ଆୟୁଷ ପ୍ରଣାଳୀ / ଭାରତୀୟ ଚିକିତ୍ସା ପ୍ରଣାଳୀ ଅଧୀନରେ ଚିକିତ୍ସା ପାଇଁ ବିଦେଶୀ ନାଗରିକଙ୍କ ନିମନ୍ତେ ଆୟୁଷ (ଏୱାଇ) ଭିସା ପ୍ରସ୍ତୁତ କରାଯିବା ସମ୍ପର୍କରେ ଭାରତ ସରକାରଙ୍କ ଗୃହ ମନ୍ତ୍ରଣାଳୟ ପକ୍ଷରୁ ସୂଚନା ପ୍ରଦାନ କରାଯାଇଛି । ଆୟୁଷ ଭିସାର ପ୍ରବର୍ତ୍ତନ ଆୟୁଷ ଚିକିତ୍ସା ପ୍ରଣାଳୀ / ଚିକିତ୍ସା ସମ୍ପର୍କିତ ଯତ୍ନ, କଲ୍ୟାଣ ଏବଂ ଯୋଗ ପରି ଚିକିତ୍ସା ପାଇଁ ଭାରତ ଆସୁଥିବା ବିଦେଶୀମାନଙ୍କ ନିମନ୍ତେ ଏକ ସ୍ୱତନ୍ତ୍ର ଭିସା ଯୋଜନା ପ୍ରବର୍ତ୍ତନ ପ୍ରସ୍ତାବକୁ ପୂରଣ କରେ ।

ଏକ ନୂତନ ଅଧ୍ୟାୟ, ଅର୍ଥାତ୍ ଅଧ୍ୟାୟ ୧୧କ - ଆୟୁଷ ଭିସା ଅଧ୍ୟାୟ ୧୧ - ଭିସା ମାନୁଆଲର ମେଡିକାଲ ଭିସା ପରେ ଅନ୍ତର୍ଭୁକ୍ତ କରାଯାଇଛି , ଯାହା ଭାରତୀୟ ଚିକିତ୍ସା ପ୍ରଣାଳୀ ଅଧୀନରେ ଚିକିତ୍ସା ସହିତ ଜଡିତ ଏବଂ ସେହି ଅନୁଯାୟୀ ଭିସା ମାନୁଆଲ, ୨୦୧୯ ର ବିଭିନ୍ନ ଅଧ୍ୟାୟରେ ଆବଶ୍ୟକୀୟ ସଂଶୋଧନ କରାଯାଇଛି ।

କେନ୍ଦ୍ର ଆୟୁଷ ଏବଂ ବନ୍ଦର, ଜାହାଜ ଚଳାଚଳ ଏବଂ ଜଳପଥ ମନ୍ତ୍ରୀ ଶ୍ରୀ ସର୍ବାନନ୍ଦ ସୋନୋୱାଲ କହିଛନ୍ତି, “ଆୟୁଷ ଚିକିତ୍ସା ପ୍ରଣାଳୀ / ଭାରତୀୟ ଚିକିତ୍ସା ପ୍ରଣାଳୀ ଅଧୀନରେ ଚିକିତ୍ସା ଚାହୁଁଥିବା ବିଦେଶୀ ନାଗରିକ ମାନଙ୍କ ପାଇଁ ଆୟୁଷ (ଏୱାଇ) ଭିସା ପ୍ରସ୍ତୁତ କରିବା ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଅଟେ । ଏହା ଭାରତରେ ଚିକିତ୍ସା ମୂଲ୍ୟଭିତ୍ତିକ ଯାତ୍ରାକୁ ବୃଦ୍ଧି କରିବ । ଏହି ପଦକ୍ଷେପ ଆମର ମାନନୀୟ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କର ଭାରତୀୟ ପାରମ୍ପରିକ ଔଷଧକୁ ଏକ ବିଶ୍ୱସ୍ତରୀୟ ପ୍ରସଙ୍ଗରେ ପରିଣତ କରିବା ପାଇଁ ଆମର ପ୍ରୟାସକୁ ଆହୁରି ମଜଭୁତ କରିବ । ଏକ ସ୍ୱତନ୍ତ୍ର ଆୟୁଷ ଭିସା ଶ୍ରେଣୀ ସୃଷ୍ଟି କରିବାରେ ତାଙ୍କର ଉଦ୍ୟମ ପାଇଁ ମୁଁ କେନ୍ଦ୍ର ଗୃହ ମନ୍ତ୍ରୀ ଶ୍ରୀ ଅମିତ ଶାହଙ୍କୁ ପ୍ରଶଂସା କରିବାକୁ ଚାହୁଁଛି ।”

ଏହା ଉଲ୍ଲେଖଯୋଗ୍ୟ ଯେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ୨୦୨୨ ମସିହା ଏପ୍ରିଲ ମାସରେ ଗୁଜରାଟର ଗାନ୍ଧିନଗର ଠାରେ ବିଶ୍ୱସ୍ତରୀୟ ଆୟୁଷ ନିବେଶ ଏବଂ ନବସୃଜନ ସମ୍ମିଳନୀ (ଜିଏଆଇଆଇଏସ୍‌) ରେ ଆୟୁଷ ଚିକିତ୍ସା ଆବଶ୍ୟକ କରୁଥିବା ବିଦେଶୀ ନାଗରିକ ମାନଙ୍କୁ ଭାରତକୁ ଯାତ୍ରା କରିବା ନିମନ୍ତେ ସୁବିଧା ପ୍ରଦାନ କରିବା ପାଇଁ ଏକ ସ୍ୱତନ୍ତ୍ର ଆୟୁଷ ଭିସା ଶ୍ରେଣୀ ସୃଷ୍ଟି କରିବାକୁ ଘୋଷଣା କରିଥିଲେ ।

