লৈবাক অসিদা মেন্তেল হেল্থ সর্ভিস পীবগী থৌওং মপাঙ্গল লৈহন্নবগীদমক্তা ভারত সরকারনা ওক্তোবর 2022দা হৌদোকখিবা নেস্নেল তেলে মেন্তেল হেল্থ প্রোগ্রাম (রাজ্য শিনবা থুংবগী তেলে মেন্তেল হেল্থ এসিস্তেন্স অমসুং নেতৱর্কিং ওইরিবা তেলে MANAS, ‘দিস্ত্রিক্ত মেন্তেল হেল্থ প্রোগ্রাম’গী দিজিতেল আর্ম) অসিনা মশক থোকপা মায় পাকপা অমা ফংখ্রে। প্রোগ্রাম অসি হেক হৌদোকখিবদগী ঙসি ফাওবদা তোল ফ্রী সর্ভিস অসিনা লৈবাক্কী তোঙান-তোঙানবা মফমশিংদগী কোল 200,000 হেন্না ফংখ্রে, মসিনা লেপ্তনা চাউখৎলকপগী মতৌ অমা উৎলি। কোল লাক্ষ অমা ফংখ্রবা (এপ্রিল 2023) মতুংদা শুপ্নগী থা 3গী মনুংদা কোল মশিং য়াম্না হেনগৎলক্তুনা কোল লাক্ষ 2 য়ৌখি।

কেন্দ্রগী হকশেল মন্ত্রী, দাঃ মনশুখ মন্দাবিয়ানা মহাক্কী ত্বীত অমদা লৈবাক মীয়াম্বু থৌওং অসিগীদমক্তা থাগৎপা ফোংদোকখি।

রাজ্য অমসুং UT 31দা মথৌ তৌরিবা তেলে MANAS সেল 42 হেন্না লৈরি, সর্ভিস অসিনা নোংমদা লোল 20দা কোল 1300+ হেন্না ওক্লি। ত্রেন তৌরবা কাউন্সেল্লর 1900 হেনবনা ফর্স্ত-লাইন সর্ভিস চলায়রি। কোলশিংগী হীরম অয়াম্বদি ৱাখল ৱাবা, তুম্বা নুংঙাইতবা, স্ত্রেস অমসুং এংজাইতীগীনি। কাউন্সেল্লরশিং চাউরাকপা কোল 7000 মুক কোল্বেক তৌদুনা কেয়র পীবগী কাঙলোন মপুং ফাহনখি। স্পেসিএলিস্তকী মথৌ তাবা কোল্লরশিংবু DMHP নত্ত্রগা মনাক নকপা অতোপ্পা হেল্থ কেয়র ফেসিলিতীশিংগুম্বা চুনবা সর্ভিসশিংগা মায় পাক্না পাউ ফাওনহন্দুনা মরী শাগৎপীখি।

পরিক্ষাগী কুমজাদা পরিক্ষাগী স্ত্রেসকা মরী লৈনবা কোল মশিং হেনগৎখি। কোল্লরশিং অসিবু কাউন্সেল্লরশিংনা সপ্পোর্তিব কাউন্সেল্লিং পীদুনা তেংবাংখি, মখোয়দা মশানা মশাবু তেংবাংবা য়াবগী উপাই তাক্তুনা পরিক্ষাদা মশক থোক্না মায় পাকহনখি। তোঙান-তোঙানবা এজুকেসনগী ইন্সতিত্যুৎশিংগী মহৈরোই অমসুং ইনখৎলক্লিবা মীওই কয়াদা য়ৌশিনবা ঙম্নবসু হৌজিক হোৎনরি।

প্রিন্ত মীদিয়া, রেদিও অমসুং সোসিএল মীদিয়াগুম্বা মখল্কয়াগী প্লেতফোর্মগী খুত্থাংদা তেলে MANAS হেন্না খুমাং চাউশিলহন্নবা হোৎনরি। তেলে MANAS অসিনা বেসিক কাউন্সেল্লিং অমসুং মেন্তেল হেল্থ সর্ভিস লেপ্তনা পীরি। হৌজিক লৈরিবা মরু ওইবা সর্ভিস অমসুং রিসোর্সশিংগা মরী লৈনহল্লি অমসুং লাক্কদৌরিবা মতমশিংদা ই-সঞ্জীবনীগসু ইন্তিগ্রেসন তৌরগনি। তেলে MANASনা থা 9দা কোল লাক্ষ 2 য়ৌদুনা লৈবাক শিনবা থুংবদা পাক চাউরবা দিজিতেল মেন্তেল হেল্থ নেতৱর্ক অমা শেমগৎপগী অচৌবা পান্দম অমগা লোয়ননা চঙশিল্লি অমসুং য়ৌরমদবা মীওইশিংবুস মসিনা য়ৌহনবগী পান্দমসু থম্লি।

লৈবাক অসিদা থেংনরিবা মেন্তেল হেল্থকী ইরাং অসিবু শকখঙলদুনা হকশেল অমসুং য়াইফ য়ুম্বাল মন্ত্রালয়না কেন্দ্রগী বজেত 2022-23দা তেলে MANAS খোঙথাং অসিবু লাউথোকখি। মসিদি কোল্লরশিংগী মশক মমিং লোত্তুনা থম্ন-থম্না মখোয়গী মেন্তেল হেল্থকী মতাংদা তেংবাং লৌবা য়াহনবা অনৌবা খোঙথাং অমনি অমসুং মসিনা মেন্তেল হেল্থকা মরী লৈননা স্তিগমাসু হন্থহল্লি।

ভারতকী নেস্নেল তেলে মেন্তেল হেল্থ প্রোগ্রাম্না কেপাসিতী বিলদিং তৌবগী খোঙথাংশিংগী খুত্থাংদা লৈবাক্কী মেন্তেল হেল্থ ৱর্কফোর্স অমা শেম্বদা মিৎয়েং চঙলি, লোয়ননা, মেন্তেল হেল্থ সর্ভিসশিংবু য়ুম্থোং খুদিং অমসুং মীপুম খুদিংদা লেম্না ফংহল্লি, খুন্নাইগী খ্বাইদগী থাপ্লবা মীওইশিংবুসু মসিনা কোনশিন্নবা পান্দম থম্লি। তেলে MANASনা থা 6তা কোল লাক্ষ 1গী মশিং য়ৌবা ঙমদুনা, ভারত শিনবা থুংবগী অচৌবা দিজিতেল মেন্তেল হেল্থ নেতৱর্ক অমা শেম্বগী পান্দম ফংবগী মাইকৈদা অনৌবা মায় পাকপা অমগসু হাপচিনখ্রে।

তোল ফ্রী হেল্পলাইন নম্বরঃ: 14416 নত্ত্রগা 1-800-891-4416 (কোল্লরশিংনা মশাগী অপাম্বা লোলদা সর্ভিস অসিগী খুদোংচাবা লৌবা য়াগনি)

******