্মনা লান্থোকখিবা য়াম্না কুপ্পা প্রজেন্তেসন অমদা, ‘আয়ুশ ফোর প্লানেতরী হেল্থ অমসুং ৱেলবিয়িং’ হায়বা থীম লোয়নরিবা WHOগী তোঙান-তোঙানবা রিজনেল সেন্তরশিং অমসুং আয়ূশ মন্ত্রালয়গী থৌরম অমসুং একজিবিসন অসিগী মশক থোকপা ৱাফম কয়া তাকখি। একজিবিসন অসিদা আয়ুশকী থবক নীংথিনা তৌবগী মতিক অমসুং মেদিসিনেল প্লান্তকী ইনাক খুল্লবা বাইওদাইবর্সিতী উৎপগা লোয়ননা WHOগী রিজনেল সেন্তরশিংগী মতিক-মগুন্সু উৎকনি। এক্সপেরিএন্স তৌনবা অমসুং ইন্তরেক্তিব ওইবা কাইওস্ক খরসু একজিবিসন অসিগী মনুংদা উৎকনি।

কনভেন্সন সেন্তর মনুংদা য়োগ অমসুং মেদিতেসনগী সেসন অমসু মন্ত্রালয়না শিন্দুনা পাংথোক্কনি। হোতেল ভেন্যুশিংদসু য়োগ অমসুং মেদিতেসনগী সেসন লৈগনি, অমসুং মহাত্মা মন্দির কনভেন্সন সেন্তর অসিদা পাংথোক্কদবা সেসনশিংগী মরক্তসু য়োগ তৌবগী অতেনবা ব্রেক লৈগনি।

ইং 2022দা, WHOনা ভারত সরকারগী তেংবাংগা লোয়ননা গ্লোবেল সেন্তর ফোর ত্রেদিস্নেল মেদিসিন লিংখৎখি। ভারতকী প্রধান মন্ত্রী, শ্রী নরেন্দ্র মোদীনা WHOগী ইকায় খুম্ননীংঙাই ওইরবা দাইরেক্তর-জেনেরেল, দাঃ তেদ্রোস অধানোম ঘেব্রেসিয়স য়াওবা থৌরম অমদা সেন্তর অসিগী উরেপ উয়ুং তমখি। সেন্তর অসি ভারতকী আয়ুশ মন্ত্রালয় অমসুং ৱর্ল্দ হেল্থ ওর্গনাইজেসন (WHO)গী অপুনবা প্রোজেক্তনি অমসুং ত্রেদিস্নেল মেদিসিনগী মালেমদা লৈবা অহানবা অমসুং অমত্তা ঙাইরবা মালেমগী আউতপোস্ত অমনি। WHO GCTMনা ত্রেদিস্নেল মেদিসিনগা মরী লৈনবা মালেমগী হকশেলগী ৱাফম খুদিং লুচিংগনি অমসুং ত্রেদিস্নেল মেদিসিন রিসর্চ, প্রেক্তিস অমসুং পব্লিক হেল্থকা মরী লৈনবা পোলিসী শেম্বদা মেম্বর লৈবাকশিংদা তেংবাংগনি। মশক থোকপা খোঙথাং অমা ওইনা, ত্রেদিস্নেল মেদিসিনগী মালেমগী সম্মিতকী মওংদা মীয়াম্না খৌরাংনা ঙাইনদুনা লাক্লবা থৌরম অসি হন্দক্কী চহিদা পাংথোক্লিবনি।

*******