କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ତଥା ସମବାୟ ମନ୍ତ୍ରୀ ଶ୍ରୀ ଅମିତ ଶାହା ଆଜି ଲୋକସଭାରେ ଭାରତୀୟ ନ୍ୟାୟ ସଂହିତା ବିଧେୟକ ୨୦୨୩, ଭାରତୀୟ ନାଗରିକ ସୁରକ୍ଷା ସଂହିତା ବିଧେୟକ ୨୦୨୩ ଏବଂ ଭାରତୀୟ ସକ୍ଷମ ବିଧେୟକ ୨୦୨୩ ଆଗତ କରିଛନ୍ତି।

ଶ୍ରୀ ଅମିତ ଶାହା କହିଥିଲେ ଯେ ଆଜି ଆଜାଦୀ କା ଅମୃତ ମହୋତ୍ସବ ଶେଷ ହେଉଛି ଏବଂ ଅମୃତ କାଳ ଆରମ୍ଭ ହେଉଛି । ଅଗଷ୍ଟ ୧୫ରେ ଆଜାଦୀ କା ଅମୃତ ମହୋତ୍ସବ ଶେଷ ହେବ ଏବଂ ସ୍ୱାଧୀନତାର ୭୫ରୁ ୧୦୦ ବର୍ଷର ଯାତ୍ରା ଅଗଷ୍ଟ ୧୬ରୁ ଆରମ୍ଭ ହେବ, ଯାହା ଏକ ମହାନ ଭାରତ ଗଠନ କରିବ । ସେ କହିଛନ୍ତି ଯେ ଅଗଷ୍ଟ ୧୫ ତାରିଖରେ ଲାଲକିଲ୍ଲା ପ୍ରାଚୀରରୁ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ତାଙ୍କ ଅଭିଭାଷଣରେ ପଞ୍ଚ ପ୍ରାଣକୁ ଦେଶବାସୀଙ୍କ ସମ୍ମୁଖରେ ରଖିଥିଲେ, ସେଥିମଧ୍ୟରୁ ଗୋଟିଏ ହେଉଛି ଗୋଲାମୀର ସମସ୍ତ ଚିହ୍ନକୁ ଶେଷ କରିବା । ସେ କହିଛନ୍ତି ଯେ ଆଜି ଆଗତ ହୋଇଥିବା ଏହି ତିନୋଟି ବିଧେୟକ ମୋଦୀଜୀଙ୍କ ଦ୍ୱାରା ନିଆଯାଇଥିବା ପାଞ୍ଚଟି ସଂକଳ୍ପ ମଧ୍ୟରୁ ଗୋଟିଏକୁ ଏକ ପ୍ରକାରରେ ପୂରଣ କରୁଛି । ଏହି ତିନୋଟି ବିଧେୟକରେ ଅପରାଧିକ ନ୍ୟାୟ ବ୍ୟବସ୍ଥା ପାଇଁ ମୌଳିକ ଆଇନ ରହିଛି। ସେ କହିଛନ୍ତି ଯେ ଆଜି ଆମେ ବ୍ରିଟିଶଙ୍କ ଦ୍ୱାରା ନିର୍ମିତ ଏବଂ ବ୍ରିଟିଶ ସଂସଦଦ୍ୱାରା ପାରିତ ହୋଇଥିବା ଭାରତୀୟ ଦଣ୍ଡ ବିଧି ସଂହିତା, ୧୮୬୦, କ୍ରିମିନାଲ ପ୍ରୋସିଜର କୋଡ୍, (୧୮୯୮), ୧୯୭୩ ଏବଂ ଭାରତୀୟ ପ୍ରମାଣ ଆଇନ, ୧୮୭୨ରେ ଉଚ୍ଛେଦ କରି ତିନୋଟି ନୂତନ ଆଇନ ଆଣିଛୁ । ଭାରତୀୟ ଦଣ୍ଡବିଧି ସଂହିତା, ୧୮୬୦ ବଦଳରେ ଭାରତୀୟ ନ୍ୟାୟ ସଂହିତା ବିଧେୟକ, ୨୦୨୩, କ୍ରିମିନାଲ ପ୍ରୋସିଜର କୋଡ୍ ୧୮୯୮ ବଦଳରେ ଭାରତୀୟ ନାଗରିକ ସୁରକ୍ଷା ସଂହିତା ବିଧେୟକ ୨୦୨୩ ଏବଂ ଭାରତୀୟ ପ୍ରମାଣ ଆଇନ ୧୮୭୨ ବଦଳରେ ଭାରତୀୟ ସାକ୍ଷୀ ବିଧେୟକ ୨୦୨୩ ଲାଗୁ ହେବ । ବ୍ରିଟିଶ ଶାସନକୁ ସୁଦୃଢ଼ ଓ ସୁରକ୍ଷା ଦେବା ପାଇଁ ଏହି ତିନୋଟି ଆଇନକୁ ବଦଳାଯିବ ଏବଂ ଏହାର ଉଦ୍ଦେଶ୍ୟ ଥିଲା ଦଣ୍ଡ ଦେବା, ନ୍ୟାୟ ଦେବା ନୁହେଁ । ଆମେ ଏହି ଦୁଇଟି ମୌଳିକ ଦିଗରେ ପରିବର୍ତ୍ତନ ଆଣିବାକୁ ଯାଉଛୁ । ଏହି ତିନୋଟି ନୂଆ ଆଇନର ଆତ୍ମା ହେବ ଭାରତୀୟ ନାଗରିକମାନଙ୍କୁ ସମ୍ବିଧାନ ଦ୍ୱାରା ଦିଆଯାଇଥିବା ସମସ୍ତ ଅଧିକାରର ସୁରକ୍ଷା କରିବା । ଏହାର ଉଦ୍ଦେଶ୍ୟ କାହାକୁ ଦଣ୍ଡ ଦେବା ନୁହେଁ ବରଂ ନ୍ୟାୟ ଦେବା । ଏହି ପ୍ରକ୍ରିୟାରେ ଅପରାଧ ନିବାରଣ ଭାବନା ସୃଷ୍ଟି କରିବା ପାଇଁ ଯେଉଁଠାରେ ଆବଶ୍ୟକ ସେଠାରେ ଦଣ୍ଡ ଦିଆଯିବ ।

କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ଲୋକସଭାରେ ଆଶ୍ୱାସନା ଦେଇଥିଲେ ଯେ ୧୮୬୦ରୁ ୨୦୨୩ ପର୍ଯ୍ୟନ୍ତ ଭାରତର ଅପରାଧିକ ନ୍ୟାୟ ବ୍ୟବସ୍ଥା ବ୍ରିଟିଶ ସଂସଦ ଦ୍ୱାରା ପ୍ରସ୍ତୁତ ଆଇନ ଆଧାରରେ ପରିଚାଳିତ ହେଉଥିଲା, କିନ୍ତୁ ବର୍ତ୍ତମାନ ଏହି ତିନୋଟି ଆଇନ ବଦଳରେ ଭାରତୀୟ ଆତ୍ମା ଅନୁରୂପ ନୂତନ ଆଇନ ପ୍ରଣୟନ କରାଯିବ, ଯାହା ଆମର ଅପରାଧିକ ନ୍ୟାୟ ବ୍ୟବସ୍ଥାରେ ଏକ ବଡ଼ ପରିବର୍ତ୍ତନ ଆଣିବ । ସେ କହିଛନ୍ତି ଯେ ବର୍ତ୍ତମାନର ଆଇନରେ ହତ୍ୟା କିମ୍ବା ମହିଳାଙ୍କ ବିରୋଧରେ ଅପରାଧ ଭଳି ଜଘନ୍ୟ ଅପରାଧକୁ ବହୁତ କମ୍ ରଖାଯାଇଛି ଏବଂ ସରକାରୀ ଅଧିକାରୀଙ୍କ ଉପରେ ଦେଶଦ୍ରୋହ, ଡକାୟତି ଓ ଆକ୍ରମଣ ଭଳି ଅପରାଧକୁ ଏହାଠାରୁ ଅଧିକ ରଖାଯାଇଛି। ସେ କହିଥିଲେ ଯେ ଆମେ ଏହି ଆଭିମୁଖ୍ୟକୁ ବଦଳାଉଛୁ ଏବଂ ଏହି ନୂତନ ଆଇନର ପ୍ରଥମ ଅଧ୍ୟାୟ ମହିଳା ଏବଂ ଶିଶୁଙ୍କ ବିରୋଧରେ ଅପରାଧ ଉପରେ ଆଧାରିତ ହେବ । ଦ୍ୱିତୀୟ ଅଧ୍ୟାୟରେ ହତ୍ୟା/ହତ୍ୟା କାଣ୍ଡ ଓ ମାନବ ଶରୀର ସହ ଅପରାଧ ସମ୍ପର୍କରେ ଆଲୋଚନା କରାଯିବ । ଶାସନ ପରିବର୍ତ୍ତେ ନାଗରିକଙ୍କୁ କେନ୍ଦ୍ରରେ ଆଣିବା ପାଇଁ ଅତ୍ୟନ୍ତ ନୀତିଗତ ନିଷ୍ପତ୍ତି ନେଇ ଆମେ ଏହି ଆଇନ ଆଣିଛୁ।

ଶ୍ରୀ ଅମିତ ଶାହା କହିଛନ୍ତି ଯେ ଏହି ଆଇନ ପ୍ରଣୟନରେ ଏକ ଲମ୍ବା ପ୍ରକ୍ରିୟା ଅନୁସରଣ କରାଯାଇଛି । ସେ କହିଥିଲେ ଯେ ୨୦୧୯ରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆମ ସମସ୍ତଙ୍କୁ ମାର୍ଗଦର୍ଶନ କରିଥିଲେ ଯେ ସମସ୍ତ ବିଭାଗରେ ବ୍ରିଟିଶମାନଙ୍କ ସମୟରେ ପ୍ରସ୍ତୁତ ହୋଇଥିବା ସମସ୍ତ ଆଇନ ଉପରେ ବର୍ତ୍ତମାନର ସମୟ ଆବଶ୍ୟକତା ଅନୁଯାୟୀ ଏବଂ ଭାରତୀୟ ସମାଜର ହିତ ଦୃଷ୍ଟିରୁ ଆଲୋଚନା ଏବଂ ସମୀକ୍ଷା କରାଯିବା ଉଚିତ୍ । ସେ କହିଛନ୍ତି ଯେ ଏହି ଆଇନଗୁଡ଼ିକୁ ତିଆରି କରିବା ପାଇଁ ସବୁଠି ବ୍ୟାପକ ବିଚାର ବିମର୍ଶ କରାଯାଇଛି। ୨୦୧୯ ଅଗଷ୍ଟ ମାସରେ ସେ ସୁପ୍ରିମକୋର୍ଟର ସମସ୍ତ ବିଚାରପତି, ଦେଶର ସମସ୍ତ ହାଇକୋର୍ଟର ମୁଖ୍ୟ ବିଚାରପତି ଏବଂ ଦେଶର ସମସ୍ତ ଆଇନ ବିଶ୍ୱବିଦ୍ୟାଳୟକୁ ଚିଠି ଲେଖିଥିଲେ। ୨୦୨୦ରେ ସମସ୍ତ ସାଂସଦ, ମୁଖ୍ୟମନ୍ତ୍ରୀ, ରାଜ୍ୟପାଳ ଓ କେନ୍ଦ୍ରଶାସିତ ଅଞ୍ଚଳର