U Myntri Sorkar Pdeng ba dei khmih ia ka Tnat Information and Broadcasting, u Anurag Thakur mynta ka sngi u la pynkup burom da ka khusnam National Community Radio Awards ba 8 bad 9. La pynkup burom da ka khusnam ha ka jingialang plie ia ka Regional Community Radio Sammelan (North) kaba ar sngi kaba la plie da u Myntri Sorkar Pdeng ha Indian Institute of Mass Communication ha New Delhi.

Ha ka jingai jingkren ha ka jingialang u Myntri u la ong ba ki Community Radio Station ki don ka bynta kaba kongsan ban pynurlong ia ka thong jong u Myntri Rangbah duh, u Narendra Modi na ka bynta ka Jan Bhagidari se Jan Andolan. Kine ki station ki kyrshan ia ki sienjam jong ka Akashvani bad ki don ka bynta kaba khraw ban ai jingtip sha ki briew ha ki por ba don ki jingeh.

U Anurag Thakur u la ong ba ki Community Radio Station ki ai ka jingshakri jong ki hapdeng kiba bun ki jingeh ba kynthup ka jingduna nongtrei, ka jingkyrduh pisa bad ka jingduna jingkyrshan bad dei ban ai jingiaroh ia kane ka mynsiem shakri jong ki na ka bynta ka ri. Katba ka jingai ia ki khusnam ka pynshlur ia ki station, u Myntri u la ong, ki ithuh ruh ia ka jingkongsan ka Community Radio ha ka pule puthi, ha ka jingioh jingtip bad ka jingweng ia ki jingeh ha ki jaka kyndong kynshrot jong ka ri. U la pynpaw ka jingkyrmen ba ka jingai khusnam kan pynshlur ia kiwei ban phaikhmat sha kane ka kam.

U Myntri u la kren shaphang ki sienjam jong ka Sorkar na ka bynta ka Jingsuk ban leh ia ki kam khaii pateng ha kane ka bynta bad ong ba ka Sorkar ka la shimkhia ia ki sienjam ban pynduna ka jingshim por ban plie ia kum kine ki community radio station. Katba mynshuwa ban ioh ia ka license ka shimpor bha bad ka rukom ban ioh ia kane ka shimpor kumba saw snem bad ka don haduh khatlai tylli ki kamram ba hap pyndep, mynta pat la pynduna ia kane sha phra tylli ki kamram ba hap pyndep bad ia ka license lah ban ioh hapoh hynriew bnai. U la bynrap ba ka Tnat ka shim baroh ki sienjam ban pynduna shuh shuh ia kane ka por. Ka rukom ban aplai mynta ka la don online ha ka rynsan Broadcast Seva bad ka iasoh bad ka rynsan Saral Sanchar.

U la kren shaphang ka jingpyniar ka jingpoi ka Radio ha India, u Myntri u la ong mynta 80% ka jaka jong ka ri bad palat 90% ka jingdon briew ki ioh ia ka Radio, ka Sorkar ka trei ban pyniar shuh shuh ka jingpoi ka Radio bad lilam 808 tylli ki channel ha 284 tylli ki nongbah hapoh ka bynta kaba 3 jong ka e-auction kaba long ka sienjam kaba khraw ha kane ka kam.

U Thakur u la ong ba ka jingbun ki Community Radio Station ka pyni ia ka jingkiew ka jong ki. Ka Sorkar India ka trei ban pynurlong ia ka thong jong u Myntri Rangbah duh, u Narendra Modi ba kadei ban don ka Community Radio station ha man ka distrik bad ia kane dei ban buh kawei ha man ka Block.

Haba ai jingkren halor ka jingdonkam ia ka bynta ka rynsan ban wanrah lang ia ki jingshem jong kine ki Community Radio Station, u Thakur u la ong ba ki jingpyrshang bad ki jingsaindur thymmai ha ki kam ai jingshakri ia ka imlang sahlang da kine ki radio station ki dang iaid marwei. U la pynpaw ka jingkyrmen ba lah ban thaw ia ka network ha kaba kine ki station kin lah ban iasam ia ki buit bad ki jingshem jong ki khnang ba yn lah ban pyndonkam ia ki rukom treikam ba bha tam ha kylleng ka ri. U la ong ba ka imlang sahlang ka lah ban tei ia ka bor kaba khlain na ki jingmut ba ioh na kine ki steshon.