ଆୟୁଷ ଭିସା ଶ୍ରେଣୀର ପ୍ରବର୍ତ୍ତନ ହେଉଛି ସରକାରଙ୍କ ହିଲ୍ ଇନ୍ ଇଣ୍ଡିଆ ପଦକ୍ଷେପ ଅନୁଯାୟୀ ଭାରତର ରୋଡମ୍ୟାପର ଏକ ଅଂଶ ବିଶେଷ, ଯାହା ଭାରତକୁ ଚିକିତ୍ସା ମୂଲ୍ୟଭିତ୍ତିକ ଯାତ୍ରା ଗନ୍ତବ୍ୟସ୍ଥଳ ଭାବରେ ପ୍ରୋତ୍ସାହିତ କରିବା ପାଇଁ ଉଦ୍ଦିଷ୍ଟ । ଆୟୁଷ ମନ୍ତ୍ରଣାଳୟ ଏବଂ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟ ମିଳିତ ଭାବେ ବିଶ୍ୱରେ ଭାରତକୁ ଏକ ମେଡିକାଲ ପର୍ଯ୍ୟଟନ ସ୍ଥଳୀ ଭାବରେ ପ୍ରୋତ୍ସାହିତ କରିବା ପାଇଁ ୱାନ୍ ଷ୍ଟପ୍ ହିଲ୍ ଇନ୍ ଇଣ୍ଡିଆ ପୋର୍ଟାଲ୍ ବିକାଶ ପାଇଁ କାର୍ଯ୍ୟ କରୁଛନ୍ତି ।

ଚିକିତ୍ସା ମୂଲ୍ୟଭିତ୍ତିକ ଯାତ୍ରାରେ ନିକଟ ଅତୀତରେ ଭାରତରେ ଉଲ୍ଲେଖନୀୟ ଅଭିବୃଦ୍ଧି ଘଟିଛି । ଗ୍ଲୋବାଲ୍ ୱେଲନେସ୍ ଇନଷ୍ଟିଚ୍ୟୁଟ୍ (ଜିଡବ୍ଲ୍ୟୁଆଇ) ଦ୍ୱାରା ପ୍ରକାଶିତ ‘ଗ୍ଲୋବାଲ୍ ୱେଲନେସ୍ ଇକୋନୋମି : ଲୁକିଂ ବିୟଣ୍ଡ କୋଭିଡ୍‌’ ରିପୋର୍ଟ ଅନୁଯାୟୀ, ବିଶ୍ୱ କଲ୍ୟାଣ ଅର୍ଥନୀତି ବାର୍ଷିକ ୯.୯% ହାରରେ ବୃଦ୍ଧି ପାଇବ । ଆୟୁଷ ଭିତ୍ତିକ ସ୍ୱାସ୍ଥ୍ୟ ସେବା ଏବଂ କଲ୍ୟାଣ ଅର୍ଥନୀତି ୨୦୨୫ ସୁଦ୍ଧା ବୃଦ୍ଧି ପାଇ ୭୦ ବିଲିୟନ ଡଲାରରେ ପହଞ୍ଚିବ ବୋଲି ଆକଳନ କରାଯାଇଛି ।

ଆୟୁଷ ମନ୍ତ୍ରଣାଳୟ ଜାତୀୟ ତଥା ଅନ୍ତର୍ଜାତୀୟ ସ୍ତରରେ ଆୟୁଷ ଚିକିତ୍ସା ପ୍ରଣାଳୀକୁ ପ୍ରୋତ୍ସାହିତ କରିବା ପାଇଁ ଅନେକ ଦିଗ ଉପରେ କାର୍ଯ୍ୟ କରୁଛି । ନିକଟରେ ଆୟୁର୍ବେଦରେ ଚିକିତ୍ସା ମୂଲ୍ୟଭିତ୍ତିକ ଯାତ୍ରା ତଥା ଅନ୍ୟାନ୍ୟ ପାରମ୍ପରିକ ଚିକିତ୍ସା ପ୍ରଣାଳୀରେ ମିଳିତ ଭାବେ କାର୍ଯ୍ୟ କରିବାକୁ ଇଣ୍ଡିଆ ଟୁରିଜିମ୍ ଡେଭଲପମେଣ୍ଟ କର୍ପୋରେସନ୍ (ଆଇଟିଡିସି), ଭାରତ ସରକାରଙ୍କ ପର୍ଯ୍ୟଟନ ମନ୍ତ୍ରଣାଳୟ ମଧ୍ୟରେ ଏକ ବୁଝାମଣାପତ୍ର (ଏମଓୟୁ) ସ୍ୱାକ୍ଷରିତ ହୋଇଛି ।

******

SSP