ପ୍ରଶାସକଙ୍କୁ ଚିଠି ଲେଖାଯାଇଥିଲା। ବ୍ୟାପକ ବିଚାର ବିମର୍ଶ ପରେ ଆଜି ଏହି ପ୍ରକ୍ରିୟା ଆଇନରେ ପରିଣତ ହେବାକୁ ଯାଉଛି। ୧୮ଟି ରାଜ୍ୟ, ୬ଟି କେନ୍ଦ୍ରଶାସିତ ଅଞ୍ଚଳ, ସୁପ୍ରିମ୍ କୋର୍ଟ, ୧୬ଟି ହାଇକୋର୍ଟ, ୫ଟି ନ୍ୟାୟିକ ଏକାଡେମୀ, ୨୨ଟି ଆଇନ ବିଶ୍ୱବିଦ୍ୟାଳୟ, ୧୪୨ ଜଣ ସଂସଦ ସଦସ୍ୟ, ପ୍ରାୟ ୨୭୦ ଜଣ ବିଧାୟକ ଏବଂ ଜନସାଧାରଣ ଏହି ନୂତନ ଆଇନ ସମ୍ପର୍କରେ ସେମାନଙ୍କର ପରାମର୍ଶ ଦେଇଛନ୍ତି। ଶ୍ରୀ ଶାହା କହିଛନ୍ତି ଯେ ୪ ବର୍ଷ ଧରି ଏବିଷୟରେ ଗଭୀର ବ୍ୟାପକ ହୋଇଥିଲା ଏବଂ ସେ ନିଜେ ୧୫୮ଟି ବୈଠକରେ ଉପସ୍ଥିତ ଥିଲେ।

କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ କହିଛନ୍ତି ଯେ ସିଆରପିସିର ସ୍ଥାନ ନେଉଥିବା ଭାରତୀୟ ନାଗରିକ ସୁରକ୍ଷା ସଂହିତା ବିଲରେ ଏବେ ୫୩୩ ଧାରା ରହିବ, ୧୬୦ ଧାରା ପରିବର୍ତ୍ତନ କରାଯାଇଛି, ୯ଟି ନୂଆ ଧାରା ଯୋଡ଼ା ଯାଇଛି ଏବଂ ୯ଟି ଧାରାକୁ ଉଚ୍ଛେଦ କରାଯାଇଛି। ଆଇପିସି ବଦଳରେ ଭାରତୀୟ ନ୍ୟାୟ ସଂହିତା ବିଧେୟକ ଲାଗୁ ହେବ । ଏଥିରେ ପୂର୍ବରୁ ଥିବା ୫୧୧ ଧାରା ପରିବର୍ତ୍ତେ ୩୫୬ ଧାରା ରହିବ । ସେହିପରି ୧୭୫ଟି ଧାରାରେ ସଂଶୋଧନ କରାଯାଇଛି, ୮ଟି ନୂଆ ଧାରା ଯୋଡ଼ାଯାଇଛି ଏବଂ ୨୨ଟି ଧାରା ରଦ୍ଦ କରାଯାଇଛି। ପ୍ରମାଣ ଆଇନ ବା ଏଭିଡେନ୍ସ ଆକ୍ଟର ସ୍ଥାନ ନେଉଥିବା ଭାରତୀୟ ସାକ୍ଷ ବିଲରେ ପୂର୍ବରୁ ଥିବା ୧୬୭ଟି ଧାରା ପରିବର୍ତ୍ତେ ଏବେ ୧୭୦ଟି ଧାରା ରହିବ, ୨୩ଟି ଧାରାରେ ପରିବର୍ତ୍ତନ କରାଯାଇଛି, ୧ଟି ନୂଆ ଧାରା ଯୋଡ଼ାଯାଇଛି ଏବଂ ୫ଟି ରଦ୍ଦ କରାଯାଇଛି।

ଶ୍ରୀ ଅମିତ ଶାହ କହିଥିଲେ ଯେ ଏହି ତିନୋଟି ପୁରୁଣା ଆଇନ ଗୋଲାମୀର ଚିହ୍ନରେ ପରିପୂର୍ଣ୍ଣ ଥିଲା, ସେଗୁଡ଼ିକ ବ୍ରିଟିଶ ସଂସଦରେ ପାରିତ ହୋଇଥିଲା ଏବଂ ଆମେ କେବଳ ଏହାକୁ ଗ୍ରହଣ କରିଥିଲୁ । ଏହି ଆଇନଗୁଡ଼ିକ ବ୍ରିଟେନର ସଂସଦ, ପ୍ରାଦେଶିକ ଆଇନ, କ୍ରାଉନ୍ ପ୍ରତିନିଧିଙ୍କ ବିଜ୍ଞପ୍ତି, ଲଣ୍ଡନ ଗେଜେଟ୍, ଜୁରି ଏବଂ ବ୍ୟାରିଷ୍ଟର, ଲାହୋର ସରକାର, ରାଜ୍ୟଗୋଷ୍ଠୀ ସଂକଳ୍ପ, ବ୍ରିଟେନ ଏବଂ ଆୟର୍ଲାଣ୍ଡ ସଂସଦକୁ ଦର୍ଶାଏ । ଏହି ଆଇନଗୁଡ଼ିକ ମଧ୍ୟରେ ହର୍ ମାଜେଷ୍ଟୀ ଏବଂ ପ୍ରିଭି କାଉନସିଲଙ୍କ ବିଷୟରେ ଉଲ୍ଲେଖ ରହିଛି । ଏହି ଆଇନଗୁଡିକ ଲଣ୍ଡନ ଗେଜେଟରେ କପି ଏବଂ ଏକ୍ସଟ୍ରାକ୍ଟସ୍ ବିଷୟବସ୍ତୁ ଉପରେ ଆଧାରିତ ଥିଲା ଏବଂ ବ୍ରିଟିଶ କ୍ରାଉନର ଅଧିକାର, ଇଂଲଣ୍ଡର ଅଦାଲତ ଏବଂ ମେଜେଷ୍ଟି