امور داخلہ اور امداد باہمی کے مرکزی وزیر جناب امت شاہ نے آج لوک سبھا میں کثیر ریاستی کوآپریٹو سوسائٹیز (ترمیمی) بل 2022 پر بحث کا جواب دیا۔ لوک سبھا نے بحث کے بعد بل کو منظور کر لیا۔

لوک سبھا میں بل پر بحث کا جواب دیتے ہوئے امداد باہمی کے وزیر امت شاہ نے کہا کہ وزیر اعظم جناب نریندر مودی کی قیادت میں مرکزی کابینہ نے کثیر ریاستی کوآپریٹو سوسائٹیوں میں شفافیت، جوابدہی اور منافع کو بڑھانے کے لیے اس بل کو منظوری دی ہے۔ انہوں نے کہا کہ اس بل میں الیکشن اتھارٹی کو منصفانہ انتخابات کرانے کے لیے انتخابی اصلاحات کے نفاذ کی شق رکھی گئی ہے اور یہ اتھارٹی الیکشن کمیشن کی طرح طاقتور ہوگی اور اس میں حکومت کی کوئی مداخلت نہیں ہوگی۔ اس کے علاوہ بورڈ میں ایک تہائی آسامیاں پیدا ہونے کی صورت میں خالی آسامیوں پر دوبارہ انتخابات کرانے کا بھی انتظام کیا گیا ہے۔ اس کے ساتھ ساتھ بورڈ کے اجلاسوں میں نظم و ضبط اور کوآپریٹو سوسائیٹیوں کے ہموار کام کرنے کے بھی انتظامات ہیں۔ کمیٹیوں کے چیئرمین، وائس چیئرمین اور ممبران کو 3 ماہ میں بورڈ کا اجلاس بلانا ہوگا۔ انہوں نے کہا کہ کوآپریٹو سوسائٹی کے طرز حکمرانی میں شفافیت لانے کے لیے ایکویٹی شیئر ہولڈرز کو اکثریت دینے کا انتظام کیا گیا ہے۔

جناب امت شاہ نے کہا کہ اس بل میں ایک درج فہرست ذات یا درج فہرست قبائل اور ایک خاتون کو کمیٹیوں میں ریزرویشن فراہم کیا گیا ہے جس سے کمیٹیوں میں ان طبقات کی نمائندگی بڑھے گی۔ انہوں نے کہا کہ مختلف آئینی تقاضوں کی عدم تعمیل بورڈ کے ارکان کی نااہلی کا باعث بن سکتی ہے۔ جناب شاہ نے کہا کہ ملازمین کی بھرتی کے عمل میں خون کے رشتے یا دور کے رشتے میں کسی کو نوکری نہیں دی جائے گی۔ انہوں نے کہا کہ اس بل میں حق اطلاعات کو بھی شامل کیا گیا ہے۔

مرکزی وزیر داخلہ اور امداد باہمی کے وزیر نے کہا کہ اس ایوان سے اس بل کی منظوری کے ساتھ ہی ملک کی تعاون پر مبنی تحریک میں ایک نئے دور کا آغاز ہوگا۔

جناب امت شاہ نے بھی لوک سبھا کو وزیر اعظم جناب نریندر مودی کی قیادت میں امداد باہمی کی وزارت کی طرف سے ملک میں کوآپریٹیو اداروں کو مضبوط بنانے کے لیے اٹھائے گئے مختلف اقدامات کے بارے میں بتایا۔ انہوں نے کہا کہ آزادی کے بعد سے ہی ملک میں کوآپریٹیو سیکٹر سے جڑے سبھی لوگ چاہتے تھے کہ کوآپریٹیو کو مرکزی حکومت کی طرف سے اہمیت دی جائے اور ایک علیحدہ وزارت امداد باہمی کا قیام عمل میں لایا جائے۔ جناب شاہ نے کہا کہ دہائیوں پرانے اس مطالبے کو پورا کرتے ہوئے وزیر اعظم مودی نے امداد باہمی کی ایک الگ وزارت تشکیل دی۔

جناب امت شاہ نے کہا کہ ہندوستان میں کوآپریٹو تحریک تقریباً 115 سال پرانی ہے اور اس تحریک نے ملک کو امول، کربھکو،آئی ایف ایف سی او جیسے کئی اہم ادارے دیئے ہیں، جو آج لاکھوں لوگوں کے لیے روزگار کا ذریعہ ہیں۔ انہوں نے کہا کہ گزشتہ 75 سال میں کوآپریٹیو پر کوئی توجہ نہیں دی گئی اور نہ ہی قومی یا ریاستی سطح پر ملک کی پارلیمنٹ میں اس پر کوئی غور و فکر کیا گیا۔ جناب شاہ نے کہا کہ امداد باہمی کی وزارت کی تشکیل کے بعد اگلے 25 سال میں کوآپریٹو سیکٹر ایک بار پھر ملک کی ترقی میں مضبوطی سے حصہ ڈالے گا۔

امداد باہمی کے مرکزی وزیر نے کہا کہ جناب مودی کی قیادت میں گزشتہ دو سال میں ملک کے کوآپریٹو سیکٹر میں کئی بڑی تبدیلیاں آئی ہیں۔ انہوں نے کہا کہ مرکزی حکومت نے پی اے سی ایس کو بحال کرنے، انہیں قابل عمل اور کثیر جہتی بنانے کے لیے کئی کوششیں کی ہیں۔ انہوں نے کہا کہ وزیر اعظم مودی نے 2500 کروڑ روپے کی لاگت سے ملک بھر میں 63,000 پی اے سی ایس  کے کمپیوٹرائزیشن کا کام کیا ہے۔ اس سے پی اے سی ایس  کے ضلع کوآپریٹو بینکوں، ریاستی کوآپریٹو بینکوں اور نبارڈ کے ساتھ ربط کو یقینی بنایا جائے گا۔ جناب شاہ نے کہا کہ کمپیوٹرائزیشن کے بعد پی اے سی ایس کے آڈٹ کا عمل مکمل طور پر آن لائن ہو جائے گا اور وہ مختلف قسم کے کاروبار کر سکیں گے۔ انہوں نے کہا کہ مودی حکومت نے پی اے سی ایس کے لیے ماڈل بائی لاز تیار کر کے تمام ریاستوں کو بھیجے اور بنگال اور کیرالہ کو چھوڑ کر تمام ریاستوں نے انہیں قبول کر لیا اور آج ملک بھر میں پی اے سی ایس ایک ہی قانون کے تحت چل رہے ہیں۔ جناب شاہ نے کہا کہ اب پی اے سی ایس  ، ایف پی او کا کام بھی کر سکے گا اور 1100 پی اے سی ایس  پہلے ہی ایف پی او کے طور پر رجسٹرڈ ہو چکے ہیں۔

جناب امیت شاہ نے کہا کہ جناب مودی نے ملک کے کروڑوں لوگوں کو گیس سلنڈر دیے ہیں اور اب پی اے سی ایس ایل پی جی کی تقسیم کا کام بھی کر سکے گا۔ اسی طرح جناب مودی ملک کے کروڑوں لوگوں کو مفت اناج دے رہے ہیں اور اب پی اے سی ایس  بھی خوردہ دکانوں کے طور پر کام کر سکے گا۔ اب پی اے سی ایس جنو شدھی کیندروں کو بھی چلا سکے گا اور واٹر کمیٹی کے طور پر کام کر کے پانی کی تقسیم کا کام کر سکے گا۔ انہوں نے کہا کہ جناب مودی نے پی اے سی ایس کو سٹوریج سسٹم سے جوڑ دیا ہے اور اب وہ اسٹوریج میں بھی مصروف رہیں گے۔ جناب شاہ نے کہا کہ اس بجٹ میں جناب مودی نے کوآپریٹیو کے ساتھ برسوں سے کی جارہی ناانصافی کو ختم کیا ہے اور کوآپریٹیو اور کارپوریٹ ٹیکس کو برابری پر لایا ہے۔ انہوں نے کہا کہ مہاراشٹر، گجرات، کرناٹک اور اتر پردیش کے کسان اپنا گنا کوآپریٹو شوگر ملوں کو فروخت کرتے ہیں، لیکن اس پر 30 فیصد انکم ٹیکس لگا دیا گیا۔ انہوں نے کہا کہ وزیر اعظم مودی نے کسانوں کے منافع پر ٹیکس کو مکمل طور پر ختم کر دیا ہے اور یہی نہیں، انہوں نے پہلے ادا کیے گئے ٹیکس کو واپس کرنے کا بھی انتظام کیا ہے۔

