Ka tnat DoNER ka la ai jingiaroh ia artylli ki Public Sector Undertaking, ka NEHHDC bad ka NERAMAC kiba la kiew shaphrang bad ka la ai jingsngewnguh ia u Myntri Rangbah Duh, u Narendra Modi uba ialam lynti bad ai jingkyrshan ia ki kam.

U Myntri Sorkar Pdeng ba dei khmih ia ki tnat Development of North East Region bad Tourism & Culture, u G. Kishan Reddy u la iaroh ruh ia kine artylli ki Public Sector Undertaking kiba treikam hapoh ka tnat DoNER, ka NEHHDC Ltd. bad ka NERAMAC kiba la treikam bha ha kaba iadei bad ka jingseisoh bad ka jingwanrah jingkylla.

Ka North Eastern Handicrafts Handlooms Development Corporation Limited (NEHHDC Ltd.), ka Public Sector Undertaking kaba treikam hapoh ka tnat Development of North East Region, Sorkar India, ka la ioh ia ka khusnam Skoch Silver Prize ha ka thup Governance na ka bynta ki kam jong ka ha kaba iadei bad ka jingshna ia ki tiar bad ka jingthain jain ha ka thain shatei lammihngi.

Ka Skoch Silver Prize ka dei ka khusnam kaba kordor ha ki kam ai jingshakri ka Sorkar bad ka roi ka par ha ka imlang shalang, ka la ithuh ia ka NEHHDC Ltd. Kum ka "Nongwanrah ia ka jingkylla ha ki kam thain jain bad shna tiar ha ka thain shatei lammihngi” namar ki sienjam ban kyntiew bad pynsaphriang ia ki dustur shna tiar bad thain jain jong ka thain shatei lammihngi.

Hapoh ka jingialam jong u Myntri Rangbah Duh, u Narendra Modi, ka corporation ka la don ka bynta kaba khraw ha ka jingpynbiang ia ka rynsan na ka bynta ka roi ka par jong ki nongthain jain bad ki nongshna jingshna na kane ka thain bad ka la don ruh ka bynta kaba khraw ha ka jingpynneh bad ka jingpynsaphriang ia ka deiriti jong kane ka thain, ka jingpynbiang ia ki nongthain jain bad ki nongshna jingshna bad ka jingpynbiang ia ka roi ka par ha ka ioh ka kot bad ka jingpynkupbor ia ki jylla ka thain shatei lammihngi.

Shuh shuh, ka NERAMAC, kaba long sa kawei ka PSU hapoh ka tnat Development of North East Region, ka la kot sha ki mawmer ha kine ki por ba la dep. Kane ka kynhun ka la ioh ia ki jingiohnong bad ka la tam ia ki thong ba la buh da ka Kynhun Myntri Sorkar Pdeng. Ha une u snem, la ai ia ka song khyllie im kaba T. 77.45 klur ia ka NERAMAC bad kane ka la plié lad ia ka jingkiew shaphrang bad ka jingjop jong ka.

Ka NEHHDC Ltd. bad ka NERAMAC ki la treikam bha ha kine ki ar snem ba la dep bad ki la don ka bynta ha ka roi ka par bad ka jingkiew shaphrang jong ka thain shatei lammihngi. Ha ka jingpeit ia ka rukom treikam ki Public Enterprise kaba long man u snem, kine artylli ki PSU jong ka tnat DoNER ki la pyni ia ka jingkiew shaphrang. Ia ka NERAMAC la ai jingithuh hapoh ka thup ‘excellent’ katba ia ka NEHHDC la ai jingithuh hapoh ka thup ‘very good’.

U Myntri Sorkar Pdeng, u G. Kishan Reddy u la iaroh ia ka jingtrei shitom bad ka jingkut jingmut jong ki kynhun na kine ki artylli ki PSU. Kine ki jingjop ki dei ki nuksa jong ka jingkut jingmut ka Sorkar Modi na ka bynta ka roi ka par bad ka jingkyntiew ia ka thain shatei lammihngi, u la ong.

Ka North Eastern Handicrafts Handlooms Development Corporation Limited (NEHHDC Ltd.) ka dei ka kynhun shimet kaba treikam hapoh ka tnat Development of North East Region, Soarkar India. Ka NEHHDC Ltd. ka trei na ka bynta ka jingkyntiew, ka jingpyniaid iew ia ki tiar bad ki jain ba shna da ki briew na ka thain shatei lammihngi, da ka jingpeit bniah ia ki nongshna tiar bad ki nongthain jain.

Ka North Eastern Regional Agricultural Marketing Corporation Limited (NERAMAC) ka dei ka Public Sector Undertaking (PSU) hapoh ka tnat Development of North East Region, jong ka Sorkar India. Ka NERAMAC ka trei ban pynbiang ia ka jingkyrshan ha ka jingpyniaid iew ia ki mar rep bad ki tiar kiba shna na ki mar rep na ka thain shatei lammihngi da ka jingthmu ban kyntiew ia ka kamai kajih jong ki nongrep.

***