ଡୋମିନିୟନଗୁଡିକ ମଧ୍ୟ ଏହି ଆଇନଗୁଡିକରେ ଅନେକ ସ୍ଥାନରେ ଉଲ୍ଲେଖ କରାଯାଇଛି । ସ୍ୱରାଷ୍ଟ୍ର ମନ୍ତ୍ରୀ କହିଛନ୍ତି ଯେ ଗୋଲାମୀର ଏହି ୪୭୫ ଟି ଚିହ୍ନକୁ ଶେଷ କରି ଆମେ ଆଜି ନୂଆ ଆଇନ ଆଣିଛୁ । ନୂଆ ଯୁଗକୁ ଏହି ଆଇନ ସହ ଯୋଡ଼ିବାକୁ ଚେଷ୍ଟା କରିଛୁ। ଆମ ଅପରାଧିକ ନ୍ୟାୟ ବ୍ୟବସ୍ଥାରେ ଦୀର୍ଘ ସମୟ ଲାଗିଥାଏ, ନ୍ୟାୟ ଏତେ ବିଳମ୍ବରେ ଦିଆଯାଏ ଯେ ନ୍ୟାୟର କୌଣସି ଅର୍ଥ ନାହିଁ, ଲୋକମାନେ ବିଶ୍ୱାସ ହରାଇଛନ୍ତି ଏବଂ ଅଦାଲତର ଦ୍ୱାରସ୍ଥ ହେବାକୁ ଭୟ କରୁଛନ୍ତି ।

ସ୍ୱରାଷ୍ଟ୍ର ମନ୍ତ୍ରୀ କହିଛନ୍ତି ଯେ ଏହି ଆଇନରେ ଅତ୍ୟାଧୁନିକ ଜ୍ଞାନକୌଶଳକୁ ଅନ୍ତର୍ଭୁକ୍ତ କରାଯାଇଛି। ଇଲେକ୍ଟ୍ରୋନିକ୍ କିମ୍ବା ଡିଜିଟାଲ ରେକର୍ଡ, ଇ-ମେଲ୍, ସର୍ଭର ଲଗ୍, କମ୍ପ୍ୟୁଟର, ସ୍ମାର୍ଟ ଫୋନ୍, ଲାପଟପ୍, ଏସ୍ଏମ୍ଏସ୍, ୱେବସାଇଟ୍, ଡିଭାଇସରେ ଉପଲବ୍ଧ ଲୋକେସନ ପ୍ରମାଣ, ମେଲ୍ ଏବଂ ମେସେଜକୁ ଅନ୍ତର୍ଭୁକ୍ତ କରିବା ପାଇଁ ଦସ୍ତାବିଜର ସଂଜ୍ଞାକୁ ସମ୍ପ୍ରସାରଣ କରାଯାଇଛି । ଫଳରେ ଏସବୁ ପ୍ରମାଣ ଭାବେ କୋର୍ଟରେ ବ୍ୟବହାର କରାଯାଇପାରିବ ଯାହାକି କାଗଜପତ୍ରର ଗଦାରୁ ମୁକ୍ତି ଦେବ। ଏତଲାରୁ କେସ୍ ଡାଏରୀ, କେସ୍ ଡାଏରୀରୁ ଚାର୍ଜସିଟ୍ ଏବଂ ଚାର୍ଜସିଟରୁ ରାୟ ପର୍ଯ୍ୟନ୍ତ ସମଗ୍ର ପ୍ରକ୍ରିୟାକୁ ଡିଜିଟାଇଜ୍ କରିବା ପାଇଁ ଏହି ଆଇନରେ ବ୍ୟବସ୍ଥା କରାଯାଇଛି । ବର୍ତ୍ତମାନ କେବଳ ଭିଡିଓ କନଫରେନ୍ସିଂ ଜରିଆରେ କୋର୍ଟରେ ଅଭିଯୁକ୍ତଙ୍କ ହାଜର ହୋଇପାରିବେ, କିନ୍ତୁ ଏବେ ଜେରା ସମେତ ସମଗ୍ର ଶୁଣାଣି ଭିଡିଓ କନଫରେନ୍ସିଂ ଜରିଆରେ ହେବ। ଅଭିଯୋଗକାରୀ ଓ ସାକ୍ଷୀଙ୍କ ଯାଞ୍ଚ, ବିଚାର ଓ ହାଇକୋର୍ଟ ଶୁଣାଣି ଓ ସମଗ୍ର ଆପିଲେଟ୍ ପ୍ରକ୍ରିୟା ଏବେ ଡିଜିଟାଲ ମାଧ୍ୟମରେ ସମ୍ଭବ ହେବ। ନ୍ୟାସନାଲ ଫରେନସିକ୍ ସାଇନ୍ସ ୟୁନିଭର୍ସିଟୀ ଏବଂ ସମଗ୍ର ଦେଶର ଆଇନଜ୍ଞ ଓ ବୈଷୟିକ ବିଶେଷଜ୍ଞଙ୍କ ସହ ଏହି ବିଷୟରେ ଆଲୋଚନା କରିବା ପରେ ଆମେ ଏହାକୁ ପ୍ରସ୍ତୁତ କରିଛୁ । ତଲାସୀ ଏବଂ ଜବତ ସମୟରେ ଆମେ ଭିଡିଓଗ୍ରାଫି ବାଧ୍ୟତାମୂଳକ କରିଛୁ, ଯାହା ମାମଲାର ଏକ ଅଂଶବିଶେଷ ହେବ ଏବଂ ଏହା ନିରୀହ ନାଗରିକମାନଙ୍କୁ ଫସାଇବାରୁ ରକ୍ଷା କରିବ । ପୁଲିସର ଏଭଳି ରେକର୍ଡିଂ ବିନା କୌଣସି ଚାର୍ଜସିଟ୍ ବୈଧ ହେବ ନାହିଁ।

କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ କହିଛନ୍ତି ଯେ ସ୍ୱାଧୀନତାର ୭୫ ବର୍ଷ ପରେ ମଧ୍ୟ ଆମର ଦୋଷୀ ସାବ୍ୟସ୍ତ ହାର ବହୁତ କମ୍, ସେଥିପାଇଁ ଆମେ ଫରେନସିକ୍ ବିଜ୍ଞାନକୁ ପ୍ରୋତ୍ସାହିତ କରିବା ପାଇଁ କାମ କରିଛୁ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଜାତୀୟ ଫରେନସିକ୍ ବିଜ୍ଞାନ ବିଶ୍ୱବିଦ୍ୟାଳୟ ପ୍ରତିଷ୍ଠା ପାଇଁ ଏକ ଐତିହାସିକ ନିଷ୍ପତ୍ତି ନେଇଛନ୍ତି । ୩ ବର୍ଷ ପରେ ଦେଶକୁ ପ୍ରତିବର୍ଷ ୩୩ ହଜାର ଫରେନ୍ସିକ୍ ବିଜ୍ଞାନ ବିଶେଷଜ୍ଞ ଓ ବୈଜ୍ଞାନିକ ମିଳିବେ । ଏହି ଆଇନରେ ଆମେ ଦୋଷୀ ସାବ୍ୟସ୍ତ ଅନୁପାତକୁ ୯୦ ପ୍ରତିଶତରୁ ଅଧିକ କରିବାକୁ ଲକ୍ଷ୍ୟ ଧାର୍ଯ୍ୟ କରିଛୁ। ଏଥିପାଇଁ ଏକ ଗୁରୁତ୍ୱପୂର୍ଣ୍ଣ ବ୍ୟବସ୍ଥା କରାଯାଇଛି, ଯେଉଁଥିରେ ୭ ବର୍ଷ କିମ୍ବା ତା'ଠାରୁ ଅଧିକ ଦଣ୍ଡନୀୟ ଅପରାଧ ପାଇଁ ଫରେନ୍ସିକ୍ ଟିମର କ୍ରାଇମ୍ ସିନକୁ ଯିବା ବାଧ୍ୟତାମୂଳକ କରାଯିବ। ଏହା ଜରିଆରେ ପୁଲିସ ପାଖରେ ବୈଜ୍ଞାନିକ ପ୍ରମାଣ ରହିବ, ଯାହା ପରେ କୋର୍ଟରେ ଦୋଷୀଙ୍କୁ ଦୋଷମୁକ୍ତ କରିବାର ସମ୍ଭାବନା ଯଥେଷ୍ଟ ହ୍ରାସ ପାଇବ। ୨୦୨୭ ମସିହା ପୂର୍ବରୁ ଦେଶର ସମସ୍ତ ଅଦାଲତକୁ କମ୍ପ୍ୟୁଟରୀକରଣ କରାଯିବ। ସେହିଭଳି ମୋବାଇଲ ଫରେନସିକ୍ ଭ୍ୟାନ୍ ର ଆବଶ୍ୟକତା ମଧ୍ୟ ଅନୁଭୂତ ହୋଇଛି। ଦିଲ୍ଲୀରେ ଆମେ ଏକ ସଫଳ ପରୀକ୍ଷଣ କରିଛୁ - ଏଫ୍ଏସ୍ଏଲ୍ ଟିମ୍ ୭ ବର୍ଷରୁ ଅଧିକ ଦଣ୍ଡର ବ୍ୟବସ୍ଥା ସହ କୌଣସି ଅପରାଧ ସ୍ଥଳ ପରିଦର୍ଶନ କରିଥାଏ। ଏଥିପାଇଁ ଆମେ ଭ୍ରାମ୍ୟମାଣ ଏମଏସଲର ଅବଧାରଣା ବା ମୋବାଇଲ ଏଫ୍ ଏସ୍ ଏଲ୍ ର କନସେପ୍ଟ ଆରମ୍ଭ କରିଛୁ ଯାହା ଏକ ସଫଳ ଅବଧାରଣା ଏବଂ ପ୍ରତ୍ୟେକ ଜିଲ୍ଲାରେ ୩ଟି ମୋବାଇଲ୍ ଏଫ୍ଏସ୍ଏଲ୍ ରହିବ ଏବଂ ଅପରାଧର ଘଟଣାସ୍ଥଳକୁ ଯିବ ।

ଶ୍ରୀ ଅମିତ ଶାହା କହିଛନ୍ତି ଯେ ସ୍ୱାଧୀନତାର ୭୫ ବର୍ଷ ପରେ ପ୍ରଥମ ଥର ପାଇଁ ଆମେ ନାଗରିକଙ୍କ ସୁବିଧା ସୁନିଶ୍ଚିତ କରିବା ପାଇଁ ଜିରୋ ଏଫଆଇଆର ଆରମ୍ଭ କରୁଛୁ । ଯେଉଁଠି ଅପରାଧ ଘଟିଥିବ ସେଠାରେ ନାଗରିକମାନେ ଥାନା ଅଞ୍ଚଳ ବାହାରେ ମଧ୍ୟ ଅଭିଯୋଗ କରିପାରିବେ। ଅପରାଧ ପଞ୍ଜୀକରଣ ହେବାର ୧୫ ଦିନ ମଧ୍ୟରେ ଏହାକୁ ସଂପୃକ୍ତ ଥାନାକୁ ପଠାଇବାକୁ ପଡ଼ିବ । ପ୍ରଥମ ଥର ପାଇଁ ଆମେ ଇ-ଏଫଆଇଆରର ବ୍ୟବସ୍ଥାକୁ ଯୋଡିଛୁ । ପ୍ରତ୍ୟେକ ଜିଲ୍ଲା ଓ ଥାନାରେ ଜଣେ ପୁଲିସ ଅଧିକାରୀଙ୍କୁ ନିଯୁକ୍ତ କରାଯିବ ଯିଏ ଗିରଫ ବ୍ୟକ୍ତିଙ୍କ ପରିବାରକୁ ଅନଲାଇନ ଏବଂ ବ୍ୟକ୍ତିଗତ ଭାବେ ଗିରଫ ବିଷୟରେ ଜଣାଇବେ। ଶ୍ରୀ ଶାହା କହିଛନ୍ତି ଯେ ଯୌନ ହିଂସା ମାମଲାରେ ପୀଡ଼ିତାଙ୍କ ବୟାନ ବାଧ୍ୟତାମୂଳକ କରାଯାଇଛି ଏବଂ ଯୌନ ନିର୍ଯାତନା ମାମଲାରେ ବୟାନର ଭିଡିଓ ରେକର୍ଡିଂକୁ ମଧ୍ୟ ବାଧ୍ୟତାମୂଳକ କରାଯାଇଛି । ପ୍ରଥମେ ୯୦ ଦିନରେ ଏବଂ ତା'ପରେ ପ୍ରତି ୧୫ ଦିନରେ ଅଭିଯୋଗକାରୀଙ୍କୁ ଅଭିଯୋଗର ସ୍ଥିତି ଦେବା ପୋଲିସ ପାଇଁ ବାଧ୍ୟତାମୂଳକ ହେବ । ପୀଡ଼ିତାଙ୍କ କଥା ନ ଶୁଣି କୌଣସି ସରକାର ୭ ବର୍ଷ କିମ୍ବା ତା'ଠାରୁ ଅଧିକ ଜେଲ୍ ଦଣ୍ଡ ମାମଲା ପ୍ରତ୍ୟାହାର କରିପାରିବେ ନାହିଁ, ଏହା ନାଗରିକଙ୍କ ଅଧିକାରର ସୁରକ୍ଷା କରିବ । ଏହି ଆଇନ ଅନୁଯାୟୀ, ପ୍ରଥମ ଥର ପାଇଁ ଆମେ ଗୋଷ୍ଠୀ ସେବାକୁ ଦଣ୍ଡ ସ୍ୱରୂପ ଲାଗୁ କରିବା ପାଇଁ ବ୍ୟବସ୍ଥା ଆଣିଛୁ । କ୍ଷୁଦ୍ର ମାମଲାରେ ସମରି ଟ୍ରାଏଲର ପରିସର ମଧ୍ୟ ବୃଦ୍ଧି କରାଯାଇଛି, ଏବେ ୩ ବର୍ଷ ପର୍ଯ୍ୟନ୍ତ ଦଣ୍ଡନୀୟ ଅପରାଧକୁ ସଂକ୍ଷିପ୍ତ ଶୁଣାଣିରେ ଅନ୍ତର୍ଭୁକ୍ତ କରାଯିବ, କେବଳ ସେସନ୍ସ କୋର୍ଟରେ ୪୦ ପ୍ରତିଶତରୁ ଅଧିକ ମାମଲା ଶେଷ ହେବ। ଚାର୍ଜସିଟ୍ ଦାଖଲ ପାଇଁ ୯୦ ଦିନର ସମୟ ସୀମା ଧାର୍ଯ୍ୟ କରାଯାଇଛି ଏବଂ ପରିସ୍ଥିତିକୁ ଦେଖି କୋର୍ଟ ଆଉ ୯୦ ଦିନ ପାଇଁ ଅନୁମତି ଦେଇପାରିବେ। ତେଣୁ ୧୮୦ ଦିନ ମଧ୍ୟରେ ତଦନ୍ତ ଶେଷ କରି ବିଚାର ପାଇଁ ପଠାଯିବ। ଅଦାଲତ ଏବେ ୬୦ ଦିନ ଭିତରେ ଅଭିଯୁକ୍ତ ବ୍ୟକ୍ତିଙ୍କୁ ଚାର୍ଜସିଟ୍ ପ୍ରସ୍ତୁତର ନୋଟିସ୍ ଦେବାକୁ ବାଧ୍ୟ ହେବେ। ମାନ୍ୟବର ବିଚାରପତିଙ୍କୁ ଯୁକ୍ତି ଶେଷ ହେବାର ୩୦ ଦିନ ମଧ୍ୟରେ ନିଷ୍ପତ୍ତି ଦେବାକୁ ପଡ଼ିବ, ଏହା ଦ୍ୱାରା ବର୍ଷ ବର୍ଷ ଧରି ନିଷ୍ପତ୍ତି ବିଚାରାଧୀନ ଭାବେ ପଡ଼ିରହିବ ନାହିଁ ଏବଂ ୭ ଦିନ ମଧ୍ୟରେ ରାୟକୁ ଅନଲାଇନରେ ପ୍ରକାଶ କରାଯିବ ।

କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ କହିଥିଲେ ଯେ ସରକାରୀ କର୍ମଚାରୀ କିମ୍ବା ପୋଲିସ ଅଧିକାରୀଙ୍କ ବିରୋଧରେ ଶୁଣାଣି ପାଇଁ ଅନୁମତି ଉପରେ ସରକାରଙ୍କୁ ୧୨୦ ଦିନ ମଧ୍ୟରେ ନିଷ୍ପତ୍ତି ନେବାକୁ ପଡିବ, ନଚେତ୍ ଏହାକୁ ଡିମ୍‌ଡ୍‌ ଅନୁମତି ଭାବରେ ବିବେଚନା କରାଯିବ ଏବଂ ଶୁଣାଣି ଆରମ୍ଭ କରାଯିବ । ଆମେ ଆଉ ଏକ ବଡ଼ ବୈପ୍ଳବିକ ପରିବର୍ତ୍ତନ କରିଛୁ, ବର୍ତ୍ତମାନ କାର୍ଯ୍ୟରତ ଏସପି ସେହି ଫାଇଲ୍ ଦେଖିବା ପରେ ସାକ୍ଷ୍ୟ ଦେବେ। ପୂର୍ବରୁ ଥିବା ସଂପୃକ୍ତ ଅଧିକାରୀ ଆସିବାର ଆବଶ୍ୟକତା ରହିବ ନାହିଁ । ଏହାଦ୍ୱାରା ଶୀଘ୍ର ସାକ୍ଷ୍ୟ ପ୍ରଦାନ ସମ୍ଭବ ହେବ ଏବଂ ଶୀଘ୍ର ନ୍ୟାୟ ମଧ୍ୟ ପ୍ରଦାନ କରାଯିବ। ଏହାବ୍ୟତୀତ ଘୋଷିତ ଅପରାଧୀଙ୍କ ସମ୍ପତ୍ତିକୁ ଜବତ କରିବାର ବ୍ୟବସ୍ଥା ମଧ୍ୟ ଆଣିଛୁ। ଆନ୍ତଃରାଜ୍ୟ ଗ୍ୟାଙ୍ଗ ଏବଂ ସଂଗଠିତ ଅପରାଧ ବିରୋଧରେ ବିଭିନ୍ନ ପ୍ରକାର କଠୋର ଦଣ୍ଡର ଏକ ନୂଆ ବ୍ୟବସ୍ଥା ମଧ୍ୟ ଆମେ ଏହି ଆଇନରେ ଯୋଡ଼ିଛୁ। ମହିଳାଙ୍କ ବିରୋଧରେ ଅପରାଧ ଓ ସାମାଜିକ ସମସ୍ୟାର ମୁକାବିଲା ପାଇଁ ଆମେ ଅନେକ ବ୍ୟବସ୍ଥା ମଧ୍ୟ କରିଛୁ। ପ୍ରଥମ ଥର ପାଇଁ ବିବାହ, ଚାକିରି ଓ ପଦୋନ୍ନତିର ମିଥ୍ୟା ପ୍ରତିଶ୍ରୁତି ଆଧାରରେ ଏବଂ ମିଥ୍ୟା ପରିଚୟ ଆଧାରରେ ଯୌନ ସମ୍ପର୍କକୁ ଅପରାଧୀକରଣ କରାଯିବାର ବ୍ୟବସ୍ଥା କରାଯାଇଛି। ଗଣଦୁଷ୍କର୍ମ ମାମଲାରେ ୨୦ ବର୍ଷ କାରାଦଣ୍ଡ କିମ୍ବା ଆଜୀବନ କାରାଦଣ୍ଡର ବ୍ୟବସ୍ଥା କରାଯାଇଛି, ଯାହା ଆଜି ପର୍ଯ୍ୟନ୍ତ କାର୍ଯ୍ୟକାରୀ ହୋଇନାହିଁ। ୧୮ ବର୍ଷରୁ କମ୍ ବୟସର ଝିଅଙ୍କ ସହ ଅପରାଧକ୍ଷେତ୍ରରେ ମଧ୍ୟ ମୃତ୍ୟୁଦଣ୍ଡର ବ୍ୟବସ୍ଥା ରଖାଯାଇଛି। ଭିଡ଼ ହିଂସା ପାଇଁ ୭ ବର୍ଷ, ଆଜୀବନ କାରାଦଣ୍ଡ ଓ ମୃତ୍ୟୁଦଣ୍ଡ ରଖାଯାଇଛି। ମହିଳାଙ୍କଠାରୁ ମୋବାଇଲ ଫୋନ୍ କିମ୍ବା ଚେନ୍ ଲୁଟ୍‌ ପାଇଁ ପୂର୍ବରୁ କୌଣସି ବ୍ୟବସ୍ଥା ନଥିବା ବେଳେ ଏବେ ଏଥିପାଇଁ ବ୍ୟବସ୍ଥା କରାଯାଇଛି।

ଶ୍ରୀ ଅମିତ ଶାହ କହିଥିଲେ ଯେ ପୂର୍ବରୁ ଉଭୟ ଗୁରୁତର ଆଘାତ ଏବଂ ସାମାନ୍ୟ ଆଘାତ ମାମଲାରେ ୭ ବର୍ଷ ଦଣ୍ଡର ବ୍ୟବସ୍ଥା ଥିଲା । ଆମେ ଉଭୟଙ୍କୁ ଅଲଗା କରିଛୁ। ସେ କହିଥିଲେ ଯେ, ସ୍ଥାୟୀ ଭିନ୍ନକ୍ଷମ କିମ୍ବା ବ୍ରେନ୍ ଡେଡ୍ କ୍ଷେତ୍ରରେ ୧୦ ବର୍ଷ କିମ୍ବା ଆଜୀବନ କାରାଦଣ୍ଡର ବ୍ୟବସ୍ଥା କରାଯାଇଛି। ଶିଶୁଙ୍କ ବିରୋଧରେ ଅପରାଧ ପାଇଁ ଦଣ୍ଡ ୭ ବର୍ଷରୁ ୧୦ ବର୍ଷକୁ ବୃଦ୍ଧି କରାଯାଇଛି। ଅନେକ ଅପରାଧରେ ଜରିମାନା ପରିମାଣ ବଢ଼ାଇବାର ବ୍ୟବସ୍ଥା ମଧ୍ୟ କରାଯାଇଛି। ହେପାଜତରୁ ଫେରାର ହୋଇଯାଇଥିବା ଅପରାଧୀଙ୍କ ପାଇଁ ୧୦ ବର୍ଷ ଜେଲ ଦଣ୍ଡର ବ୍ୟବସ୍ଥା ରହିଛି। ରାଜନୈତିକ ଫାଇଦା ପାଇଁ ଅପରାଧ କ୍ଷମା ବ୍ୟବସ୍ଥାକୁ ଅପବ୍ୟବହାର କରିବାର ଅନେକ ମାମଲା ଦେଖିବାକୁ ମିଳିଛି । ଏବେ ମୃତ୍ୟୁଦଣ୍ଡକୁ ଆଜୀବନ କାରାଦଣ୍ଡରେ ପରିବର୍ତ୍ତନ କରାଯାଇପାରିବ । ଆଜୀବନ କାରାଦଣ୍ଡ ସର୍ବନିମ୍ନ ୭ ବର୍ଷ ଏବଂ ସର୍ବନିମ୍ନ ୩ ବର୍ଷକୁ ପରିବର୍ତ୍ତନ କରାଯାଇପାରିବ, କୌଣସି ଦୋଷୀଙ୍କୁ ଛଡାଯିବ ନାହିଁ ।

କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ କହିଛନ୍ତି ଯେ ମୋଦୀ ସରକାର ଦେଶଦ୍ରୋହକୁ ସମ୍ପୂର୍ଣ୍ଣ ଭାବେ ବନ୍ଦ କରିବାକୁ ଯାଉଛନ୍ତି କାରଣ ଭାରତରେ ଗଣତନ୍ତ୍ର ଅଛି ଏବଂ ସମସ୍ତଙ୍କର ମତବ୍ୟକ୍ତ କରିବାର ଅଧିକାର ଅଛି । ପୂର୍ବରୁ ଆତଙ୍କବାଦର କୌଣସି ସଂଜ୍ଞା ନଥିଲା, କିନ୍ତୁ ବର୍ତ୍ତମାନ ଏହି ଆଇନରେ ବିଚ୍ଛିନ୍ନତା, ସଶସ୍ତ୍ର ବିଦ୍ରୋହ, ବିଶୃଙ୍ଖଳାମୂଳକ କାର୍ଯ୍ୟକଳାପ, ବିଚ୍ଛିନ୍ନତାବାଦ, ଭାରତର ଏକତା, ସାର୍ବଭୌମତ୍ୱ ଏବଂ ଅଖଣ୍ଡତାକୁ ଚ୍ୟାଲେଞ୍ଜ କରିବା ଭଳି ଅପରାଧକୁ ପ୍ରଥମ ଥର ପାଇଁ ଏହି ଆଇନରେ ବ୍ୟାଖ୍ୟା କରାଯାଇଛି ଏବଂ ଏହି ଅପରାଧ ସହ ଜଡିତ ବ୍ୟକ୍ତିଙ୍କ ସମ୍ପତ୍ତି ଜବତ କରିବାର ଅଧିକାର ଦିଆଯାଇଛି । ତଦନ୍ତକାରୀ ପୁଲିସ ଅଧିକାରୀଙ୍କ ତତ୍ତ୍ୱାବଧାନରେ କୋର୍ଟ ଏହି ନିର୍ଦ୍ଦେଶ ଦେବେ। ଶ୍ରୀ ଶାହା କହିଛନ୍ତି ଯେ ଅପରାଧୀଙ୍କ ଅନୁପସ୍ଥିତିରେ ବିଚାରକୁ ନେଇ ମୋଦୀ ସରକାର ଏକ ଐତିହାସିକ ନିଷ୍ପତ୍ତି ନେଇଛନ୍ତି। ସେସନ୍ସ କୋର୍ଟ ବିଚାରପତି ଉପଯୁକ୍ତ ପ୍ରକ୍ରିୟା ପରେ ଦୁନିଆରେ ଯେକୌଣସି ସ୍ଥାନରେ ଲୁଚି ରହିଲେ ବି ଅନୁପସ୍ଥିତ ଅବସ୍ଥାରେ ପଳାତକ ଘୋଷିତ ବ୍ୟକ୍ତିଙ୍କୁ ଦଣ୍ଡିତ କରିବାକୁ ଚେଷ୍ଟା କରିବେ। ଏହି ଦଣ୍ଡାଦେଶ ବିରୋଧରେ ଆବେଦନ କରିବା ପାଇଁ ତାଙ୍କୁ ଭାରତୀୟ ଆଇନ ଓ ଅଦାଲତର ଆଶ୍ରୟ ନେବାକୁ ପଡ଼ିବ।

ଶ୍ରୀ ଅମିତ ଶାହା କହିଛନ୍ତି ଯେ ଦେଶର ବିଭିନ୍ନ ଥାନାରେ ବହୁ ସଂଖ୍ୟକ ମାମଲା ସମ୍ପତ୍ତି ପଡ଼ି ରହିଛି, ଭିଡିଓଗ୍ରାଫି ମାଧ୍ୟମରେ ଏହାର ସମାଧାନ କରାଯାଇ ପାରିବ ଏବଂ ଯାଞ୍ଚ କରାଯାଇଥିବା କପି ଅଦାଲତରେ ଦାଖଲ କରାଯାଇପାରିବ। ସେ କହିଛନ୍ତି ଯେ ଏହି ଆଇନରେ ସମୁଦାୟ ୩୧୩ଟି ପରିବର୍ତ୍ତନ କରାଯାଇଛି ଯାହା ଆମ ଅପରାଧିକ ନ୍ୟାୟ ବ୍ୟବସ୍ଥାରେ ବ୍ୟାପକ ପରିବର୍ତ୍ତନ ଆଣିବ ଏବଂ ଯେ କେହି ସର୍ବାଧିକ ୩ ବର୍ଷ ମଧ୍ୟରେ ନ୍ୟାୟ ପାଇପାରିବେ । ଶ୍ରୀ ଶାହା କହିଛନ୍ତି ଯେ ଏହି ଆଇନରେ ମହିଳା ଓ ଶିଶୁଙ୍କ ବିଶେଷ ଯତ୍ନ ନିଆଯାଇଛି, ଅପରାଧୀଙ୍କୁ ଦଣ୍ଡ ମିଳିବା ସୁନିଶ୍ଚିତ କରାଯାଇଛି ଏବଂ ପୋଲିସ ସେମାନଙ୍କ କ୍ଷମତାର ଅପବ୍ୟବହାର ନ କରିବା ପାଇଁ ମଧ୍ୟ ଏଭଳି ବ୍ୟବସ୍ଥା କରାଯାଇଛି। ଗୋଟିଏ ପଟେ ଦେଶଦ୍ରୋହ ଭଳି ଆଇନକୁ ଉଚ୍ଛେଦ କରାଯାଇଥିବା ବେଳେ ଅନ୍ୟପଟେ ଠକେଇ ଓ ଭିଡ଼ ହିଂସା ଭଳି ଜଘନ୍ୟ ଅପରାଧ କରି ମହିଳାଙ୍କୁ ଶୋଷଣ କରିବା ପାଇଁ ଦଣ୍ଡ ବିଧାନ, ସଂଗଠିତ ଅପରାଧ ଓ ଆତଙ୍କବାଦ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।

*******

P.S.