U Myntri u la ai khublei ia ka kynhun ki nongbishar ban ai ia ki khusnam na ka bynta ka jingnohsynniang jong ki bad ai khublei ia ki nongjop da kaba kdew kyrpang ia ka steshon kaba la ioh ia ka khusnam jong ka bynta ba 8 bad 9 da kaba ong ba kane kalong ka jingithuh ia ka jingtbit jong ka ha ka kam.

Ha ka jingai jingkren hashuwa kane, u Secretary Apurva Chandra, u la ong ba ki lad ai jingtip ki la iaid shaphrang lyngba ka Television bad hadien ka Internet bad mynta ka OTT, hynrei kane kam pat ktah ia ka jingsngewtynnad ki briew ia ka radio. Ka Community Radio ka don ha ka jaka bym pat ktah da kiwei kiwei ki rynsan bad ka pynbiang ia ka jingdonkam na ka bynta ka jingpyniasoh ha ki jaka bym pat poi ki lad katkum ka juk mynta. U la ong shuh shuh ba ka khlam COVID19 ka la khang ban pynlong ka jingai khusnam bad kumta mynta u snem ka Tnat ka la sam ia ka bynta bad 8 bad 9 jong ka National Community Radio Awards.

U la pyntip shuh shuh ha ka jingialang ba ha ki 2 snem ba ladep la iohi ka jingmih palat 120 tylli ki community radio station bad mynta baroh ki don palat 450 tylli bad ki don ruh sa palat 100 tylli ki Letters of Intent bad ka Tnat.

Ki nongjop ia ka khusnam National Community Radio Awards ba 8 bad 9 kadei ka jingithuh ia ki Community Radio Station kiba la trei bha ha kane ka kam, na ka bynta ka bha ka miat jong ki paidbah. Ia kane ka khusnam la ai ha ka Community Radio Regional Sammelan ba la pynlong ha ka jingrakhe ia ka National Broadcasting Day ha ka 23 tarik Naitung 2023.

Na ka bynta ka 9th National Community Radio Awards la ai 12 tylli ki khusnam ha 4 tylli ki thup. Ki Community Radio Station kiba la ioh ia ka khusnam ki dei na ki Jylla jong ka Haryana, Bihar, Odisha, Uttar Pradesh, Uttrakhand, Tamil Nadu, Rajasthan bad Tripura.

Ka Sorkar India ka la sdang ia ka khusnam National Community Radio Awards ban kyntiew ia ka jinpynmih prokram ha ka Community Radio bad pynshlur ia ki Community Radio Station ban pynmih ia ki prokram na ka bynta ka bha ka miat jong ki nongshong shnong ka thain. Ia ka khusnam National Community Radio Awards la ai sha kito ki Community Radio Station kiba la leh ia ka kam kaba khraw ha ka jingai jingshakri lyngba ki prokram kiba phaikhmat sha ka imlang sahlang. La ai ia ki khusnam ha ki thup bapher bapher kiba pynshlur ia ki community radio ba kin shna ia ki prokram halor ki phang bapher bapher. Ka khusnam ka la kyntiew ia ka jing iaineh, ka jingsaindur thymmai bad ka jingiashim bynta ki nongshong shnong.

Ka Community Radio kalong ka bynta kaba kongsan ha ki kam pynmih prokram ha ka radio kaba pher na ka jingpynmih prokram da ki steshon radio paidbah bad ki radio steshon kiba trei na ka bynta ka jingiohnong. Ki steshon community radio ki dei ki steshon ba duna ka jingdonkam bording bad kiba seng bad pyntreikam da ki kynhun kiba don ha ka imlang sahlang.