مرکزی وزیر داخلہ اور امداد باہمی کے وزیر نے کہا کہ مودی حکومت نے کوآپریٹیو اداروں کو مضبوط کرنے کے لیے 3 نئی کثیر ریاستی سوسائٹیز بنانے کا فیصلہ کیا ہے۔ پہلی سوسائٹی کسانوں کی پیداوار برآمد کرنے کے لیے ایک پلیٹ فارم کے طور پر کام کرے گی۔ دوسری سوسائٹی چھوٹے کسانوں کو بیج کی پیداوار کے ساتھ منسلک کرے گی اور اس کے ذریعے 1 ایکڑ زمین والے کسان بھی بیج کی پیداوار سے منسلک ہو سکیں گے۔ تیسری سوسائٹی کسانوں کو ان کی آرگینک مصنوعات کی ملک اور دنیا بھر میں مارکیٹنگ کرکے ان کی پیداوار کی مناسب قیمت فراہم کرے گی۔ جناب شاہ نے کہا کہ اس کے علاوہ وزیر اعظم جناب نریندر مودی نے بھی آنے والے دنوں میں کوآپریٹو تعلیم کے لیے ایک کوآپریٹو یونیورسٹی قائم کرنے کا فیصلہ کیا ہے۔ نیشنل کوآپریٹو ڈیٹا بیس بھی جلد ہی وزیر اعظم جناب نریندر مودی کے ذریعہ شروع کیا جائے گا۔ انہوں نے کہا کہ 2003 سے 2020 کے درمیان ملک میں کبھی بھی قومی کوآپریٹو پالیسی نہیں تھی، لیکن جناب مودی کی قیادت میں اس سال دیوالی سے پہلے نئی قومی کوآپریٹو پالیسی بنائی جائے گی جو اگلے 25 سالوں کے لیے کوآپریٹیو کا نقشہ ملک کے سامنے رکھے گی۔

جناب امت شاہ نے کہا کہ وزیر اعظم جناب نریندر مودی نے گزشتہ 9 سال میں ملک کے کروڑوں لوگوں کو غربت سے نجات دلانے کی کوشش کی ہے۔ انہوں نے مزید کہا کہ زراعت اور کوآپریٹیو ہی ملک میں روزگار پیدا کرنے کے واحد راستے ہیں اور اس کے لیے وزیراعظم نے امداد باہمی کی ایک الگ وزارت قائم کی ہے۔

بل میں اراکین کے انتخابی عمل میں اصلاحات، معاشرے میں شفافیت لانے، نگرانی کے نظام کو مضبوط بنانے اور کاروبار کرنے میں آسانی جیسے موضوعات کی تفصیلی دفعات ہیں۔

بل میں سوسائٹی کے ارکان میں نظم و ضبط اور پیشہ ورانہ مہارت، بورڈ آف ڈائریکٹرز میں کمزور اور پسماندہ طبقات کی نمائندگی کے حوالے سے بھی دفعات رکھی گئی ہیں۔ بل میں ملازمین کی بھرتی کے عمل میں شفافیت لانے، سنٹرل رجسٹرار کی طرف سے منظور شدہ پینل سے آڈیٹرز کی تقرری اور آڈٹ اور اکاؤنٹس کے مقررہ معیارات کے ذریعے مالیاتی نظم و ضبط لانے جیسے معاملات سے متعلق دفعات بھی شامل ہیں۔

بل میں کنکرنٹ آڈٹ کے ذریعے فوری اصلاحی کارروائی، سوسائٹی کی جعلی اور غیر قانونی سرگرمیوں میں مرکزی رجسٹرار کے نظم و ضبط کی تعمیل، اس کی تشکیل اور اس کے کام کاج اور مالی حالت کی تحقیقات پر بھی زور دیا گیا ہے۔ کاروبار کرنے میں آسانی کو یقینی بنانے کے لیے بل میں رجسٹریشن کے طریقہ کار میں ترمیم، درخواستوں کو تیزی سے نمٹانے اور درخواستوں، دستاویزات، اور ان کی جانچ پڑتال وغیرہ کو الیکٹرانک طور پر جمع کرنے کی دفعات بھی رکھی گئی ہیں۔

اس بل میں حکومت کی پیشگی منظوری کے ساتھ سرکاری حصص کو چھڑانے، کثیر ریاستی کوآپریٹو سوسائٹی کو سننے کا موقع فراہم کرنے کے بعد لیکویڈیشن اور کوآپریٹو بینکوں پر بینکنگ ریگولیشن (بی آر) ایکٹ، 1949 کے نفاذ کا بھی بندوبست کیا گیا ہے۔  

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ش ح۔ م ع۔ع ن

 (U: 7514)