Ka Community Radio ka plie ka rynsan ia ki nongshong shnong ban pynsngew ia ki jingeh jong ki ba iadei bad ka koit ka khiah, ka bam kaba tei, ka pule puthi, ka rep ka riang bad kiwei kiwei. Ka Community Radio ka don ruh ka lad ban pynkhlain ka jingiashim bynta jong ki briew ha ki prokram ba iadei bad ka roi ka par lyngba ka rukom treikam kaba pura. Ha ka ri kum ka India, ha kaba man ka jylla ka don la ka jong ka ktien ka thylliej bad ka deiriti, ki CRS ki long ruh ki tyllong jong ka put ka tem tynrai bad ka deiriti. Bun ki CRS ki pynneh bad kyntiew ia ki jingrwai tynrai bad ki ai rynsan ia ki nongput nongtem ba kin pyni ia ka sap jong ki sha ka imlang sahlang. Kane ka pynlong ba ki CRS ki long ki nongwanrah ia ka jingkylla ha ka imlang sahlang bad namar kane ki long ka atiar na ka bynta ka jingpynkupbor ia ki briew. Namar ki prokram ki long ha ka ktien tynrai, ki briew ki kloi ban iadei bad sngewthuh ia ki prokram.

Ka Sorkar ka kyrshan ia ki kam Community Radio ha India, ha ka rukom kaba khraw khnang ba kane ka rukom pathai khubor ka poi sha baroh ki briew ha kaba ki lad pathai khubor ki duna. Ka la don ka jingkiew ha ki steshon community radio ha kine ki snem ba la dep. Haduh mynta, ki don haduh 449 tylli ki steshon community radio ha ka ri bad na kine, 70% ki dei ha ki jaka nongkyndong. La ai jingbit ia kumba 100 tylli ki kynhun ba kin seng ia ki steshon community radio. Kane ka pyni ia ka jingieng skhem ka Sorkar na ka bynta ka jingpynkupbor ia ka imlang sahlang bad ka jingwanrah ia ki jingkylla ban kynthup lang ia ki ha ka roi ka par.

Ki khusnam National Community Radio Award ki don lai kyrdan ha kaba kiba wan nongkong ki ioh T 1 Lak, ba ar ki ioh T.  75,000/- bad kiba lai ki ioh T 50,000/. Ia ki jingtip shaphang ki nongjop la ai hangne harum: -

Ki khusnam katkum ki phang

• Ba nyngkong: Radio Mind Tree, Ambala, Haryana; Kyrteng jong ka Programme: Hope Jeene Ki Rah

• Ba ar: Radio Hirakhand, Sambalpur, Odisha; Kyrteng jong ka Programme: Adhar O PoshanBigyan

• Ba lai: Green Radio, Sabour, Bihar; Kyrteng jong ka Programme: PoshanShrinkhla

Most Innovative Community Engagement Awards

• Ba nyngkong Radio SD, Muzaffarnagar, Uttar Pradesh; Kyrteng jong ka programme: Hizra in Between

• Ba ar Kabir Radio, Sant Kabir Nagar, Uttar Pradesh; Kyrteng jong ka Program: Selfie Le Le Re

• Ba lai: Radio Mind Tree, Ambala, Haryana kyrteng jong ka Programme: Book Bugs

Promoting Local Culture Awards

• Ba nyngkong: Voice of SOA, Cuttack, Odisha; Kyrteng jong ka Programme: Asmita

• Ba ar: Friends FM, Tripura, Agartala; Kyrteng jong ka Programme: Revived a dying art: MASK & POT

• Ba lai: PantnagarJanvani, Pantnagar, Uttarakhand; Kyrteng jong ka Program: Dadi Ma Ka Batua

Sustainability Model Awards

• Ba nyngkong: Radio Hirakhand, Sambhalpur, Odisha

• Ba ar: VayalagaVanoli, Madurai, Tamil Nadu

• Ba lai: VAGAD Radio “90.8”, Banswara, Rajasthan